Read Talaud YOHANES 19 Bible Online

YOHANES 19 - Talaud bible

YOHANES 19

¹Wua'udde i Pilatus sinumutta see nandolokku taumata nanggesekka Mawu Yesus.

²Manga tantara na'ola'a sambau araposa wuassu manga rannang kalu ṛoaanna, see niluṛṛe su pua Mawu Yesus. Wua'udde i Tou nilluṛṛeanni mangitou jubah ungu,

³see masokka-sokka rumanta ringanni Tou wuṛṛu mabbisara, “Nabbiakke ratun taumatan Yahudi!” Wua'udde i mangitou namero si Tou.

⁴Wua'udde i Pilatus sinumabangnga apia wuṛṛu nabbisara su taumata nambo udde, “Pa'ellega! I Ya'u mangapiddi Tou su liudde ringanni yamiu, tadea'u i yamiu maasingkatta manungku i ya'u tawe naasomba pasasal᷊a saran sambau si Tou.”

⁵Ne Mawu Yesus sinumabbangnga ringannu ual᷊uṛṛen araposa pia ṛoangnge wuṛṛu jubah ungu. I Pilatus nabbisara si mangitou, “Pa'ellege taumata udde.”

⁶Napawe manga imam temboanne wuṛṛu manga mandariaga udde naasilo Mawu Yesus, i mangitou u'ui, “Arussa'a i Tou! Arussa'a i Tou!” I Pilatus nabbisara si mangitou, “Apira'e i Tou, wuṛṛu arussa'eng kamiu sassane, i ya'u tawe naasomba saran sambau pasasal᷊a-Ne.”

⁷Manga taumatan Yahudi udde sinumimbakka, “Tumuṛṛuttu titan kami, i Tou ṛinone pateanna ana waugu i Tou mangnga'u watangan-Ne Ana'u Ruata.”

⁸Napawe i Pilatus naaringikka si mangitou mabbisara aroddi, i tou lembo nata'utta lai.

⁹Ne i tou nabelengnga sinumutta sulal᷊ummu wal᷊en araratuanna wuṛṛu napawe Mawu Yesus niapidde sulal᷊umme, i Pilatus naiwal᷊o si Tou, “I'o indi daranta-Nu wuassuapa?” Arawe Mawu Yesus tawe sinumimbakka.

¹⁰Ne, i Pilatus nabbisara apia, “I'o maddiri maggahato'u? Ana see I'o masingkatta, i ya'u pia taṛṛino mamallosu riri-Nu, wuṛṛu taṛṛino mangarussa-Nu!”

¹¹Mawu Yesus sinumimbakka, “Amungkangngu Ruata tawe mangonggolu taṛṛino udde si'o, i'o atonna-tonna tawe taṛṛino su riri-U. Ana waugu udde taumata apan nanantillu riri-U si'o, magewal᷊anna rosane wuassu rosanu.”

¹²Napawe i Pilatus naaringikka udde, i tou mangke maddea'a lal᷊anne mamallossu Mawu Yesus. Arawe manga taumatan Yahudi mangke u'ui, “Amungkangngu ituangnga mamallosi Tou, ituangnga wal᷊ine haweng Kaisar! Taumata apan mangnga'u ririne ratu, ete i tou seetti Kaisar!”

¹³Napawe Pilatus naaringikka manga wisara udde, i tou nangapiddu Mawu Yesus su liudde see inuma'ianna su adderam pamarikisanna su tampa aranne Wawilanne Watu. (Sulal᷊ummu wisaran Ibrani aranne Gabata.)

¹⁴Tempo udde maranitem puulla mapul᷊o dua allattune, taambe Allo Wahewam Paskah. I Pilatus nabbisara su manga taumata udde, “Indi ratunu!”

¹⁵I mangitou mangke pasi ui, “Patete i Tou; Patete i Tou! Arussa'a i Tou!” I Pilatus naiwal᷊o, “Apa ṛinone i ya'u mangarussan ratunu?” Manga imam tembonanne sinumimbakka, “Tumba'u i Kaisar sassane ratung kami!”

¹⁶Ne i Pilatus nanantillu Mawu Yesus si mangitou niapaarussa. I mangitou nangehetta Mawu Yesus, see niapiddi mangitou inai wua isudde.

¹⁷Mawu Yesus sinumabangnga uapasanna alu arussane sassane watukku tampa apan aranne “Tampan Tanggilal᷊a”. (Sulal᷊ummu wisaran Ibrani isassago Golgota.)

¹⁸Poiaroddi i Tou niarussa. Su sambau ringanni Tou pia lai ruang katou taumata waine apan uaarussa; sangkatou su samba'a aiṛṛi, sangkatou su samba'a uananna wuṛṛu Mawu Yesus su tangngane.

¹⁹Su alu arussa Mawu Yesus, i Pilatus napa'elen boṛṛetta indi: “Yesus wuassu Nazaret, Ratun Taumatan Yahudi.”

²⁰Manambo taumatan Yahudi naawasan woṛṛetta udde, ana waugu su tampa Mawu Yesus niarussa udde tawe marau wuassu soa. Woṛṛetta udde niwoṛṛeta sulal᷊ummu wisaran Ibrani, Latin wuṛṛu Yunani.

²¹Manga imam tembonanne nabbisara si Pilatus, “Arie pabboṛṛeta'a Ratun Taumatan Yahudi, ewe'e woṛṛetta'a, ‘Taumata indi nabbisara, i Ya'u Ratun Taumatan Yahudi.’ ”

²²Arawe i Pilatus sinumimbakka, “Apa ta'u niwoṛṛetta, udde aroddite.”

²³Napawe manga tantara udde nangarussaten Mawu Yesus, i mangitou nanganute laung-Nge. Laubba udde nitahia appatta: sambau-sambau naasomba sambageanganna. I mangitou lai nanganu jubah-Ne. Jubah udde tawe tatabingnge — niradu'a wua dosone sara wowane.

²⁴Manga tantara udde nabbisara sangkatou ringannu waine, “Arie i ite mamonggo'a jubah indi, wette i ite masasi'atta asinginne isai wotongnge maabba'a.” Hatto udde mariaddi tadea'u natipusse apa apan uawoṛṛetta sulal᷊ummu Wuke Susi, eteudde: “I mangitou mattahia lau-U, wuṛṛu nasasi'attu jubah-U.” Wuṛṛu atonna manga tantara udde na'ola'a aroddi.

²⁵Maranin arussa Mawu Yesus uarisikka inangngu Mawu Yesus, wuṛṛu tuṛṛangngu inang-Nge wawine, i Maria awingngi Klopas, wuṛṛu i Maria Magdalena.

²⁶Napawe Mawu Yesus naasilo inang-Nge wuṛṛu mallal᷊aṛṛenggenna apan arangnguan-Ne uarisikka isudde, i Tou nabbisara inang-Nge, “Inangnga, udde ana'i Inangnga.”

²⁷Wua'udde Mawu Yesus nabbisara su mallal᷊aṛṛenggen-Ne udde, “Udde inangngu.” Nanattakka orassa udde mallal᷊aṛṛenggenna nanengkampe inangngu Mawu Yesus matana'a su wal᷊ene.

²⁸Mawu Yesus masingkatta manungku orassa udde sarangkanambone natipusse, wuṛṛu tadea'u apa apan uawoṛṛetta sulal᷊ummu Wuke Susi wotongngete mariaddi, i Tou nabbisara, “I Ya'u marou.”

²⁹Isudde pia sambau mangko napeneng kua'e anggore mapakadda. Ne sambau wungan sahatta niammo sulal᷊ummu ua'en anggore udde, wuṛṛu nitukka su sandanna hisop, see nitogokka su moṛṛongngu Mawu Yesus.

³⁰Mawu Yesus naattemma ua'en anggore udde see nabbisara, “Nia'omante!” See nal᷊apute pua-Ne wuṛṛu natete.

³¹Manga tembonannu Yahudi maddiri winal᷊unannu manga taumata apan niarussa udde mangke ua'ele su alu arussa su allon Sabatta, lembonete Sabatta paassa indi Allo Wahewa apan apianne. Ana waugu su allo Mawu Yesus niarussa naṛṛino massallo taambe allon Sabatta, manga taumatan Yahudi nadorongnga si Pilatus mamadi ledda manga taumata apan suete niarussa wuṛṛu manossokku manga winal᷊unanna udde wuassu alu arussa.

³²Ne manga tantara udde inaite wuṛṛu namadite rorone leddan taumata darua apan niarussa su sambau ringannu Mawu Yesus.

³³Napawe i mangitou na'omate ringannu Mawu Yesus, i mangitou naasilo i Tou natete. I mangitou tate nariaddi namadi ledda-Ne.

³⁴Arawe sandiṛṛannu Mawu Yesus niusu'u sangkatou tantara ringannu sambeangnga; wuṛṛu tawe nal᷊annu sinumabangke raṛṛa wuṛṛu ua'e.

³⁵Taumata apan naasilo sassane arariaddianna udde, ete i tou apan namasingkattu olangnge udde, tadea'u i yamiu lai mangngimanna. Wuṛṛu tatialane udde atonna, wuṛṛu i Tou masingkatta manungku olangnge udde atonna.

³⁶Olangnge udde mariaddi tadea'u apa apan uawoṛṛetta sulal᷊ummu Wuke Susi, eteudde, “Tawe saran sambau wuassu duṛṛi-Ne paddianna.”

³⁷Sulal᷊ummu Wuke Susi uawoṛṛetta lai: “I mangitou sarun ma'ellega si Tou apan suete niusu'i mangitou.”

³⁸Wua'udde i Yusuf wuassu Arimatea nadorongnga si Pilatus, mangal᷊appa winal᷊unannu Mawu Yesus. (I Yusuf eteudde mallal᷊aṛṛenggennu Mawu Yesus, arawe ringannu mal᷊annaba, ana waugu i tou matta'uttu manga tembonannu Yahudi.) I Pilatus namalaten tou, wua'udde i tou inaite nangal᷊appa winal᷊unannu Mawu Yesus.

³⁹I Nikodemus apan paarorone suete nirumanta ringannu Mawu Yesus su tempo ṛabbi, inai lai suadio'a ringanni Yusuf. Nikodemus uaapiddu undamma mur wuṛṛu gaharu — sarangkanambone iraṛṛangngo tallum pul᷊o kilo gramma — anambone.

⁴⁰Itarua nanosokku winal᷊unannu Mawu Yesus, see nipi'unnu kaengnga kafan su sambau ringannu udamma mawangngi udde tumuṛṛuttu addattu pallal᷊abingngu taumatan Yahudi.

⁴¹Su tampa Mawu Yesus niarussa pia sambau wailla. Su wailla udde pia sambau lal᷊abinganna wakku, apan taambe nipaatta pallabingannu taumata.

⁴²Ana waugu lal᷊abinganna udde marani, wuṛṛu allon Sabatta maranite manattakka, Mawu Yesus nilabingngi mangitou su wailla udde.