Read Talaud TAHIUL᷊E 14 Bible Online

TAHIUL᷊E 14 - Talaud bible

TAHIUL᷊E 14

¹“Ete i yamiu al᷊aṛṛana'u MAWU Ruatanu. Nariaddi su tempo i yamiu lullal᷊on taumata nate, imbaṛṛangnga mallessa watangannu ara'e mangiṛṛi saruannu puanu ere apan buatte niola'u manga walahanna waine.

²I yamiu uddewe pussa'an MAWU Ruatanu; wuassu al᷊awo'u walahanna su wowon dunia, ete i yamiu apan nipilen MAWU Ruata mabbal᷊i al᷊aṛṛanang-Nge.”

³“Imbaṛṛangnga uminassa winatangnga unnu MAWU udde palli.

⁴I yamiu wotongnge uminassa manga winatangnga indi; sapi, domba, ambinga,

⁵rusa, domban ahuranganna, ambingngu ahuranganna, kijang

⁶wuṛṛu anambon binatangnga apan anuune nawa'a wuṛṛu paarua malluta anna.

⁷I yamiu imbaṛṛangnga uminassa winatangnga apan anuune tawe nawa'a wuṛṛu tawe malluta anna paarua. Arie pa'inassa unta, kelinci ara'e marmot. Winatangnga udde palli ana waugu salaiwe i tou malluta anna paarua, arawe anuune tawe nawa'a.

⁸Arie pa'inassa wawi. Winatangnga udde palli, ana waugu salaiwe anuune nawa'a, i tou tawe malluta anna paarua. Ṛemenne arie pa'inassa, winal᷊unanne tawe wotongnge indinganna.

⁹I yamiu wotongnge uminassa al᷊awo'u inassa apan pia papaidde wuṛṛu onamme.

¹⁰Winatangnga apan mabbiakka sulal᷊ummu ua'e arawe tawe papaidde wuṛṛu tawe onamme udde palli, nariaddi imbaṛṛangnga inasanna.

¹¹I yamiu wotongnge uminassa al᷊awo'u manu'u winalanganna apan tawe ipappalli.

¹²Arawe pia manga pira manu'u winalanganna apan tawe wotongnge inasanna eteudde; manu'a iamba, manu'a mammeo, al᷊awo'u manu'a asiaṛṛe, nasar, gagak, manu'a unta, bal᷊al᷊angnga, blekok wuṛṛu al᷊awo'u manu'a waṛṛoa, undan, manu'a kasawuṛṛu pani'i.

¹⁹Anambon taṛṛangassa apan pia papaidde udde ipappalli, nariaddi imbaṛṛangnga inasanna.

²⁰Winatangnga apan tawe papaidde wuṛṛu tawe ipappalli wotongnge inasanna.

²¹Winatangnga apan nate sassane imbaṛṛangnga inasanni yamiu, arawe wotongnge inasannu taumata raho apan uatana'a suwallati yamiu, ara'e iwal᷊u'a su walahanna raho. I yamiu uddewe al᷊aṛṛana'a apan niaṛṛaen MAWU Ruatanu. Ṛemessu ana'u domba ara'e ana'u ambinga imbaṛṛangnga lahannu ua'en susun inangnge.”

²²“Suapan tonna i yamiu ṛinone manggaingnga sepere mapul᷊o wuassu anambon inasaharannu.

²³Su saruannu MAWU Ruatanu, su tampa apan nipile maola'a tampa patataṛṛamawuanna, i yamiu ṛinone umanna sasamba sepere mapul᷊o wuassu gandumma, ua'e anggore, lanan zaitun see lai ana'u sapi wuṛṛu ambinga dombanu apan paarorone niasungkanga. Ola'e olangnge udde, tadea'u saran mal᷊annu-l᷊annu i yamiu masingkatta mangaddata MAWU Ruatanu.

²⁴Amungkangngu tampa apan nipilen MAWU Ruatanu tumaniten marau wuassu wal᷊enu na'oman sara sepere mapul᷊o wuassu inasaharannu apan ionggolu MAWU Ruatanu si yamiu tawe iapiddi yamiu isudde, ne

²⁵wal᷊ua'e sangkadoanna wuassu wuan letangngu udde wuṛṛu apira'e roinne watukku tampa apan nipilen MAWU Ruatanu.

²⁶Roitta udde pamallia'e saranapa apan ipaapulun kamiu — sapi ara'e ambinga domba, ua'e anggore ara'e ua'e maawu'anna — ana see su tampa udde, su saruannu MAWU Ruatanu, i yamiu wuṛṛu amonannu ṛinone umanna suadio'a wuṛṛu lumala'a.

²⁷Imbaṛṛangnga mamalan taumatan Lewi apa uawanua su manga soanu masusa; naungete manungku i mangitou udde tawe uatahuanna leta'a sassane.

²⁸Suapan panginsueannu tonna atallune, i yamiu ṛinone mangapiddu sepere mapul᷊o wuassu hessin inasaharannu wuṛṛu ammul᷊a'a su manga soanu.

²⁹Anna udde wuattu taumatan Lewi ana waugu i mangitou tawe naatahuanna leta'a, wuṛṛu wuattu taumata raho, asisimpal᷊ussa wuṛṛu manga inawal᷊uanna apan mabbiakka su manga soanu. I mangitou wotongnge rumanta wuṛṛu mangal᷊appa sarangkanambone apan pappandumanni mangitou. Amungkangngu inolaanni yamiu aroddi, ne MAWU Ruatanu sarun mangal᷊amatta al᷊awo'u manaranu.”