Read Talaud TAHIUL᷊E 11 Bible Online

TAHIUL᷊E 11 - Talaud bible

TAHIUL᷊E 11

¹“Pandangngute MAWU Ruatanu, wuṛṛu paatuṛṛutte al᷊awo'u parenta-Ne.

²Naungete orassa indi apan niasingkatanni yamiu ola'u MAWU, su wuassu al᷊o'engngu pabbiaṛṛannu. Manga anangngu taambe asingkatta su ola'u pabbiaṛṛanna udde. Ete i yamiu apan sidutu ual᷊ellega awawantugu MAWU Ruatanu, atatohan-Ne wuṛṛu taṛṛino-Ne

³wuṛṛu manga al᷊aṛṛindu'a apan niolang-Nge. I yamiu naasilo sassane apa niolang-Nge su saruannu ratun Mesir wuṛṛu su ahewallu wanuane.

⁴I yamiu naasilo ereapa MAWU namate tantaran Mesir suadio'a ringannu anambon awal᷊o wuṛṛu keretan pangalone. I mangitou sarangkanambone niwontolla su Tahal᷊oangngu Gelagah su tempo ta'e mangngenggenna si yamiu.

⁵I yamiu masingkatta apa niola'u MAWU si yamiu su wadda'a tantal᷊anna i yamiu taambe na'oma isindi.

⁶I yamiu lai maanaungnga apa niola'u MAWU si Datan wuṛṛu si Abiram, manga ana'i Eliab wuassu ṛuanganni Ruben. Su saruanni yamiu sarangkanambone, runia napesangnga ana see nangallupa si mangitou sangkamonanna, rasanna, anambon allangnga wuṛṛu winatangngi mangitou.

⁷Ore, ete i yamiu apan ringannu mata wuṛṛu puanu sasane buatte naasilo anambon al᷊aṛṛindu'a apan niola'u MAWU.”

⁸“Paatuṛṛutte anambon tita apan ta'u niapasingkatta si yamiu allo indi, ya'u wotongnge lumewessa sal᷊ukka wuṛṛu maasutta watukku wanua apan tate malannu lai atanaanni yamiu.

⁹Wuṛṛu i yamiu sarun mabbiakka mal᷊annu su wanua apan ala wuṛṛu masuwukka, apan pina'iren MAWU su iupungngu al᷊amonanu wuṛṛu su papapulunni mangitou.

¹⁰Wanua apana tanaanni yamiu udde wal᷊ine ere su Mesir, su tampa dorone i yamiu uatana'a. Poiaroddi yamiu ṛinone mammanara mawakkata mapa'elekku ua'e su manga wailla napawe i yamiu mangasi'en bualanna.

¹¹Arawe wanua apan sarun suttanni yamiu eteudde manga leta'u panenteanna wuṛṛu manga wawal᷊anna; letangnge pangngeleṛṛannu ua'en kuranna.

¹²MAWU Ruatanu mappadul᷊i wanua udde wuṛṛu mallu'adda su al᷊o'engngu tonna.

¹³Nariaddi paatuṛṛutte manga parenta apan ta'u niapasingkata si yamiu allo indi; pandangngute MAWU Ruatanu wuṛṛu pattaṛṛamawute si Tou ringannu ahewallu lal᷊ummu naungngu.

¹⁴Amungkangngu i yamiu ma'ola'a aroddi, ne MAWU sarun manossokku uranna su letangngu su tempone matitimma, napawe i yamiu buatte nangitingnga, wuṛṛu su tempo i yamiu manattakke mangasi'a. Ne i yamiu sarun maatahuanna manambo gandumma, anggore wuṛṛu lanan zaitun,

¹⁵see lai nannal᷊o annu winatangngu. Al᷊awo'u anna apan pappandumanni yamiu sarun nasadiate si yamiu.

¹⁶Imbaṛṛangnga i yamiu iaparau wuassu MAWU wuṛṛu inai massubba wuṛṛu mattaṛṛamawu su manga MAWU waine.

¹⁷Amungkangngu i yamiu lumawangnga parenta udde, MAWU sarun masa'u si yamiu. I Tou sarun tawe manossokku uranna; lettangngu mabbal᷊i mamara-mara maoman sara sasuanna lai tawe mangonggolu wuane. Ne tawe mal᷊annu i yamiu sarun mate su leta'a masuwukka apan nionggolu MAWU si'o.

¹⁸Paanaungete wuṛṛu panutukke manga parenta udde. Wa'isa'a su ta'iakku wuṛṛu reeta'a su pakkannu tadea'u sidutu nanaunganna.

¹⁹Tantiroa'e su al᷊aṛṛanangngu. Pagattoa'a sulal᷊ummu wal᷊en wuṛṛu su liuddu wal᷊en, su tempo mangillol᷊o wuṛṛu su tempo mammanara.

²⁰Woṛṛeta'a su diṛṛi ngaranu wuṛṛu su ngaran soanu.

²¹Ne i yamiu wuṛṛu al᷊aṛṛanangngu uukke mal᷊o'engnga su wanua apan pina'iren MAWU Ruatanu su iupungngu al᷊amonanu. Su al᷊o'engngu ta'e pia langitta su wowon dunia, su al᷊annune udde lai yamiu sarun mabbiakka su leta'a udde.

²²Paatuṛṛutte ringannu maṛṛimadda anambon tita apan ta'u niapaasingkata si yamiu: Pandangngute MAWU Ruatanu, wuṛṛu tuṛṛutte al᷊awo'u parenta-Ne si yamiu, wuṛṛu ṛinone i yamiu sidutu uararingikka si Tou.

²³Ne MAWU sarun mallimbuakka anambon balahanna wuassu saruannu, wuṛṛu i yamiu sarun matana'a su leta'a tatahuanannu manga walahanna apan magewal᷊anna wuṛṛu mattohasanna wuassi yamiu.

²⁴Suapan wageangngu leta'a apan amatanni yamiu sarun mabbal᷊i pussaanu. Letangngu mawannadda wuassu wadda'a su samba'an timukka maddatingngu Panenteannu Libanon su samba'an sawannakka, wuṛṛu wuassu Sal᷊ukku Efrat su samba'an da'i maddatingngu Tahal᷊oangngu Tangngane su samba'an baṛṛatta.

²⁵Su ahewallu wanua udde MAWU Ruatanu sarun ma'ola'a tadea'u manga taumata udde matta'utta su saruannu ere buatte nipa'ire-Ne, na'oman sara tawe saran sangkatou apan botongnge manal᷊are si yamiu.

²⁶Allo indi yamiu wotongnge mamile suwallatu al᷊amatta wuṛṛu wontoga.

²⁷I yamiu sarun al᷊amatanna amungkangngu matuṛṛutta su manga titan MAWU Ruatanu, apan allo indi ta'u niapasingkatta si yamiu.

²⁸Arawe i yamiu sarun bontohanna amungkangngu tawe tumuṛṛutta manga titan MAWU Ruatanu, ewe'e lai tinumal᷊iudda wuṛṛu nassubba paal᷊uanna apan taambe sinumabbanni yamiu.

²⁹Napawe MAWU Ruatanu buatte nangapiddi yamiu sumutta watukku wanua apan sarun atanaanni yamiu sal᷊immurine, al᷊amatta udde ṛinone iwisaran kamiu wuassu Wowon Gerizim wuṛṛu wontoga udde wuassu Wowon Ebal. (

³⁰Wowone darua udde addone su samba'an baṛṛatu Sal᷊ukku Yordan su leta'u taumatan Kanaan apan uatana'a su wawal᷊annu Yordan, uasaruanna watukku waṛṛatta tawe marau wuassu manga aaluanna tampa patataṛṛamawuanna su More maranin soa Gilgal.)

³¹Tate mal᷊annu lai yamiu lumewessa su Sal᷊ukku Yordan wuṛṛu mamanua su leta'a apan nionggolu MAWU Ruatanu si yamiu. Napawe i yamiu buatte naatahuanna leta'a udde wuṛṛu namanua isudde,

³²i yamiu sarun tumuṛṛutta anambon tita apan ta'u niapasingkatta si yamiu allo indi.”