Read Talaud YOHANES 8 Bible Online

YOHANES 8 - Talaud bible

YOHANES 8

¹Arawe Mawu Yesus inaite watukku Wuiddu Zaitun.

²Tiṛṛabbine rua'allo maṛṛanggapa i Tou inaite lai su Wal᷊e Mawu, wuṛṛu manambo taumata nirumanta ringanni Tou. Mawu Yesus inuma'ianna see nanattakke mangngaṛṛa'a si mangitou.

³Tantal᷊anna udde, manga hurun agama wuṛṛu manga taumatan Farisi nangapiddu sangkatou wawine ringanni Tou apan niaratinganna sussandaga. I mangitou nandolokku wawine udde niapararisikka su pattangnganne,

⁴see nabbisara su Mawu Yesus, “Iamangnga Huru, wawine indi niaratinganna sussandaga.

⁵Sulal᷊ummu Tita Musa pia atoranna manungku wawine ereindi ṛinone tuntungannu watu ma'oman sara mate. Orassa indi ereapa addapattu Iamangnga?”

⁶I mangitou naiwal᷊o aroddi maddea'a pasasal᷊a-Ne, tadea'u i mangitou wotongnge mapaasal᷊an Tou. Arawe Mawu Yesus inumaruutta wuṛṛu mamoṛṛettu tal᷊imado-Ne su leta'a.

⁷Napawe i mangitou sidutu mammata'a, i Tou tinumatagekka wuṛṛu nabbisara si mangitou, “Taumata apan tawe dosane su wallatti yamiu, wotongnge i tou manuntungngu watu paarorone su wawine udde.”

⁸Wua'udde Mawu Yesus inumaruutta apia wuṛṛu namoṛṛetta apia su leta'a.

⁹Napawe naaringikka Mawu Yesus nabbisara aroddi, i mangitou nanantangken tampa udde, passangkatou nanattakka wuassu atimmaranne. Panginsueanne Mawu Yesus natantangnga sassane isudde ringannu wawine apan ta'e uarisikka su dararisiṛṛanne.

¹⁰See Mawu Yesus namatti'u puane wuṛṛu nabbisara wawine udde, “Suapate i mangitou sarangkanambone? Tawedu nakkuumannu?”

¹¹“Tawe, Ama,” sasimbakke. “Aroddite,” unnu Mawu Yesus, “I Ya'u lai tawe makkuumannu. Orassa indi apul᷊ete, imbaṛṛangnga ma'ola'a rosa apia.”]

¹²Mawu Yesus nabbisara apia su taumata nambo udde, wisara-Ne, “Ete i Ya'u asasemakku runia. Taumata apan tumantalongnga si Ya'u tawe umamatta su ararandumma, arawe maatahuanna asasemakku pabbiaṛṛanna.”

¹³“Orassa indi I'o mangngonggolu tatiala su ola'u riri-Nu sassane,” unnu manga taumatan Farisi udde si Tou, “Tatialanu udde awusu.”

¹⁴Mawu Yesus sinumimbakka, “Salaiwe i Ya'u mangngonggolu tatiala su ola'u riri-U sassane, tatiala-U udde atonna; ana waugu i Ya'u masingkatta wuassuapa i Ya'u nirumanta wuṛṛu watukku apa i Ya'u inai. I yamiu wagga wuassuapa i Ya'u nirumanta wuṛṛu watukku apa i Ya'u inai.

¹⁵I yamiu mammarikissa taumata ringannu apulun taumata; i Ya'u tawe mamarikissa saran sangkatou.

¹⁶Arawe unnu wisara i Ya'u mamarikissa taumata, i Ya'u maṛṛawessa udde matul᷊ida, ana waugu i Ya'u tawe sassane; Iamangnga apan nandolo-U su sambau lai ringang-Ku.

¹⁷Sulal᷊ummu Tita Musa uawoṛṛetta arendi; Tatiala apan atonna eteudde tatiala wuassu ruang katou.

¹⁸Apan mangngonggolu tatiala su ola'u riri-U udde ruang katou — i Ya'u wuṛṛu Iamangnga apan nandolo-U.”

¹⁹“Iamangngu udde suapa?” aiwal᷊o mangitou. Mawu Yesus sinumimbakka, “I yamiu tawe maaillal᷊a si Ya'u aroddi lai Iamang-Ku. Unnu wisara i yamiu maaillal᷊a si Ya'u, i yamiu lai sarun maaillal᷊a Iamang-Ku.”

²⁰Sarangkanambone udde niwisara Mawu Yesus su tempo i Tou tantal᷊anna mangngaṛṛa'a su Wal᷊e Mawu marani manga pangangadoannu roitta sasamba. Arawe tawe saran sangkatou apan nanametta si Tou, ana waugu taambe nia'omanna tempone.

²¹Mawu Yesus nabbisara apia si mangitou, “I Ya'u inaite, wuṛṛu i yamiu sarun maddea'a si Ya'u, arawe i yamiu sarun mate sulal᷊ummu rosanu. Su tampa Ta'u rantanna, i yamiu tawe maaranta.”

²²Ne manga tembonannu Yahudi nabbisara, “Asinungka i Tou matingkaate, ana waugu i Tou nabbisara, ‘Su tampa Ta'u rantanna, i yamiu tawe maaranta.’ ”

²³See Mawu Yesus nabbisara si mangitou, “I yamiu nirumanta wua bowane; arawe i Ya'u nirumanta wua dosone. I yamiu wuassu runia arawe i Ya'u tawe wuassu runia.

²⁴Ana waugu udde i Ya'u mabbisara si yamiu, manungku i yamiu sarun mate sulal᷊ummu manga rosanu. Wuṛṛu atonna i yamiu sarun mate sulal᷊ummu manga rosanu, amungkangngu i yamiu tawe mangngimanna manungku, ‘ete i Ya'u i Tou apan isassago I YA'U INDI’. ”

²⁵“Ṛinone isai I'o?” aiwal᷊o mangitou. Mawu Yesus sinumimbakka, “Ipa'ura maggahatong kamiu apia!

²⁶Ta'e manambo lai hatto su ola'i yamiu apan Ta'u iwisara wuṛṛu ipamarikissa. Arawe i Tou apan nandolo-U wotongnge apangimananna. Wuṛṛu i Ya'u mamasingkatta su runia apa apan Ta'u niaringiṛṛanna wuassi Tou.”

²⁷I mangitou tawe maasunna manungku i Tou tantal᷊anna mabbisara si mangitou su ola'u Iamangnga.

²⁸Ana waugu udde Mawu Yesus nabbisara si mangitou, “Ṛaddoi amungkangngu i yamiu suete nanduittu Ana'u Taumata, i yamiu sarun maasingkatta manungku ‘ete i Ya'u i Tou apan isassago I YA'U INDI’, wuṛṛu i yamiu sarun maasingkatta manungku tawe saran sambau apan a'olaang-Ku wuassu riri-U sassane. I Ya'u tumba'u mamasingkattu apa apan niaṛṛa'u Iamangnga si Ya'u.

²⁹Wuṛṛu i Tou apan nandolo-U indi su sambau ringang-Ku. I Tou tawe mamala-U sassane, ana waugu i Ya'u sidutu ma'ola'a inolaanna apan maal᷊uassa naung-Nge.”

³⁰Napawe Mawu Yesus suete nabbati'u sarangkanambone udde, manambo taumata mangngimanna si Tou.

³¹Wua'udde Mawu Yesus nabbisara su manga taumatan Yahudi apan nangimante si Tou, “Amungkangngu i yamiu mabbiakka tuttuṛṛutta al᷊aṛṛa-U, i yamiu atonna-tonna mallal᷊aṛṛenggeng-Ku,

³²ne i yamiu sarun maaillal᷊a Ruata apan naṛṛino, wuṛṛu ana waugu udde i yamiu sarun ipallossa.”

³³“I yami indi papapulunni Abraham,” unni mangitou. “Taambe saran paassa i yami naola'a allangngi sai-sai! Apa pandumannu ringannu mabbisara, ‘I yamiu sarun ipallossa’? ”

³⁴“Mangke atonna wisara-U indi,” unnu Mawu Yesus si mangitou. “Taumata apan ma'ola'a rosa, eteudde allangngu rosa.

³⁵Wuṛṛu sangkatou allangnga tawe atatanaanne uasidutu sulal᷊ummu wal᷊ene, arawe ana'a pia atatanaanne sarangkal᷊o'engnge sulal᷊ummu wal᷊ene.

³⁶Ana waugu udde, amungkangngu ana'a mamallossi yamiu, i yamiu atonna-tonna mapallossa.

³⁷Atonna i Ya'u masingkatta manungku i yamiu indi papapulunni Abraham. Arawe i yamiu maapulu mamate si Ya'u, ana waugu i yamiu maddiri manarimmattu al᷊aṛṛa-U.

³⁸Apa apan niasiloang-Ku wuassu Iamang-Ku eteudde apan iwabbisara-U. Arawe i yamiu tuttuṛṛutta apa apan iaaṛṛa'i iamangngu si yamiu.”

³⁹I mangitou sinumimbakka, “Iamangngi yami eteudde i Abraham.” “Unnu wisara atonna-tonna i yamiu ana'i Abraham,” unnu Mawu Yesus, “i yamiu ṛinone ma'ola'a apa apan a'olaanni Abraham.

⁴⁰I Ya'u mamasingkatta si yamiu atatul᷊idda apan niaringiṛṛang-Ku wuassu Ruata, arawe i yamiu maapulu mamate si Ya'u. I Abraham tawe inolaanne ereudde!

⁴¹I yamiu ma'ola'a ere apa apan niola'u iamangngu sassane.” Sasimbakki mangitou, “I yami wal᷊ine al᷊aṛṛana'a su liuddu awingnga. Iamangngi yami tumba'u sangkatou eteudde Ruata sassane.”

⁴²See Mawu Yesus nabbisara si mangitou, “Unnu wisara Ruata udde Iamangngu, i yamiu sarun mandangngu si Ya'u, ana waugu i Ya'u nirumanta wuassu Ruata. I Ya'u tawe nirumanta ringannu apulu-U sassane, arawe ete i Tou apan nanadolo-U.

⁴³Anio i yamiu tawe maasunna apa iwabal᷊o-U? Ana waugu i yamiu tawe maataṛṛangnga maddaringikka al᷊aṛṛa-U.

⁴⁴Ete Setanna iamangngu, wuṛṛu i yamiu tuttuṛṛutta apulun iamangngu. Ro'en panataṛṛanne Setanna udde taṛṛa pate. I tou taambe saran paassa manamba'a apapia, ana waugu tawe apapia si tou. Amungkangngu i tou mangawusu, udde naṛṛino ana waugu ete aroddi pallal᷊agune. I tou taṛṛa awusu wuṛṛu punnu al᷊awo'u awusu.

⁴⁵Arawe i Ya'u mabatti'u atatul᷊idda, wuṛṛu ana waugu eteudde i yamiu maddiri mangngimanna si Ya'u.

⁴⁶Isai su wallatti yamiu wotongnge maatiala manungku i Ya'u pia dosa? Amungkangngu i Ya'u mabatti'u atatul᷊idda, anio i yamiu tawe mangngimanna si Ya'u?

⁴⁷Taumata apan darantane wuassu Ruata, madaringikka wisaran Ruata. Arawe i yamiu wal᷊ine wuassu Ruata, ana waugu udde i yamiu maddiri madaringikka.”

⁴⁸Manga taumatan Yahudi udde sinumimbakka Mawu Yesus, “Wal᷊inewe atonna wisarang kami manungku I'o taumatan Samaria apan niasuttannu setanna?”

⁴⁹Mawu Yesus sinumimbakka, “I Ya'u tawe niasuttannu setanna. I Ya'u mangngaddatta Iamang-Ku, arawe i yamiu mangngal᷊uandaga si Ya'u.

⁵⁰I Ya'u tawe maddea'a awawantugu riri-U sassane. Pia sangkatou apan maddea'a awawantu-U, wuṛṛu tumba'u i Tou apan mammarikissa.

⁵¹Mangke atonna wisara-U indi, taumata apan tuttuṛṛutta wisara-U, tawe mate saran mal᷊annu-l᷊annu.”

⁵²See manga taumatan Yahudi udde nabbisara Mawu Yesus, “Orassa indi yami masingkatta I'o indi atonna-tonna niasuttannu setanna! I Abraham sassane natete, aroddi lai manga nabi. Arawe I'o mabbisara, ‘Taumata apan tuttuṛṛutta wisara-U, tawe mate saran mal᷊annu-l᷊annu.’

⁵³Amungkangngu i Abraham sassane natete, wuṛṛu manga nabi sarangkanambone lai natete, I'o indi isai? Ṛatadde I'o magewal᷊anna wuassi iamangngi yami Abraham!”

⁵⁴Mawu Yesus sinumimbakka, “Unnu wisara i Ya'u maddea'a awawantugu riri-U sassane, awawantugu udde tawe gunane. Apan mangngaddata si Ya'u eteudde Iamang-Ku apan unni yamiu Ruatang kamiu,

⁵⁵arawe i yamiu tawe maaillal᷊a si Tou. Arawe i Ya'u maaillal᷊a. Amungkangngu i Ya'u mabbisara manungku i Ya'u tawe maaillal᷊a si Tou, ne i Ya'u sangkatou taṛṛa awusu, ere lai yamiu. I Ya'u maaillal᷊a si Tou wuṛṛu tuttuṛṛutta wisara-Ne.

⁵⁶Iamangngu Abraham lembon lulluassa, manungku i tou sarun maasilo allo-U. I tou naasilote wuṛṛu i tou mangke lulluassa!”

⁵⁷See manga taumatan Yahudi nabbisara Mawu Yesus, “Uukku taambe naṛṛatubba limam pul᷊o su tonnane, arawe I'o naasilote si Abraham?”

⁵⁸Mawu Yesus sinumimbakka, “Atonna i Ya'u mabbisara si yamiu: Tantal᷊anna i Abraham taambe niasungkangnga, i Ya'u nariaddite.”

⁵⁹See manga taumatan Yahudi nanganute watu ipanuntungnga si Tou; arawe Mawu Yesus na'imbuni, see napul᷊ete nanantangngu Wal᷊e Mawu.