Read Talaud TAHIUL᷊E 17 Bible Online

TAHIUL᷊E 17 - Talaud bible

TAHIUL᷊E 17

¹Imbaṛṛangnga mangonggolu sapi ara'e domba apan pia sangkule su MAWU Ruatanu, ana waugu i Tou maddantinna.

²Napawe i yamiu maaringikka manungku suwallatu manga soanu pia taumata apan marosa su saruannu MAWU Ruatanu ana waugu nilumawangnga pa'aire

³wuṛṛu parenta-Ne ringannu massubba wuṛṛu massuṛṛubawa su manga MAWU waine ara'e su matannallo, wul᷊anna ara'e manga anumpitanna,

⁴ne i yamiu ṛinone manutukka ringannu maadunna. Unnu wisara al᷊al᷊eo udde atonna-tonna buatte nariaddi su Israel,

⁵taumata apan nassal᷊a ṛinone iapidda su liuddu soa wuṛṛu tuntungannu watu ma'oman sara mate.

⁶Arawe i tou tumba'u wotongnge iṛṛuumanna amungkangu pia ruan katou mattiala ara'e nilumebbe; sangkatou taumata tawe wotongnge iṛṛuumanna pateanna amungkangngu tumba'u sangkatou matatialane.

⁷Manga matatialane ṛinone manuntungu watu paarorone su taumata udde, tatantalongannu anambon tumana'u soa. Ringannu aroddi yamiu mangnginsue al᷊al᷊eo.

⁸Amungkangngu pia ghatto apan tawe iainsue manga mallaṛṛuungnga isudde ana waugu tumaniten masahadda, erenai manga hatton pamamate nipattatudda ara'e tawe nipattatudda, patatiakka su ola'u leta'a ara'e ual᷊alessa awa'a, i yamiu ṛinone inai watukku tampa apan nipilen MAWU Ruatanu.

⁹Apira'e hattonu udde su manga imam Lewi wuṛṛu su mallaṛṛuungnga apan uamanara orassa udde, wua'udde wala'e i mangitou makkawessu hatto udde.

¹⁰Ete i mangitou apan makkawessa, wuṛṛu i yamiu ṛinone manutukka ringannu mapia-pia apa apan iwisaran mangitou si yamiu.

¹¹Sengkampe laṛṛawessi mangitou wuṛṛu amata'e sarangkanambone apan buatte tinantunni mangitou ma'omana sara su inolaanna addio'a lai.

¹²Isai-sai apan waṛṛani lumawangnga mallaṛṛuungnga ara'e imam apan mammanara orassa udde, ṛinone iṛṛuumanna pateanna; ringannu aroddi yamiu manginsue al᷊al᷊eo su Israel.

¹³Anambon taumata sarun maaringikka ola'u arariadianna udde wuṛṛu mata'utta, ma'oman sara tate sangkatou apan ma'ola'a inolaanna aroddi.”

¹⁴“Amungkangngu leta'a apan nionggolu MAWU Ruatanu si yamiu naola'e pussaanu, wuṛṛu i yamiu uatana'e isudde asinungka i yamiu mapulun sangkatou ratu ere lai manga walahanna apan uatana'a su al᷊indongannu.

¹⁵Panutukka paapia-pia, tadea'u taumata apan itenegi yamiu maola'a ratunu, eteudde taumata apan nipilen MAWU Ruatanu. I tou ṛinone sangkatou wuassu walahanna sassane; imbaṛṛangnga mapatenegu sangkatou taumata raho maola'a ratunu.

¹⁶Ratu tawe wotongnge manahuanna awal᷊o manambo ionggola su tantarane wuṛṛu tawe wotongnge mandolokku walahanna indi mabelengnga watukku Mesir huna mamalli awal᷊o, ana waugu MAWU buatte nabbisara manungku alaṛṛanang-Nge tawe wotongnge mabelengnga watukku wanua udde.

¹⁷Ratu tawe wotongnge awingnge manambo, tadea'u i tou tawe tumal᷊iudda MAWU. I tou lai tawe wotongnge maola'a ala ringannu sal᷊a'a wuṛṛu wul᷊awanna.

¹⁸Amungkangngu sangkatou itenega maola'a ratu, i tou ṛinone onggol᷊annu sambau wuke lal᷊oṛṛoannu manga titan Duata apan nial᷊inna wuassu wuke tutune apan sasahipunannu manga imam Lewi.

¹⁹Wuke udde ṛinone sidutu uaraddo maranine, wuṛṛu su al᷊o'engngu pabbiaṛṛanne i tou ṛinone mabbasa tadea'u masingkatta mangaddata MAWU Ruatane wuṛṛu ringannu matuṛṛutta mappaamattu al᷊awo'u parenta apan uawoṛṛetta sulal᷊umme.

²⁰Amungkangngu i tou mabbasa ringannu maṛṛimadda, i tou tawe ma'ellega ete i tou apianne wuassu manga taumata walahanna sambau, wuṛṛu tawe lumawangnga parentan MAWU ringannu al᷊awo'u inolaanna. Ana see i tou wuṛṛu papapulunne sarun mamarenta walahanna udde ma'oman sara pallal᷊awanne.”