Read Talaud YOHANES 10 Bible Online

YOHANES 10 - Talaud bible

YOHANES 10

¹“Mangke atonna wisara-U indi: Taumata apan sumutta sulal᷊ummu tanda'u domba lumiu pagalla, wuṛṛu tawe sumutta su ngara, arawe umawitta sumabbi lal᷊anna waine, taumata udde taṛṛa ta'o wuṛṛu taṛṛa rampassa.

²Arawe taumata apan sinumutta wuassu ngara, ete i tou mallal᷊u'adda domba.

³Mandariaga tanda'a mammu'a ngara suttanni tou, wuṛṛu manga domba uatantalongnga tingikke su tempo i tou mammago si mangitou ringannu aranne sambau-sambau wuṛṛu mangngehetta si mangitou su liudde.

⁴Napawe manga domba udde niapidde su liudde, mallal᷊u'adda udde u'amatta rorone, wuṛṛu manga domba udde uatantalongnga si tou, ana waugu i mangitou ma'aillal᷊a tingikke.

⁵I mangitou maddiri tumantalongnga taumata waine, ewe'e tumal᷊angngu taumata udde, ana waugu i mangitou tawe maaillal᷊a tingikke.”

⁶Mawu Yesus nabbati'u sasumandingnga udde, arawe i mangitou tawedu naasunna apa panduman-Ne.

⁷Ne Mawu Yesus nabbisara paassa lai, “Mangke atonna wisara-U indi: Ete i Ya'u ngara suttannu domba.

⁸Sarangkanambone apan nirumanta nalliu ṛoro wuassia-U, udde taṛṛa ta'o wuṛṛu taṛṛa rampassa, arawe manga domba udde tawe maddaringikka tingikki mangitou.

⁹Ete i Ya'u ngara. Isai apan sumutta sumabbi si Ya'u, sarun masal᷊amatta; i tou sumabangnga wuṛṛu sumutta sarun maasomba wiakka.

¹⁰Taṛṛa ta'o rumanta tumba'u manna'o, mamate, wuṛṛu manggohakka. Arawe i Ya'u nirumanta tadea'u taumata maasomba wiakka — wiakka apan tawe masue.

¹¹Tumba'u i Ya'u mallal᷊u'adda apan mapia. Mallal᷊u'adda mapia mannantillu niawa-Ne ipanal᷊i manga domba-Ne.

¹²Taumatan sewa apan wal᷊ine mallal᷊u'adda wuṛṛu wal᷊ine lai tatahuannu manga domba udde, sarun tumal᷊angnga manantangngu manga dombane napawe i tou naasilo serigala rumanta. Ne manga domba udde sarun sametanne wuṛṛu isal᷊iawukku serigala.

¹³Taumatan sewa udde tumal᷊angnga, ana waugu i tou mammanara tumba'u maddea'a roitta.

¹⁴Tumba'u i Ya'u mallal᷊u'adda apan mapia. Ere lai Iamangnga maaillal᷊a si Ya'u, wuṛṛu i Ya'u lai ma'aillal᷊a Iamangnga, aroddi lai Ya'u maaillal᷊a manga domba'u wuṛṛu i mangitou lai maaillal᷊a si Ya'u. I Ya'u mannantillu niawa-U ana waugu i mangitou.

¹⁶Ta'e pia manga domba waine lai apan tatahuanang-Ku, arawe tawe nareengnga sulal᷊ummu wageangngu domba indi. I mangitou lai ṛinone Ta'u iapidda wuṛṛu i mangitou sarun madaringikka tingi-U. I mangitou sarangkanambone sarun maola'a ammul᷊anna sambau ringannu mallal᷊u'adde sangkatou.

¹⁷Iamangnga mandangngu si Ya'u ana waugu i Ya'u mannantillu niawa-U, see manengkamma apia.

¹⁸Tawe saran sangkatou wotongnge mangaṛṛo wuassia-U. I Ya'u manantilla wuassu apulu-U sassane. I Ya'u uataṛṛino manantilla, wuṛṛu uataṛṛino mangul᷊e apia. Eteudde manara apan Ta'u sinengkakama wuassu Iamang-Ku.”

¹⁹Ana waugu Mawu Yesus nabbisara aroddi, manga taumatan Yahudi mannattakke uatataiakka.

²⁰Manambo taumata mabbisara, “I tou niasuttannu setanna! I tou wewa! Ipa'ura i yamiu madaringikka si Tou?”

²¹Arawe piaddu lai mabbisara, “Taumata apan niasuttannu setanna tawe maawisara aroddi! Wotongnge setanna maaola'a taumata wuta maasilo?”

²²Su Yerusalem manga taumata tantal᷊anna mallaggun Allo Wahewa Manattakka Sumutta su Wal᷊e Mawu. Tempo udde runia masunge.

²³Mawu Yesus tantal᷊anna u'amatta su panumbal᷊en Salomo sulal᷊ummu Wal᷊e Mawu,

²⁴su tempo udde manga taumatan Yahudi nirumanta ma'ammulla mamal᷊iwutta Mawu Yesus. I mangitou nabbisara, “Sara tingngera I'o mamalang kami uapapadua? Wal᷊oa'e paasemakka, amungkangngu I'o atonna-tonna Ratum Punnu Sal᷊amatta.”

²⁵Mawu Yesus sinumimbakka, “Suete Ta'u niwal᷊o si yamiu, arawe i yamiu maddiri mangngimanna. Manga manara Ta'u ola'anna su arannu Iamang-Ku, mangngonggolu tatiala su ola'u riri-U

²⁶I yamiu maddiri mangngimanna ana waugu i yamiu tawe nareengnga manga domba-U.

²⁷Manga domba-U madaringikka tingi-U. I Ya'u ma'aillal᷊a si mangitou, wuṛṛu i mangitou uatantalongnga si Ya'u.

²⁸I Ya'u mangngonggolu wiakka tutune wuṛṛu saran mal᷊annu-l᷊annu si mangitou, wuṛṛu sarangkal᷊o'engnge i mangitou tawe mate. Tawe saran sangkatou apan botongnge mangaṛṛo si mangitou wuassu lima-U.

²⁹Iamang-Ku, apan suete nanantilli mangitou si Ya'u, nanampal᷊iu wuassu sarangkanambone. Wuṛṛu tawe saran sangkatou wotongnge mangaṛṛo si mangitou wuassu liman Iamangnga.

³⁰I Ya'u wuṛṛu Iamangnga tumba'u sambau.”

³¹See manga taumatan Yahudi namurutta watu ipanuntungnga Mawu Yesus.

³²Arawe Mawu Yesus nabbisara si mangitou, “I yamiu suete naasilo si Ya'u ma'ola'a manambo manara apan mapia, apan niapamanaran Iamangku si Ya'u. Wuassu anambo manara udde, suapane apan naa'al᷊udda si yamiu na'oman sara i yamiu mammareta si Ya'u?”

³³Manga taumatan Yahudi udde sinumimbakka, “Wal᷊inewe ana waugu manga manaranu apan mapia udde i yami manuntungngu watu Si'o, arawe ana waugu I'o mangngadio'a Ruata. I'o sangkatou taumata, ma'apulu ma'ola'a riri-Nu ere Ruata.”

³⁴See Mawu Yesus sinumimbakka, “Wal᷊inewe sulal᷊ummu Wuken Titanu uawoṛṛetta: Ruata nabbisara, ‘Ete i yamiu udde mawu?’

³⁵I ite masingkatta manungku apa apan uawoṛṛetta sulal᷊ummu Wuke Susi ipappaatta sarangkal᷊o'engnge. Nariaddi, amungkangngu Ruata mangonggolu aranna ‘mawu’ su manga taumata apan madaringikka wisara-Ne,

³⁶anio i yamiu mabbisara si Ya'u mangngadio'a Ruata ana waugu nabbisara i Ya'u Ana'u Ruata? Sumbal᷊i Ya'u nipilen Ruata wuṛṛu nirolokka watukku runia.

³⁷Amungkangngu i Ya'u tawe ma'ola'a manara apan tinantillu Iamangnga, i yamiu arie pangimanna si Ya'u.

³⁸Arawe ana waugu i Ya'u, tinumuṛṛutta manara udde, pangimante apa apan Ta'u ola'anna udde, salaiwe i yamiu maddiri mangngimanna si Ya'u. Ringannu aroddi yamiu maasingkatta wuṛṛu naasunna manungku Iamangnga sidutu su sambau ringang-Ku, wuṛṛu i Ya'u sidutu su sambau ringannu Iamangnga.”

³⁹I mangitou maddea'a lai manametta Mawu Yesus, arawe i Tou naatal᷊angnga wuassi mangitou.

⁴⁰Mawu Yesus nabelengke watukku samba'an Sal᷊ukku Yordan, su tampan Yohanes dorone mannarani, see natana'e poiaroddi.

⁴¹Manambo taumata nirumanta ringanni Tou. I mangitou mabbisara, “I Yohanes tawe ma'ola'a manga al᷊aṛṛindu'a, arawe anambon bisara su ola'u taumata indi mangke atonna.”

⁴²See manambo taumata poiaroddi mangngimanna Mawu Yesus.