Read Talaud TAHIUL᷊E 30 Bible Online

TAHIUL᷊E 30 - Talaud bible

TAHIUL᷊E 30

¹“Orassa indi yamiu wotongnge mamile suwallatu al᷊amatta wuṛṛu wontoga ere buatte ta'u tinal᷊a'a si yamiu. Amungkangngu i yamiu buatte naapendamma al᷊awo'u asasusa udde wuṛṛu mabiakka suwallatu walahanna waine sutampa i yamiu nisal᷊iawukku MAWU Ruatanu, i yamiu sarun maanaungnga pamamile apan ta'u nionggolla si yamiu.

²Amungkangngu i yamiu wuṛṛu papapulunnu mappulu mabelengnga ringannu MAWU Ruatanu, wuṛṛu ringannu ahewallu naungngu tumuṛṛutta manga parenta-Ne apan ta'u nionggola si yamiu allo indi,

³ne MAWU Ruatanu sarun umakkanni yamiu. I yamiu sarun iapiddi Tou mabelengnga wuassu manga walahanna suapa i yamiu nisal᷊iawukka wuṛṛu iapawiakka su lal᷊umanna'a apia.

⁴Salaiwe i yamiu uasal᷊iawukka su al᷊awo'u tampa su ahewallu runia, MAWU Ruatanu sarun mangammulli yamiu wuṛṛu mangapiddi yamiu apia.

⁵Ne i yamiu wotongnge maatahuanna apia leta'a dorone wawanuannu iupungngu al᷊amonanu. Wuṛṛu wiakki yamiu olaanna lembon ala, wuṛṛu reengannu mannamboanna wuassu al᷊amonanu.

⁶I yamiu wuṛṛu papapulunnu sarun onggol᷊annu naungnga matuṛṛutta, ma'oman sara i yamiu marangngu MAWU Ruatanu ringannu ahewallu naungngu wuṛṛu wotongnge sidutu matana'a su wanua udde.

⁷Anambon bontoga udde sarun iema'a su manga seennu apan maddantina wuṛṛu makkinda si yamiu.

⁸I yamiu sarun mabelengnga apia tumuṛṛutta MAWU Ruata wuṛṛu mapaamattu al᷊awo'u parenta-Ne apan ta'u nionggola si yamiu allo indi.

⁹MAWU Ruatanu sarun ma'ola'a inasaharannu mangke mahessi; yamiu sarun maatahuanna anna manambo, wuṛṛu winatangnga apan manambo; manga wawail᷊annu sarun mangonggolu hessine manambo-nambo. MAWU ringannu naungnga mal᷊uassa ma'ola'a si yamiu ala, ere lai i Tou mal᷊uassa nangonggolu pa'a'ala su iupungngu al᷊amonanu.

¹⁰Arawe i yamiu ṛinone matuṛṛutta MAWU Ruatanu wuṛṛu tuttuṛṛuta al᷊awo'u tita-Ne apan uawoṛṛetta sulal᷊ummu wuke indi, wuke Titan MAWU. I yamiu ṛinone mabelengnga si Tou ringannu ahewallu naungngu.

¹¹Parenta apan ta'u nionggola si yamiu tawe tumanite masahadda wuṛṛu lai tawe tumaniten marau.

¹²Tampane wal᷊inewe su langitta, na'oman sara i yamiu maiwal᷊o, “Isai sarun umawitta poiaroddi mangal᷊appa wuatti ite, tadea'u i ite wotongnge maaringikka wuṛṛu tumuṛṛutta?”

¹³Tampane lai wal᷊ine su samba'an tahal᷊oangnga, na'oman sara i yamiu maiwal᷊o, ‘Isai inai su samba'an tahal᷊oangnga mangal᷊appa wuatti ite, tadea'u i ite wotongnge maaringikka wuṛṛu tumuṛṛutta?’

¹⁴Imbaṛṛangnga maiwal᷊o aroddi, ana waugu parenta udde tumaniten maraninu. I yamiu masingkatte wuṛṛu wotongnge mabbisara su liuddu pua, nariaddi ete ma'ola'a.

¹⁵Allo indi yamiu wotongnge mamile suwallatu mapia wuṛṛu lal᷊eo, suwallatu wiakka wuṛṛu mate.

¹⁶Allo indi ya'u mamarenta si yamiu tadea'u mandangngu MAWU Ruatanu wuṛṛu tumuṛṛutta si Tou apiddu tumuṛṛutta al᷊awo'u tita wuṛṛu parenta-Ne tadea'u i yamiu maala wuṛṛu maola'a sambau walahanna apan wahewalla. MAWU Ruatanu sarun mangal᷊amatta si yamiu su wanua apan tate mal᷊annu lai pamanuanni yamiu.

¹⁷Arawe amungkangngu i yamiu tawe tumuṛṛutta wuṛṛu maddiri maddaringikka, wuṛṛu mamalan batangannu ial᷊iwune iapasubba manga MAWU waine,

¹⁸I yamiu sarun pateanna, wuṛṛu uukku maautta su wanua apan tate mal᷊annu lai atanaanni yamiu. Paanaunge! Olangnge udde buatte ta'u niwal᷊o si yamiu allo indi.

¹⁹Orassa indi yamiu wotongnge mamile suwallatu wiakka wuṛṛu mate, suwallatu al᷊amattu MAWU wuṛṛu wontoga. Langitta wuṛṛu runia ta'u wagoanna maola'a tatialane su ipaapuluna Pamilete i yamiu wiakka.

²⁰Pandangngute MAWU Ruatanu, paatuṛṛutta si Tou, wuṛṛu paatammuda tumuṛṛutta si Tou. Ne i yamiu wuṛṛu papapulunnu sarun mabbiakka wuṛṛu uukka mal᷊o'engnga su wanua apan nipa'iren MAWU su iupungngu al᷊amonanu, i Abraham, i Ishak wuṛṛu i Yakub.”