Read Talaud YOHANES 5 Bible Online

YOHANES 5 - Talaud bible

YOHANES 5

¹Wua'udde pia ramean Yahudi, ne Mawu Yesus inaite watukku Yerusalem.

²Su Yerusalem marani “Ngaran Domba” pia sambau li'u, apan su wisaran Ibrani isassago Betesda. Isudde pia lima panumbal᷊e.

³Su manga panumbal᷊e udde manambo taumata marada'a ual᷊allowangnga, piaddu wuta, piaddu u'ento, wuṛṛu pia lai lome. [I mangitou sarangkanambone uaraṛṛaddo ua'en li'u udde umio'a.

⁴Ana waugu wiasane mala'ekattu Mawu sussossokka su li'u udde wuṛṛu mangngio'u ua'ene. Wuṛṛu taumata marada'a apan paarorone umurumma sulal᷊ummu li'u udde su tempo ua'e rudal᷊ua'a, sarun mapia wuassu radangnge.]

⁵Su tampa udde pia sangkatou esakka apan marada'a tallutem pul᷊o ual᷊u su tonnane al᷊annune.

⁶Mawu Yesus naasilo si tou ual᷊allowangnga poiaroddi, wuṛṛu masingkatta manungku i tou mal᷊annute marada'a; ne Mawu Yesus naiwal᷊o si tou, “I'o ma'apulu iapaapia?”

⁷Taumata marada'a udde sinumimbakka, “Iamangnga, tawe taumata isindi mapasutta'u sulal᷊ummu li'u napawe ua'ene rudal᷊ua'e. Wuṛṛu tantal᷊anna ya'u mattudan li'u, taumata waine niumurumpe rorone.”

⁸Ne Mawu Yesus nabbisarate si tou, “Pabbangunte, lappute wilannu wuṛṛu apul᷊ete.”

⁹Su tempo udde lai taumata udde napia. I tou nallapute wilanne wuṛṛu inumamatte. Olangnge udde nariaddi su allon Sabatta.

¹⁰Ana waugu udde manga tembonannu Yahudi nabbisara taumata apan wakkute napia udde, “Allo indi allon Sabatta. I'o tawe wotongnge mallapu wilannu.”

¹¹Arawe taumata udde sinumimbakka, “Taumata apan napaapia'u tanginna nandolokka nallapu wilatta wuṛṛu i ya'u niapaamatta.”

¹²“Isai i tou apan nandolokku mallapu wilannu wuṛṛu niapaamatta?” aiwal᷊o mangitou.

¹³Arawe taumata apan napiate udde wagga isai taumatane, ana waugu Mawu Yesus nattingkawul᷊ite su wallattu taumata nambo isudde.

¹⁴Wua'udde Mawu Yesus nassomban taumata udde sulal᷊ummu Wal᷊e Mawu, wuṛṛu nabbisara si tou, “Orassa indi i'o napiate. Arie pa'ola'a rosa apia, tadea'u tawe mamendamma rada'a lembon aral᷊eoanne.”

¹⁵Ne taumata udde napul᷊ete see namasingkatta su tembonannu Yahudi manungku ete Mawu Yesus napaapian tou.

¹⁶Wuṛṛu ana waugu udde i mangitou mannattakke mapaasusa Mawu Yesus ana waugu i Tou mapaapian taumata su allon Sabatta.

¹⁷Arawe Mawu Yesus nabbisara si mangitou, “Iamang-Ku sidutu mammanara sara orassa indi, wuṛṛu i Ya'u lai mammanara.”

¹⁸Manga wisara udde naaola'a manga tembonannu Yahudi mangke maddea'a mamate si Tou. I mangitou na'ola'a aroddi, wal᷊ine tumba'u ana waugu i Tou nilumawanna Titan agama su ola'u allon Sabatta, arawe ana waugu i Tou lai nabbisara manungku Ruata udde Iamang-Nge; atappasanne i Tou mannul᷊ungngu watangan-Ne ringannu Ruata.

¹⁹Mawu Yesus sinumimbakka su manga taumata udde arendi, “Pangimante, Ana'a tawe mapa'ola'a al᷊awo'u inolaanna ringannu taṛṛino-Ne sassane. I Tou tumba'u maaola'a apa apan niasiloanni Tou niola'u Iamang-Nge. Ana waugu apa apan niola'u Iamangnga, udde lai a'olaannu Ana'a.

²⁰Ana waugu Iamangnga mandangngu Ana'a wuṛṛu manantiro si Tou al᷊awo'u inolaan-Ne sassane. Ewe'e lai Iamangnga sarun manantiro si Tou manga inolaanna apan magewal᷊anna lai ma'oman sara i yamiu tumiangnga.

²¹Iamangnga udde mapaawangunnu taumata nate, wuṛṛu mangngonggolu wiakka tutune wuṛṛu mal᷊annu-l᷊annu; aroddi lai Ana'a mangngonggolu wiakka tawe panginsueanne su taumata apan maapulu onggol᷊annu wiakka.

²²Iamangnga sassane tawe makkuungngi sai-sai. Anambon taṛṛino ipakkuungnga suete tinantilla su Anang-Nge.

²³Iamangnga na'ola'a udde tadea'u anambon taumata mangngaddatta Ana'a ere lai i mangitou mangngaddatta Iamangnga. Taumata apan maddiri mangngaddatta Ana'a maddiri lai mangngaddatta Iamangnga apan nandolokku Ana'a.

²⁴Mangke atonna manga wisara-U indi: Taumata apan madaringikka manga wisara-U wuṛṛu mangngimanna si Tou apan nandolo-U, maatahuanna wiakka tutune wuṛṛu saran mal᷊annu-l᷊annu. I tou tawe iṛṛuumanna; i tou nal᷊iute wuassu papate wuṛṛu naaba'e wiakka.

²⁵Pangimante: Sarun rumanta tempone — ewe'e nia'omante lai tempone — taumata nate sarun maddaringikka tingikku Ana'u Ruata. Wuṛṛu taumata apan maddaringikka sarun masal᷊amatta.

²⁶Ere lai Iamangnga sassane punnu wiakka, i Tou na'ola'a Anang-Nge lai punnu wiakka.

²⁷I Tou suete nangonggolla su Anang-Nge taṛṛino ipakuungnga, ana waugu i Tou Ana'u Taumata.

²⁸Arie i yamiu tumiangnga maaringikka manga olangnge indi, ana waugu tempone sarun a'omanna manungku taumata nambo apan natete maaringikka tingikke,

²⁹see sumabangnga wuassu lal᷊abinganna. Taumata apan suete na'ola'a apapia sarun mabangunna mabbiakka. Arawe taumata apan suete na'ola'a al᷊al᷊eo sarun mabangunna wuṛṛu iṛṛuumanna.”

³⁰“I Ya'u tawe mapa'ola'a manga apa wuassu apulu-U sassane. I Ya'u tumba'u makkuungnga wuassu parentan Ruata. Wuṛṛu i Ya'u maṛṛawessa tawe sal᷊ane, ana waugu i Ya'u tawe tumuṛṛutta apulu-U sassane, arawe apulun Iamangnga apan nandolo-U.

³¹Unnu wisara i ya'u mangngagillu tatiala su ola'u riri-U sassane, tatiala udde tawe apangimananna.

³²Arawe pia taumata waine apan mangngagillu tatiala su ola'u riri-U, wuṛṛu i Ya'u masingkatta manungku tatialane udde atonna.

³³I yamiu suete nandolokku daroloṛṛanna ringanni Yohanes, wuṛṛu i tou suete nangagillu tatialane su ola'u riri-U.

³⁴Olangnge indi Ta'u iwisara, wal᷊ine ana waugu i Ya'u mapandumma tatiala wuassu taumata, arawe tadea'u i yamiu maasomba asasal᷊amatta.

³⁵I Yohanes udde naal᷊ihida sol᷊o apan luṛṛenggamma wuṛṛu mannemakka. Tumba'u sangkatempo i yamiu mal᷊uassa mannengkamma semakka udde.

³⁶Arawe tatiala-U magewal᷊anna wuassu tatialan Yohanes. Apa apan niola-U orassa indi, eteudde manara apan nianggillu Iamangnga si Ya'u, mattiala manungku Iamangnga suete nandolo-U.

³⁷Wuṛṛu Iamangnga apan nandolo-U lai nangagillu tatiala su ola'u riri-U. I yamiu taambe naaringikka tingikke ara'e naasilo pahudde.

³⁸Manga wisara-Ne tawe maaddo sulal᷊ummu naungngu ana waugu i yamiu tawe mangngimanna si Ya'u apan nirolokki Tou.

³⁹I yamiu mangngurumma Wuke Susi ana waugu mangngantimma manungku ringannu olangnge udde i yamiu maatahuanna wiakka tutune wuṛṛu saran mal᷊annu-l᷊annu. Wuṛṛu Wuke Susi udde sassane mattiala su ola'u riri-U.

⁴⁰Arawe i yamiu maddiri rumanta ringang-Ku tadea'u maasomba wiakka apan tawe panguddusanne.

⁴¹I Ya'u tawe maddea'a daralo wuassu taumata.

⁴²I Ya'u masingkatti yamiu, i Ya'u masingkatti yamiu maddiri mandangngu Ruata sulal᷊ummu naungngu.

⁴³I Ya'u nirumanta ringannu taṛṛinon Iamang-Ku, arawe i yamiu maddiri manarimma-U. Arawe amungkangngu taumata waine rumanta ringannu taṛṛinone sassane, i yamiu maapulu manarimmatti tou.

⁴⁴Ereapa i yamiu wotongnge apangimananna, amungkangngu i yamiu maddea'a daralo wuassu sansul᷊ungngu taumata, wuṛṛu tawe mappandumma maddea'a daralo wuassu Ruata apan Tinggassa?

⁴⁵Arie massunna i Ya'u mapaasal᷊ang kamiu su saruannu Iamangnga. Arawe mapaasal᷊ang kamiu eteudde i Musa, ete i tou apan aantimanni yamiu.

⁴⁶Unnu wisara i yamiu mangngimanna si Musa, i yamiu sarun mangngimanna lai si Ya'u, ana waugu ete su ola'u riri-U, i tou namoṛṛetta.

⁴⁷Arawe amungkangngu i yamiu tawe mangngimanna apa apan suete niwoṛṛetti Musa, ereapa i yamiu wotongnge mangngimanna apa apan iwabal᷊o-U si yamiu?”