Read Talaud TAHIUL᷊E 31 Bible Online

TAHIUL᷊E 31 - Talaud bible

TAHIUL᷊E 31

¹I Musa nabbisara apia su walahannu Israel,

²wisarane, “Orassa indi uukka si ya'u maṛṛasutte ruan pul᷊o su tonnane wuṛṛu i ya'u tate maapammanara maola'a piaṛṛangngu. Wuṛṛu lai MAWU buatte nabbisara manungku i ya'u tate wotongnge lumewessa Sal᷊ukku Yordan.

³MAWU Ruatanu sassane sarun umamatta malliu ṛoro wuṛṛu mamate manga walahanna apan uatana'a isudde, ma'oman sara i yamiu wotongnge mamanua su leta'i mangitou. I Yosua sarun maola'a piaṛṛa'i yamiu, ere buatte niwal᷊on MAWU.

⁴MAWU sarun mamate manga walahanna udde, ere lai i Tou namaddon Sihon wuṛṛu i Og, ratun taumatan Amori, lapiddu nakkimunsa'a wanuan mangitou.

⁵MAWU sarun mangonggolu auntunganna si yamiu, ana see i yamiu ṛinone ma'ola'a si mangitou ere lai buatte ta'u niwal᷊o si yamiu.

⁶Ṛinone naungngi yamiu matammuda wuṛṛu waṛṛani! Imbaṛṛangnga mata'utti mangitou, ana waugu MAWU Ruatanu sassane sarun mantul᷊ungngi yamiu. I Tou tawe mapaurangngu naungngu ara'e manantangngi yamiu.”

⁷Ana see i Musa namago si Yosua, wuṛṛu su saruannu anambon walahannu Israel i tou nabbisara si Yosua, “Ṛinone naungngu matammudda wuṛṛu waṛṛani, Yosua! Ete i'o apan sarun mamiaṛṛa'u walahanna indi inai matana'a su wanua apan pina'iren MAWU su iupungngu al᷊amona mangitou.

⁸MAWU sarun mangehetta wuṛṛu mantulungngu. I Tou tawe mapaasusan naungngu ara'e manantangngu. Ana waugu udde imbaṛṛangnga mata'utta ara'e suminggawangnga.”

⁹Ana see i Musa namoṛṛettu Titan MAWU Ruata wuṛṛu nionggola su manga imam Lewi apan niapamanara ual᷊u'adda Wantallu Pa'aire, wuṛṛu su manga piaṛṛa'u Israel.

¹⁰I tou nandolokki mangitou, “Suapan panginsueannu tonna appitune, sulal᷊ummu tonna pamapasanna utangnga su andeangngu Rasannu Rongnga,

¹¹i yamiu ṛinone mabbasa manga tita indi ringannu tingikka ma'ikkata su manga taumatan Israel apan dumanta massubba MAWU Ruatanu su tampa apan nipile-Ne.

¹²Doloṛṛa'e manga esakka, wawine wuṛṛu al᷊aṛṛana'a ana see lai taumata raho apan uatana'a su manga soanu ma'ammulla wuṛṛu maddaringikka pabbawawasa udde, tadea'u i mangitou masingkatta mangaddata MAWU Ruatanu wuṛṛu matammudda tuttuṛṛutta manga parenta-Ne.

¹³Ringannu olangnge aroddi manga al᷊aṛṛanangngu apan taambe naaringikka titan MAWU Ruatanu wotongnge maaringikka wuṛṛu masingkatta mangaddata MAWU su al᷊o'engngu i mangitou mabbiakka su wanua apan tate mal᷊annu lai atanaanni yamiu su samba'an Sal᷊ukku Yordan.”

¹⁴Wua'udde MAWU nabbisara si Musa, “Tate mal᷊annu i'o mabbiakka. Nariaddi wagoite i Yosua wuṛṛu apira'e i tou watukku Rasang-Ku, tadea'u i Ya'u wotongnge mangonggolu manga tatantiro si tou.” Ne i Musa wuṛṛu i Yosua inaite watukku Rasannu MAWU,

¹⁵wuṛṛu MAWU nattingkapasilo sitarua sulal᷊ummu winabbawa maranin ngaran Dasanna.

¹⁶Wisaran MAWU si Musa, “Papatenu maranite. Su apapul᷊enu walahannu Israel maddirite tumuṛṛutta si Ya'u wuṛṛu lumawangke pa'aire apan Ta'u niola'a si mangitou. I mangitou sarun manantang-Ku wuṛṛu massubba manga MAWU apan sassubbanna su wanua apan tate mal᷊annu lai suttanni mangitou.

¹⁷Amungkangngu udde mariaddi, i Ya'u sarun masa'u nipangillembo su saruanni mangitou. I mangitou sarun Ta'u itantangnga wuṛṛu Ta'u pateanna. Manambo asasusa apan masaddata maṛṛia'a si mangitou, ana see i mangitou maatutukka manungku sarangkanambone udde nariaddi ana waugu i Ya'u, Ruatan mangitou, tate lai ual᷊u'adda si mangitou.

¹⁸Su tempo udde i Ya'u maddiri mantul᷊ungngi mangitou, ana waugu i mangitou, buatte nassubba manga MAWU wuṛṛu na'ola'a al᷊al᷊eo.

¹⁹Orassa indi woṛṛeta'e antari indi wuṛṛu tantiroa'a su walahannu Israel maola'a sambau tatiala si mangitou.

²⁰I mangitou sarun Ta'u iapidda watukku wanua apan ala wuṛṛu masuwukka, ere buatte Ta'u pina'ire su iupungngu al᷊amonan mangitou. Isudde i mangitou sarun mabbiakka ringannu mal᷊uassa wuṛṛu maasomba al᷊awo'u anna apan pappandumanni mangitou. Arawe wua'udde i mangitou sarun tumal᷊iudda wuṛṛu massubba manga MAWU waine. I Ya'u sarun itol᷊a'i mangitou wuṛṛu lumawangnga paaire-U,

²¹wuṛṛu manambo asasusa apan bahewalla sarun maṛṛia'a si mangitou. Arawe antari indi sidutu sarun ia'antari wuṛṛu ipappaatta maola'a tatiala si mangitou. Wuṛṛu lai orassa indi, tantal᷊anna i mangitou taambe niapi-U Ta'u iapidda watukku wanua apan pina'ire-U, i Ya'u masingkattu lal᷊annu ṛingiddi mangitou.”

²²Su allo udde i Musa namoṛṛettu antari, ana see niaṛṛa'a su walahannu Israel.

²³Wua'udde MAWU nabbisara si Yosua, ana'i Nun, wisara-Ne, “Ṛinone naungngu matohassa wuṛṛu waṛṛani, Yosua! I'o sarun mamiaṛṛa'u walahannu Israel sumutta su wanua apan Ta'u pina'ire si mangitou, wuṛṛu i Ya'u sarun mantul᷊ungngu.”

²⁴Ana see i Musa namoṛṛettu titan Duata sulal᷊ammu sambau wuke. I tou namoṛṛetta ringannu maadunna wuassu panattaṛṛanne naddatingngu panginsueanne.

²⁵Napawe nasuete, i tou nabbisara su manga imam Lewi apan niapamanara mallu'adda Wantallu Pa'aire,

²⁶“Anute wuken Titan Duata indi, wuṛṛu sahipunte su sandiṛṛannu wantallu Pa'airen MAWU Ruatanu, tadea'u sidutu sasahipunanna isudde maola'a sambau tatiala su walahannu udde.

²⁷I ya'u masingkatta i mangitou puane mangke maatikka wuṛṛu apulune lullawangnga. Ro'en i ya'u ta'e wiakka lai i mangitou lullawangnga MAWU; nangillembo lai su allo addantane, napawe i ya'u natete!

²⁸Orassa indi doloṛṛa'e anambon piaṛṛa'u walahannu wuṛṛu manga tembonannu tantara ma'ammula su saruangku, tadea'u i ya'u wotongnge mamasingkattu manga hatto indi si mangitou. Langitta wuṛṛu runia ta'u wagoanna maola'a sambau tatiala su saruanni mangitou.

²⁹I ya'u masingkatta manungku napawe i ya'u natete, manga taumata udde sarun mabbal᷊i lal᷊eo wuṛṛu maddiriten al᷊aṛṛa'a apan buatte ta'u niaṛṛa'a si mangitou. Wuṛṛu i mangitou sarun aṛṛiaannu asasusa, ana waugu naasa'u MAWU ringannu na'ola'a sarangkanambone apan isassingaddi Tou.”

³⁰Wua'udde i Musa nangantariten antari indi na'oman sara nuddussa tantal᷊anna anambon walahannu Israel uararingikka.