Read Talaud YOHANES 1 Bible Online

YOHANES 1 - Talaud bible

YOHANES 1

¹Su paarorone, tantal᷊anna runia taambe niriaddi, Ṛengetanna udde piate. Ṛengetanna udde su sambau ringannu Ruata wuṛṛu Ṛengetanna udde uasul᷊ungngu Ruata.

²Ro'en paarorone i Tou su sambau ringannu Ruata.

³Sarangkanambone niola'a sulal᷊ummi Tou, wuṛṛu wuassu al᷊awo'u apan piate, tawe saran sambau apan inola'a tawedi Tou.

⁴Ṛengetanna udde punnu wiakka, wuṛṛu wiakka udde mannemakka taumata.

⁵Semakka udde lullansiangnga sulal᷊ummu ararandumma, wuṛṛu ararandumma tawe maapadumma si Tou.

⁶Nirumantate taumata apan nirolokku Ruata, aranne i Yohanes.

⁷I tou nirumanta mammasingkattu asasemakka udde, tadea'u anambon taumata mangngimanna.

⁸I tou sassane wal᷊ine asasemakka udde, i tou tumba'u mabawal᷊one.

⁹Semakka tutune apan mannemakka anambon taumata, nirumanta su runia.

¹⁰Ṛengetanna piate su runia, runia niola'a sulal᷊ummi Tou, arawe runia tawe maaillal᷊a si Tou.

¹¹I Tou nirumanta su wanua-Ne sassane, arawe pabbawala-Ge maddiri manarimmatti Tou.

¹²Arawe pia lai taumata apan manarimmatti Tou wuṛṛu mangngimanna si Tou; i mangitou nionggol᷊annu taṛṛino maola'a ana'u Ruata,

¹³apan niasungkangnga wal᷊ine wuassu taumata, ana waugu wiakka wakku udde punnene wuassu Ruata.

¹⁴Ṛengetanna naola'e taumata, I Tou uatana'a su wallatti ite, wuṛṛu i ite suete naasilo awawantu-Ge. Awawantuga udde suete sinengkammi Tou Ana'u Iamangnga tinggassa. Sulal᷊ummi Tou i ite naasilo Ruata wuṛṛu darangngu-Ne si ite.

¹⁵I Yohanes nirumanta naola'a tatiala-Ne, i tou mammasingkatta: “Ete i Tou indi apan ta'u iwabbatti'a: I Tou sarun rumanta, nasal᷊immuri wuassia'u, arawe magewal᷊anna wuassia'u, ana waugu tantal᷊anna i ya'u taambe, i Tou nirumantate.”

¹⁶I Tou napenen darangngu; tawe illol᷊one, i Tou mangngal᷊amatta si ite.

¹⁷Tita Mawu, nisengkammi ite wuassi Musa. Arawe darangngu wuṛṛu tatal᷊antupu Ruata niapaal᷊iatta'a sulal᷊ummi Yesus Kristus.

¹⁸Tawe saran sangkatou apan suete naasilo Ruata, tumba'u ana'u Iamangnga tinggassa, apan uasul᷊ungngu Iamangnga wuṛṛu uaaukka atonna ringanni Tou. Ete i Tou apan napaal᷊iatta'u Iamangnga si ite.

¹⁹Manga piaṛṛa'u Yahudi su Yerusalem nandolokku manga imam wuṛṛu manga taumatan Lewi inai ringanni Yohanes wuṛṛu naiwal᷊o si tou, “I'o indi isai?”

²⁰I Yohanes nanga'u atonna-tonna, “I ya'u wal᷊ine Ratum Punnu Sal᷊amatta.”

²¹“Amungkangngu aroddi, i'o isai?” aiwal᷊o mangitou. “Apa i'o i Elia?” “Wal᷊ine,” sasimbakki Yohanes. “Apa i'o sangkatou Nabi?” aiwal᷊o mangitou apia. “Wal᷊ine,” sasimbakki tou.

²²“Amungkangngu aroddi, wal᷊oa'e si yami isai i'o indi,” unni mangitou, “tadea'u i yami wotongnge sumimbakka aiwal᷊o manga taumata apan nandolokki ami. Apa wisaranu su ola'u ririnu sassane?”

²³I Yohanes sinumimbakka, “Ete i ya'u apan niapaasingkatti Nabi Yesaya: ‘Taumata apan u'al᷊iata su wadda'a: Rataṛṛa'e lal᷊anna amatannu Mawu.’ ”

²⁴Manga taumata apan nirolokku taumatan Farisi,

²⁵naiwal᷊o, “Amungkangngu i'o wal᷊ine Ratun Punnu Sal᷊amatta, wal᷊ine i Elia, wal᷊ine lai sangkatou Nabi, anio i'o mannaṛṛani?”

²⁶I Yohanes sinumimbakka, “I ya'u mannaṛṛani ringannu ua'e. Arawe su pattangnganni yamiu pia taumata apan tawe aillal᷊anni yamiu.

²⁷I Tou nirumanta sal᷊immurine wuassia'u, arawe mamu'a tal᷊in sapatu-Ne lai ya'u tawe wotongnge.”

²⁸Sarangkanambone udde nariaddi su Betania, samba'an ra'in Sal᷊ukku Yordan, su tampan Yohanes mannaṛṛani.

²⁹Su allo tiṛṛabbine, i Yohanes naasilo Mawu Yesus nirumanta ringanni tou. See i Yohanes nabbisara, “Pa'ellega, eteudde Ana'u Domban Ruata apan namappassa rosan runia indi.

³⁰Ete i Tou apan ta'u iwabbatti'a apan nirumanta murine wuassia'u, arawe maggewal᷊anna wuassia'u, ana waugu ya'u taambe niasungkangnga, i Tou uddete su runia.

³¹Su paarorone, ya'u wagga isai i Tou udde. Sumbal᷊i ya'u nirumanta mannaṛṛani ringannu ua'e, tadea'u taumatan Israel maaillal᷊a si Tou.”

³²I Yohanes nangagillu lai tatiala indi, “I ya'u naasilo Ghaṛṛahon Ruata niumonto'a ere manu'a merpati wuassu langitta see nangintaṛṛo si Tou.

³³Tempo udde i ya'u ta'e wagga isai i Tou. Arawe Ruata apan nandolo'u manaṛṛani ringannu ua'e suete nabbisara si ya'u, ‘Napawe i'o maasilo Ghaṛṛahon Ruata niumonto'a, see matana'a mangintaṛṛo su sangkatou, ete i Tou apan manaṛṛani ringannu Ghaṛṛahon Ruata.’

³⁴I ya'u suete naasilo sassane,” unni Yohanes, “wuṛṛu ya'u mangonggolu tatiala manungku ete i Tou Ana'u Ruata.”

³⁵Su allo tiṛṛabbine i Yohanes su tampa udde lai ringannu ruang katou mallal᷊aṛṛenggenne.

³⁶Napawe i tou naasilo Mawu Yesus sinumabbi, i tou nabbisara, “Pa'ellega! Eteudde Ana'u Domban Ruata.”

³⁷Ruang katou mallal᷊aṛṛenggenni Yohanes naaringikka manga watti'a udde, see inaite tinumantalongnga Mawu Yesus.

³⁸Mawu Yesus nanaile su liudde, wuṛṛu naasilo si mangitou uatantalongnga si Tou, i Tou naiwal᷊o, “Yamiu maddea'a apa?” I mangitou sinumimbakka, “Rabi, Rabi uatana'a suapa?” (Wisara ‘Rabi’ atappasanne huru.)

³⁹“Wette pa'ellege sassane,” unnu Mawu Yesus. I mangitou inaite su sambau ringanni Tou ma'ellega suapa i Tou uatana'a. Orassa udde puulle appatta wawallo. Allo udde i mangitou uatana'a su sampunna ringanni Tou.

⁴⁰Sangkatou su wallatti tarua apan suete naaringikka apa apan iwabatti'i Yohanes wuṛṛu see inaite tinumantalongnga Mawu Yesus, eteudde i Andreas, tuṛṛangngi Simon Petrus.

⁴¹Mal᷊iha-l᷊ihakka i Andreas naddea'a si Simon, tuṛṛangnge, wuṛṛu nabbisara si tou, “Yami suete nassomba Mesias!” (Mesias nassul᷊ungngi Kristus, eteudde: Ratum Punnu Sal᷊amatta.)

⁴²I Andreas nanguntudi Simon ringannu Mawu Yesus. Mawu Yesus nanutuda si Simon, see nabbisara, “I'o Simon, ana'i Yona. I'o sarun isago i Kefas.” (Kefas uasul᷊ungngi Petrus, atappasanne: wowom batu.)

⁴³Su allo tiṛṛabbine Mawu Yesus naṛṛawessa inai watukku Galilea. I Tou nassombam Filipus, wuṛṛu nabbisara si tou, “Wette tantalongke si Ya'u!”

⁴⁴I Filipus inasapputanne wuassu Betsaida, eteudde tampa atatanaanni Andreas wuṛṛu i Petrus.

⁴⁵I Filipus nassomba Natanael wuṛṛu nabbisara si tou, “Yami suete nassomban taumata apan iwabal᷊o Musa sulal᷊ummu Wuken Titan Ruata, wuṛṛu niapaasingkattu manga nabi. I Tou eteudde Mawu Yesus wuassu Nazaret ana'i Yusuf.”

⁴⁶Arawe i Natanael sinumimbakka, “Wotongngewe sambau apapia rumanta wuassu Nazaret?” “Wette pa'ellega sassane,” sasimbakki Filipus.

⁴⁷Mawu Yesus naasilo si Natanael nirumanta, see nabbisara su ola'i tou, “Pa'ellega, udde taumatan Israel tutune. Tawe awusune i tou.”

⁴⁸“Ereapa Iamangnga maaillal᷊a si ya'u?” aiwal᷊o Natanael su Mawu Yesus. Mawu Yesus sinumimbakka, “Tantal᷊anna i Filipus taambe namaggo si'o, i Ya'u naasilote si'o su al᷊ungngu alu ara udde.”

⁴⁹“Iamangnga Huru,” unni Natanael, “Iamangnga eteudde Ana'u Ruata! Ete Iamangnga Ratum walahannu Israel!”

⁵⁰Mawu Yesus nabbisara, “I'o mangngimanna, tumba'u ana waugu i Ya'u nabbisara manungku i Ya'u naasilote si'o su al᷊ungngu alu ara udde? Manga inolaanna apan maggewal᷊anna wuassu inolaanna udde sarun asiloannu!”

⁵¹Mawu Yesus nabbisara apia, “Atonna, pangimante, i'o sarun maasilo langitta mawu'a, wuṛṛu manga mala'ekattu Ruata uapapal᷊ele ringannu Ana'u Taumata.”