Read Talaud WATTI'U MANGA RASUL 1 Bible Online

WATTI'U MANGA RASUL 1 - Talaud bible

WATTI'U MANGA RASUL 1

¹Teofilus apan ma'imanna, Sulal᷊ummu wuke'u paarorone sueten ta'u tinal᷊a'a sarangkanambone apan niola'a wuṛṛu niaṛṛa'u Mawu Yesus ro'en i Tou nanattakku manara-Ne,

²na'oman sara allone i Tou nasengkengnga su surga. Tantal᷊anna i Tou taambe nasengkengnga su surga, ringannu taṛṛinon Ghaṛṛahon Ruata i Tou mannantiro manga rasul apan sueten pinile.

³Napawe i Tou wua nate, al᷊annune appatu pul᷊o su allone i Tou masokka mapaal᷊iatta'u inolaan-Ne apan masemakka su manga rasul udde manungku i Tou atonna-tonna wiakka. I mangitou ma'asilo si Tou, wuṛṛu i Tou lai uahahatto mangitou su ola'u ereapa Ruata mamarenta ere sangkatou Ratu.

⁴Wuṛṛu su tempo i Tou uaammulla suadio'a ringanni mangitou, i Tou nangonggolu parenta indi si mangitou, “Arie pangingkatta wuassu Yerusalem. Paṛṛaddo isudde ma'oman sara Iamangnga mangonggolu apa apan suete pinaire-Ne, eteudde apa apan suete niapaasingkatta si yamiu rorone.

⁵Ana waugu i Yohanes mannaṛṛani ringannu ua'e, arawe ete pira allo lai yamiu sarun saṛṛaniannu Ghaṛṛahon Ruata.”

⁶Napawe manga rasul udde uaammulla su sampunna ringannu Mawu Yesus, i mangitou naiwal᷊o si Tou, “Mawu, apa orassa indi Mawu mapararisika apia Araratuannu walahannu Israel?”

⁷Mawu Yesus sinumimbakka, “Iamangku sassane manantunnu allone wuṛṛu tempone. Udde tawe wotongnge asingkatanni yamiu, ana waugu udde apulun Iamangnga.

⁸Arawe i yamiu sarun maasomba taṛṛino, amungkangngu Ghaṛṛahon Ruata nirumantate ringanni yamiu. Wuṛṛu yamiu sarun ma'ola'a manga tatiala-U su Yerusalem, su ahewallu Yudea, su Samaria, wuṛṛu sara pentakku runia.”

⁹Napawe Mawu Yesus suete nabbisara aroddi, i Tou nasengkengnga su surga su saruannu mata mangitou, wuṛṛu winabbawa nallindumma si Tou wuassu aellegi mangitou.

¹⁰Tantal᷊anna i mangitou ta'e uatingngara langitta, su tempo Mawu Yesus nasengkengnga, inaṛṛombanganne ruang katou uapedettu mawira uarisikka su samba'a mangitou.

¹¹“Ei, manga taumatan Galilea,” unnu taumata darua udde, “anio i yamiu uarisikka isudde uatingngara langitta? Mawu Yesus apan aellehanni yamiu nasengkengnga watukku surga udde su saruanni yamiu, sarun mabelengnga apia ringannu olangnge ereudde lai apan niasiloanni yamiu tanginna.”

¹²See manga rasul udde nabelengnga watukku Yerusalem wuassu Wuiddu Zaitun. Wuidda udde araune iraṛṛangngo sangkilo wuassu Yerusalem.

¹³Su Yerusalem i mangitou inaite watukku wal᷊e su tampa i mangitou mattindaho, see nirumanganna su wabbo'a ṛengkenne al᷊iurosone. Manga rasul eteudde i Petrus wuṛṛu i Yohanes, i Yakobus wuṛṛu i Andreas, i Filipus wuṛṛu i Tomas, i Bartolomeus wuṛṛu i Matius, i Yakobus ana'i Alfeus, i Simon Patriot wuṛṛu i Yudas ana'i Yakobus;

¹⁴sarangkanambone sidutu ringannu naungnga uasampinunutanna uaammulla u'al᷊iomanna. I mangitou lai u'al᷊iomanna suadio'a ringannu manga wawine nasutta i Maria inangngu Mawu Yesus, wuṛṛu manga tuṛṛangngu Mawu Yesus.

¹⁵Su allo sambau, su tempo i mangitou tantal᷊anna uaammulla — iraṛṛangngo pia maṛṛasutta ruam pul᷊o su atoune nirumanta — i Petrus dirumarisikka mabbisara. I tou nabbisara,

¹⁶“Manga tuṛṛangnga! Apa apan uawoṛṛetta sulal᷊ummu Wuke Susi, udde sarun matipussa. Paarorone wuassi Daud, Ghaṛṛahon Ruata suete namasingkatta su ola'i Yudas, piaṛṛa'u manga taumata apan nanametta Mawu Yesus udde.

¹⁷I Yudas eteudde sangkatou wuassu wallatti ite, wuṛṛu i tou suete nipile lai mammanara suadio'a ringanni ite.” (

¹⁸I Yudas indi suete naasomba leta'u lal᷊abinganne wuassu lal᷊antakku ala'uanne apan dal᷊eo. I tou nanawo wuṛṛu nate ringannu tianne nawasse na'oman sara lal᷊oṛṛon sinangngone sinumabangnga.

¹⁹Anambon taumata apan uatana'a su Yerusalem masingkattu hatto udde. Ana waugu udde sulal᷊ummu wisara mangitou leta'a udde nissago Akeldama, atappasanne ‘Leta'a Ṛaṛṛa.’)

²⁰“Ana sulal᷊ummu Wuke Mazmur uawoṛṛetta arendi, ‘Wala'e atatanaan-Ne maola'a mal᷊annaba; arie piaddu sangkatou matana'a sulal᷊umme.’ Pia uawoṛṛetta arendi lai, ‘Wala'e aianan-Ne anuannu taumata waine.’

²¹Ana waugu udde, ṛinone pia sangkatou apan tumantalongnga si ite maola'a tatiala manungku Mawu Yesus nabbiakke apia wuassu papate-Ne. Taumata udde ṛinone sangkatou wuassu wallattu manga taumata apan sidutu suadio'a ringanni ite su tempo i ite uatantalongnga Mawu Yesus su al᷊awo'u tampa, ro'en Yohanes nanattakka mannaṛṛani na'oman sara Mawu Yesus nasengkengnga su surga wuassu pattangnganni ite.”

²³Ne manga taumata apan uasemodda isudde nanebo'u ruang katou, eteudde i Yusuf apan isassago lai Barsabas (i tou isassago lai i Yustus), wuṛṛu i Matias.

²⁴See i mangitou inumal᷊iomanna. I mangitou nabbisara, “Mawu, I'o masingkattu naungngu awadaalla. Yudas suete niaddo wuassu manarane sangkatou rasul wuṛṛu see natete. Nariaddi pantingira'a si yami isai wuassu wallattu ruang katou indi apan pileannu Mawu onggol᷊annu manara ipallol᷊ossa si Yudas.”

²⁶Wua'udde aranna darua udde niundi, see niata'eanne eteudde Matias. Nariaddi i tou netenega maola'a rasul mammanara su sambau ringannu sire mapul᷊o assa rasul waine.