Read Talaud YOHANES 3 Bible Online

YOHANES 3 - Talaud bible

YOHANES 3

¹Pia sangkatou piaṛṛa'u agama wuassu taumatan Farisi aranne i Nikodemus.

²Su sambau ṛabbi i tou nirumanta ringannu Mawu Yesus wuṛṛu nabbisara, “Iamangnga Huru, i yami masingkatta Iamangnga nirolokku Ruata. Ana waugu tawe saran sangkatou apan wotongnge ma'aola'a tanda ma'aṛṛindu'a ere niola'u Iamangnga, amungkangngu Ruata tawe uaṛṛundinganna si tou.”

³Mawu Yesus sinumimbakka, “Pangimante, tawe saran sangkatou apan botongnge maola'a lal᷊oṛṛon araratuannu Ruata, amungkangngu i tou tawe iasungkangnga apia.”

⁴“Ṛatadde taumata timmaddete wotongnge iasungkangnga apia,” sasimbakki Nikodemus su Mawu Yesus, “Wotongnge i tou mabelengnga apia sulal᷊ummu illoṛṛo inangnge wuṛṛu see iasungkangnga apia?”

⁵Mawu Yesus sinumimbakka, “Atonna-tonna wisara'U indi: amungkangngu taumata tawe iasungkangnga wuassu ua'e wuṛṛu Ghaṛṛahon Ruata, taumata udde tawe mawal᷊i su reengannu walahannu Ruata.

⁶Taumata su ola'u wadangnge niasungkangngu hagurangnga, arawe su pangangimanna niasungkangngu Ghaṛṛahon Ruata.

⁷Arie pa'aherangnga amungkangngu i Ya'u mabbisara: i yamiu sarangkanambone ṛinone iasungkangnga apia.

⁸Anginna tuttiupa watukkuapa ipa'apul᷊une; i ite ma'aringikka tingikke, arawe i ite wagga wuassuapa rarantane wuṛṛu watukku apa amatanne. Aroddi lai taumata apan niasungkangngu Ghaṛṛahon Ruata.”

⁹“Ereapa udde wotongnge mariaddi?” aiwal᷊o Nikodemus.

¹⁰Mawu Yesus sinumimbakka, “I'o huru su Israel; ṛatadde i'o wagga?

¹¹Pangimante: i yami mabbisara tumba'u apa apan asingkatanni ami, wuṛṛu i yami mattiala tumba'u su ola'u apa apan niasiloanni ami; arawe i yamiu maddiri mangngimanna tatiala wuassi ami.

¹²I yamiu tawe mangngimanna amungkangngu i Ya'u mabatti'a si yamiu su ola'u inolaannu runia indi; ereapa i yamiu wotongnge mangngimanna, amungkangngu i Ya'u mabatti'a si yamiu su ola'u surga?

¹³Tawe saran sangkatou apan suete nasengkengnga watukku surga, tumba'u i Tou apan sinumossokka su runia, eteudde Ana'u Taumata.

¹⁴Ere lai i Musa nanduittu atoanna witu'a su alu sambua su wadda'a, aroddi lai Ana'u Taumata ṛinone iruitta,

¹⁵tadea'u taumata nambo apan mangngimanna si Tou maasomba wiakka tutune wuṛṛu saran mal᷊annu-l᷊annu.”

¹⁶Ana waugu Ruata aroddi arangngune su taumatan runia indi, na'oman sara i Tou nanantillu Anang-Nge tinggassa, tadea'u suapan taumata apan mangngimanna si Tou tawe mate, ewe'e maasomba wiakka tutune wuṛṛu saran mal᷊annu-l᷊annu.

¹⁷Ana waugu Ruata nandolokku Anang-Nge wal᷊ine maṛṛuungngu runia indi, arawe manal᷊amatta runia indi.

¹⁸Taumata apan mangngimanna si Tou tawe iṛṛuumanna. Arawe taumata apan tawe mangngimanna suete niṛṛuumannu Ruata, ana waugu i tou tawe mangngimanna Ana'u Ruata apan tinggassa udde.

¹⁹I Tou niapaasal᷊a ana waugu inolaanna indi: Asasemakka udde nirumantate su runia, arawe taumata lembo maapulun ararandumma wuassu asasemakka, ana waugu pallal᷊agu mangitou lal᷊eo.

²⁰Suapan taumata apan ma'ola'a al᷊al᷊eo, maddirin asasemakka; tadea'u pallal᷊agune apan dal᷊eo tawe asiloanna.

²¹Arawe taumata apan tuttuṛṛutta apulun Ruata, nirumanta ringannu asasemakka tadea'u lumiatta'a manungku al᷊awo'u inolaanne udde tumuṛṛutta apulun Ruata.

²²Wua'udde Mawu Yesus wuṛṛu mallal᷊aṛṛenggen-Ne inaite watukku Yudea. I tou natana'a poiaroddi manga pira allo al᷊annune ringanni mangitou wuṛṛu mannaṛṛani.

²³Su tempo udde i Yohanes Mananaṛṛani taambe sinumutta su tuttupanna. I tou mannaṛṛani su Ainon, tawe marau wuassu Salim, ana waugu poiaroddi manambo ua'e. Manga taumata nirumanta ringanni tou, ne i tou nanaṛṛanite si mangitou.

²⁵Manga sire pira mallal᷊aṛṛenggenni Yohanes mannatakke uatatiakka ringannu taumatan Yahudi su ola'u atorannu pamamaresi.

²⁶I mangitou inaite ringanni Yohanes, wuṛṛu nabbisara, “Iamangnga Huru, Iamangnga ta'e ma'anaungnga taumata apan su sambau ringannu Iamangnga su samba'an Sal᷊ukku Yordan udde, apan tina'en Iamangnga dorone? I tou orassa indi lai mannaṛṛani wuṛṛu manambo taumata rudanta ringanni-Tou!”

²⁷I Yohanes sinumimbakka, “Taumata tawe maatahuanna al᷊awo'a amungkangngu tawe ionggolu Ruata si tou.

²⁸I yamiu sassane suete naaringikka si ya'u nabbisara, ‘I ya'u wal᷊ine Ratum Punnu Sal᷊amatta. I ya'u nirolokka malliu ṛoro si Tou.’

²⁹Ma'a'awingnga wawine tatahuanannu ma'a'awingnga esakka. Hawe maa'awingnga esakka udde tumba'u uarisikka su sandiṛṛanne wuṛṛu uararingikka, wuṛṛu i tou lulluassa napawe naaringikke tingikku maa'awingnga esakka. Aroddi lai ya'u. Orassa indi ya'u lembon lulluassa.

³⁰Ete i Tou apan ṛinone magewal᷊anna, wuṛṛu i ya'u ma'adio'anne.”

³¹Apan nirumanta wuassu atanggaṛṛanne nangillembo wuassu sarangkanambone. Apan nirumanta wuassu runia nareengnga taumatan runia, wuṛṛu uahahatton pallal᷊agun runia. I Tou apan nirumanta wuassu atangngaṛṛanne nangilembo wuassu sarangkanambone.

³²I Tou mabbisara su ola'u apa apan suete niasiloanna wuṛṛu niaringiṛṛan-Ne, arawe tawe saran sangkatou apan mangngimanna tatiala-Ne.

³³Taumata apan mangngimanna tatiala-Ne udde, mangnga'u manungku Ruata udde atonna.

³⁴Ana waugu taumata apan nirolokku Ruata mabatti'u wisaran Ruata, ana waugu Ghaṛṛahon Ruata suete nionggolla si Tou sarangkanambone.

³⁵Iamangnga mandangngu Anang-Nge, wuṛṛu suete nanantillu taṛṛino si Tou.

³⁶Taumata apan mangngimanna Ana'a udde saru maasomba pabbawiakka tutune wuṛṛu saran mal᷊annu-l᷊annu. Arawe taumata apan tawe madaringikka Ana'a udde tawe maasomba wiakke. I tou iṛṛuumannu Ruata sarangkal᷊o'engnge.