Read Talaud YOHANES 16 Bible Online

YOHANES 16 - Talaud bible

YOHANES 16

¹Sarangkanambone udde Ta'u niapaasingkatta si yamiu tadea'u i yamiu tawe massinaadda.

²I yamiu sarun iapaasabangnga wuassu manga wal᷊em pattataṛṛamawuanna. Wuṛṛu sarun a'omanna tempone manungku taumata apan mamate si yamiu massunna i tou massubba Ruata.

³I mangitou ma'ola'a udde si yamiu ana waugu i mangitou taambe naaillal᷊a Iamangnga aroddi lai si Ya'u.

⁴Arawe orassa indi iwal᷊o-U olangnge udde si yamiu, tadea'u amungkangngu udde mariaddi murine, i yamiu maanaungnga manungku i Ya'u suete namasingkatta si yamiu.” “Hatto indi tawe Ta'u niwal᷊o si yamiu ro'en paarorone, ana waugu i Ya'u ta'e su sampunna ringanni yamiu.

⁵Arawe orassa indi Ya'u sarun inai ringanni Tou apan nandolo-U; wuṛṛu tawe saran sangkatou wuassi yamiu maiwal᷊o, watukkuapa i Ya'u inai.

⁶Orassa indi ewe'e naungngu niatambanna asasusane, ana waugu i Ya'u namasingkattu olangnge udde si yamiu.

⁷Arawe i Ya'u mamasingkatta atonna si yamiu: Mappianne si yamiu amungkangngu i Ya'u inai; ana waugu amungkangngu i Ya'u tawe inai, Mantatal᷊ungnga udde tawe rumanta ringanni yamiu. Arawe amungkangngu i Ya'u inai, i Ya'u sarun mandolokki Tou ringanni yamiu.

⁸Amungkangngu i Tou nirumantate, i Tou sarun mapaal᷊iatta'a su runia atapasannu rosa, apan ṛinone, wuassu inolaanna apan atonna, wuṛṛu wuassu ṛuumannu Ruata.

⁹I Tou sarun mapaal᷊iatta'a manungku tawe mangngimanna si Ya'u, udde lai rosa;

¹⁰manungku i Ya'u atonna, ana waugu i Ya'u inai ringannu Iamangnga wuṛṛu i yamiu tate maasilo si Ya'u lai;

¹¹wuṛṛu manungku Ruata mannattake maṛṛuumanna, ana waugu tembonannu runia indi suete niṛṛuumanna.

¹²Manambo lai Ta'u iwal᷊o si yamiu, arawe orassa indi yamiu tawe maasengkamma.

¹³Arawe amungkangngu Ghaṛṛaho udde rumanta, eteudde i Tou apan napaal᷊iatta'u atatul᷊iddu Ruata i yamiu sarun ehetan-Ne iapaaillal᷊a anambon apan taṛṛino. I Tou tawe mabbisara wuassu riri-Ne sassane arawe mamasingkattu apa apan suete niaringiṛṛanne, wuṛṛu i Tou namasingkatta si yamiu apa apan sarun mariaddi su allon sal᷊immurine.

¹⁴I Tou sarun mamantuga si Ya'u, ana waugu apa apan suete niapaasingkatta si yamiu, sinengkamma wuassia-U.

¹⁵Sarangkanambone apan tatahuanannu Iamangnga udde lai tatahuanang-Ku. Ana waugu udde i Ya'u mabbisara manungku apa apan niapaasingkattu Ghaṛṛaho si yamiu, nisengkamme wuassia-U.”

¹⁶“Ete adio'a lai tempone, i yamiu tate maasilo si Ya'u, wuṛṛu ete adio'a lai tempone i yamiu sarun maasilo si Ya'u.”

¹⁷Sire pira mallal᷊aṛṛenggennu Mawu Yesus uaaiwal᷊ote sangkatou ringannu waine, “Apa pandumanne i Tou nabbisara si ite, ‘Ete adio'a lai yamiu tate maasilo si ya'u, wuṛṛu ete adio'a lai yamiu sarun maasilo si Ya'u’? Apa lai pandummu wisara-Ne: ‘I Ya'u inai ringannu Iamangnga’?”

¹⁸I mangitou sidutu uaaiwal᷊o, “Apa atappasanne, ‘ete adio'a tempone’? I ite tawedu maasunna i Tou mabbisara su ola'u apa!”

¹⁹Mawu Yesus masingkatta manungku i mangitou maapulu maiwal᷊o si Tou. Ne i Tou nabbisara, “Tanginna suete niwal᷊o-U, ‘Ete adio'a tempone i yamiu tate maasilo si Ya'u, wuṛṛu ete adio'a tempone i yamiu sarun maasilo si Ya'u’. Eteudde apan naola'a pattatiakka su wallatti yamiu?

²⁰Pangimante, i yamiu sarun lumuai wuṛṛu sumangitta, arawe runia sarun lumuassa. Naungngi yamiu sarun masusa, arawe asasusanu udde sarun mawal᷊u maola'a al᷊al᷊uassa.

²¹Amungkangngu sangkatou wawine maraniten mangunsiwe, i tou massusa, ana waugu temponete i tou matataṛṛangnga. Arawe aroddi anangnge niasungkangnga, wawine udde naabul᷊iten asasusane ana waugu lulluassa manungku sangkatou ana'a niasungkangke su runia.

²²Aroddi lai yamiu; Orassa indi naungngi yamiu massusa, arawe i Ya'u sarun maisasomba apia ringanni yamiu, ne naungngi yamiu sarun lumuassa; wuṛṛu tawedu sangkatou maapanganu al᷊al᷊uassa udde wuassu lal᷊ummu naungngi yamiu.

²³Su allo udde, i yamiu tate maiwal᷊o manga apa si Ya'u. Pangimante: Al᷊awo'u apa apan raddoronganni yamiu su Iamangnga sulal᷊ummu arang-Ku, udde sarun ionggolu Iamangnga si yamiu.

²⁴Na'oman sara orassa indi yamiu taambe nadorongnga manga apa sulal᷊ummu arang-Ku. Padorongke, ne i yamiu sarun manengkamma, tadea'u al᷊al᷊uannu udde masuungnga.”

²⁵“Sarangkanambone indi Ta'u iwal᷊o si yamiu ringannu sasumandingnga. Arawe sarun a'omanna tempone, i Ya'u tate mappaattu sasumandingnga lai, arawe mabbisara uahahati si yamiu su ola'u Iamangnga.

²⁶Su tempo udde i yamiu sarun madorongnga su Iamangnga sulal᷊ummu arang-Ku; Paanaungete, i Ya'u tawe madorongnga wuassu Iamangnga ionggolla si yamiu,

²⁷ana waugu Iamangnga sassane marangngu si yamiu. I Tou marangngu si yamiu ana waugu i yamiu marangngu si Ya'u, wuṛṛu mangngimanna manungku i Ya'u nirumanta wuassu Ruata.

²⁸Atonna i Ya'u nirumanta wua dingannu Iamangnga, wuṛṛu suete nirumanta sulal᷊ummu runia. Arawe orassa indi Ya'u manantangken runia inai mabelengnga ringannu Iamangnga.”

²⁹See manga mallal᷊aṛṛenggennu Mawu Yesus nabbisara si Tou, “Orassa indi Mawu mabbisara uahahati wuṛṛu tawe mappaattu sasumandingnga,

³⁰wuṛṛu i yami masingkatta manungku Mawu masingkattu sarangkanambone. Ipa'ura lai taumata maiwal᷊o manga apa su Mawu. Ana waugu udde i yami mangngimanna Mawu nirumanta wua dingannu Ruata.”

³¹Mawu Yesus sinumimbakka si mangitou, “Nariaddi orassa indi yamiu mangngimanna?

³²Paanaunge! Tempone sarun rumanta, ewe'e nia'omante, i yamiu sarun massal᷊iawukka. I yamiu sarun mapul᷊e su wal᷊en sangkatou-sangkatou wuṛṛu manantang-Ku sassane. Arawe i Ya'u tawe sassane ana waugu Iamangnga udde ringang-Ku.

³³Sarangkanambone indi iwabal᷊o-U si yamiu, tadea'u i yamiu maasomba al᷊al᷊uassa ana waugu su sampunna ringang-Ku. Su runia i yamiu sarun matataṛṛangnga. Arawe siddutu'a naungngu! I Ya'u suete napaarugin runia!”