Read Talaud TAHIUL᷊E 7 Bible Online

TAHIUL᷊E 7 - Talaud bible

TAHIUL᷊E 7

¹“MAWU Ruatanu sarun mangapiddi yamiu watukku wanua apan sarun wanuanni yamiu, wuṛṛu manambo walahanna apan limbuaṛṛanna wua'isudde. Su saruannu matanu i Tou sarun mallimbuakka pitu walahanna apan maggewal᷊anna wuṛṛu mattohasanna wuassi yamiu, eteudde manga taumatan Het, Girgasi, Amori, Kanaan, Feris, Hewi wuṛṛu Yebus.

²Napawe MAWU Ruatanu manantillu manga walahanna udde sulal᷊ummu taṛṛinonu wuṛṛu i yamiu mamaddon mangitou, patete i mangitou sarangkanambone. Imbaṛṛangnga umakkanni mangitou ara'e makkiinnu pa'aire ringanni mangitou.

³Imbaṛṛangnga i yamiu ma'awingngi mangitou, wuṛṛu arie pabbala'a manga anangngu ma'awingngi mangitou,

⁴tadea'u i mangitou tawe mapaaraun manga anangngu wuassu MAWU wuṛṛu massubba manga MAWU waine. Amungkangngu i yamiu massubba manga MAWU waine, MAWU masa'u wuṛṛu i yamiu sarun pateanne.

⁵Ana waugu udde, hogaṛṛa'e manga mezbah manga walahanna udde, ṛimunsa'a manga diṛṛi watu apan sassunnanni mangitou maṛṛaubba, watanga'a manga waneṛṛan Asyera, wuṛṛu tambuna'e manga paal᷊uanna apan sassubbanni mangitou.

⁶Ola'e sarangkanambone udde ana waugu i yamiu pussa'an MAWU Ruatanu. Wuassu al᷊awo'u walahanna su runia indi, ete i yamiu apan nipilen MAWU Ruatanu mabbal᷊i walage apan apianne.

⁷I yamiu arangnguanna wuṛṛu nipilen MAWU, wal᷊ine ana waugu i yamiu maggewal᷊anna wuassu manga walahanna waine; atonna i yamiu walahanna atul᷊unganne su wowon dunia indi.

⁸Arawe MAWU namile si yamiu ana waugu i Tou marangngu si yamiu wuṛṛu mapulu manipussa pa'aire apan niola'i Tou ringannu iupungngu al᷊amonanu. Ana waugu udde i Tou buatte nanal᷊amatta si yamiu ringannu taṛṛino apan wahewalla wuṛṛu namallossi yamiu wuassu pattataṛṛuallanganna si ratun Mesir.

⁹Naungete manungku MAWU Ruatanu uddewe tumba'u sambau MAWU Ruata, wuṛṛu i Tou MAWU Ruata maakkanna. MAWU nanipussu pa'aire-Ne wuṛṛu napal᷊iatta'u darangngu-Ne apan uatatana'a maddatingngu saṛṛiwu pallaṛṛawanna su manga taumata apan mandangngu si Tou wuṛṛu tuttuṛṛuta manga parenta-Ne.

¹⁰Arawe ringannu tawe humago'a i Tou makkuumanni mangitou apan maddantinni Tou.

¹¹Nariaddi, paatuṛṛutte anambon tita apan ta'u niwal᷊o si yamiu allo indi.”

¹²“Amungkangngu i yamiu manutukka manga tita udde, wuṛṛu mapaamatta ringannu matammudda, ne MAWU Ruatanu lai sidutu matuṛṛutta su pa'aire-Ne apan niolang-Nge si yamiu. I Tou sarun mapal᷊iatta'u darangngu-Ne sidutu si yamiu, ere buatte nipa'ire-Ne su al᷊amonanu.

¹³I Tou sarun marangngu wuṛṛu mangal᷊amatta si yamiu, mao'man sara anangngu manambo, wuṛṛu reengannu a'atambanna. I Tou sarun mangal᷊amatta manga wawail᷊annu, na'oman sara maghesin gandumma, anggore wuṛṛu lanan zaitun. I Tou sarun mangal᷊amata si yamiu na'oman sara manambo sapi wuṛṛu ambinga dombanu. Anambon al᷊amatta udde sarun sengkamanni yamiu su wanua apan ionggolu MAWU si yamiu, uasul᷊ungngu paaire-Ne su iupungngu al᷊amonanu.

¹⁴Wuassu anambon balahanna su runia, tawe saran sambau apan naasomba al᷊amatta aroddi nilumambalanna ere si yamiu. Wuassi yamiu sarangkanambone, wuṛṛu wuassu al᷊awo'u winatangnga papadul᷊ianannu tawe saran sambau apan tinna.

¹⁵I yamiu sarun lu'arannu MAWU wuassu al᷊awo'u radda'a wuṛṛu ipaarau wuassu al᷊awo'u asasusa ere buatte niasiloanni yamiu su Mesir, arawe manga asasusa udde sarun iapaṛṛia'a su manga seennu.

¹⁶Suapan balahanna apan itantillu MAWU Ruatanu sulal᷊ummu taṛṛinonu ṛinone pateanna; arie umakkanni mangitou. Imbaṛṛangnga massubba manga MAWU mangitou, ana waugu pallal᷊aghu udde mandantan asasilaka si yamiu.

¹⁷Asinungka i yamiu maṛṛingidda manga walahanna udde mannamboanne reenganne na'oman sara i yamiu tawe mal᷊imbuakka si mangitou.

¹⁸Arawe arie pa'ata'utti mangitou; naungete apa apan niola'u MAWU Ruatanu su saruannu ratun Mesir wuṛṛu anambon tumanangnge.

¹⁹Paanaungete manga asasusa wahewalla apan niasiloanni yamiu sassane, manga al᷊aṛṛindu'a, wuṛṛu atatohassa apan bahewalla apan nipaattu MAWU Ruatanu ipamallossi yamiu. Aroddi lai MAWU Ruatanu sarun mallimbuakka anambon balahanna apan iaata'utti yamiu.

²⁰Ewe'e lai MAWU Ruatanu sarun mandantan atata'utta suwallati mangitou na'oman sara manga taumata apan botongnge tumal᷊angngu watanganne wuṛṛu ma'imbuni lai sarun mate.

²¹Nariaddi ariete mata'uttu manga walahanna udde. MAWU Ruatanu ual᷊u'adda si yamiu. I Tou uddewe MAWU Ruata apan mawantuga wuṛṛu ahewal᷊anne.

²²Manga walahanna udde sarun limbuaṛṛan-Ne pa'adio'a wuassu saruannu. I yamiu tawe wotongnge mamate si mangitou ringannu mal᷊ihakka, tadea'u manga winatangnga mal᷊aṛṛaga tawe atambanna anambone wuṛṛu maola'a tehamanna si yamiu.

²³Etearoddi MAWU Ruatanu sarun manantillu manga seenne si yamiu. I Tou sarun mangal᷊iba'ukki mangitou ma'oman sara i mangitou mate.

²⁴I Tou sarun manantillu manga ratun mangitou si yamiu. I mangitou sarun pateanni yamiu, wuṛṛu aranni mangitou sarun timbul᷊iananna. Tawe saran sangkatou apan botongnge maataṛṛangnga sumaruanna si yamiu; i mangitou sarangkanambone sarun pateanni yamiu.

²⁵Tambuna'e manga paal᷊uanna apan sassubbanni mangitou. Arie umanggangu sal᷊a'a ara'e wul᷊awanna apan ua'ele si tou wuṛṛu imbaṛṛangnga manganu hunanu sassane. Amungkangngu i yamiu lumawangnga parenta udde i yamiu sarun mate, ana waugu MAWU Ruatanu udde maddantinnu pasasubba paal᷊uanna.

²⁶Imbaṛṛangnga mangaddon sambau paal᷊uanna sulal᷊ummu wal᷊enu, tadea'u wontoga apan maṛṛia'a si tou tawe maṛṛia'a lai si yamiu. Olangnge udde ṛinone ia'atantinni yamiu wuṛṛu a'adio'a, ana waugu buatte niwontohannu MAWU Ruata.”