Read Talaud TAHIUL᷊E 12 Bible Online

TAHIUL᷊E 12 - Talaud bible

TAHIUL᷊E 12

¹“Indiwe manga tita apan ṛinone tuṛṛutanni yamiu su al᷊o'engngu pabbiaṛṛannu su wanua apan nionggolu MAWU, Ruatan iupungngu al᷊amonanu.

²Napawe nasuttate su wanua udde i yamiu ṛinone manggohakku manga tampa passubbanna su puiddu manga wowone matanggakka, su manga wuidda wuṛṛu su al᷊ungngu manga aaluanna masindumunna, tampan manga walahanna apan uatana'a isudde massubba manga monganni mangitou.

³Ṛaea'e manga mezbah mangitou wuṛṛu ṛimunsa'a manga diṛṛine watu apan a'antimanni mangitou pia taṛṛinone. Tambuna'a manga hambaranni Asyera, wuṛṛu ṛimunsa'a manga paal᷊uanna sassubbanni mangitou, na'oman sara manga monganna udde tate subbanna lai su tampa udde.

⁴Su tempo i yamiu massubba MAWU Ruatanu, ariewe mattanno ola'u manga taumata udde massubba manga monganni mangitou.

⁵Wuassu ahewallu wageangngu leta'u ṛuangannu Israel, MAWU Ruatanu sarun mamile sambau tampa tadea'u walahanni ite wotongnge rumanta su saruan-Ne wuṛṛu massubba si Tou.

⁶Watukku tampa uddewe i yamiu ṛinone mangapiddu manga sasamba itattambunna see lai manga sasamba waine, manga sasamba sepere mapul᷊o waussu inasaharannu see lai manga sasamba waine, sasamba wawaekka riandinu, sasamban tawe niwata'a wuṛṛu ana'u sapi wuṛṛu ambinga dombanu apan paarorone niasungkangnga.

⁷Isudde lai, su saruannu MAWU Ruatanu, i yamiu suadio'a ringannu amonannu ṛinone umanna wuṛṛu lulluassu inasaharannu apan pia gessine ana waugu nial᷊amatannu MAWU Ruatanu.

⁸Amungkangngu tempo udde rumantate, i yamiu arieten pa'ola'a ere orassa indi. Na'oman sara indi yamiu walate apulun naungngu mattaṛṛamawu,

⁹ana waugu i yamiu taambe naasutta su wanua apan nionggolu MAWU Ruatanu si yamiu, su tampa apan botongnge pamanuanni yamiu ringannu matammuda.

¹⁰Napawe i yamiu buatte nilumewessa Sal᷊ukku Yordan, MAWU Ruatanu sarun mantul᷊ungngi yamiu matana'a wuṛṛu mamanua su leta'a samba'an sal᷊ukka udde. I Tou sarun mallu'adda si yamiu wuassu al᷊awo'u seetta, wuṛṛu i yamiu sarun mabbiakka ringannu matammamudda wuṛṛu mal᷊uassa.

¹¹Wua'udde MAWU Ruatanu sarun mamile sambau tampa suapa i Tou ṛinone subbanna. Ete isudde i yamiu ṛinone inai mangapiddu al᷊awo'a apan buatte niparenta, eteudde sasamba itattambunna wuṛṛu manga sasamba waine, sasamba sepere mapul᷊o wuassu inasaharannu wuṛṛu sasamba al᷊aṛṛaene apan buatte nipa'irenu su MAWU.

¹²Lallala'e su saruannu MAWU Ruatanu, suadio'a ringannu manga anangngu, manga allangngu wuṛṛu manga taumatan Lewi apan uatana'a su manga soanu, ana waugu taumatan Lewi tawe naasomba wageangngu leta'a su wanuanu.

¹³I yamiu imbaṛṛangnga mangongolu sasambanu su al᷊awo'u tampa apan nipilenu sassane,

¹⁴arawe tumba'u su tampa apan nipilen MAWU suwallatu sambau tampa wageangngu walahannu. Tumba'u isudde i yamiu ṛinone mangonggolu sasamba itattambunna wuṛṛu ma'ola'a manara wal᷊ine apan ta'u niparenta si yamiu.

¹⁵Arawe walate i yamiu mamate winatangngi yamiu wuṛṛu uminassa su al᷊awo'u tampa i yamiu uatana'a. I yamiu wotongnge umanna al᷊awo'u anna apan nionggolu MAWU Ruatanu si i yamiu. Su al᷊awo'u taumata, mawae waresi ara'e marosa, wotongnge uminassa ṛemessa udde, ere lai yamiu wotongnge uminassa ṛemessu kijang ara'e rusa.

¹⁶Tumba'u imbaṛṛangnga daṛṛane inasanna, arawe ṛinone iwoso su leta'a ere namoson ua'e.

¹⁷Su tampa wawanuannu imbaṛṛangnga i yamiu umanna sasamba sepere mapul᷊o wuassu inasaharannu eteudde gandumma, anggore, lanan zaitun, sapi ara'e ambinga dombanu apan paarorone niasungkangnga, sasamba ipamaekka riandinu, sasamba apulun naungngu ara'e sasamba waine.

¹⁸I yamiu wuṛṛu manga anangngu, suadio'a ringannu manga allangngu wuṛṛu manga taumatan Lewi apan utana'a su manga soanu, ṛinone umanna sasamba udde su saruannu MAWU Ruatanu, su tampa apan nipilen MAWU Ruatanu. Wuṛṛu su tampa udde i yamiu ṛinone lulluassa ana waugu al᷊awo'u inasaharannu.

¹⁹Paatehamma tadea'u arie i yamiu ma'oman sara mamalan ṛuanganni Lewi uawala aroddi tantal᷊anna i yamiu mabbiakka su wanua udde.

²⁰Napawe MAWU Ruatanu buatte nanggewalla manga passarannu wanuanu ere buatte niriandi-Ne, i yamiu wotongnge uminassa ṛemessa ringannu walate apulun naungngu.

²¹Amungkangngu tampa apan nipilen MAWU Ruatanu tumaniten marau wuassu tampa atatanaannu, i yamiu wotongnge mamate sapi sambau, domba ara'e ambingnga apan nionggolu MAWU si yamiu, wuṛṛu uminassa ṛemessa su tampanu ringannu walate apulun naungngu, ere lai buatte ta'u niwal᷊o si yamiu.

²²Suapan taumata, mawae i tou waresi ara'e marosa, wotongnge uminassa ṛemessa udde, ere lai yamiu wotongnge uminassa ṛemessu rusa ara'e ṛemessu kijang.

²³Arawe ṛemessa apan ta'e pia daṛṛane tawe wotongnge inasanna, ana waugu niawa udde sulal᷊ummu daṛṛa, wuṛṛu i yamiu tawe wotongnge uminassa niawa suadio'a ual᷊omega ringannu ṛemessa.

²⁴Daṛṛane mangke tawe wotongnge inasanna, arawe ṛinone iwoso su leta'a ere namoson ua'e.

²⁵Amungkangngu i yamiu tumuṛṛutta parenta udde, MAWU sarun mal᷊uassa, wuṛṛu i yamiu see lai papapulunnu sarun su lal᷊umanna'a.

²⁶Al᷊awo'u aonggola wuṛṛu sasamba apan buatte pina'iren kamiu su MAWU, ṛinone iapiddi yamiu watukku tampa apan buatte nipilen MAWU.

²⁷Sasamba itattambunna wuṛṛu sasamba apan a'inasanna ṛamenene ṛinone ionggola su wowon mezbah MAWU Ruatanu wuṛṛu daṛṛane iwoso su wowon mezbah udde.

²⁸Panutukke ringannu mapia al᷊awo'a apan buatte ta'u nirolokka si yamiu, ne i yamiu ma'ola'a apan apianne wuṛṛu ipaapulun MAWU Ruatanu, na'oman sara i yamiu wuṛṛu pappapulunnu masal᷊amatta wuṛṛu su lal᷊umanna'a saran mal᷊annu-l᷊annu.”

²⁹“MAWU Ruatanu sarun mamate manga walahanna apan utana'a su wanua udde, na'oman sara i yamiu wotongnge matana'a wuṛṛu mamanua su wanua udde.

³⁰Napawe manga walahanna udde buatte nipate, paatehampe i yamiu arie ma'oman sara mattanno si mangitou massubba manga MAWU wal᷊ine, ana waugu inolaanna udde mandantan papate.

³¹Lalaghu manga walahanna udde massubba manga mawun mangitou, imbaṛṛangnga tannoanni yamiu ipassubba MAWU Ruatanu, ana waugu i mangitou massubba ringannu manga inolaanna lal᷊eo apan ia'arantinnu MAWU. Ewe'e lai manga ana'i mangitou sassane tutunganni mangitou su wowon mezbah maola'a sasamba su manga MAWU mangitou.

³²Tuṛṛutte sarangkanambone apan ta'u nirolokka si yamiu; arie pattambai ara'e hainganna.