Read Talaud TAHIUL᷊E 15 Bible Online

TAHIUL᷊E 15 - Talaud bible

TAHIUL᷊E 15

¹“Suapan panginsueannu tonna appitune ṛinone i yamiu mallaghun pamamaekka awallassa.

²Arendi lal᷊anne. Suapan taumatan Israel apan napawallassu roitta su taumata sambalahanne, ṛinone mamappassa awallassa udde, ana waugu tumuṛṛuttu ṛaṛṛawessu MAWU sassane awallassa udde buatte niwaeṛṛanna, nariaddi tate aroronganna apia.

³I yamiu wotongnge madorongnga roitta apan niapawallasi yamiu su taumata raho, arawe arie madorongnga apia roitta apan napawallasi yamiu su walahanna sambau.

⁴MAWU Ruatanu sarun mangal᷊amatta si yamiu su wanua apan nionggoli Tou si yamiu. Ne suwallatu walahannu tawe taumata asiangnga,

⁵sawal᷊iate i yamiu matuṛṛutta su MAWU Ruatanu, wuṛṛu ringannu maadunna ma'ola'a al᷊awo'u manara apan ta'u irolokka si yamiu allo indi.

⁶MAWU Ruatanu sarun mangal᷊amatta si yamiu ere buatte nipa'ire-Ne. I yamiu sarun mapawallasu roitta su anambon balahannu, arawe i yamiu sassane tawe mabballasa; i yamiu uataṛṛino anambon balahanna, arawe i mangitou tawe taṛṛinone si yamiu.

⁷Napawe i yamiu uatana'e su wanua apan nionggolu MAWU Ruatanu si yamiu, ana see pia sambau soa niaabbaanna taumata sambalahannu pia auranganne, taumatan balahannu pia urangnge, arie tumba'u maṛṛingiddu watangannu sassane wuṛṛu tawe massumbala si tou.

⁸Arawe i yamiu ṛinone masambiolo wuṛṛu mapawallasa su taumata udde anambone ere pappandumanne.

⁹Imbaṛṛangnga tawe mapawallasa si tou ringannu wisara manungku tonna pamamaekka awallasa maranite. Arie mamalan ṛingirannu dal᷊eo udde sumutta sulal᷊ummu naungngu. Amungkangngu i yamiu madiri mapawallasa, taumata udde sarun sumal᷊ande MAWU wuṛṛu mangalaen kamiu, ne i yamiu udde sasagoanne nassal᷊a.

¹⁰Onggol᷊a'e si tou ringannu naungnga mal᷊uassa wuṛṛu tawe iwata'a, ne MAWU Ruatanu sarun mangal᷊amatta al᷊awo'u inasaharannu.

¹¹Su ammul᷊annu taumatan Israel sidutu sarun pia siri pira taumata asiangnga wuṛṛu pia auranganne. Ana waugu udde i ya'u mandolokki yamiu tadea'u masambiolo si mangitou.”

¹²“Amungkangngu sangkatou esakka ara'e wawine wuassu walahannu nabbal᷊u'u watangannen maola'a allangnga, i tou ṛinone mammanara ringannu al᷊annune annumu tonna. Su tonna appitune ṛinone i tou iapasabbangke.

¹³Allangnga apan niapasabbangke udde tawe wotongnge iapaapul᷊e ringannu tawe ul᷊ene.

¹⁴Onggol᷊a'e si tou ringannu naungnga masaṛṛionto'a wuassu saranapa apan nionggolu MAWU Ruatanu si yamiu eteudde ambinga domba, gandumma wuṛṛu anggore.

¹⁵Naungete manungku i yamiu dorone allangnga su Mesir ana see nipallosu MAWU Ruatanu; ana waugu udde i ya'u nangonggolu parenta indi si yamiu.

¹⁶Arawe amungkangngu allangnga udde maddiri mapul᷊e ana i tou marangngu si yamiu wuṛṛu amonannu wuṛṛu mal᷊uassa matana'a suadio'a, ṛingannu,

¹⁷apira'e i tou watukku ngaran bal᷊enu wuṛṛu loṛṛangke tal᷊ingane, ne i tou sarun maola'a allangngu su al᷊o'engngu pabbiaṛṛanne. Aroddi lai olaanna su allangnga wawine.

¹⁸Amungkangngu i yamiu mamallosu sangkatou allangnga, arie i yamiu sumassilla, ana waugu al᷊annune annummu tonna i tou buatte nammanara ringanni yamiu ana see lal᷊antakke tumba'u satengah haddin su sangkatou allangnga. Paatuṛṛutte su parenta udde, ne MAWU Ruatanu sarun mangal᷊amatta al᷊awo'u inasaharannu.”

¹⁹“Ana'u sapi wuṛṛu ambingnga domba apan paaororone nariaddi ṛinone ionggola su MAWU Ruatanu. Sapi udde wotongnge ipaatta iapawol᷊engnga pajeko, wuṛṛu domba udde tawe wotongnge iṛṛianna.

²⁰Suapan tonna i yamiu sangkamonanna ṛinone uminassa ṛemessa su saruannu MAWU Ruatanu, su tampa apan nipilen MAWU.

²¹Arawe amungkangngu winatangnga udde pia sangkulle, ere u'ento ara'e wuta ara'e lai sangkulla wahewalla waine, imbaṛṛangnga ionggoli yamiu su MAWU Ruatanu.

²²Suapan taumata mawae ete waresi ara'e pia salane, wotongnge uminassa su wal᷊ene, ere lai u'inassa ṛemessu rusa ara'e ṛemessu kijang.

²³Daṛṛane imbaṛṛangnga inasanna, arawe ṛinone iwoso su leta'a ere namoson kua'e.”