Read Talaud YOHANES 11 Bible Online

YOHANES 11 - Talaud bible

YOHANES 11

¹Sangkatou aranne i Lazarus uatana'a su Betania su sampunna ringannu tuṛṛangnge i Maria wuṛṛu i Marta.

²I Maria eteudde wawine apan nallal᷊innu lana mawangngi su ledda Mawu Yesus, wuṛṛu see niapun uta'i tou. Su sambau allo i Lazarus nirumada'a.

³Ruang katou tuṛṛangnge namasingkatta Mawu Yesus, “Mawu, tuṛṛangngi yami apan arangnguannu Mawu udde marada'a.”

⁴Napawe Mawu Yesus naaringikka watti'a udde, i Tou nabbisara, “Rada'a indi tawe maapate. Indi mariaddi tadea'u Ruata wantuhanna, wuṛṛu tadea'u ana waugu udde Ana'u Ruata lai iapaawantuga.”

⁵Mawu Yesus marangngu si Marta, si Maria wuṛṛu si Lazarus.

⁶Arawe napawe Mawu Yesus naaringikka watti'a manungku Lazarus marada'a, i Tou natana'a rua allo lai su tampane.

⁷Wua'udde i Tou nabbisara su mallal᷊aṛṛenggen-Ne, “Wette i ite mabelengnga su Yudea.”

⁸I mangitou sinumimbakka, “Iamangnga Huru, wakkute tanginna manga taumatan Yahudi ma'apulu manuntungngu watu su Iamangnga see orassa indi Iamangnga maapulu mabelengnga apia poiaroddi?”

⁹“Wal᷊inewe allo al᷊annune mapul᷊o dua su oranne?” Wisara Mawu Yesus. “Taumata apan u'amatta su tempo allo, tawe matara ana waugu i tou ma'asilo semakku runia indi.

¹⁰Arawe taumata apan u'amatta su tempo ṛabbi, mattara ana waugu tawe asasemakka si tou.”

¹¹Ete aroddi unnu Mawu Yesus. Wua'udde i Tou nabbisara apia, “Haweng kite i Lazarus mattiille, arawe I Ya'u sarun inai mamu'o si tou.”

¹²Manga mallal᷊aṛṛenggennu Mawu Yesus nabbisara, “Mawu, amungkangngu Lazarus mattiilla, ṛaddoite i tou sarun mapia.”

¹³Pandumannu Mawu Yesus eteudde manungku i Lazarus natete. Arawe i mangitou massunna manungku pandumannu Mawu Yesus udde Lazarus mattiilla wiasa.

¹⁴Ana waugu udde Mawu Yesus nabbisara si mangitou ringannu masema-semakka, “I Lazarus natete.

¹⁵Arawe i Ya'u lulluassa lai ana waugu i Ya'u tawe poiaroddi, ana waugu mappianne si yamiu, tadea'u i yamiu wotongnge mangngimanna. Wette i ite inaite orassa indi ringanni Lazarus.”

¹⁶I Tomas isassago “I Ṛindua” nabbisara su manga ringanne mallal᷊aṛṛenggennu Mawu Yesus, “Wette i ite tumantalongnga, salaiwe i ite mate su sambau ringanni Tou!”

¹⁷Napawe Mawu Yesus na'omate su tampa udde, i Lazarus appate allo al᷊annune nilabingnga.

¹⁸Betania maranin Yerusalem, itatakasere tallu kilo meteṛṛe araune.

¹⁹Manambo taumatan Yahudi nirumanta nattembo si Marta wuṛṛu si Maria malluassa naungngi mangitou ana waugu apapaten tuṛṛangnge.

²⁰Napawe i Marta naaringikka Mawu Yesus nirumanta, i tou sinumabangnga nanal᷊oho Mawu Yesus, arawe i Maria natana'a su wal᷊e.

²¹Wisara Marta su Mawu Yesus, “Mawu, wuṛṛu Mawu isindi su orassa udde, asinungka tuṛṛangku tawe nate.

²²Arawe aroddi i ya'u masingkatta manungku orassa indi lai Ruata sarun mangagillu apa apan radorongannu Mawu si Tou.”

²³“Tuṛṛangngu sarun mabbiakka apia,” wisara Mawu Yesus si Marta.

²⁴I Marta sinumimbakka, “I ya'u masingkatta i Lazarus sarun mabbiakka apia napawe taumata nate iapawangunna su Allong Kiamatta.”

²⁵“Ete i Ya'u apan mangngonggolu wiakka wuṛṛu mapaawangunnu taumata nate,” wisara Mawu Yesus si Marta. “Taumata apan mangngimanna si Ya'u sarun mabbiakka, salaiwe i tou natete.

²⁶Wuṛṛu taumata wiakka apan mangngimanna si Ya'u sarangkal᷊o'engnge, i tou tawe mate. Mangngimannawe i'o su olangnge udde?”

²⁷“Mawu,” sasimbakki Marta, “i ya'u mangngimanna Mawu Ana'u Ruata, Ratum Punnu Sal᷊amatta apan sarun rumanta su runia indi.”

²⁸Napawe i Marta nabbisara aroddi, i tou inaite namago si Maria, tuṛṛangnge wuṛṛu sinumal᷊imburungnga si tou, “Iamangnga Huru isindite; i Tou ma'iwal᷊onu.”

²⁹Naaringikka udde, i Maria mal᷊iha-l᷊ihakka nabuatta see inaite naisasomba Mawu Yesus.

³⁰Tempo udde, Mawu Yesus taambe sinumutta su ampungnga. I Tou ta'e su tampa Marta naisasomban Tou.

³¹Manga taumatan Yahudi apan tantal᷊anna mallimbatta naungngi Maria su wal᷊e, naasilo si Maria nabbuatta wuṛṛu mal᷊iha-l᷊ihakka sinumabangnga; nariaddi i mangitou inai lai tinumantalongnga si tou, ana waugu i mangitou massunna manungku i tou inai su lal᷊abinganna lumuai.

³²Napawe i Maria na'omate su tampa Mawu Yesus wuṛṛu naasilo si Tou, i Maria inumal᷊intuda su saruannu Mawu Yesus wuṛṛu nabbisara, “Mawu, amungkangngu Mawu isindi su orassa udde, asinungka tuṛṛangku tawe nate.”

³³Napawe Mawu Yesus naasilo si Maria lulluai, wuṛṛu manga taumatan Yahudi nirumanta sangkaṛṛindo'i Maria udde lai lulluai, naung-Nge nasusa, wuṛṛu i Tou niasiloanna mangke natuno atonna.

³⁴Ne i Tou naiwal᷊ote si mangitou, “Suapa i yamiu nallabingngi tou?” “Wette pa'ellega, Mawu,” sasimbakki mangitou.

³⁵See Mawu Yesus nilumuai.

³⁶Ne manga taumatan Yahudi udde nabbisara, “Pa'ellega tawe hampa darangngu-Ne si Lazarus!”

³⁷Arawe pia su wallatti mangitou apan nabbisara, “I Tou na'ola'a taumata wuta naasilo, anio i Tou tawe naawa'ungnga tadea'u i Lazarus tawe mate?”

³⁸Mawu Yesus lembo natuno naung-Nge, see inaite su lal᷊abinganna. Lal᷊abinganna udde sambau loṛṛangnga apan nitaapannu watu wahewa.

³⁹“Irua'a watu udde,” unnu Mawu Yesus. I Marta, tuṛṛangngu taumata nate udde sinumimbakka, “Arawe Mawu, i tou appate allo nilabingnga. Hal᷊urune mawukku'e!”

⁴⁰Mawu Yesus nabbisara si Marta, “Wal᷊inewe suete niwal᷊o-U si'o: amungkangngu i'o mangngimanna, i'o sarun maasilo aroddi ahewalle taṛṛinon Ruata!”

⁴¹Ne i mangitou nangiruten batu udde. See Mawu Yesus naningngara watukku langitta wuṛṛu nabbisara, “Aadiangkamanna, Iamangnga, ana waugu I'o suete naddaringikka si Ya'u.

⁴²I Ya'u masingkatta I'o sidutu uararingikka si Ya'u, arawe I Ya'u mabbisara indi, hunane su manga taumata isindi; tadea'u i mangitou mangngimanna manungku ete I'o apan nandolo-U.”

⁴³Napawe suete nabbisara aroddi, Mawu Yesus inumui ringannu tingikka ma'ikkatta, “Lazarus, sabbangke!”

⁴⁴Ne sinumabbangke taumata apan natete udde. Lima wuṛṛu leddane ta'e papi'unannu kaengnga kafan, wuṛṛu hatine tataapannu kaengnga tataappa hati. “Wu'ate kaengnga udde; tadea'u i tou wotongnge umamatta,” unnu Mawu Yesus su manga taumata isudde.

⁴⁵Manambo manga taumatan Yahudi nirumanta mattembo si Maria, nangimanna Mawu Yesus su tempo i mangitou naasilo arariaddianna udde.

⁴⁶Arawe manga pira su wallatti mangitou inaite ringannu taumatan Farisi wuṛṛu nangalae apa apan suete niola'u Mawu Yesus.

⁴⁷Ana waugu udde manga taumatan Farisi wuṛṛu manga imam tembonanne naammulla ringannu Mallaṛṛuungngu Agama. I mangitou nabbisara, “I ite ṛinone ma'ola'a apa? Taumata indi ma'ola'a anambon al᷊aṛṛindu'a!

⁴⁸Amungkangngu i ite sidutu mamalan Tou arendi, manambo taumata sarun mangngimanna si Tou. Wuṛṛu panginsueanne tembonannu Roma sarun rumanta wuṛṛu manggohakku Wal᷊e Mawu wuṛṛu anambon walahanni ite!”

⁴⁹Sangkatou su wallatti mangitou apan aranne Kayafas, imam wahewa su tonna udde, nabbisara, “I yamiu waggan apa-apa.

⁵⁰Apa i yamiu tawe maatutukka manungku ana waugu tumanangnge, mappianne sangkatou mate wuassu al᷊awo'u walahanna indi maṛṛimunsa'a?”

⁵¹Su ṛinone i Kayafas nabbisara aroddi, wal᷊ine wuassu ṛingiranne sassane. Arawe ana waugu i tou sangkatou imam bahewalla tonna udde, i tou namasingkatta manungku Mawu Yesus sarun mate hunane tumba'u su walahannu Yahudi.

⁵²Wuṛṛu wal᷊ine tumba'u su walahannu Yahudi sassane, arawe hunane lai mangammula wuṛṛu manggemonnu manga al᷊aṛṛana'u Ruata apan uasal᷊iawukka.

⁵³Nanattakka allo udde manga tembonannu Yahudi na'irete mamate Mawu Yesus.

⁵⁴Ana waugu udde Mawu Yesus tate nattingkapasilo su saruannu awada'alla su pattangngannu taumatan Yahudi. I Tou nanantangken Yudea, see inaite watukku soa aranne Efraim marani wadda'a. Isudde i Tou natana'a su sampunna ringannu mallal᷊aṛṛenggen-Ne.

⁵⁵Tempo udde maranite Allo Wahewam Paskahn Yahudi. Manambo taumata wuassu manga ampungnga inai watukku Yerusalem mallaghum pamamaresi wadangnga tantal᷊anna taambe ramea udde.

⁵⁶I mangitou maddea'a Mawu Yesus, wuṛṛu su tempo uaammulla su Wal᷊e Mawu, i mangitou naiwal᷊o sangkatou ringannu waine. “Ereapa addapannu? Asinungka i Tou tawe rumanta su ramea indi.”

⁵⁷I mangitou nabbisara aroddi ana waugu manga imam tembonanne wuṛṛu manga taumatan Farisi suete namarenta manungku taumata apan masingkattu tampa Mawu Yesus, ṛinone mabal᷊o tadea'u i Tou wotongnge sametanna.