Read Talaud TAHIUL᷊E 4 Bible Online

TAHIUL᷊E 4 - Talaud bible

TAHIUL᷊E 4

¹Ana see i Musa nabbisara su walahanna udde, “Paatuṛṛute anambon tita apan ta'u niaṛṛa'a si yamiu, tadea'u i yamiu wotongnge mabbiakka ma'oman sara mamanua su leta'a apan nionggolu MAWU Ruatan al᷊amonanu si yamiu.

²Apa apan nirolo'u, arie pattambai ara'e hainganna sarangkadio'a. Paatuṛṛute manga parentan MAWU Ruatanu apan ta'u nionggola si yamiu.

³I yamiu naasilo sassane sarangkanambone apan niola'u MAWU Ruatanu su Wowon Peor. Suapan taumata apan massubba Baal su tampa udde sarun pateannu MAWU,

⁴arawe i yamiu apan sidutu tuttuṛṛutta MAWU Ruatanu, ta'e wiakka naddatingngu orassa indi.

⁵Anambon tita udde ta'u niaṛṛa'a si yamiu ere buatte nirolokku MAWU Ruatanu. Tuṛṛute sarangkanambone udde su wanua apan sarun suttanna wuṛṛu atanaanna udde.

⁶Ola'e ringannu atatuṛṛutta. Amungkangngu inolaanni yamiu aroddi, ne apapandenu lumiatta'a su manga walahanna waine. Napawe i mangitou maaringikka manga tita udde, i mangitou sarun mabbisara, “Asingkata wuṛṛu apandewe eteapa walahanna apan bahewalla udde!”

⁷Walahanna wahewalla suapa apan pia monganne aroddi aranine amungkangngu pappandumanna ere MAWU Ruatan kite maranin kite? I Tou sinumimbakka suapan tempo i ite sumal᷊ande maiontolla si Tou.

⁸Wuṛṛu walahanna wahewalla suapa apan pia manga tita apan aroddi atul᷊idde ere manga tita apan ta'u niaṛṛa'a si yamiu allo indi?

⁹Panutukke wuṛṛu naungete paapia-pia, tadea'u su al᷊o'engngu pabbiaṛṛannu i yamiu tawe maabul᷊i sarangkanambone apan buatte niasiloanni yamiu sassane. Wattia'e su anangngu wuṛṛu pulunnu

¹⁰su ola'u allo udde, su tempo i yamiu uarisikka su saruannu MAWU Ruatanu su Wowon Sinai. Su tempo udde i Tou nabbisara si ya'u, ‘Ammul᷊a'e walahanna udde. I Ya'u maapulu i mangitou maddaringikka apa apan Ta'u iwal᷊o, tadea'u i mangitou masingkatta tumuṛṛutta si Ya'u su al᷊o'engngu pabbiaṛṛanne, wuṛṛu tadea'u i mangitou manantiro al᷊aṛṛana'i mangitou tumuṛṛutta si Ya'u.’

¹¹Wattia'e su manga anangngu ereapa i yamiu nirumanta wuṛṛu uarisikka su leddam bowone apan aoopannu timbulla marandumma naal᷊ihidda winabbawa maapala wuṛṛu putungnga lukkenggamma wuassu langitta.

¹²Wua'udde MAWU nabbisara si yamiu wuassu putungnga wuṛṛu i yamiu naaringikka tingikke, arawe tawe naasilo si Tou sulal᷊ummu al᷊awo'u lihidda.

¹³Poiaroddi i Tou namasingkatta si yamiu sarangkanambone apan sarun olaanni yamiu su ipanipussa pa'aire-Ne apan niola'a ringanni yamiu. Mapul᷊o Tita apan buatte niwoṛṛettu MAWU su daruan kul᷊appa watu udde ṛinone daringiṛṛanni yamiu.

¹⁴I ya'u nirolokku MAWU iapaaṛṛa'a si yamiu anambon tita apan ṛinone tuṛṛutanna su wanua apan sarun suttanna wuṛṛu atanaanni yamiu udde.”

¹⁵“Naungete paapia-pia! Su tempo MAWU nabbisara si yamiu wuassa lal᷊ummu putungnga su Wowon Sinai, i yamiu tawe naasilo manga apa.

¹⁶Nariaddi paatehamma tadea'u i yamiu tawe marosa ana waugu i yamiu na'ola'a su watangannu sassane paal᷊uanna subbanna sulal᷊ummu al᷊awo'u lihidda, esakka ara'e wawine,

¹⁷manu'u winalanganna ara'e inassa, winatangnga tuttondon tianne ara'e winatangnga waine.

¹⁸

¹⁹Ariete i yamiu marosa ana waugu massubba wuṛṛu mattaṛṛamawu su al᷊awo'u apa apan niasiloanni yamiu su langitta; matannallo, wul᷊anna wuṛṛu manga anumpitanna. MAWU Ruatanu namalan manga walahanna waine massubba manga saranapa udde.

²⁰Arawe i yamiu uddewe walahanna apan niapasal᷊amatta wuassu Mesir, su tampa i yamiu tumaniten uatataṛṛanga. I yamiu niapiddi Tou sinumabbangnga wuassu wanua udde, tadea'u mabbal᷊i walahanna sassane ere olangngu orassa indi.

²¹Arawe MAWU Ruatanu nabbal᷊i nasa'u si ya'u ana waugu i yamiu, wuṛṛu i Tou nassalu manungku i ya'u tawe maal᷊ewessa Sal᷊ukku Yordan inai sumutta su leta'a masuwukka apan sarun ionggoli Tou si yamiu.

²²Tate mal᷊annu lai yamiu sarun lumewessa wuṛṛu matana'a su leta'a apan masuwukka udde; arawe i ya'u tawe tumantalongnga, ana waugu i ya'u sarun mate isindi.

²³Paanaunge paapia-pia! Imbaṛṛangnga maabul᷊in pa'aire apan niola'u MAWU Ruatanu si yamiu. Paatuṛṛutte parenta-Ne; saran paassa imbaṛṛangnga i yamiu mallanginnu al᷊awo'u paal᷊uanna tadea'u subbanna,

²⁴Ana waugu MAWU Ruatanu naal᷊ihidda putungnga apan mannoṛṛobba. I Tou maddiri isul᷊ungngu al᷊awo'u saranapa apan sassubbanna.

²⁵See lai amungkangngu i yamiu mal᷊annute uatana'a su wanua udde wuṛṛu piate ana'a pulunna, arie i yamiu marosa ana waugu na'ola'a su watangannu paal᷊uanna sulal᷊ummu al᷊awo'u lihiddu manga apa. Inolaanna udde sambau al᷊al᷊eo su mata MAWU Ruatanu wuṛṛu i Tou sarun masa'u.

²⁶Antimanna langitta wuṛṛu runia allo indi maola'a matatialane manungku amungkangngu i yamiu tawe matuṛṛutta si ya'u, i yamiu sarun mal᷊ihakka mawul᷊i wuassu leta'a apan wawanuanni yamiu su samba'an Sal᷊ukku Yordan udde. Yamu tawe mal᷊annu uatana'a isudde; i yamiu sarun insueanna pateanna.

²⁷MAWU sarun manal᷊iawukki i yamiu suwallatu manga walahanna waine wuṛṛu tumba'u matul᷊ungna suwallati yamiu apan sidutu wiakka.

²⁸Isudde i yamiu sarun mattaṛṛamawu su manga monganna apan niola'u liman taumata, manga monganna wuassu alu wuṛṛu watu apan tawe maasilo wuṛṛu maaringikka, tawe maanna wuṛṛu maasimbua.

²⁹Ana see i yamiu sarun maddea'a MAWU Ruatanu, wuṛṛu amungkangngu i yamiu maddea'a si Tou ringannu ahewallu naungngu, i yamiu sarun maasomba si Tou.

³⁰Amungkangngu i yamiu aṛṛiaannu al᷊al᷊eo udde, wuṛṛu i yamiu udde lai sulal᷊ummu asasusa, ne i yamiu sarun mabelengnga ringannu MAWU Ruatanu wuṛṛu tuttuṛṛutta si Tou.

³¹MAWU Ruatanu eteudde MAWU apan maakkanna. I Tou tawe manantangnga ara'e mamate si yamiu, ara'e maabul᷊im pa'aire apan niolang-Nge sassane ringannu al᷊amonanu.

³²Panaṛṛasidde tempo nal᷊iu, marau sutempo i yamiu taambe niasungkanga, manattakka wuassu allo su tempo MAWU Ruata nandiadi taumata su runia indi. Paddea'e su ahewallu runia. Apa arariadianna ahewalle indi buatte nariaddi tempo paarorone? Apa piate taumata apan naaringikka ola'u arariadianna ereindi?

³³Apa pia balahanna apan sidutu mabbiakka napawe naaringikka sambau monganna mabbisara si mangitou wuassu putungnga, ere buatte niapendamanni yamiu?

³⁴Apa pia sambau monganna apan baṛṛani mangal᷊appa sambau walahanna wuassu wallatu manga walahanna isudde ana see ma'ola'a si mangitou al᷊aṛṛanang-Nge sassane, ere buatte niola'u MAWU Ruatanu si yamiu su Mesir? I yamiu naasilo sassane ereapa Ruata ringannu atatohassa apan bahewalla nandantan asasilaka wuṛṛu pangalo, nammanara manga al᷊aṛṛindu'a wuṛṛu na'ola'a manga inolaanna apan bahewalla.

³⁵Sarangkanambone udde niapal᷊iatta'u MAWU si'o ipattiala manungku tumba'u MAWU udde Ruata, wuṛṛu taweddu waine.

³⁶Wuassu langitta i Tou napararingikku tingik-Ke si'o ipangaṛṛa'a si yamiu; su runia indi i Tou buatte namasilon putung-Nge apan bahewalla, wuṛṛu wuassu putungnga i Tou uahahatton kamiu.

³⁷Ana waugu i Tou mandangngu al᷊amonanu, ne i Tou buatte namile si yamiu; ringannu taṛṛino-Ne apan wahewalla i yamiu buatte niapiddi Tou sinumabbangnga wuassu Mesir.

³⁸Manga walahanna apan magewal᷊anna wuṛṛu mattohassanna nilimbuaṛṛanni Tou wuassu saruannu, tadea'u ipanguntuddi yamiu watukku wanuan mangitou apan nionggola si yamiu, wanua apan orassa indi naola'a pussaanuu.

³⁹Ana waugu udde atimpu'ote su allo indi wuṛṛu arie abbul᷊iananna; Tumba'u MAWU uddewe Ruata su langitta wuṛṛu su runia; taweddu wal᷊ine.

⁴⁰Paatuṛṛutte anambon tita apan ta'u nionggola si yamiu allo indi, ne i yamiu wuṛṛu papapulunnu sarun mal᷊uassa wuṛṛu sidutu mabbiakka su wanua apan nionggolu MAWU Ruatanu maola'a pussaanu saran mal᷊annu-l᷊annu.”

⁴¹Ana see i Musa namantingiddu tatallu soa su samba'an da'in Sal᷊ukku Yordan

⁴²maola'a soa tatal᷊anganna, tampan taumata manal᷊amatta watanganne amungkangu i tou ringannu tawe nipattatudda buatte namate taumata wal᷊ine seenne. I tou wotongnge tumal᷊angngu watanganne su wallatu sambau soa udde tadea'u i tou tawe pateanna lai.

⁴³Su ṛuanganni Ruben buatte nisaddia soan Bezer su panenteannu wadda'a; su ṛuanganni Gad soan Ramot su wageangngu leta'u Gilead, wuṛṛu su ṛuanganni Manasye soan Golan su wageangngu leta'u Basan.

⁴⁴Ana see i Musa nangonggolu manga tita wuṛṛu manga atoranna wuassu Ruata su walahannu Israel.

⁴⁵Olangnge udde niola'a napawe i mangitou sinumabbangke wuassu Mesir wuṛṛu uatana'e su wawal᷊anne samba'an da'i, Sal᷊ukku Yordan, uasasaruannu soan Bet-Peor. Wageangngu leta'a udde lanna'u paparentanni Sihon, ratun taumatan Amori, apan dorone uaparenta su soan Hesybon. I Musa wuṛṛu walahannu Israel namaddon tou su tempo i mangitou sinumabbangnga wuassu Mesir.

⁴⁶

⁴⁷I mangitou natana'e su leta'i Ratu Sihon udde, see lai leta'i Ratu Og wuassu Basan, sangkatou ratun Amori waine apan uatana'a su samba'an da'in Sal᷊ukku Yordan.

⁴⁸Leta'a udde uawannadda wuassu soan Aroër su wiwikku Sal᷊ukku Arnon masal᷊a watukku sawannakka maddatingngu Wowon Siryod, eteudde Wowon Hermon,

⁴⁹wuṛṛu ahewallu wageangngu leta'a su samba'an da'in Sal᷊ukku Yordan watukku timukka maddatingngu Tahal᷊oangnga Nate su wawal᷊annu Wowon Pisga.