Read Talaud TAHIUL᷊E 25 Bible Online

TAHIUL᷊E 25 - Talaud bible

TAHIUL᷊E 25

¹Unnu wisara pia darua taumatan Israel inai ringannu mallaṛṛuunga mangalaen sambau hatto, ana see sangkatou tawe niapaasal᷊a wuṛṛu waine niapaasal᷊a.

²Amungkangngu iapa nassal᷊a iṛṛuumanna sambokkanna, mallaṛṛuungnga ṛinone mandolokki tou umaṛṛu'utta. Anambon sasambokka walate wuassu al᷊al᷊eo apan buatte niolangnge,

³arawe tawe wotongnge lumebbe wuassu appatu pul᷊o anambone. Amungkangngu nilumebbe, mangal᷊ene taumata udde niadio'a su saruannu awadaalla.

⁴Imbaṛṛangnga mangganggumma moṛṛongngu sapi apan tantal᷊anna sussappa gandumma.”

⁵“Amungkangngu manga taumata sangkatuṛṛanganna uatana'a su sambau, ana see sangkatou suwallati mangitou nate wuṛṛu tawe ana'a esakka, ne inawal᷊uanne udde tawe wotongnge ma'awingngu taumata waine su liuddu tuṛṛangngu awingnge. Tuṛṛangngu taumata nate udde ṛinone ma'awingngu wawine udde.

⁶Ana'a esakka pahul᷊un mangitou ṛinone ireengnga ana'u tuṛṛangnga apan nate udde, tadea'u i tou pia pangangawanne suwallatu walahannu Israel.

⁷Amungkangngu taumata udde maddiri ma'awingngu wawine inawal᷊uannu tuṛṛangnge, wawine udde ṛinone inai sumaruanna manga tembonannu soa wuṛṛu mabbisara, ‘Ipa'u maddiri ma'awingku, tadea'u tuṛṛangnge pia pangangawanne suwallatu walahannu Israel.’

⁸Ana see manga tembonannu soa mamago taumata udde wuṛṛu maggahatton tou. Amungkangngu i tou mangke maddiri,

⁹awingngu tuṛṛangnge apan nate udde ṛinone mangundanin tou su saruannu manga tembonannu soa, malluatta silopen taumata udde, mangaddu hatine wuṛṛu mabbisara, ‘Arendi ṛinone ola'anna su taumata maddiri mangonggolu pangangawanna su tuṛṛangnge.’

¹⁰Ṛuangannu taumata udde sarun tumelengnga su Israel sasagoanne, ‘Ṛuangannu taumata apan pinalluattanna silopene.’ ”

¹¹“Amungkangngu ruan katou esakka tantal᷊anna uawawul᷊o, wuṛṛu awingngu sangkatou nallal᷊ima nantul᷊ungngu sawane ringannu naṛṛamissa palli ro'appu sawane,

¹²ponggo'e ta'iakku wawine udde wuṛṛu arie umakkanni tou.

¹³Imbaṛṛangnga mallinga ringannu mappaattu timbanganna wuṛṛu supa'a apan tawe suṛṛinone.

¹⁵Pappaatten timbanganna wuṛṛu supa'a apan naṛṛino, tadea'u uukki yamiu mal᷊o'engnga su wanua apan nionggolu MAWU Ruatanu si yamiu.

¹⁶MAWU Ruatanu maddantinnu taumata apan apulune mallinga.”

¹⁷“Naungete ereapa taumatan Amalek na'ola'a si yamiu su tempo i yamiu sulal᷊ummu amatanna sinumabbangnga wuassu Mesir.

¹⁸I mangitou tawe mata'uttu MAWU Ruata wuṛṛu ana see namangalo si yamiu wuassu liudde su tempo i yamiu nal᷊otakke wuṛṛu nallome, ana see namate manga taumatanu apan ringannu masahadda niumamatta su liudde.

¹⁹Ana waugu udde, amungkangngu MAWU Ruatanu buatte nangonggolu wanua udde si yamiu wuṛṛu i yamiu matammudda wuassu al᷊awo'u seetta apan uatana'a maraninu, anambon taumatan Amalek udde ṛinone pateanni yamiu, ma'oman sara i mangitou tate naunganna lai. Imbaṛṛangnga abbul᷊iananna!”