Read Talaud TAHIUL᷊E 21 Bible Online

TAHIUL᷊E 21 - Talaud bible

TAHIUL᷊E 21

¹“Amungkangngu su wanua apan nionggolu MAWU Ruatanu si yamiu udde pia taumata apan niasombanganna nate nipate su wawail᷊anna wuṛṛu tawe niasingkattanna isai namate,

²ne piaṛṛangnge wuṛṛu mallaṛṛuungnga ṛinone manguukka araune wuassu tampa winal᷊unanna udde niasombanganna watukku soa maranine.

³Ana see manga timmaddu soa maranine, ṛinone mamile sambau sapi wakku apan taambe nipaatta mammanara.

⁴Sapi udde ṛinone iapiddi mangitou su sambau tampa maranin sal᷊ukka apan tawe mamara wuṛṛu letangnge nipajeko wuṛṛu sinuananna. Isudde i mangitou ṛinone mallatto'a ullekkan binatangnga udde.

⁵Manga imam Lewi ṛinone lai inai isudde, ana waugu i mangitou ṛinone mangonggolu ṛaṛṛawessa sulal᷊ummu hatton pamamate udde. I mangitou nipilen MAWU Ruatanu tadea'u mattaṛṛamawu si Tou wuṛṛu massinaukku al᷊amatta sulal᷊ummu aran-Ne.

⁶Ana see anambon piaṛṛangnge wuassu soa maranine, ṛinone mangukkassa liman mangitou su wowon sapi udde,

⁷wuṛṛu mabbisara, ‘Wal᷊ine yami apan namate taumata udde, wuṛṛu yami wagga isai namate taumata udde.

⁸MAWU, ampungewe Israel, al᷊aṛṛanang-Ngu apan buatte nipallossa wuassu Mesir. Ampungewe yami wuṛṛu arie massunna si yami manungku yami namate taumata apan tawe sal᷊ane udde.’

⁹Ne ringannu tinumuṛṛutta wisara apan nirolokku MAWU, i yamiu tawe aantimanna masingkattu lai pamamate udde.”

¹⁰“Amungkangngu i yamiu mapapangalo wuṛṛu MAWU Ruatanu mangonggolu auntungnga si yamiu, ana see i yamiu manganu atawannu pangalo,

¹¹asinungka suwallati mangitou pia sangkatou wawine maṛṛamaga apan ipaapulunu wuṛṛu olaanna awingngu.

¹²Apira'e wawine udde watukku wal᷊enu. Isudde i tou ṛinone mamol᷊o uta'i tou angnge wuṛṛu manallu anuune,

¹³wuṛṛu mangganti laubba. I tou ṛinone matana'a su wal᷊enu, wuṛṛu lumal᷊on papaten hagurangnge, al᷊annune sambul᷊anna. Wua'udde i'o wotongngete ma'awingngi tou.

¹⁴Amungkangngu su allo sal᷊immurine i'o maddiriten tou lai, i tou wotongngete iapaapul᷊enu ringannu mapia. Tawe wotongnge i tou olaanna ere sangkatou allangnga ara'e iwal᷊ungngu, ana waugu i tou buatte niwata'a matatambanu.”

¹⁵“Unnu wisara pia sangkatou awingnge darua, wuṛṛu iratua pia anangnge esakka, arawe ana'a apan niasungkanga paarorone wal᷊ine ana'a wuassu awingnga arangnguanne.

¹⁶Amungkangngu taumata udde mappulu manantunna, ereapa i tou sarun mattahia pa'a'alane su al᷊aṛṛanangnge, i tou tawe wotongnge manamba'a ana'a wuassu awingnga arangnguanne ringannu mangonggolu wageangnge su ana'a udde apa apan maola'a wageangngu ana'a pahul᷊u.

¹⁷I tou ṛinone mangonggolu wageangnga paarua anambone wuassu pa'a'alane su ana'a esakka pahul᷊une, salaiwe ana'a udde wal᷊ine ana'a wuassu awingnga arangnguanne. Pussaan ana'a pahul᷊u ṛinone a'uannu iamangnge, wuṛṛu su ana'a udde ṛinone onggol᷊annu leta'a apan maola'a pussaane tumuṛṛuttu tita.”

¹⁸“Unnu wisara pia ana'a esakka apan maatikka puane, taṛṛa l᷊awangnga wuṛṛu maddiri irolokku hagurangnge, salaiwe i mangitou buatte naṛṛuumanni tou.

¹⁹Ne hagurangnge ṛinone mangapiddi tou ringannu manga matatimmadu soa su tampa atatanaanni mangitou uatana'a wuṛṛu madorongnga tadea'u ana'a udde parikisanna.

²⁰I mangitou ṛinone mabbisara su matatimmadu soa udde, ‘Ana'i yami indi maattikka puane, apulune lullawangnga wuṛṛu madiri tumuṛṛutta si yami; i tou mangnginsue roitta wuṛṛu taṛṛa wu'anna.’

²¹Ana see manga esakka wuassu soa udde ṛinone manuntungngu watu su ana'a udde ma'oman sara mate. Ringannu aroddi yamiu mangnginsue al᷊al᷊eo udde. Anambon taumatan Israel sarun maaringikka arariadianna udde wuṛṛu mabbal᷊i mata'utta.”

²²“Amungkangngu pia sangkatou buatte niṛṛuumanna nate ana waugu sambau al᷊al᷊eo, wuṛṛu winal᷊unanne niele su tiangnga,

²³winal᷊unanna udde tawe wotongnge iwala isudde su al᷊o'engngu ṛabbi, arawe ṛinone ilabbingnga allo udde lai. Winalunanna apan ua'ele udde, mandantan bontogu MAWU Ruata su wanua udde. Nariaddi, labbinga'e winal᷊unanna udde tadea'u i yamiu tawe mandal᷊eo wanua apan nionggolu MAWU Ruatanu si yamiu.