Read Talaud YOHANES 20 Bible Online

YOHANES 20 - Talaud bible

YOHANES 20

¹Su allo Misa ruaallo, su tempo ta'e marandumma, Maria Magdalena inaite watukku lal᷊abinganna. I tou naasilo watu laṛṛapingnge na'irute wuassu loṛṛangngu lal᷊abinganna udde.

²Ne i tou tinumal᷊angnga nadea'a si Simon Petrus wuṛṛu mallal᷊aṛṛenggenna apan arangnguannu Mawu Yesus, wuṛṛu nabbisara si mangitou, “Mawu suete nial᷊appa wuassu lal᷊abinganna, wuṛṛu i ya'u wagga suapa i Tou niapal᷊allowanga.”

³See i Petrus wuṛṛu mallal᷊aṛṛenggenna waine udde inaite watukku lal᷊abinganna.

⁴Itarua tuttal᷊angnga, arawe mallal᷊aṛṛenggenna waine udde mallihaṛṛanna wuassi Petrus, wuṛṛu i tou na'oma rorone su lal᷊abinganna.

⁵I tou nallinge sulal᷊ummu lal᷊abinganna wuṛṛu naasilo kaengnga kafan uaraddo isudde, arawe i tou tawe sinumutta.

⁶I Simon Petrus uatantuṛṛutta wuassu liudde, lapiddu sinumutta sulal᷊ummu lal᷊abinganna udde. I tou naasilo kaengnga kafan uaraddo isudde,

⁷arawe kaengnga apan uawa'issa pua Mawu Yesus tawe gaddi'a maranine arawe lalul᷊unanna paṛṛalane.

⁸Wua'udde mallal᷊aṛṛenggenna apan na'oma paarorone su lal᷊abinganna, sinumuttate lai. I tou na'ellegga wuṛṛu nangimante. (

⁹Na'oman sara orassa udde i mangitou taambe naasunna apa apan uawoṛṛetta sulal᷊ummu Wuke Susi manungku i Tou ṛinone mabangunna wuassu papate.)

¹⁰Wua'udde manga mallal᷊aṛṛenggennu Mawu Yesus napul᷊ete.

¹¹I Maria Magdalena uarisikka su saruannu lal᷊abinganna lapiddu lulluai. Tantal᷊anna lulluai i tou ua'ellega lal᷊ummu lal᷊abinganna,

¹²see i tou naasilo ruang katou mala'ekatta uapedettu mawira. I mangitou udde ua'ianna su lanna'u winal᷊unannu Mawu Yesus, sangkatou su wageangngu pua, wuṛṛu waine lai su wageangngu ledda.

¹³Manga mala'ekatta udde naiwal᷊o, “Inangnga, anio lulluai?” I Maria sinumimbakka, “Mawu'u suete nianu, wuṛṛu i ya'u wagga i Tou niaddo suapa.”

¹⁴Napawe wua nabbisara aroddi, i tou nanaile liudde wuṛṛu naasilo Mawu Yesus uarisikka isudde. Arawe i tou wagga manungku udde Mawu Yesus.

¹⁵Mawu Yesus naiwal᷊o si tou, “Inangnga, anio lulluai? Inangnga maddea'a sisai?” I Maria massunna manungku udde mabawailla, nariaddi i tou nabbisara, “Iamangnga, amungkangngu Iamangnga nangingkatti Tou wua isindi, tul᷊unga'a wal᷊o'a si ya'u suapa Iamangnga nangadon Tou, tadea'u i ya'u wotongnge mangal᷊appa si Tou.”

¹⁶Mawu Yesus nabbisara si tou, “Maria!” I Maria nanaile Mawu Yesus see nabbisara sulal᷊ummu wisaran Ibrani, “Rabuni!” (Atatappasanne “Huru”.)

¹⁷“Arie pamita si Ya'u” wisara Mawu Yesus si tou, “ana waugu i Ya'u taambe nasengkengnga ringannu Iamangnga. Arawe roote ringannu manga tuṛṛang-Ku, wuṛṛu pasingkata'e si mangitou manungku orassa indi Ya'u ireete ringannu Iamang-Ku wuṛṛu Iamangngu, Ruata-U wuṛṛu Ruatanu.”

¹⁸Ne i Maria inaite namasingkatta su manga mallal᷊aṛṛenggennu Mawu Yesus manungku i tou suete naasilo Mawu Yesus wuṛṛu manungku Mawu suete namasingkattu sarangkanambone udde si tou.

¹⁹Su allo Misa udde lai, su tempo ṛabbite, manga mallal᷊aṛṛenggennu Mawu Yesus uaammulla su sambau wal᷊e apan ngarane uaṛṛuudda, ana waugu i mangitou matta'uttu manga tembonannu Yahudi. Inaṛṛombanganne Mawu Yesus nirumanta wuṛṛu dirumarisikka su pattangnganni mangitou wuṛṛu nabbisara, “Sal᷊amatta wuṛṛu paddarame si yamiu.”

²⁰Napawe suete nabbisara aroddi, i Tou namasiloten lima-Ne wuṛṛu sandiṛṛan-Ne si mangitou. Su tempo naasilo Mawu, i mangitou lembo nilumuassa.

²¹See Mawu Yesus nabbisara si mangitou paassa lai, “Sal᷊amatta wuṛṛu paddarame si yamiu. Ere lai Iamangnga nandolo-U aroddi lai Ya'u mandolokki yamiu.”

²²See i Tou napaasabangngu singangu-Ne si mangitou wuṛṛu nabbisara, “Sengkampe Ghaṛṛahon Ruata.

²³Amungkangngu i yamiu mangampungnga rosan sangkatou taumata, Ruata lai mangampungnga rosane. Amungkangngu yamiu tawe mangampungnga rosan taumata waine, Ruata lai tawe mangampungnga rosane.”

²⁴I Tomas (apan isassago lai “Ṛindua”), sangkatou wuassu sire mapul᷊o dua mallal᷊aṛṛenggennu Mawu Yesus, apan tawe suadio'a ringannu mallal᷊aṛṛenggenna waine su tempo Mawu Yesus nirumanta.

²⁵Ne manga mallal᷊aṛṛenggennu Mawu Yesus apan baine nabbisara si Tomas, “I yami naasilote Mawu!” Arawe i Tomas sinumimbakka, “Amungkangngu i ya'u taambe naasilo lanna'u lessam pa'u su lima-Ne, udde wuṛṛu taambe napangadon tal᷊imado'u su manga lanna'u lessam pa'u udde wuṛṛu taambe napangadon lima'u susandiṛṛan-Ne, i ya'u tawe mangngimanna saran paassa.”

²⁶Sangkamisa nal᷊iudda, manga mallal᷊aṛṛenggennu Mawu Yesus naammulla apia su tampa udde, wuṛṛu i Tomas isudde lai. Anambo ngara uaṛṛuudda. Arawe Mawu Yesus nirumanta wuṛṛu nirumarisikka su pattangnganni mangitou, see nabbisara, “Sal᷊amatta wuṛṛu paddarame si yamiu.”

²⁷Wua'udde Mawu Yesus nabbisara si Tomas, “Pa'ellege lima-U, wuṛṛu addoa'e tal᷊imadonu isindi. Ul᷊uṛṛa'e limanu wuṛṛu addoa'e su sandiṛṛang-Ku. Arie mapapadua lai ewe'e pangimante!”

²⁸I Tomas nabbisara Mawu Yesus, “Mawu'u wuṛṛu Ruata'u!”

²⁹Ne Mawu Yesus nabbisara si tou, “I'o mangngimanna ana waugu naasilote si Ya'u? Asasal᷊amatta su taumata apan mangngimanna salaiwe tawe naasilo si Ya'u!”

³⁰Ta'e manambo lai manga al᷊aṛṛindu'a waine apan suete niola'u Mawu Yesus su saruannu manga mallal᷊aṛṛenggen-Ne, arawe tate nawoṛṛeta sulal᷊ummu wuke indi.

³¹Arawe sarangkanambone indi niwoṛṛetta, tadea'u i yamiu mangngimanna manungku Mawu Yesus eteudde Ratu Punnu Sal᷊amatta, Ana'u Ruata, wuṛṛu ana waugu mangngimanna si Tou, i yamiu naasomba wiakka.