Read Talaud YOHANES 6 Bible Online

YOHANES 6 - Talaud bible

YOHANES 6

¹Manga pira allo wua'udde, Mawu Yesus inaite su samba'a Ranon Galilea, apan isassago lai Ranon Tiberias.

²Napawe na'omate poiaroddi, manambote taumata uatantalongnga si Tou ana waugu i mangitou suete naasilo manga al᷊aṛṛindu'a apan niolang-Nge ringannu napaapian taumata marada'a.

³Mawu Yesus sinuma'a su wowom buidda, wua'udde inuma'ianna isudde ringannu mallal᷊aṛṛenggen-Ne.

⁴Tempo udde maranite Allo Wahewam Paskah Yahudi.

⁵Napawe Mawu Yesus na'ellega su uapal᷊iwutta, i Tou naasilo taumata mangngelekka rudanta ringanni Tou. Ne i Tou nabbisara si Filipus, “Suapa i ite wotongnge mamalli anna, tadea'u taumata nambo indi wotongnge umanna?” (

⁶Mawu Yesus masingkatte apa apan sarun olaan-Ne, arawe i Tou nabbisara aroddi ana waugu i Tou ma'apulu maannamma si Filipus.)

⁷I Filipus sinumimbakka, “Roti aregane rua ṛasutta roitta sal᷊a'a, tawe maattiudda su manga taumata indi, salaiwe sangkatou tumba'u maabba'a adio'a.”

⁸Sangkatou mallal᷊aṛṛenggennu Mawu Yesus apan baine eteudde i Andreas, tuṛṛangngi Simon Petrus nabbisara,

⁹“Isindi pia sangkatou ana'a esakka uaapiddu roti limam bau wuṛṛu inassa ruam bua. Arawe apa hunane su taumata anambone indi?”

¹⁰“Doloṛṛa'e manga taumata udde uma'ianna,” wisara Mawu Yesus. Su tampa udde manambonannal᷊o, nariaddi manga taumata udde inuma'iante su nannal᷊o — sarangkanambone itatakasere esakka lima ṛiwu su atoune.

¹¹Wua'udde Mawu Yesus nanganu roti udde, see ma'adiangkamanna su Ruata. Nasue udde i Tou natahiate roti udde su taumata nambo. Wua'udde i Tou nattahia inassa, wuṛṛu i mangitou inumanna mangke nawusa-wusa.

¹²Napawe sarangkanambone suete inumanna na'oman sara nal᷊aidda, Mawu Yesus nabbisara su manga mallal᷊aṛṛenggen-Ne, “Ammul᷊a'e lambeng kanna udde; arie ma'oman sara piaddu maramme.”

¹³See i mangitou nangammullu mapul᷊o dua su ul᷊angnge napene lambeng kanna wuassu limam bau roti apan niannan taumata nambo udde.

¹⁴Napawe taumata nambo udde naasilo al᷊aṛṛindu'a apan niola'u Mawu Yesus, i mangitou nabbisara, “Atonna, ete indi Nabi apan a'antimanna rumanta su runia!”

¹⁵Mawu Yesus masingkatte i mangitou nirumanta tuddane mamata'i Tou maola'a ratu mangitou. Ana waugu udde i Tou inaite nassal᷊iu watukku wageangnge pia wuidda.

¹⁶Napawe allo maṛṛabite, manga mallal᷊aṛṛenggennu Mawu Yesus sinumossokke watukku rano.

¹⁷See i mangitou sinuma'ete saalanna malliu rano udde mabatukku Kapernaum. Allo marandumpe arawe Mawu Yesus taambe lai nirumanta ringanni mangitou.

¹⁸Tantal᷊anna udde rano mannattakke mattandi'a ana waugu anginna ma'ikkatte.

¹⁹Napawe nassenggotte itatakasere lima ara'e anummu kilo meteṛṛe araune, i mangitou naasilo Mawu Yesus mattudan saalanna u'amatta su wowon ua'e. I mangitou mangke nata'utta.

²⁰Arawe Mawu Yesus nabbisara si mangitou, “Arie paata'utta, i Ya'u indi!”

²¹See ringannu naungnga lulluassa i mangitou nanal᷊oho si Tou watukku saalanna, wuṛṛu orassa udde lai saalanni mangitou na'omate su tampa tattudanna.

²²Su allo tiṛṛabbine taumata nambo apan ta'e uatana'a su samba'an rano, natutukka manungku tanginna tumba'u pia sangngassa saalanna poiaroddi. I mangitou masingkatta manungku manga mallal᷊aṛṛenggennu Mawu Yesus nassenggotte ringannu saalanna udde, arawe Mawu Yesus tawe naṛṛundinganna.

²³Wua'udde manga pira ngassa saalanna wuassu Tiberias nirumanta wuṛṛu nabbal᷊ango maranin tampan taumata nambo udde u'anna roti napawe Mawu Yesus suete na'adiangkamanna.

²⁴Napawe taumata nambo udde naasilo manungku mawae Mawu Yesus ara'e mallal᷊aṛṛenggen-Ne tawe isudde, i mangitou sinuma'ete manga salaanna udde wuṛṛu inaite watukku Kapernaum maddea'a Mawu Yesus.

²⁵Napawe manga taumata udde nassombate Mawu Yesus su samba'an rano, i mangitou naiwal᷊o si Tou, “Iamangnga Huru, ro'en angngera Iamangnga na'oma isindi?”

²⁶Mawu Yesus sinumimbakka, “Atonna i yamiu madde'a si Ya'u wal᷊inewe ana waugu i yamiu naasunnate pandumannu manga al᷊arindu'a apan Ta'u niola'a, arawe ana waugu i yamiu suete inumanna na'oman sara nal᷊aidda.

²⁷Arie pammanara ipaddea'a anna apan wotongnge masue wuṛṛu mawukku'a. Pammanarate tadea'u maasomba anna apan tawe mawukku'a wuṛṛu apan mangngonggolu wiakka tutune wuṛṛu saran mal᷊annu-l᷊annu. Anna udde sarun ionggolu Ana'u Taumata si yamiu, ana waugu i Tou suete nitenegu Ruata Iamangnga.”

²⁸See i mangitou naiwal᷊o si Tou, “I yami ṛinone ma'ola'a apa tadea'u maatuṛṛutta apulun Ruata?”

²⁹Mawu Yesus sinumimbakka, “Ete indi apan ipa'apulun Ruata wuassi yamiu: pangimante si Tou apan nirolokku Ruata.”

³⁰“Amungkangngu aroddi,” unni mangitou, “tatiala apa apan ionggolli Iamangnga tadea'u i yami maasilo wuṛṛu mangngimanna Iamangnga? Apa apan sarun olaannu Iamangnga?

³¹Iupungngu al᷊amonang kami u'anna manna su wadda'a, ere lai uawoṛṛetta sulal᷊ummu Wuke Susi, ‘i Tou napaanni mangitou roti wuassu surga.’ ”

³²See Mawu Yesus nabbisara si mangitou, “Pangimante: Wal᷊ine i Musa ewe'e ete Iamang-Ku apan nangonggolu roti suṛṛinone wuassu surga.

³³Ana waugu roti apan nionggolu Ruata eteudde i Tou apan nirumanta wuassu surga wuṛṛu nangonggolu wiakku taumata su runia.”

³⁴“Iamangnga,” unni mangitou, “onggol᷊a'awe lai si yami roti udde uatialu.”

³⁵“Ete i Ya'u roti apan mangonggolu wiakka,” unni Mawu Yesus si mangitou. “Taumata apan rumanta ringang-Ku tawe amal᷊unusanna sarangkal᷊o'engnge. Wuṛṛu taumata apan mangngimanna si ya'u tawe marou lai sarangkal᷊o'engnge.”

³⁶“Arawe ere sueten Ta'u niapaasingkatta si yamiu, salaiwe i yamiu suete naasilo si Ya'u, i yamiu tawe mangngimanna.

³⁷Anambon taumata apan nionggolu Iamangnga si Ya'u sarun rumanta ringang-Ku. I Ya'u tawe mapawelengngi sai-sai apan rumanta ringang-Ku.

³⁸Ana waugu i Ya'u nirumanta wuassu surga, wal᷊ine ma'ola'a apulu-U sassane, ewe'e apulun Tou apan nandolo-U.

³⁹Wuṛṛu ete indi apulu-Ne apan nandolo-U: tadea'u wuassu anambon taumata apan tinantilla si Ya'u, tawe saran sangkatou apan mawul᷊i; tadea'u i Ya'u mapaawangunni mangitou su Allong Kiamatta.

⁴⁰Atonna, eteudde apulun Iamang-Ku: Tadea'u anambon taumata maasilo Ana'a wuṛṛu mangngimanna si Tou maasomba wiakka tutune wuṛṛu saran mal᷊annu-l᷊annu, wuṛṛu iapaawiakka apia su Allong Kiamatta.”

⁴¹Manga taumatan Yahudi manattakke sussawutulla su saruannu Mawu Yesus, ana waugu i Tou nabbisara: “I Ya'u roti apan niumonto'a wuassu surga.”

⁴²I mangitou nabbisara, “Wal᷊inewe indi Yesus ana'i Yusuf? I yami masingkattu inangnga iamangnge! Ereapa i Tou wotongnge mabbisara i Tou niumonto'a wuassu surga?”

⁴³See Mawu Yesus nabbisara si mangitou, “Arie passawutulla.

⁴⁴Tawe saran sangkatou maaranta ringang-Ku, amungkangngu Iamangnga apan nandolo-U tawe mangapiddi tou ringang-Ku; wuṛṛu isai apan rumanta, sarun Ta'u iapaasengkengnga su Allong Kiamatta.

⁴⁵Sulal᷊ummu Wuke Manga Nabi uawoṛṛetta arendi, ‘Anambon taumata sarun tantiroannu Ruata.’ Nariaddi anambon taumata apan madaringikka Iamangnga wuṛṛu mangngurumma wuassi Tou, rumanta ringang-Ku.

⁴⁶Udde tawe atapasanne manungku piate taumata apan suete naasilo Iamangnga. Tumba'u i Tou apan nirumanta wuassu Ruata, suete naasilo Iamangnga.

⁴⁷Paanaunge: Taumata apan mangngimanna, maatahuanna wiakka tutune wuṛṛu saran mal᷊annu-l᷊annu.

⁴⁸Ete i Ya'u roti apan mangonggolu wiakka.

⁴⁹Iupungngu al᷊amonanu u'anna manna su wadda'a wuṛṛu i mangitou nate lai.

⁵⁰Arawe tawe aroddi roti apan niumonto'a wuassu surga; taumata apan inumanna roti udde tawe mate.

⁵¹Ete i Ya'u roti apan niumonto'a wuassu surga — roti apan mangonggolu wiakka. Taumata apan umanna roti indi sarun mabbiakka sarangkal᷊o'engnge. Roti apan Ta'u ionggolla ipabiakku taumata su runia eteudde ṛeme-U.”

⁵²Naaringikka udde, manga taumatan Yahudi uatatiakke sangkatou ringannu waine. “Ereapa taumata indi wotongnge mangonggolu ṛemessi Tou si ite iapaanna?” unni mangitou.

⁵³See Mawu Yesus nabbisara si mangitou, “Pangimante: Amungkangngu i yamiu tawe umanna ṛemessu Ana'u Taumata wuṛṛu ma'inumma raṛṛa-Ne, i yamiu atonna-tonna tawe mabbiakka.

⁵⁴Taumata apan umanna ṛeme-U wuṛṛu ma'inumma raṛṛa-U maatahuanna wiakka tutune wuṛṛu saran mal᷊annu-l᷊annu wuṛṛu i Ya'u sarun mapaawiakki tou apia su Allong Kiamatta.

⁵⁵Ana waugu ṛeme-U atonna-tonna udde anna, wuṛṛu raṛṛa-U atonna-tonna udde inumanna.

⁵⁶Taumata apan umanna ṛeme-U wuṛṛu ma'inumma raṛṛa-U sidutu su sambau ringang-Ku wuṛṛu i Ya'u ringanni tou.

⁵⁷Iamangnga apan wiakka udde, nandolo-U wuṛṛu i Ya'u lai mabbiakka sulal᷊ummu Iamangnga. Aroddi lai taumata apan umanna ṛeme-U sarun mabbiakka wuassia-U.

⁵⁸Ete indi roti apan niumonto'a wuassu surga: wal᷊ine ere roti apan niannu iupungngu al᷊amonanu. Ana waugu napawe niumanna roti udde, i mangitou nate lai. Arawe taumata apan umanna roti indi sarun mabbiakka sarangkal᷊o'engnge.”

⁵⁹Sarangkanambone udde niwisara Mawu Yesus su tempo i Tou mangngaṛṛa'a su wal᷊em pattataṛṛamawuanna su Kapernaum.

⁶⁰Napawe suete naddaringikka manga wisara Mawu Yesus udde, manambo su wallattu mallal᷊aṛṛenggen-Ne nabbisara, “Tatantiro indi tumanite masahadda. Isai wotongnge maasunna!”

⁶¹Mawu Yesus sassane masingkatta manungku manga mallal᷊aṛṛenggen-Ne sussawutulla su ola'u hatto udde. Ne i Tou nabbisara, “Apa i yamiu nal᷊udda ana waugu manga wisara-U indi?

⁶²Ereapa olangnge amungkangngu i yamiu maasilo Ana'u Taumata masengkengnga apia su tampane apan paarorone?

⁶³Apan maawiakka taumata eteudde Ghaṛṛahon Ruata. Atatohassu taumata tawe gunane. Manga wisara apan niwisara-U si yamiu indi eteudde wisara Ghaṛṛahon Ruata wuṛṛu manga wisara apan mangngonggolu wiakka.

⁶⁴Arawe pia lai su wallatti yamiu apan tawe mangngimanna.” (Mawu Yesus massingkatte ro'en paarorone isai-sai apan tawe mangngimanna wuṛṛu isai-sai sarun mamate si Tou.)

⁶⁵See Mawu Yesus nabbisara apia, “Ana waugu udde i Ya'u mamasingkatta si yamiu manungku tawe saran sangkatou apan maaranta ringang-Ku, amungkangngu Iamangnga tawe mamala.”

⁶⁶Nanattakka orassa udde manambo mallal᷊aṛṛenggen-Ne manantangngi Tou, wuṛṛu maddirite mallal᷊aṛṛenggenna si Tou.

⁶⁷See Mawu Yesus naiwal᷊o su sire mapul᷊o dua mallal᷊aṛṛenggen-Ne, “Apa i yamiu ma'apulu lai manantang-Ku?”

⁶⁸“Mawu,” wisaran Simon Petrus si Tou, “ringanni sai yami sarun inai? Wisara Mawu mangngonggolu wiakka tutune wuṛṛu saran mal᷊annu-l᷊annu.

⁶⁹I yami mangngimante wuṛṛu naatutukke manungku ete Mawu darol᷊oṛṛanna apan naukkassa wuassu Ruata.”

⁷⁰Mawu Yesus sinumimbakka, “Wal᷊inewe i Ya'u apan namile si yamiu mapul᷊o dua indi? Arawe sangkatou wuassu wallatti yamiu eteudde ghaṛṛaho lal᷊eo!”

⁷¹Apan su pandumannu Mawu Yesus eteudde i Yudas ana'i Simon Iskariot. Ana waugu salaiwe i Yudas sangkatou wuassu sire mapul᷊o dua mallal᷊aṛṛenggennu Mawu Yesus, ete i tou apan namate Mawu Yesus.