Read Talaud YOHANES 9 Bible Online

YOHANES 9 - Talaud bible

YOHANES 9

¹Su tempo Mawu Yesus u'amatta, i Tou naasilo sangkatou wuta ro'eniariaddine.

²Manga mallal᷊aṛṛenggennu Mawu Yesus naiwal᷊o Mawu Yesus, “Iamangnga Huru, anio taumata indi niasungkangnga matane wuta? Apa ana waugu i tou sassane marosa ara'e hagurangnge marosa?”

³Mawu Yesus sinumimbakka, “I tou wuta wal᷊ine ana waugu rosane sassane ara'e rosan hagurangnge, arawe tadea'u taumata wotongnge maasilo taṛṛinon Ruata mammanara sulal᷊ummu ririne.

⁴Tantal᷊anna ta'e allo, i ite ṛinone mammanara manaran Tou apan nandolo-U. Ṛabbi sarun dumanta, wuṛṛu tawe saran sangkatou apan wotongnge maapammanara.

⁵Tantal᷊anna i Ya'u ta'e su runia indi, ete i Ya'u asasemakku runia.”

⁶Napawe suete nabbisara aroddi Mawu Yesus nangaddu su leta'a, wuṛṛu addune niluakka ringannu leta'a. Wua'udde i Tou nangapu su matan taumata udde

⁷see nabbisara si tou, “Roote pamaresi hatinu su Li'un Siloam.” (Siloam atapasanne ‘Nirolokka’.) Ne taumata udde inaite namaresi hatine. Su tempo i tou nabelengnga, i tou wotongngete maasilo.

⁸Manga al᷊indonganna wuṛṛu manga taumata apan paarorone ma'asilo si tou sangkatou madarorongnga, sarangkanambone nabbisara, “Wal᷊inewe i tou indi taumata apan inaramanne ua'ianna madorongnga?”

⁹Piaddu mabbisara, “Atonna i tou.” Arawe piaddu lai mabbisara, “Tawe i tou tumba'u lihiddu taumata udde.” Arawe taumata udde sassane nabbisara, “Ete i ya'u i tou.”

¹⁰“Ereapa olangnge na'oman sara i'o naasilo?” aiwal᷊o mangitou si tou.

¹¹I tou sinumimbakka, “Taumata apan aranne Mawu Yesus udde na'ola'a labbo adio'a, see niapu su mata'u lapiddu nabbisara, ‘Roote pamaresi hatinu su Li'un Siloam.’ See i ya'u inaite. Wuṛṛu su tempo i ya'u namaresi hati'u, orassa udde lai ya'u naasilote.”

¹²“Suapa taumata udde?” aiwal᷊o mangitou. I tou sinumimbakka, “I ya'u waggate.”

¹³Allo udde allon Sabatta su tempo Mawu Yesus nalluakku leta'a ringannu addune nipangundamma taumata wuta udde wotongnge naasilo. Ne taumata wuta tanginna udde niapidda ringannu manga taumatan Farisi.

¹⁵I mangitou lai naiwal᷊o si tou ereapa na'oman sara i tou naasilo. I tou sinumimbakka, “I tou nangadon labbo su mata'u, see i ya'u namaresi wuṛṛu i ya'u wotongngete maasilo.”

¹⁶Manga pira su wallattu manga taumatan Farisi udde nabbisara, “Tawe mariaddi taumata na'ola'a indi darantane wuassu Ruata, ana waugu i Tou tawe mallaghun allon Sabatta.” Arawe taumata waine lai mabbisara, “Tawe mariaddi taumata marosa wotongnge maaola'a manga al᷊aṛṛindu'a ereindi?” See nasapputte patatatiakka su wallattu addapatti mangitou.

¹⁷Ne manga taumatan Farisi udde naiwal᷊o apia su taumata udde, “Apa addapannu su ola'i Tou apan naapia si'o na'oman sara naasilo?” “I Tou sangkatou nabi,” sasimbakku taumata udde.

¹⁸Arawe manga piaṛṛa'u Yahudi udde maddiri mangngimanna manungku taumata udde atonna wuta ro'eniariaddine, wuṛṛu orassa indi naasilote. Ana waugu udde i mangitou namago hagurangnge,

¹⁹wuṛṛu naiwal᷊o, “Atonna indi anangngu apan niasungkangnga wuta? Ereapa i tou wotongnge naasilo orassa indi?”

²⁰Inangnga iamangngu taumata udde sinumimbakka, “Atonna indi ana'i yami; wuṛṛu atonna i tou niasungkangnga wuta.

²¹Arawe ereapa i tou naasilote orassa indi, i yami wagga. Wuṛṛu isai apan nangundamma si tou wotongnge naasilo, udde lai yami wagga. Pa'iwal᷊ote si tou, i tou timmaddete; i tou wotongngete sumimbakka sassane.”

²²Inangnga iamangngu taumata udde sinumimbakka aroddi ana waugu i mangitou matta'uttu manga piaṛṛa'u Yahudi; ana waugu i mangitou na'irete, manungku taumata apan manga'u Mawu Yesus Ratum Punnu Sal᷊amatta, tate wotongnge sumutta su wal᷊em pattataṛṛamawuanna.

²³Ana waugu udde inangnga iamangngu taumata udde nabbisara, “I tou timmaddete; paiwal᷊ote si tou.”

²⁴See i mangitou namago apia taumata apan tanginna wuta udde, wuṛṛu nabbisara si tou, “Passalute manungku i'o mabbisara su ṛinone. I yami masingkatta taumata udde taumata marosa.”

²⁵“Apa i Tou marosa ara'e tawe,” sasimbakku taumata udde, “i ya'u wagga. Arawe ete sambau asingkatangku; i ya'u dorone wuta, arawe orassa indi ya'u naasilote.”

²⁶See i mangitou nabbisara apia si tou, “I tou na'ola'a apa si'o? Ereapa i tou na'ola'a si'o na'oman sara naasilo?”

²⁷Taumata udde sinumimbakka, “Suete ta'u niwatti'a si yamiu, arawe i yamiu tawe madaringikka. Anio i yamiu maapulu madaringikka apia? Asinungka i yamiu maapulu maola'a mallal᷊aṛṛenggen-Ne lai?”

²⁸See i mangitou nallela si tou wuṛṛu nabbisara, “Ete i'o mallal᷊aṛṛenggen-Ne; wal᷊ine i yami! I yami mallal᷊aṛṛenggenni Musa.

²⁹I yami masingkatta manungku Ruata suete nabbisara si Musa. Arawe su ola'u taumata udde, i yami wagga wuassuapa inarantan-Ne.”

³⁰Taumata udde sinumimbakka, “Ma'atiangnga atonna manungku i yamiu wagga wuassuapa inarantan-Ne, wuṛṛu see i Tou suete na'ola'a si ya'u naasilo.

³¹I ite masingkatta manungku Ruata tawe madaringikka taumata marosa, ewe'e taumata apan mangngaddatta Ruata, wuṛṛu tuttuṛṛutta apulu-Ne.

³²Ro'en panattaṛṛannu runia taambe niaringiṛṛanna pia taumata ma'apia taumata wuta ro'eniasungkangnga see wotongnge maasilo.

³³Amungkangngu taumata udde wal᷊ine wuassu Ruata, i tou tawe maaola'a apa-apa.”

³⁴Sasimbakki mangitou, “Apa? I'o apan napenen rosa ro'e niariaddine, i'o ma'apulu mangngaṛṛa'a si yami?” Ne nanattakka orassa udde i tou isassingadde sumutta su wal᷊em pattataṛṛamawuanna.

³⁵Mawu Yesus naaringikka manungku i mangitou suete naningaddu taumata udde sumutta su wal᷊en pattataṛṛamawuanna. I Tou nadea'e taumata udde see nabbisara si tou. “Apa i'o mangngimanna Ana'u Taumata?”

³⁶Taumata udde sinumimbakka, “Isai i tou, Mawu? Tul᷊unga'a wal᷊oa'a tadea'u i ya'u mangngimanna si Tou.”

³⁷“I'o suete naasilo si Tou,” sasimbakku Mawu Yesus, “Ete i Tou apan orassa indi uahahattonu.”

³⁸“I ya'u mangngimanna, Mawu,” sasimbakku taumata udde, see inumal᷊intudda su saruannu Mawu Yesus.

³⁹Mawu Yesus nabbisara, “I Ya'u nirumanta su runia indi, makkuungngu taumata; tadea'u taumata wuta wotongnge maasilo, wuṛṛu taumata ma'asilo, maola'a wuta.”

⁴⁰Manga pira taumatan Farisi naaringikka Mawu Yesus nabbisara aroddi, see i mangitou naiwal᷊o si Tou, “Pandumannu i yami indi lai wuta?”

⁴¹Mawu Yesus sinumimbakka, “Unnu wisara i yamiu wuta, i yamiu tawe marosa. Arawe ana waugu i yamiu mabbisara, ‘I yami ma'asilo,’ udde atappasanne i yamiu ta'e marosa.”