Read Talaud TAHIUL᷊E 34 Bible Online

TAHIUL᷊E 34 - Talaud bible

TAHIUL᷊E 34

¹Ana see i Musa nanantangngu leta'u Moab wuṛṛu sinuma'a Wowon Nebo, watukku puiddu Pisga su samba'an ra'in Yerikho. Isudde MAWU nanta'e si tou ahewallu wanua udde, eteudde: Wageangngu leta'u Gilead watukku sawannaka araune sara soan Dan;

²ahewallu wageangngu leta'i Naftali; wageangngu leta'i Efraim wuṛṛu Manasye, wageangngu leta'i Yehuda watukku waṛṛatta araune sara Tahal᷊oangngu Tangngane;

³su wageangngu timukku Yehuda wuṛṛu su leta'a ratakke apan uawannada wuassu Zoar watukku Yerikho soa apan napenen alu kurma.

⁴Ana see MAWU nabbisara si Musa, “Eteudde leta'a apan Ta'u pina'ire si Abraham, si Ishak wuṛṛu si Yakub apan tinantilla su papapulunni mangitou. I Ya'u namasilo si'o, Musa, arawe tawe mamalanu inai poiaroddi.”

⁵Ana see i Musa natete allangngu MAWU udde su leta'u Moab, ere buatte niwisaran MAWU paarorone.

⁶MAWU nallabingngi tou su sambau wawal᷊annu Moab su samba'an soa Bet-Peor, arawe naddatingngu allo indi tawe saran sangkatou masingkattu lal᷊abinganne.

⁷I Musa nate su uukka maṛṛasutta ruan pul᷊o su tonnane. Atatohassi tou tawe nahaingnga wuṛṛu matane ta'e matilangnga.

⁸Su ratakku Moab walahannu Israel nilumuain Musa wuṛṛu nilumal᷊o al᷊annune tallu pul᷊o su allone.

⁹MAWU nangonggola si Yosua ana'i Nun ringannu apapande ana waugu i tou buatte nita'en Musa pinallol᷊ossa si tou. Walahannu Israel mararingikka si Yosua wuṛṛu mappaamattu manga parentane apan nionggolu MAWU si mangitou apan niapawal᷊o si Musa.

¹⁰Su Israel tate lai nabi ere i Musa apan uahahatti uasasaruannu MAWU.

¹¹Taweddu apan maaola'a manga al᷊aṛṛindu'a wuṛṛu tatiala maatiangnga ere niola'i Musa su wanuan Mesir, ratune wuṛṛu manga mammamanarane uasul᷊ungngu parentan MAWU.

¹²Taweddu maaola'a manga inolaanna apan bahewalla wuṛṛu ma'ata'utta ere niola'i Musa su saruannu anambon balahannu Israel.