Read Talaud YOHANES 7 Bible Online

YOHANES 7 - Talaud bible

YOHANES 7

¹Wua'udde Mawu Yesus inaite su alawo'u tampa su Galilea. I Tou maddiri mabatukku leta'u Yudea ana waugu manga tembonannu Yahudi poiaroddi pia pandumma mamate si Tou.

²Su tempo udde maranite Allo Wahewa Rasannu Rongnga.

³Ne manga tuṛṛangngu Mawu Yesus nabbisara si Tou, “Tantanga'e tampa indi wuṛṛu roote su Yudea, tadea'u manga mallal᷊aṛṛenggen-Nu maasilo lai manara-Nu.

⁴Tawe taumata apan maapamunin apa apan a'olaanne. Amungkangngu i tou maapulu asingkatannu awadaalla. Amungkangngu i'o maapulu ma'ola'a inolaanna ere udde, ahewallu runia indi ṛinone maasingkatta!” (

⁵Ana waugu manga tuṛṛang-Nge sassane tawe mangngimanna si Tou.)

⁶“Taambe tempone si Ya'u,” unnu Mawu Yesus si mangitou, “arawe si yamiu, suapan tempo udde wotongnge.

⁷Runia indi tawe marantinni yamiu. Arawe i Ya'u atonna-tonna ia'arantinnu runia, ana waugu i Ya'u sidutu mabbisara runia manungku inolaanne lal᷊eo.

⁸Roote i yamiu sassane su ramea udde. I Ya'u tawe inai ana waugu tempone taambe nia'omanna si Ya'u.”

⁹Eteudde wisara Mawu Yesus su manga tuṛṛang-Nge, wuṛṛu i Tou lai natana'a su Galilea.

¹⁰Napawe manga tuṛṛang-Nge inaite watukku ramea udde, mal᷊anna-l᷊annaba Mawu Yesus nattuda sassane tawe niasingkatannu taumata.

¹¹Su al᷊annun ramea udde, manga tembonannu Yahudi maddea'a si Tou wuṛṛu uaaiwal᷊o, “Suapa i Tou?”

¹²Manambo taumata mannattake uasasal᷊imburungnga su ola'i Tou. Piaddu mabbisara, “I Tou taumata mapia.” Piaddu lai mabbisara, “Tawe! I Tou mangngal᷊iwun taumata nambo.”

¹³Arawe tawe saran sangkatou waṛṛani mabbisara uasasaruanna su ola'i Tou ana waugu i mangitou matta'uttu manga tembonannu Yahudi.

¹⁴Mattangngan ramea, Mawu Yesus sinumutta sulal᷊ummu Wal᷊e Mawu, see nanattakke mangngaṛṛa'a.

¹⁵Manga tembonannu Yahudi naherangnga wuṛṛu nabbisara, “Ereapa taumata indi asingkanne aroddi anambone, sumbal᷊i I Tou tawe nassi'ol᷊a?”

¹⁶Mawu Yesus sinumimbakka, “Apan Ta'u ia'aṛṛa'a indi wal᷊inewe al᷊aṛṛa-U arawe al᷊aṛṛa'i Tou apan nandolo-U.

¹⁷Taumata apan matuṛṛutta apulun Ruata, sarun maasingkatta tanne al᷊aṛṛa-U indi darantane wuassu Ruata ara'e wuassia-U sassane.

¹⁸Taumata apan mangngonggolu al᷊aṛṛangnge sassane maddea'a awawantugu ririne sassane. Arawe taumata apan maddea'a awawantugi Tou apan nandolokki Tou, taumata udde matul᷊ida, i tou tawe awusune.

¹⁹Wal᷊inewe i Musa suete nangonggolu Titan Ruata si yamiu? Arawe su wallatti yamiu tawedu tinumuṛṛutta Tita udde. Anio i yamiu maapulu mamate si Ya'u?”

²⁰Awada'alla udde sinumimbakka, “I'o wewa! Isai ma'apulu mamate Si'o?”

²¹Mawu Yesus sinumimbakka, “Tumba'u sambau manara Ta'u olaanna su allon Sabatta, wuṛṛu naaherangnga si yamiu.

²²I Musa nangonggolu atoranna si yamiu iapasunatta — salaiwe sunatta udde tawe wuassi Musa, arawe wuassu manga iamangngu al᷊amona ro'en i Musa taanna. Ana waugu udde, su allon Sabatta lai yamiu ma'apulu mannunatta taumata.

²³Amungkangngu i yamiu ma'ola'a udde tadea'u tawe lumawangnga atoranni Musa su ola'u sunatta, anio i yamiu mannaungnga lal᷊eo si Ya'u ana waugu mapaapian ahewallu wadangngu taumata su allon Sabatta?

²⁴Arie mamarikissa taumata ana waugu pinangiananne apan aasiloanna, arawe ana waugu atatul᷊idda.”

²⁵Wua'udde pia manga pira taumatan Yerusalem mabbisara, “Wal᷊inewe indi taumatane apan tantal᷊anna raddeaanna pateanna?

²⁶Pa'ellege i Tou mabbisara tawe singgawangnge su saruannu awada'alla, wuṛṛu tawe saran sangkatou apan mabbisaran apa-apa si Tou! Asinungka manga tembonanni ite naatutukke manungku i Tou indi Ratum Punnu Sal᷊amatta?

²⁷Arawe amungkangngu Ratum Punnu Sal᷊amatta udde rumanta, tawe saran sangkatou maasingkatta wuassuapa atatanaan-Ne! Sumbal᷊i i ite masingkatta wuassuapa darantane taumata indi.”

²⁸Wua'udde, tantal᷊anna Mawu Yesus mangngaṛṛa'a su Wal᷊e Mawu, i Tou nangintul᷊i ringannu tingikka ma'ikkatta, “Nariaddi yamiu masingkatta isai i Ya'u indi, wuṛṛu wuassuapa i Ya'u nirumanta? I Ya'u tawe nirumanta ana waugu apulu-U sassane. I Ya'u nirolokki Tou apan pia taṛṛino wotongnge mandolo-U, wuṛṛu i Tou wotongnge apangimananna. Arawe i yamiu tawe maaillal᷊a si Tou.

²⁹I Ya'u maaillal᷊a si Tou, ana waugu i Ya'u nirumanta wua dinganni Tou, wuṛṛu ete i Tou apan nandolo-U.”

³⁰Su tempo udde i mangitou ma'apulu manametta Mawu Yesus, arawe tawedu waṛṛani mangagassa si Tou, ana waugu taambe nia'omanna tempone.

³¹Manambo su wallattu manga taumata udde mannattakke mangngimanna si Tou, wuṛṛu mabbisara, “Amungkangngu Ratum Punnu Sal᷊amatta udde rumanta, apa i Tou wotongnge maaola'a mannamboanna al᷊aṛṛindu'a wuassu taumata indi?”

³²Manga taumatam Farisi naaringikka ereapa taumata nambo udde uasasal᷊imburungnga su ola'u Mawu Yesus. Ana waugu udde su sampunna ringannu manga imam tembonanne, i mangitou nandolokku manga pira mandariaga Wal᷊e Mawu inai manametta Mawu Yesus.

³³Mawu Yesus nabbisara su taumata nambo su Wal᷊e Mawu, “Ete lai tal᷊ang kadio'a i Ya'u su sambau ringanni yamiu. Wua'udde i Ya'u sarun mabelengnga ringanni Tou apan nandolo-U.

³⁴I yamiu sarun maddea'a si Ya'u, arawe tawe maasomba si Ya'u; ana waugu i yamiu tawe maaranta su tampa atatanaang-Ku.”

³⁵See manga tembonannu Yahudi uawawisarate sangkatou ringannu waine, “Taumata indi inai suapa na'oman sara i ite tawe maasomba si Tou? Apa i Tou inai ringannu manga taumatan Yahudi apan uatana'a su wanua marau su wallattu taumatan Yunani, wuṛṛu mangngaṛṛa'a taumatan Yunani?

³⁶Apa pandumanne ringannu mabbisara manungku i ite sarun maddea'a si Tou, arawe tawe maasomba si Tou, wuṛṛu manungku i ite tawe maaranta su tampa i Tou uatana'a?”

³⁷Su allo panginsueannu ramea udde, eteudde allo apan apianne, Mawu Yesus dirumarisikka sulal᷊ummu Wal᷊e Mawu see nabbisara, “Taumata apan marou ṛinone rumanta ringang-Ku ma'inumma.

³⁸Su ola'u taumata apan mangngimanna si Ya'u, uawoṛṛetta sulal᷊ummu Wuke Susi, ‘Wuassu lal᷊ummu naungnge mangngelekka manga aeleṛṛannu ua'e apan mangngonggolu wiakka.’ ” (

³⁹Mawu Yesus mabbisara su ola'u Ghaṛṛahon Ruata apan sarun sengkamannu manga taumata apan mangngimanna si Tou. Ana waugu su tempo udde Ghaṛṛahon Ruata taambe nionggolla; ana waugu Mawu Yesus taambe niapaawantuga ringannu papate-Ne.)

⁴⁰Manambo taumata ma'aringikka apa apan niwisara Mawu Yesus, wuṛṛu su wallatti mangitou piaddu mabbisara, “Taumata indi natantunna ete Nabi udde!”

⁴¹Arawe piaddu lai mabbisara, “Ete indi Ratum Punnu Sal᷊amatta!” Arawe piaddu lai mabbisara, “Eh, ṛatadde Ratum Punnu Sal᷊amatta nirumanta wuassu Galilea?

⁴²Sulal᷊ummu Wuke Susi uawoṛṛetta manungku Ratum Punnu Sal᷊amatta udde sinossoṛṛanne wuassi Daud wuṛṛu sarun dumanta wuassu Betlehem, eteudde soa atatanaanni Daud.”

⁴³Panginsueanne manga taumata mannatakke uatatiakka su ola'u Mawu Yesus.

⁴⁴Piaddu ma'apulu manametta si Tou, arawe tawe saran sangkatou mamita si Tou.

⁴⁵Su tempo manga mandariaga Wal᷊e Mawu, apan nirolokka manametta Mawu Yesus nabelengke apia, manga imam tembonanne wuṛṛu manga taumatan Farisi udde naiwal᷊o si mangitou, “Anio i yamiu tawe nangapiddi Tou inawarendi?”

⁴⁶Manga mandariaga udde sinumimbakka, “Ah, taambe saran paassa pia taumata mabbisara naal᷊ihida ere i Tou!”

⁴⁷“Apa i yamiu lai suete nial᷊iwu-Ne?” unnu manga taumatan Farisi udde.

⁴⁸“Apa wuassu manga tembonanni ite wuṛṛu manga taumatan Farisi piaddu mangngimanna si Tou?

⁴⁹Arawe awadaalla indi, i mangitou wagan Tita Musa, wuṛṛu salaiwe ereapa i mangitou niawontohante.”

⁵⁰Sangkatou su wallattu manga taumatan Farisi udde eteudde i Nikodemus apan suete nirumanta ringannu Mawu Yesus. I Nikodemus nabbisara su manga taumatan Farisi waine,

⁵¹“Tumuṛṛuttu Tita, sangkatou tawe wotongnge iṛṛuumanna amungkangngu hattone taambe niaringiṛṛanna wuṛṛu pallal᷊agune niparikisanna.”

⁵²“Apa i'o lai wuassu Galilea?” sasimbakki mangitou, “Pamarikisse Wuke Susi! I'o sarun maasingkatta manungku tawe sangkatou nabi apan asapputanne wuassu Galilea!” [

⁵³Wua'udde, taumata nambo udde napul᷊ete watukku wal᷊e.