Read Talaud TAHIUL᷊E 33 Bible Online

TAHIUL᷊E 33 - Talaud bible

TAHIUL᷊E 33

¹Tantal᷊anna taambe nate, i Musa daroloṛṛannu Ruata, nangal᷊amatte walahannu Israel ringannu manga wisara indi:

²“MAWU nirumanta wuassu Wowon Sinai; i Tou nilumapputa su Edom naal᷊ihidda matannallo wuṛṛu wuassu Wowon Paran i Tou mannemakka al᷊aṛṛanang-Nge. I Tou raṛundinganannu mapul᷊o ṛiwu mala'ekatta; putungnga lukkenggamma su samba uanan-Ne.

³Atonna, MAWU marangngu walahan-Ne I Tou mallu'adda anambon taumata apan naola'a pussa'a-Ne. Wette i ite umal᷊intudda su saruannu ledda-Ne wuṛṛu tumuṛṛutta manga parenta-Ne.

⁴Tita apan nionggoli Musa i ite paatuṛṛuta, pussa'a apan maarega su walahanna indi.

⁵Su tempo Israel uaammula ringannu manga piaṛṛangnge, MAWU nabbal᷊i Ratu su al᷊aṛṛanang-Nge.”

⁶Su ṛuanganni Ruben i Musa nabbisara, “Antimanna ṛuanganni Ruben tawe mate, salaiwe taumata tumba'u matul᷊u.”

⁷Su ṛuanganni Yehuda i tou nabbisara: “MAWU, daringiṛṛewe sasal᷊anden Yehuda; hemona'a apia i mangitou ringannu walahanna. Pamangalote panamba'a si mangitou, oh MAWU, ontol᷊ewe i mangitou su saruannu seetta.”

⁸Su ṛuanganni Lewi i tou nabbisara: “Ringannu Urim wuṛṛu Tumim, I'o mapal᷊iatta'u apulu-Nu, su taumatan Lewi, allang-Ngu apan matuṛṛutta. I'o buatte namono'a si mangitou su Masa, wuṛṛu uatatiakki mangitou su al᷊imatan ua'e su Meriba.

⁹I mangitou marangngu Si'o nipangillembo wuassu al᷊awo'a, nipangillembo wuassu hagurangnga wuṛṛu tuṛṛangnga. Manga parenta-Nu tattuṛṛutanni mangitou, pa'aire-Nu niapatipussi mangitou.

¹⁰I mangitou mangngaṛṛa'a al᷊aṛṛanang-Ngu tuttuṛṛutta anambon parenta-Nu wuṛṛu mangonggolu sasamba su meddan sasamba-Nu.

¹¹MAWU, ontol᷊ewe ṛuanganna indi tadea'u matohassa, antimanna I'o mal᷊uassa ringannu manaran mangitou. Patete anambon seetti mangitou ma'oman sara tate maararisikka apia.”

¹²Su ṛuanganni Benyamin i tou nabbisara: “Ete indi ṛuanganna apan arangnguannu MAWU. I Tou ual᷊u'adda si mangitou allo wuṛṛu ṛabbi wuṛṛu uatana'a suwallati mangitou.”

¹³Su papapulunni Yusuf i tou nabbisara: “Antimanna leta'i mangitou al᷊amatannu MAWU ringannu uranna, wuṛṛu ua'e wuassu wantan dunia.

¹⁴Antimanna suapan watianna mapenen manga wuan aaluanna manga wua apianne wuṛṛu nal᷊aha su alune.

¹⁵Antimanna manga wuidda wuassu tempon al᷊amona mapenen hessin leta'a apan apianne.

¹⁶Antimanna letangnge aomboannu al᷊awo'a apan apianne, wuṛṛu al᷊amatannu apapian MAWU apan nabbisara wuassu anggaṛṛumunanne lukkenggamma. Antimanna al᷊amatta udde umonto'a su papapulunni Yusuf, ana waugu ete i tou piaṛṛa'u manga tuṛṛangnge.

¹⁷I Yusuf uatahuanna atatohassu sambau bantenga, wuṛṛu tatandu'u sapin ahuranganna esakka eteudde su ṛiwune Manasye wuṛṛu su pul᷊o ṛiwune Efraim. Manga walahanna nihesangnge wuṛṛu nilimbuaṛṛanni mangitou naddatingngu manga pentakku runia.”

¹⁸Su manga ṛuanganni Zebulon wuṛṛu i Isakhar i tou nabbisara: “Antimanna i Zebulon maala ana waugu manga amamatti mangitou, wuṛṛu Isakhar mallal᷊umanna'a su manga rasanne.

¹⁹I mangitou nannote manga walahannu su wowone mangitou wuṛṛu nangonggolu sasamba apan naṛṛino poiaroddi. I mangitou naasomba pa'a'ala wuassu tahal᷊oangnga, wuṛṛu wuassu anne su al᷊o'engngu apanne.”

²⁰Su ṛuanganni Gad i tou nabbisara: “Daralo su Ruata apan nanggewalla leta'i Gad. I Gad ual᷊aṛṛaddo naal᷊ihidda sambau singa inai manggesa'a ta'iakka ara'e pisin pua.

²¹Leta'a apan apianne nianu hunan batanganne tahia su piaṛṛangnge tinantilla si mangitou. I mangitou tutturutta al᷊awo'u parenta wuṛṛu titan MAWU su tempo manga piaṛṛa'u Israel uasemodda suadio'a.”

²²Su ṛuanganni Dan i tou nabbisara: “I Dan naal᷊ihidda sambau singa saṛṛen tumuwo apan sinumolo'a sinumabbangnga wuassu Basan.”

²³Su ṛuanganni Naftali i tou nabbisara: “I Naftali niomboannu al᷊amatta wuṛṛu darangngun MAWU; letangnge wuassu Ranon Galilea maddatingngu timukka.”

²⁴Su ṛuanganni Asyer i tou nabbisara: “I Asyer nial᷊amatanna nipangillembo wuassu manga ṛuanganna waine; antimanna i tou maola'a arangnguannu manga tuṛṛangnge, wuṛṛu punnu zaitun tumuwo masuwukka su letangnge.

²⁵Antimanna manga soane tatandaanna ringannu ngaran pasallanganna apan niola'a wuassu witu'a wuṛṛu atta'a tadea'u i mangitou sidutu mabbiakka mal᷊annaba wuṛṛu matammuda.”

²⁶“Ore Israel! Tawe MAWU naal᷊ihidda Ruatanu; I Tou mammal᷊itaddu langitta ringannu awawantuga wuṛṛu nallassuta winabbawa tadea'u mangontolla si yamiu.

²⁷Ruata sarangkal᷊o'engnge mabbal᷊i mallal᷊u'addi yamiu, ta'iakku Ruata saran mal᷊annu-l᷊annu ua'ehetta si yamiu. I Tou nallimbuakka seetta wuassu saruannu wuṛṛu i yamiu nirolokka niapapate si mangitou.

²⁸Ne papapulunni Yakub sarun mabbiakka ringannu matammuda su wanua napenen gandumma wuṛṛu ua'e anggore, wuṛṛu niwokkannu angngukka wuassu langitta.

²⁹Lal᷊uassa si'o ei Israel! Tawe walahanna ere i'o niapasal᷊amattu MAWU. MAWU naal᷊ihidda hal᷊ele wuṛṛu allungnga si yamiu; ipanamba'a wuṛṛu ipangonggolu auntunganna si yamiu. Manga seennu sarun dumanta madorongnga aakkanna, wuṛṛu i'o sarun maṛṛinda si mangitou.”