Read Talaud YOHANES 14 Bible Online

YOHANES 14 - Talaud bible

YOHANES 14

¹“Arie naungngu suminggawangnga,” wisara Mawu Yesus si mangitou. “Pangimante Ruata, wuṛṛu pangimante si Ya'u lai.

²Su wal᷊en Iamang-Ku manambo tampa atatanaanna. I Ya'u inai watukku tampa udde manaddia tampang kamiu. I Ya'u tawe mabbisara aroddi si yamiu amungkangngu udde tawe mariaddi.

³Napawe i Ya'u suete nanaddia tampang kamiu, i Ya'u sarun mabelengnga wuṛṛu manal᷊oho si yamiu, tadea'u suapa i Ya'u isudde, isudde lai yamiu.

⁴Watukku tampa i Ya'u umamatta i yamiu lai masingkattu lal᷊anne.”

⁵See i Tomas nabbisara Mawu Yesus, “Mawu, i yami wagga suapa Mawu inai, ereapa i yami maasingkattu lal᷊anne?”

⁶Mawu Yesus sinumimbakka, “Ete i Ya'u lal᷊anna ipa'illal᷊a Ruata wuṛṛu see maasomba wiakka. Tawe saran sangkatou wotongnge rumanta ringannu Iamangnga, amungkangngu tawe umamatta lumiu si Ya'u.

⁷Unnu wisara i yamiu maaillal᷊a si Ya'u, i yamiu lai maaillal᷊a Iamang-Ku. Orassa indi yamiu naaillal᷊ate si Tou, wuṛṛu suete naasilo si Tou.”

⁸Ne i Filipus nabbisara Mawu Yesus, “Mawu ta'ea'a Iamangnga udde si yami tadea'u i yami maasunnate.”

⁹Arawe Mawu Yesus sinumimbakka, “Mal᷊annute i Ya'u su sambau ringanni yamiu, i yamiu taambe lai naaillal᷊a si Ya'u, Filipus? Taumata apan naasilote si Ya'u, naasilote lai Iamangnga. Ereapa i'o wotongnge mabbisara, ‘Ta'ea'a Iamangnga si yami’?

¹⁰Filipus! I'o tawe mangngimanna, manungku i Ya'u su sambau ringannu Iamangnga, wuṛṛu Iamangnga su sambau ringang-Ku? Apa niwisara-U si'o, tawe niwisara-U wuassu wadang-Ku sassane. Iamangnga apan sidutu su sambau ringang-Ku ete i Tou apan nammanara sarangkanambone udde.

¹¹Pangimante si Ya'u, manungku i Ya'u su sambau ringannu Iamangnga wuṛṛu Iamangnga su sambau ringang-Ku. Ara'e amungkangngu tawe, pangimante, ana waugu al᷊awo'u inolaang-Ku apan suete niola-U.

¹²Mangke atonna wisara-U indi; Taumata apan mangngimanna si Ya'u, sarun tumuṛṛutta apa apan suete Ta'u niola'a, — ewe'e i tou sarun ma'ola'a lembon ahewal᷊anne lai — ana waugu i Ya'u inai ringannu Iamangnga.

¹³Wuṛṛu al᷊awo'u apa apan raddoronganni yamiu sulal᷊ummu arang-Ku, udde sarun olaang-Ku lai si yamiu, tadea'u Iamangnga wantuhanna sulal᷊ummu Ana'a.

¹⁴Al᷊awo'u apa apan raddoronganni yamiu sulal᷊ummu arang-Ku, sarun olaang-Ku.”

¹⁵“Amungkangngu i yamiu marangngu si Ya'u, i yamiu sarun tumuṛṛutta manga parenta-U.

¹⁶I Ya'u sarun madorongnga su Iamangnga, wuṛṛu i Tou sarun manganggilla si yamiu Mattatul᷊ungnga waine, apan sarun matana'a ringanni yamiu saran mal᷊annu-l᷊annu.

¹⁷I Tou udde Ghaṛṛahon Ruata apan sarun mapaal᷊iatta'u atatul᷊iddu Ruata. Runia maddirin Tou, ana waugu tawe maasilo wuṛṛu tawe maaillal᷊a si Tou. Arawe i yamiu ma'aillal᷊a si Tou, ana waugu i Tou uatana'a su sambau ringanni yamiu wuṛṛu uaaukka ringanni yamiu.

¹⁸I yamiu tawe itantang-Ku sassane ere asisi tim pal᷊ussa. I Ya'u sarun mabelengnga ringanni yamiu.

¹⁹Tate mal᷊annu runia maasilo si Ya'u. Arawe i yamiu sarun maasilo si Ya'u. Wuṛṛu ana waugu i Ya'u wiakka, i yamiu lai sarun mabbiakka.

²⁰Napawe nia'omante allo udde, i yamiu sarun maasingkatta manungku i Ya'u uaaukka ringannu Iamangnga, wuṛṛu i yamiu uaaukka ringang-Ku, wuṛṛu i Ya'u uaaukka ringanni yamiu.

²¹Taumata apan tuttuṛṛutta manga parenta-U wuṛṛu ma'ola'a, i tou marangngu si Ya'u. Iamang-Ku sarun mandangngu taumata apan mandangngu si Ya'u. I Ya'u lai sarun mandangngu taumata udde wuṛṛu mapaal᷊iatta'u riri-U si Tou.”

²²I Yudas (wal᷊ine i Yudas Iskariot) naiwal᷊o Mawu Yesus, “Mawu, anio Mawu mapaal᷊iatta'u riri-Nu si yami wuṛṛu tawe su runia?”

²³Mawu Yesus sinumimbakka, “Taumata apan mandangngu si Ya'u, sarun tumuṛṛutta al᷊aṛṛa-U. Iamang-Ku sarun mandangngu si tou. Iamang-Ku wuṛṛu i Ya'u sarun rumanta ringanni tou wuṛṛu matana'a su sampunna ringanni tou.

²⁴Taumata apan tawe mandangngu si Ya'u, tawe tumuṛṛutta al᷊aṛṛa-U. Al᷊aṛṛa'a apan niaringiṛṛanni yamiu udde, wal᷊ine wuassia-U, ewe'e wuassu Iamangnga apan nandolo-U.

²⁵Sarangkanambone udde suete niwal᷊o-U si yamiu, tantal᷊anna i Ya'u ta'e su sambau ringanni yamiu.

²⁶Arawe Ghaṛṛahon Ruata, Mattatul᷊ungnga apan sarun irolokku Iamangnga sulal᷊ummu arang-Ku, ete i Tou apan mangaṛṛa'a si yamiu su ola'u sarangkanambone wuṛṛu mapaanaungnga su ola'u sarangkanambone apan suete Ta'u niapaasingkatta si yamiu.

²⁷Al᷊al᷊uassa Ta'u itantangnga si yamiu. Al᷊al᷊ua-U sassane apan Ta'u nionggolla si yamiu. Ta'u nionggolla udde wal᷊ine ere nionggolu runia indi si yamiu. Arie passinggawangnga, arie pa'ata'utta.

²⁸Yamiu suete naaringikka si Ya'u mabbisara, ‘I Ya'u sarun manantangngi yamiu, arawe i Ya'u sarun mabelengnga apia ringanni yamiu’. Amungkangngu i yamiu mandangngu si Ya'u, i yamiu sarun lumuassa ana waugu i Ya'u inai ringannu Iamangnga, ana waugu Iamangnga magewal᷊anna wuassia-U.

²⁹I Ya'u mamasingkattu udde si yamiu orassa indi, tantal᷊anna sarangkanambone udde taambe mariaddi, tadea'u napawe mariaddite, i yamiu sarun mangngimanna.

³⁰I Ya'u tate mabbisara manambo lai ringanni yamiu, ana waugu nia'omante tempone tembonannu runia indi rumanta. Arawe i tou tawe uataṛṛino su riri-U.

³¹Arawe sarangkanambone udde sarun mariaddi tadea'u runia maatutukka manungku i Ya'u marangngu Iamangnga wuṛṛu tuttuṛṛutta al᷊awo'u apa apan nirolokku Iamangnga si Ya'u. Ne, wette i ite inaite mangingkatta wua isindi.”