Read Talaud YOHANES 18 Bible Online

YOHANES 18 - Talaud bible

YOHANES 18

¹Napawe Mawu Yesus sueten inumal᷊iomanna aroddi, i Tou wuṛṛu manga mallal᷊aṛṛenggen-Ne inaite su samba'an Sal᷊ukku Kidron. Isudde pia sambau wailla, ne Mawu Yesus wuṛṛu manga mallal᷊aṛṛenggen-Ne sinumuttate su wailla udde.

²I Yudas mandal᷊al᷊eo udde, masingkattu tampa udde; ana waugu Mawu Yesus masokkate maammulu manga mallal᷊aṛṛenggen-Ne isudde.

³Ne i Yudas inaite su tampa udde wuṛṛu uaapiddu sangkawiliṛṛanna tantaran Romawi wuṛṛu manga pira mandariaga Wal᷊e Mawu apan nirolokku manga imam tembonanne wuṛṛu manga taumatan Farisi. I mangitou uaapiddu ahidda, lentera wuṛṛu auttutta.

⁴Mawu Yesus masingkattu sarangkanambone apan sarun mariaddi su watangan-Ne. Ne i Tou nangundanite manga taumata udde wuṛṛu naiwal᷊o, “I yamiu maddea'a sisai?”

⁵“Mawu Yesus, taumata Nazaret,” sasimbakki mangitou. “Ete i Ya'u indi,” sasimbakku Mawu Yesus. I Yudas mamamate udde uarisikka isudde ringanni mangitou.

⁶Su tempo Mawu Yesus nabbisara si mangitou, “Ete i Ya'u indi,” i mangitou sarangkanambone sinumoṛṛota see naṛṛa'a su leta'a.

⁷Paassa lai Mawu Yesus naiwal᷊o si mangitou, “I yamiu maddea'a sisai?” “Mawu Yesus taumata Nazaret,” sasimbakki mangitou.

⁸“Suete niwal᷊o-U ete i Ya'u indi,” unnu Mawu Yesus. “Wuṛṛu amungkangngu atonna i Ya'u radeaanni yamiu, wala'e i mangitou waine indi inai.” (

⁹Ringannu nabbisara aroddi, natipusse apa apan suete niwisara Mawu Yesus paarorone: “Iamangnga, wuassu manga taumata apan nionggolu Iamangnga si Ya'u, tawe saran sangkatou apan mawul᷊i.”)

¹⁰I Simon Petrus apan uaapiddu hal᷊ele sammata, sinawutta see namuulla allangngu imam bahewa na'oman sara naṛṛassatta tal᷊ingane aikkatanna. Arannu allangnga udde i Malkus.

¹¹Ne Mawu Yesus nabbisara si Petrus, “Sutta'a apia hal᷊elenu su romane! Apa i'o maṛṛingidda i Ya'u tawe maainumma ua'en asasusa apan nionggolu Iamangnga si Ya'u?”

¹²See manga tantaran Romawi wuṛṛu piaṛṛangnge see manga mandariagan Yahudi nanametta wuṛṛu naṛṛapussa Mawu Yesus.

¹³Paarorone i mangitou nangapiddu Mawu Yesus ringanni Hanas, la'iananni Kayafas. I Kayafas eteudde sangkatou imam bahewa su tonna udde.

¹⁴Wuṛṛu ete i tou apan nanantiro manga tembonannu Yahudi, manungku mappianne sangkatou mate hunane su anambon walahanna.

¹⁵I Simon Petrus wuṛṛu sangkatou mallal᷊aṛṛenggenna waine tinumantalongnga Mawu Yesus. Mallal᷊aṛṛenggenna waine indi asingkatannu imam bahewa; nariaddi i tou sinumutta su sambau ringannu Mawu Yesus su rallakku wal᷊en imam bahewa,

¹⁶arawe i Petrus uaraṛṛaddo su liudde, su ngara. Wua'udde mallal᷊aṛṛenggenna apan baine udde sinumabangnga wuṛṛu nagahatto mangangimbe wawine apan uariaga ngara, see nangapiddi Petrus sinumutta sulal᷊umme.

¹⁷Mangangimbe wawine apan uariaga ngara udde nabbisara si Petrus, “Ei, wal᷊inewe i'o lai sangkatou wuassu wallattu mallal᷊aṛṛenggennu taumata udde?” “Wal᷊ine,” sasimbakki Petrus.

¹⁸Orassa udde runia masunge, nariaddi manga mangangimbe wuṛṛu manga mandariaga suete naṛṛunuttu putungnga wuassu waṛṛa see i mangitou manningikke isudde. I Petrus inai lai poiaroddi wuṛṛu nirumarisikka manningikke su sambau ringanni mangitou.

¹⁹Imam wahewa naiwal᷊o Mawu Yesus su ola'u manga mallal᷊aṛṛenggen-Ne wuṛṛu su ola'u al᷊aṛṛang-Nge.

²⁰Mawu Yesus sinumimbakka, “I Ya'u sidutu mabbisara ringannu uahahati su saruannu awadaalla. I Ya'u sidutu mangngaṛṛa'a su manga wal᷊em pattataṛṛamawuanna wuṛṛu su Wal᷊e Ruata, su tampan taumatan Yahudi wiasane maammula. Taambe saran paassa i Ya'u mabbisara ringannu itattullampingnga.

²¹Nariaddi anio ituangnga maiwal᷊o si Ya'u? Paiwal᷊ote si mangitou apan suete naaringikka si Ya'u mangngaṛṛa'a. I mangitou masingkatte apa apan niwisara-U.”

²²Napawe Mawu Yesus suete nabbisara aroddi, sangkatou su wallattu mandariaga isudde namero si Tou wuṛṛu nabbisara, “Waṛṛani atonna I'o mabbisara aroddi su imam bahewa!”

²³Mawu Yesus sinumimbakka, “Amungkangngu i Ya'u mabatti'u wisara nassal᷊a, wal᷊oa'e isindi suapa sal᷊ane! Arawe amungkangngu niwisara-U udde atonna, anio i'o namero si Ya'u?”

²⁴Wua'udde i Hanas nandolokku taumata nangapiddu Mawu Yesus ringannu ṛaṛṛapusanna watukku Imam Bahewa Kayafas.

²⁵I Simon Petrus ta'e lai uarisikka manningikka isudde. Manga taumata nabbisara si tou, “Wal᷊inewe i'o lai mallal᷊aṛṛenggennu taumata udde?” Arawe i Petrus nassinaadda, unni tou, “Wal᷊ine!”

²⁶Sangkatou allangngu imam bahewa, eteudde walahannu taumata tal᷊ingane niponggo'i Petrus, nabbisara, “Wal᷊inewe i ya'u naasilo si'o su wailla udde suadio'a ringanni Tou?”

²⁷See i Petrus nassinaadde apia, “Tawe” — wuṛṛu naṛṛino su orassa udde lai manu'a niumu'u.

²⁸Rua'allo maṛṛanggapa i mangitou nangapiddu Mawu Yesus wuassu wal᷊en Kayafas watukku wal᷊en gubernure. Manga taumatan Yahudi sassane tawe sinumutta sulal᷊ummu wal᷊en araratuanna, tadea'u i mangitou tawe mabbal᷊i marosa su ola'u agama, ana waugu i mangitou lai inai umanna annu Paskah.

²⁹Ana waugu udde i Pilatus sinumabangnga ringanni mangitou wuṛṛu naiwal᷊o, “Apa alaenu su ola'u taumata indi?”

³⁰I mangitou sinumimbakka, “Unnu wisara i Tou tawe sal᷊ane, i yami tawe nangapiddi Tou ringannu Iamangnga Gubernure.”

³¹I Pilatus nabbisara si mangitou, “Apira'e i Tou wuṛṛu parikisete i Tou tumuṛṛuttu titanu sassane!” Arawe manga taumatan Yahudi udde sinumimbakka, “I yami tawe maṛṛuumannu taumata ma'oman sara mate.” (

³²Indi mariaddi tadea'u matipusse apa apan niapaasingkattu Mawu Yesus su ola'u i Tou sarun mate.)

³³I Pilatus sinumutta apia su wal᷊ene see namaggo Mawu Yesus wuṛṛu naiwal᷊o, “Atonna I'o ratun taumatan Yahudi?”

³⁴Mawu Yesus sinumimbakka, “Apa aiwal᷊o indi wuassi'o sassane ara'e pia taumata waine apan suete namasingkatta si'o su ola'u riri-U?”

³⁵I Pilatus sinumimbakka, “Antimannu ya'u indi taumatan Yahudi? Apan nanantillu riri-Nu si ya'u udde walahannu sassane wuṛṛu manga imam tembonanne. Apa apan suete niolangngu?”

³⁶Mawu Yesus nabbisara, “Araratuang-Ku wal᷊ine wuassu runia indi. Unnu wisara araratuang-Ku wuassu runia indi, manga taumata-U sarun mando'appa, tadea'u i Ya'u tawe itantilla su manga tembonannu Yahudi. Arawe atonna araratuang-Ku wal᷊ine wuassu runia indi!”

³⁷Ne i Pilatus naiwal᷊o si Tou, “Amungkangngu aroddi, I'o indi ratu?” Mawu Yesus sinumimbakka, “I'o nabal᷊o manungku i Ya'u indi ratu. I Ya'u niasungkangnga wuṛṛu nirumanta su runia indi ringannu sambau pandumma, eteudde mangonggolu tatiala su ola'u atatul᷊idda. Taumata apan wuassu atatul᷊idda udde maddaringikka si Ya'u.”

³⁸I Pilatus naiwal᷊o si Tou, “Apa atappasannu atatul᷊idda?” See i Pilatus sinumabangnga apia wuassu wal᷊en araratuanna wuṛṛu nabbisara su manga taumatan Yahudi, “I Ya'u tawe naasomba saran sambau pasasal᷊an taumata indi.

³⁹Arawe tumuṛṛuttu inanaramannu, i ya'u wiasane mammallossu sangkatou taumatan ṛuumanna su Allo Wahewam Paskah. I yamiu maapulu tadea'u i ya'u mamallossu ratun taumatan Yahudi si yamiu?”

⁴⁰I mangitou sinumimbakka ringannu u'ui, “Tawe, arie i Tou, ewe'e i Barabas!” (I Barabas udde, sangkatou taṛṛa rampassa.)