Read Talaud TAHIUL᷊E 8 Bible Online

TAHIUL᷊E 8 - Talaud bible

TAHIUL᷊E 8

¹“Anambon tita apan ta'u nionggola si yamiu allo indi ṛinone olaanni yamiu ringannu matuṛṛutta, tadea'u i yamiu sidutu wiakka, a'atambanna anambone wuṛṛu mamanua su leta'a apan pina'iren MAWU su iupungngu al᷊amonanu.

²Paanaungete! Appatu pul᷊o su tonnane al᷊annune MAWU Ruatanu uapiaṛṛa'i yamiu sulal᷊ummu amatanna marau sumabbi wadda'a. Amamatta udde pandumanne pa'annamannu MAWU si yamiu, tadea'u i Tou wotongnge maasilo apa apan uaraddo sulal᷊ummu naungngu wuṛṛu tanne i yamiu sarun tumuṛṛutta manga parenta-Ne.

³I tou mamalan kamiu niamal᷊unusanna, ana see i tou nangonggolu manna iapaanna si yamiu. I yamiu wuṛṛu al᷊amonanu taambe niumanna anna udde paarorone. MAWU na'ola'a aroddi tadea'u ipangaṛṛa'a si yamiu manungku taumata tawe tumba'u mabbiakku anna sassane; ewe'e wuassu al᷊awo'u wisaran MAWU.

⁴Su al᷊annune appatu pul᷊o su tonnane indi laungngu tawe naliesa'a wuṛṛu leddanu tawe hinumanne.

⁵Naungete, manungku MAWU Ruatanu mannantiro si yamiu naal᷊ihidda iamangnga mannantiro anangnge.

⁶Nariaddi, pa'ola'e al᷊awo'u apa apan nirolokku MAWU Ruatanu. Pabbiakke tuttuṛṛutta manga tita-Ne wuṛṛu pangaddate si Tou.

⁷MAWU Ruatanu nangapiddi yamiu su leta'a apan masuwukka; wanua apan manambo sal᷊ukke wuṛṛu al᷊imatan uae'ene, ringannu ua'ene sulal᷊ummu leta'a apan mangangelekka watukku manga wawal᷊anne wuṛṛu manga wuidda.

⁸Su wanua udde manambo wuan manga gandumma, anggore, wuan ara, wuan delima, alu zaitun wuṛṛu pul᷊a.

⁹Isudde i yamiu tawe amal᷊unusanna ara'e asueanne. Watu ṛanige ual᷊alluppa atta'a, wuṛṛu wuassu manga wuidde i yamiu wotongnge ma'al᷊i witu'a.

¹⁰I yamiu sarun umanna walate apulun naungngu, wuṛṛu ma'adiangkamanna su MAWU Ruatanu ana waugu leta'a masuwukka apan nionggolu MAWU si yamiu.”

¹¹“Pa'ariagai paapia-pia arie ma'oman sara i yamiu ma'abul᷊in MAWU Ruatanu; Imbaṛṛangnga mangadio'a saran sambau wuassu al᷊awo'u tita-Ne apan ta'u nionggola si yamiu allo indi.

¹²Amungkangngu i yamiu buatte niumanna ringannu walate apulun naungngu wuṛṛu buatte napararisikku manga wal᷊en apan mapia maola'a tampa atatanaannu,

¹³wuṛṛu amungkangngu niatambante sapi wuṛṛu ambinga dombanu, sal᷊a'a wuṛṛu wul᷊awannu wuṛṛu al᷊awo'u darotongngu waine,

¹⁴paarigaite paapia-pia tadea'u i yamiu tawe mabbal᷊i mawunga wuṛṛu maabul᷊in MAWU Ruatanu apan namallossi yamiu wuassu Mesir, su tampa i yamiu mattaṛṛuallanga.

¹⁵MAWU namiaṛṛa'i yamiu sinumabbi wadda'a apan mal᷊alangnga wuṛṛu ma'ata'utta, manambo atoanna mawisa, wuṛṛu kalajengking. Su leta'a apan mamara tawe ua'ene, i Tou na'ola'a ua'e mangngelekka wuassu watu, tadea'u i yamiu wotongnge ma'inumma walate apulun naungngu.

¹⁶Su wadda'a i Tou nangonggolu manna maola'a pabbawiakku, anna apan awaganannu iupungngu al᷊amonanu. MAWU na'ola'a udde tadea'u iapaannama si yamiu wuṛṛu ipamawo naungngu, tadea'u panginsueanne i Tou wotongnge ma'ola'a apapia si yamiu.

¹⁷Nariaddi, arie saran paassa i yamiu maṛṛingidda manungku ringannu apulu wuṛṛu atatohannu sassane i yamiu wotongnge mabbal᷊i ala.

¹⁸Naunge manungku tumba'u MAWU Ruatanu apan mangonggolu paa'ala udde si yamiu. Olangnge udde niola'i Tou ana waugu na'oman sara allo indi i Tou ta'e uaagassa su pa'aire apan niolangnge-Nge ringannu iupungngu al᷊amonanu.

¹⁹Imbaṛṛangnga maabulin MAWU Ruatannu wuṛṛu imbaṛṛangnga mabelengnga su manga MAWU waine inai massubba wuṛṛu mattaramawu si mangitou. Allo indi ya'u mapaanaungngi yamiu manungku amungkangu i yamiu ta'e ma'ola'a lai, i yamiu sarun pateannu MAWU.

²⁰Amungkangngu i yamiu tawe tumuṛṛutta MAWU Ruatanu, i yamiu lai pateanni Tou, ere manga walahanna apan nipate-Ne su saruannu matanu.”