Read Talaud YOHANES 13 Bible Online

YOHANES 13 - Talaud bible

YOHANES 13

¹Allo massallo tantal᷊anna taambe nia'omanna Allo Wahewam Paskah, Mawu Yesus naasingkatte manungku temponete i Tou manantangngu runia indi mabelengnga ringannu Iamang-Nge. I Tou mandangngu manga taumata apan tatahuanan-Ne su runia, wuṛṛu i Tou sidutu mandangngu si mangitou ma'oman sara panginsueanne.

²Mawu Yesus wuṛṛu manga mallal᷊aṛṛenggen-Ne tantal᷊anna u'anna annu ṛabbi. Setanna suete napaasuttam pandumanne sulal᷊ummu naungngi Yudas ana'i Simon Iskariot ipamate Mawu Yesus.

³Mawu Yesus masingkatta manungku Iamangnga suete nanantillu al᷊awo'u taṛṛino si Tou. I Tou masingkatta lai manungku i Tou nirumanta wua dingannu Ruata wuṛṛu sarun mabelengnga lai ringannu Ruata.

⁴Ana waugu udde i Tou nirumarisikka, nalluatta jubah-Ne, wuṛṛu nama'issu handukka su lawan-Ne.

⁵Wua'udde i Tou nallal᷊innu ua'e sulal᷊ummu sambau pangangukasanna lima, see nanattakke nangukassa ledda manga mallal᷊aṛṛenggen-Ne wuṛṛu niapaamaran handukka apan uawa'issa su lawan-Ne.

⁶Na'omate i Tou ringanni Simon Petrus, apan nabbisara, “Mawu, ṛatadde Mawu nangukkassa ledda'u?”

⁷Mawu Yesus sinumimbakka, “Orassa indi i'o tawe maasunna apa apan a'olaang-Ku indi, arawe sal᷊immurine i'o sarun maasunna.”

⁸“Arie Mawu,” wisaram Petrus su Mawu Yesus, “Arie saran paassa Mawu mangukkassa ledda'u!” Arawe Mawu Yesus sinumimbakka, “Amungkangngu i Ya'u tawe mangukkassa leddanu, i'o tawe paa'aukka ringang-Ku.”

⁹I Simon Petrus nabbisara, “Amungkangngu aroddi, Mawu, arie tumba'u ledda'u, ewe'e lima'u wuṛṛu pua'u lai!”

¹⁰“Taumata apan suete nandeno, nawaresite sarangkanambone,” wisara Mawu Yesus si Petrus. “I tou salaiwe tate waresianna; tumba'u leddane. I yamiu indi nawaresite, arawe tawe sarangkanambone.” (

¹¹Mawu Yesus masingkatte isai apan sarun mamate si Tou. Ana waugu udde i tou nabbisara, “I yamiu indi nawaresite arawe tawe sarangkanambone.”)

¹²Napawe Mawu Yesus suete nangukassa ledda mangitou, i Tou nalluṛṛete apia jubah-Ne see inuma'ianna apia. See i Tou nabbisara si mangitou, “I yamiu maasunna apa apan wakkute niola-U si yamiu?

¹³I yamiu mammago si Ya'u huru wuṛṛu Mawu. Wuṛṛu atonna aroddi.

¹⁴Amungkangngu i Ya'u Mawu wuṛṛu hurunu nangukkassa leddanu, i yamiu ṛinone lai uaa'ukkasa ledda.

¹⁵I Ya'u mangngonggolu tul᷊ada indi si yamiu, tadea'u i yamiu lai ma'ola'a apa apan suete Ta'u inola'a si yamiu.

¹⁶Mangke atonna wisara-U indi: Sangkatou allangnga tawe magewal᷊anna wuassu mawune, wuṛṛu sangkatou darol᷊oṛṛanna tawe magewal᷊anna wuassu mandarolokke.

¹⁷Amungkangngu i yamiu maasingkatten sarangkanambone indi, al᷊al᷊uassa si yamiu apan suete na'ola'a manara udde.

¹⁸Apa apan Ta'u niwisara indi wal᷊inewe su ola'i yamiu sarangkanambone. I Ya'u masingkatta isai-sai apan suete nipile. Arawe apa apan uawoṛṛetta sulal᷊ummu Wuke Susi ṛinone matipussa, eteudde ‘Taumata apan u'anna su sambau ringang-Ku sarun lumawangnga si Ya'u.’

¹⁹Olangnge udde Ta'u iapaasingkatta si yamiu orassa indi, tantal᷊anna taambe natipussa, tadea'u amungkangngu olangnge udde mariaddi, yamiu sarun mangngimanna manungku ete i Ya'u apan isassago I YA'U INDI.

²⁰Mangke atonna wisara-U indi: Isai manarimmattu taumata Ta'u nirolokka, mannarimma-U lai. Wuṛṛu isai mannarimma-U, i tou lai manarimmatti Tou apan nandolo-U.”

²¹Napawe Mawu Yesus suete nabbisara aroddi, naungngi Tou mangke natuno. See i Tou nabbisara, “Mangke atonna wisara-U indi; sangkatou wuassu wallatti yamiu sarun mamate si Ya'u.”

²²Manga mallal᷊aṛṛenggen-Ne uaa'ellega sangkatou ringannu sangkatou, wuṛṛu lembon tinumiangnga ana waugu wagga isai apan ipappandum-Me udde.

²³Mallal᷊aṛṛenggenna apan arangnguannu Mawu Yesus ua'ianna su samba'a Mawu Yesus.

²⁴I Simon Petrus inumeramma si tou, tadea'u i tou maiwal᷊o Mawu Yesus tanne isai apan pappandumanne udde.

²⁵Ne mallal᷊aṛṛenggenna udde nangundani Mawu Yesus wuṛṛu naiwal᷊o, “Isai i tou Mawu?”

²⁶Mawu Yesus sinumimbakka, “Taumata apan Ta'u onggol᷊annu roti apan Ta'u iammo sulal᷊ummu mangko, ete i tou taumatane.” Ne Mawu Yesus nanganu roti sampaddi, niammo sulal᷊ummu mangko see nionggolla si Yudas ana'i Simon Iskariot.

²⁷Napawe i Yudas nanengkamma roti udde, Setanna sinumuttate sulal᷊ummu naungnge. See Mawu Yesus nabbisara si tou, “Ola'e paal᷊ihakka apa apan sarun olaannu.”

²⁸Tawe saran sangkatou wuassi mangitou apan ua'ianna u'anna isudde naasunna anio Mawu Yesus nabbisara aroddi si Yudas.

²⁹Piaddu massunna Mawu Yesus mandolokki Yudas mamalli sarannapa apan ipaatta su andeangnga udde, ara'e mangonggolu roitta adio'a su taumata asiangnga ana waugu i Yudas eteudde sangkatou mananahipunna roitti mangitou.

³⁰Napawe i Yudas nanengkamma roti udde, i tou lapiddu sinumabangnga. Allo ṛabbite.

³¹Napawe i Yudas sinumabangke, Mawu Yesus nabbisara, “Orassa indi Ana'u Taumata wantuhanna, wuṛṛu Ruata wantuhanna sulal᷊ummi Tou.

³²Amungkangngu Ruata wantuhanna sulal᷊ummi Tou, i Tou lai sarun wantuhannu Ruata sulal᷊ummu wadang-Nge sassane. Ewe'e Ruata lai sarun mamantuga si Tou ringannu mal᷊ihakka.

³³Manga al᷊aṛṛana-U, i Ya'u tate matana'a mal᷊annu lai ringanni yamiu. I yamiu sarun maddea'a si Ya'u, arawe ere suete niwal᷊o-U su manga tembonannu Yahudi, aroddi lai iwal᷊o-U si yamiu; su tampa patuddang-Ku, i yamiu tawe maaranta isudde.

³⁴Parenta wakku apan Ta'u ionggolla si yamiu: Padarangngute sangkatou ringannu waine. Ere lai Ya'u mandangngu si yamiu, aroddi lai yamiu ṛinone uararangngu.

³⁵Amungkangngu i yamiu uarararangngu, anambon taumata sarun maasingkatta manungku i yamiu mallal᷊aṛṛenggeng-Ku.”

³⁶“Mawu, Mawu inai watukkuapa?” aiwal᷊on Simon Petrus su Mawu Yesus. Mawu Yesus sinumimbakka, “Su tampa tuddang-Ku, i'o tawe maatantalongnga orassa indi. I'o sarun tumantalongnga si Ya'u sal᷊immurine.”

³⁷“Mawu, anio i ya'u tawe maatantalongnga Mawu orassa indi?” aiwal᷊on Simon Petrus apia. “I ya'u mal᷊uassa mate ana waugu Mawu!”

³⁸Mawu Yesus sinumimbakka, “Atonna i'o mal᷊uassa mate ana waugu i Ya'u? Paanaunge, tantal᷊anna manu'a taambe inumu'u, paatallute i'o nabbisara manungku i'o wagga-U!”