Read Talaud TAHIUL᷊E 13 Bible Online

TAHIUL᷊E 13 - Talaud bible

TAHIUL᷊E 13

¹Amungkangngu sangkatou nabi ara'e taṛṛa wal᷊iawa maddiandin sambau tanda ma'atiangnga ara'e al᷊aṛṛindu'a

²ringannu pandumanna tadea'u i yamiu massubba massuṛṛubawa su manga MAWU apan awagananni yamiu, salaiwe riandine udde mariaddi,

³imbaṛṛangnga ma'ellega si tou. MAWU Ruatanu nappaattu taumata udde ipamono'a si yamiu, ipa'ellega tanne i yamiu atonna-tonna mandangngu MAWU ringannu ahewallu naungngu ara'e tawe.

⁴Taumata ereudde ṛinone i ṛuumanne pateanna, ana waugu apulune mangngal᷊iwun kamiu wuassu lal᷊anna apan nirolokku MAWU Ruatanu si yamiu. Ete i tou udde taumata lal᷊eo ana waugu mandolokki yamiu lullawangnga su saruannu MAWU Ruatanu apan namallossi yamiu waussu Mesir, su tampa i yamiu niola'a allangnga. Nariaddi i tou ṛinone pateanna, tadea al᷊al᷊eo udde masue. Arawe i yamiu uatantalongnga MAWU Ruatanu wuṛṛu mangngaddata si Tou; paddaringikka si Tou wuṛṛu amata'e al᷊awo'u parenta-Ne. Paasidutua'e tatuṛṛutta wuṛṛu pattaṛṛamawu si Tou.

⁶Napawe tuṛṛangngu ara'e anangngu esakka ara'e wawine, ara'e awingnga arangnguannu ara'e hawenu apianne, ringannu mal᷊anna-l᷊annaba massal᷊ongngu massubba manga MAWU waine apan awagananni yamiu wuṛṛu awaganannu al᷊amonanu, manga mawun balahanna apan uatana'a marani ara'e marau,

⁸imbaṛṛangnga maddaringikka si tou imbaṛṛangnga i'o iasal᷊o'i tou. Imbaṛṛangnga lai umakkanna, ara'e manamba'a taumata udde.

⁹I tou ṛinone tuntungannu watu ma'oman sara mate. I'o ṛinone malliu ṛoro mamareta si tou ringannu tatantalongannu anambon tumana'u soa. Taumata apan nassal᷊a udde ṛinone pateanna, ana waugu i tou pia pandumma mapaaraun kamiu wuassu MAWU Ruatanu apan namallosi yamiu wuassu patataṛṛuallanganna su Mesir.

¹¹Ne anambon balahannu Israel sarun maaringikka ola'u pamamate udde wuṛṛu mabbal᷊i mata'utta, ma'oman sara tawe saran sangkatou lai apan baṛṛani ma'ola'a al᷊al᷊eo udde.

¹²Napawe i yamiu matana'e su manga soa apan ionggolu MAWU Ruatanu si yamiu, asinungka tumelengke watti'a

¹³manungku manga pira taumata lal᷊eo wuassu walahannu buatte nangal᷊iwun tumana'u soa massubba manga MAWU apan awagananni yamiu.

¹⁴Amungkangngu maaringikka manga watti'a awusu ereudde, panutukke ringannu mapia-pia. Amungkangngu al᷊al᷊eo udde atonna-tonna mariaddi,

¹⁵ne anambon tumana'u soa udde suadio'a ringannu winatangnga papadul᷊iananne ṛinone pateanna. Soa udde ṛinone ṛimunsaanna lai ma'oman sara masue.

¹⁶Anambon darotongngu tumana'u soa udde ṛinone ihemonna wuṛṛu iombo su leta'a mal᷊alangnga, ana see soa wuṛṛu darotongnge ṛinone tutunganna maola'a sasamba su MAWU Ruatanu. Wua'udde sarangkanambone udde ṛinone itantangnga maola'a tuidda wuṛṛu imbaṛṛangnga olaanna apia.

¹⁷Manga saranapa apan niawontohanna udde tawe wotongnge sahipunna maola'a darotongngu sassane, arawe ṛinone insueanna abbi. Ne asasa'un MAWU umompo'a wuṛṛu i Tou sarun mapal᷊iatta'u tatal᷊antume si yamiu. I Tou sarun mal᷊uassa naung-Nge si yamiu wuṛṛu ma'ola'a si yamiu walahanna apan bahewalla ere buatte niriandi-Ne su al᷊amonanu,

¹⁸sawal᷊iate i yamiu tuttuṛṛutta al᷊awo'u parenta-Ne apan ta'u niwal᷊o si yamiu allo indi, wuṛṛu tumuṛṛutta al᷊awo'a apan ipaapulu-Ne.”