Read Talaud YOHANES 12 Bible Online

YOHANES 12 - Talaud bible

YOHANES 12

¹Annummu allo tantal᷊anna taambe Allo Wahewam Paskah, Mawu Yesus inaite su Betania. Su soa udde uatana'a i Lazarus apan suete niapawangunna wuassu papate.

²Poiaroddi Mawu Yesus sinaruanni mangitou, wuṛṛu i Marta nangimbe. I Lazarus wuṛṛu manga raho ua'ianna su sampunna u'anna ringannu Mawu Yesus.

³Wua'udde i Maria nirumanta uaapiddu iraṛṛangngo mal᷊oara su liteṛṛe lana mawangngi narwastu apan masagada atonna aregane. I Tou nanebokku lana udde su ledda Mawu Yesus, see niapun uta'i tou. Ahewallu wal᷊e udde nabal᷊i mawangngi ana waugu hal᷊urun lana udde.

⁴Arawe Yudas Iskariot, sangkatou su wallattu mallal᷊aṛṛenggennu Mawu Yesus — apan wua'udde nandal᷊eo si Tou — nabbisara,

⁵“Anio lana mawangngi udde tawe niwal᷊u'a ringannu aregane tallu ṛasutta roitta sal᷊a'a, wuṛṛu roinne ionggolla su taumata asiangnga?”

⁶I Yudas nabbisara aroddi wal᷊ine ana waugu i tou tuttundaallu taumata asiangnga, arawe ana waugu i tou taṛṛa ta'o. I tou masokka manna'o roitti mangitou wuassu pangadoannu roitta apan uaraddo si tou.

⁷Arawe Mawu Yesus nabbisara, “Wala'e wawine udde! I tou na'ola'a indi hunan allo pallabingang-Ku.

⁸Taumata asiangnga sidutu su wallatti yamiu, arawe i Ya'u tawe.”

⁹Manambo taumatan Yahudi naaringikka manungku Mawu Yesus poi su Betania, nariaddi i mangitou inaite lai poiaroddi. I mangitou inai tawe tumba'u ana waugu Mawu Yesus. Arawe ana waugu i mangitou lai maapulu ma'ellega si Lazarus apan suete niapaawiakki Tou wuassu papate.

¹⁰Ana waugu udde manga imam tembonanne ma'apulu lai mamate si Lazarus;

¹¹ana waugu ete i tou naanambo taumatan Yahudi nanantangngi mangitou, wuṛṛu nangimanna Mawu Yesus.

¹²Su allo tiṛṛabbine manga taumata apan suete nallaghum Paskah, naaringikka manungku Mawu Yesus tantal᷊anna u'amatta matuddan Yerusalem.

¹³Ne i mangitou nanappo manga rongngu palem see inaite nanansomakka si Tou, lapiddu u'ui, “Paddalote Ruata! Inal᷊amatanna i Tou apan nirumanta ringannu arannu Mawu. Nial᷊amatanna Ratun Israel!”

¹⁴Mawu Yesus naasomba sambau keledai saṛṛen tumuwo wuṛṛu sina'eanni Tou. Natipusse apa apan uawoṛṛetta sulal᷊ummu Wuke Susi:

¹⁵“Arie pa'ata'utta, sinangiannu Sion! Pa'ellege Ratunu nirumanta, uasa'e sambau keledai saṛṛen tumuwo!”

¹⁶Su tempo udde manga mallal᷊aṛṛenggennu Mawu Yesus taambe naasunna sarangkanambone udde. Arawe napawe Mawu Yesus niapaawantuga ringannu papate-Ne, wakkute udde i mangitou naanaungnga manungku apa apan niola'u manga taumata si Tou uawoṛṛette sulal᷊ummu Wuke Susi su ola'i Tou.

¹⁷Manga taumata apan uasemodda su tempo Mawu Yesus namago si Lazarus niapasabangnga wuassu lal᷊abinganna wuṛṛu namangunna si tou wuassu papate, sidutu mattiala su olangnge udde.

¹⁸Ana waugu udde taumata nambo inaite ringannu Mawu Yesus ana waugu i mangitou naaringikka manungku ete i Tou apan na'ola'a al᷊aṛṛindu'a udde.

¹⁹Ne manga taumatan Farisi uawawisarate sangkatou ringannu sangkatou, “I ite tawe mapa'ola'a apa-apa! Pa'ellege, anambon lal᷊oṛṛon runia uatantalongnga si Tou!”

²⁰Su wallattu manga taumata apan inai su Yerusalem mattaṛṛamawu su tempon ramea udde pia lai manga pira taumatan Yunani.

²¹I mangitou nirumanta ringanni Filipus wuṛṛu nabbisara, “Tuṛṛangnga, amungkangngu wotongnge, i yami maapulu maisasomba Mawu Yesus.” (I Filipus taumata wuassu Betsaida su Galilea.)

²²Ne i Filipus inaite namasingkattu pandumanne udde si Andreas, wuṛṛu sal᷊immurine itarua namasingkatte Mawu Yesus.

²³Mawu Yesus nabbisara si mangitou, “Nia'omante tempone Ana'u Taumata wantuhanna.

²⁴Mangke atonna wisara-U indi: Amungkangngu gandumma sambatu tawe iasi'a su leta'a wuṛṛu mate, i tou ta'e matatana'a sambatu. Arawe amungkangngu watun gandumma udde mate, wakkute udde i tou mabua manambo.

²⁵Taumata apan mandangngu wiakke sarun awul᷊iannu wiakke. Arawe taumata apan maddantinnu wiakke su runia indi, sarun maapadul᷊i wiakka tutune wuṛṛu saran mal᷊annu-l᷊annu.

²⁶Taumata apan maapulu mangimbe si Ya'u ṛinone tumantalongnga si Ya'u; tadea'u mangangimbe'u wotongnge su sambau ringang-Ku su tampa i Ya'u uatana'a. Taumata apan mangngimbe si Ya'u sarun addatannu Iamang-Ku.”

²⁷“Naungku sussinggawangnga; apa Ta'u iwisara su orassa indi? Ṛinonewe i Ya'u mabbisara, ‘Iamangnga liua'awe i Ya'u wuassu orassa indi’? Arawe tadea'u i Ya'u maapendamma orassu asasusa indi i Ya'u nirumanta.

²⁸Iamangnga, mawantuga arannu!” Ne niaringiṛṛanna tingikka wuassu langitta nabbisara, “I Ya'u suete namantuga si Tou, wuṛṛu i Ya'u sarun mamantuga lai si Tou.”

²⁹Awada'alla isudde naaringikka tingikka udde. I mangitou nabbisara, “Udde rallu'a!” Arawe piaddu lai nabbisara, “Wal᷊ine! Mala'ekatta uahahatton Tou!”

³⁰See Mawu Yesus nabbisara si mangitou, “Tingikka udde niaringiṛṛanna, wal᷊ine hausang-Ku, arawe maola'a hausannu.

³¹Tempone nia'omante runia parikisanna; orassa indi tembonannu runia tate ipaatta.

³²Arawe i Ya'u indi, amungkangngu i Ya'u suete niruitta su wowon runia, i Ya'u sarun mamago anambon taumata rumanta ringang-Ku.”

³³I Tou nabbisara aroddi tadea'u mapaal᷊iatta'u ereapa olangnge i Tou mate.

³⁴Manga taumata nambo udde nabbisara si Tou, “Tumuṛṛuttu Wuken Titang kami, Ratun Punnu Sal᷊amatta sarun mabbiakka sarangkal᷊o'engnge. Ereapa I'o wotongnge mabbisara manungku Ana'u Taumata ṛinone iruitta su wowon runia? Isai Ana'u Taumata udde?”

³⁵Mawu Yesus sinumimbakka, “Tumba'u tantal᷊anna adio'a semakka udde su wallatti yamiu. Nariaddi amatte tantal᷊anna semakka udde ta'e pia, tadea'u i yamiu tawe aratingannu randumma. Taumata apan u'amatta su ararandumma wagga suapa pattudanne.

³⁶Pangimante su semakka udde, tantal᷊anna semakka udde ta'e ringanni yamiu, tadea'u i yamiu maola'a al᷊aṛṛana'u asasemakka.” Napawe Mawu Yesus suete nabbisara aroddi, i Tou nangingkatte wua isudde wuṛṛu maddirite mattingkapasilom batangan-Ne si mangitou.

³⁷Salaiwe manambote al᷊aṛṛindu'a apan niola'u Mawu Yesus su saruanni mangitou, i mangitou tawe lai mangngimanna si Tou.

³⁸Ne natipusse apa apan niapasingkatti Nabi Yesaya, “Mawu, isai mangngimanna watti'i yami? Ete sisai taṛṛino Mawu niapaal᷊iatta'a?”

³⁹Ana waugu udde i mangitou tawe mangngimanna, ana waugu Yesaya suete nabbisara apia, “Ruata nabbisara,

⁴⁰‘I Ya'u mapaawuta mata mangitou, maola'a naungngi mangitou maatikka; tadea'u i mangitou tawe maasilo, ṛingiṛṛanni mangitou tawe maasunna. Tadea'u i mangitou tawe mabelengnga ringang-Ku, see I Ya'u mapaapia mangitou.’ ”

⁴¹Yesaya nabbisara aroddi ana waugu i tou suete naasilo awawantugu Mawu Yesus wuṛṛu nabbatti'a su ola'i Tou.

⁴²Salaiwe aroddi, manambo taumata, ewe'e lai su wallattu tembonannu Yahudi lai mangngimanna Mawu Yesus. Arawe i mangitou tawe waṛṛani manga'u udde ringannu uahahati, ana waugu i mangitou matta'utta aṛṛengenne taumatan Farisi maningaddi mangitou sumutta su wal᷊em pattataṛṛamawuanna.

⁴³I mangitou lembo maapulu maasomba daralon taumata wuassu daralon Ruata.

⁴⁴See Mawu Yesus inumui, “Taumata apan mangngimanna si Ya'u, wal᷊inewe si Ya'u i tou mangngimanna, arawe si Tou apan nandolo-U.

⁴⁵Wuṛṛu taumata apan naasilo si Ya'u, naasilo lai si Tou apan nandolo-U.

⁴⁶I Ya'u nirumanta su runia indi maola'a sambau asasemakka, tadea'u anambon taumata apan mangngimanna si Ya'u tawe matana'a sulal᷊ummu ararandumma.

⁴⁷Taumata apan maddaringikka al᷊ara-U, arawe tawe tumuṛṛutta — wal᷊ine i Ya'u makkuumanni tou. Ana waugu i Ya'u nirumanta wal᷊inewe mamarikissa runia indi, arawe rumanta manal᷊amatta.

⁴⁸Taumata apan mannol᷊a-U wuṛṛu maddiri maddaringikka wisara-U, piate mallaṛṛuungnge. Wisara apan Ta'u iapaasingkatta, eteudde sarun ipamarikissa si tou su Allong Kiamatta.

⁴⁹Ana waugu i Ya'u tawe mabbisara wuassu apulu-U sassane; Iamangnga apan nanadolo-U, ete i Tou apan namarenta si Ya'u apa apan Ta'u iwisara wuṛṛu iapaasingkatta.

⁵⁰Wuṛṛu i Ya'u masingkatta manungku parenta-Ne udde mangngonggolu wiakka tutune wuṛṛu saran mal᷊annu-l᷊annu. Ne i Ya'u lai namasingkatta ere lai niaṛṛa'u Iamangnga si Ya'u.”