Read Talaud WATTI'U MANGA RASUL 10 Bible Online

WATTI'U MANGA RASUL 10 - Talaud bible

WATTI'U MANGA RASUL 10

¹Su Kaisarea pia sangkatou esakka aranne i Kornelius. I tou sangkatou apitennu “Tantaran Italia”.

²I tou sangkatou apan matta'uttu Ruata wuṛṛu anambon lal᷊oṛṛon bal᷊ene mattaṛṛamawu Ruata. I tou masokka mantul᷊ungngu taumatan Yahudi apan asiangnga wuṛṛu i tou sidutu u'al᷊iomanna su Ruata.

³Su sambau allo iraṛṛangngo puulla tatallu allattune i tou naasilo ringannu masemakka sulal᷊ummu sondappa, sangkatou mala'ekattu Mawu nirumanta wuṛṛu namaggo si tou, “Kornelius!”

⁴I Kornelius nanutuda mala'ekatta udde ringannu atata'utta see nabbisara, “Pia apa Mawu?” Mala'ekatta udde sinumimbakka, “Aal᷊iomannu wuṛṛu asasaṛṛionto'u naungngu sinengkampen Ruata wuṛṛu Ruata mannaungnga si'o.

⁵Orassa indi pandolokken taumata watukku Yope pawagoa'a si Simon apan aranne nasuungnga Simon Petrus.

⁶I tou tantal᷊anna uaintal᷊a su wal᷊en sangkatou mallal᷊aha pisi aranne i Simon wal᷊ene su winggin apanne.”

⁷Napawe mala'ekatta apan uahahatton Kornelius udde inaite, i Kornelius namago ruang katou mangangimbe sulal᷊ummu wal᷊ene wuṛṛu sangkatou tantara mandariagane apan ma'imanna.

⁸I Kornelius nabatti'a si mangitou apa apan suete nariaddi, see nandolokki mangitou watukku Yope.

⁹Tiṛṛabbine, tantal᷊anna i mangitou sulal᷊ummu amatanne wuṛṛu maraniten Yope, i Petrus nirumanganna su pangketta ana umal᷊iomanna.

¹⁰See i tou naapendamma lunussa wuṛṛu maapulute umanna. Tantal᷊anna anna iaatokka, i tou nissondapanna.

¹¹I tou naasilo langitta nawu'a wuṛṛu pia sambau naal᷊ihida ere mal᷊aṛṛenessa apan mal᷊al᷊akka, ia'ul᷊ukka watukku runia ua'ele su wuune appata.

¹²Sulal᷊umme pia al᷊awo'u winatangnga leddane appata, al᷊awo'u winatangnga tuttundon tianne wuṛṛu manga manua'a matengnga.

¹³See pia tingikka nabbisara si tou, “Petrus, apu'ote! wuṛṛu Pamototte wuṛṛu ante!”

¹⁴I Petrus sinumimbakka, “Tawe, Mawu! Taambe saran paassa i ya'u inumanna apa ipappalli ara'e ia'arantinna.”

¹⁵Arawe tingikka udde nabbisara apia si tou, “Apa apan suete niwalan Ruata wotongnge ipaattu taumata, imbaṛṛangnga iwal᷊onu palli.”

¹⁶Sondappa udde na'oman sara paatallu sinul᷊e, wua'udde mal᷊aṛṛenessa udde nasengkengnga watukku surga.

¹⁷I Petrus nabingo maṛṛingiddu apa atappasannu sondappa udde. Tantal᷊anna i Petrus maṛṛingidda, manga taumata apan nirolokki Kornelius naasombate wal᷊en Simon wuṛṛu i mangitou uddete su ngara.

¹⁸See i mangitou namago taumata wuṛṛu naiwal᷊o, “Apa isindi pia daho uaintal᷊a, aranne i Simon Petrus?”

¹⁹Tantal᷊anna i Petrus ta'e maddea'a maasingkatta apa atappasannu sondappa udde, Ghaṛṛahon Ruata nabbisara si tou, “Ei Petrus, pia sire tallu maddea'a si'o.

²⁰Paal᷊ihakke sumossokka wuṛṛu arie mapapadua tumantalongnga si mangitou, ana waugu ete i Ya'u nandolokki mangitou.”

²¹Ne i Petrus sinumossokke wuṛṛu nabbisara su manga taumata udde, “Ete i ya'u apan raddeaanni yamiu. Manga tuṛṛangnga rumanta mappandumma apa?”

²²I mangitou sinumimbakka, “Apitenna Kornelius nandolokki yami isindi. I tou sangkatou taumata mapia wuṛṛu matta'uttu Ruata, wuṛṛu lembon aaddatannu anambon taumatan Yahudi. Sangkatou mala'ekattu Ruata nandolokki tou madorongnga i Tuangnga rumanta su wal᷊ene, ana waugu maola'a ere sambau sasimbakku aal᷊iomanne, i tou nirolokka madaringikka apa apan iapaasingkatti Tuangnga si tou.”

²³Ne i Petrus napaasuttate mangitou natana'a isudde. Tiṛṛabbine i Petrus nabuatte wuṛṛu inaite suadio'a ringanni mangitou. Manga pira taumata mangngimanna wuassu Yope tinumantalongnga lai.

²⁴Massallo wua'udde i mangitou na'omate su Kaisarea. Poiaroddi i mangitou ṛaṛṛadoanten Kornelius ringannu manga tuṛṛangnge wuṛṛu manga hawene apan suete niwal᷊oanne.

²⁵Napawe i Petrus na'omate, i Kornelius inai nanal᷊oho si tou wuṛṛu inumal᷊intuda su saruanne.

²⁶Arawe i Petrus nantul᷊ungngi tou niapararisikka, see nabbisara, “Darisikke! I ya'u lai sassane taumata.”

²⁷Tantal᷊anna uahahatton Kornelius, i Petrus sinumutta sulal᷊ummu wal᷊e. Isudde i tou naasilo manambote taumata uaammulla.

²⁸See i tou nabbisara si mangitou, “Manga tuṛṛangnga sassane masingkatta manungku taumatan Yahudi isassingadu agamane mattembo ara'e ma'ammulu manga taumata wuassu walahanna waine. Arawe Ruata suete namasingkatta si ya'u manungku i ya'u tawe wotongnge massunna taumata waine lal᷊eo wuṛṛu ipapalli.

²⁹Ana waugu udde su tempo i Tuangnga madorongnga tadea'u i ya'u rumanta, i ya'u tawe nano'e rumanta. Nariaddi orassa indi ya'u maddea'a maasingkatta, anio i Tuangnga maparanta'u.”

³⁰I Kornelius sinumimbakka, “Tallu allo nal᷊iu, iraṛṛangngo su tempo ereindi, i ya'u tantal᷊anna u'al᷊iomanna su wal᷊e puulla tatallu wawallo. Inaṛṛombanganne sangkatou esakka nirumarisikka su saruangku. Laubbu taumata udde sussal᷊ol᷊otta.

³¹I tou nabbisara, ‘Kornelius! Ruata suete nadaringikka aal᷊iomannu wuṛṛu uanaungnga sasaṛṛionto'u naungngu.

³²Nariaddi pandolokken taumata watukku Yope pamaggo taumata aranne i Simon Petrus, i tou tantal᷊anna uaintal᷊a su wal᷊en sangkatou mallal᷊aha pisi arannen Simon; wal᷊e udde su winggin tahal᷊oangnga.’

³³Ana waugu udde i ya'u nasasaṛṛawutta nandolokku taumata inai namaggo si Tuangnga. Wuṛṛu i Tuangnga naungnge mapia atonna nirumanta isindi. Orassa indi yami nambo uaammulle isindi su saruannu Ruata madaringikka apa apan niapasilon Ruata si Tuangnga iapa'asingkatta si yami.”

³⁴See i Petrus nabbisara, “Orassa indi ya'u atonna-tonna naapendampe manungku inolaannu Ruata su anambon taumata udde nassul᷊ungnga.

³⁵Taumata apan matta'uttu Ruata wuṛṛu ma'ola'a apapia, taumata udde sengkamannu Ruata, tawe mamile i tou wuassu walahannu apa.

³⁶Manga tuṛṛangnga masingkate lal᷊oṛṛon watti'a apan niapaasingkattu Ruata su walahannu Israel. Eteudde Watti'u Al᷊al᷊uassa su ola'u padarame sulal᷊ummu Mawu Yesus Kristus, eteudde Mawun anambon taumata.

³⁷I yamiu masingkate apa apan nariaddi su ahewallu Yudea, eteudde nitattakka wuassu Galilea napawe nal᷊iudde sasaṛṛani apan nititan Yohanes.

³⁸Yamiu masingkatta manungku Ruata suete namile Mawu Yesus taumata Nazaret udde wuṛṛu nangonggolu Ghaṛṛaho Ruata wuṛṛu taṛṛino si Tou. I yamiu masingkatta lai manungku Mawu Yesus u'amatta su al᷊awo'u tampa ma'ola'a apapia; i Tou mapaapian taumata apan niasuttannu Setanna, ana waugu Ruata uatantalongnga si Tou.

³⁹Ete i yami indi manga taumata apan suete naasilo sassane al᷊awo'u manga apa apan niola'i Tou su wanuan taumatan Yahudi wuṛṛu su Yerusalem. Salaiwe aroddi i mangitou nangarussa wuṛṛu namate si Tou.

⁴⁰Arawe su allo atallune Ruata napaawiakki Tou apia wuassu papate wuṛṛu namasilon Tou su taumata;

⁴¹tawe su anambon taumata ewe'e tumba'u si yami apan suete nipilen Ruata paarorone tadea'u maola'a manga tiala-Ne: I yami u'anna wuṛṛu ma'inumma ringanni Tou napawe i Tou nabbiakke apia wuassu papate.

⁴²Wuṛṛu i Tou nandolokki yami mamasingkattu Watti'u Al᷊al᷊uassa udde su manga taumata apan mattiala manungku ete i Tou apan nitenegu Ruata maola'a Mallaṛṛuungngu manga taumata apan ta'e wiakka wuṛṛu manga taumata apan natete.

⁴³Anambo manga nabi mabatti'i Tou. I mangitou mabbisara manungku anambon taumata apan mangngimanna Mawu Yesus, sarun ampunganna rosane ringannu taṛṛino wuassu Ruata.”

⁴⁴Tantal᷊anna i Petrus ta'e mabbisara, Ghaṛṛahon Ruata inumonto'a wuṛṛu nangintaṛṛo su anambon taumata apan uararingikka watti'a udde.

⁴⁵Manga taumatan Yahudi apan mangngimanna Mawu Yesus wuṛṛu taumata uatantalongnga si Petrus wuassu Yope, sarangkanambone naherangnga naasilo Ruata nangonggolu Ghaṛṛaho-Ne su manga taumata walahanna waine apan wal᷊ine Yahudi.

⁴⁶Ana waugu i mangitou naaringikka manga taumata udde uahahatto sulal᷊ummu al᷊awo'u wisara wuṛṛu mangke maddalo awawantugu Ruata. See Petrus nabbisara,

⁴⁷“Pa'ellege, manga taumata indi naasombate Ghaṛṛahon Ruata ere lai i ite. Nariaddi apa wotongnge taumata apan mannal᷊are si mangitou saṛṛaniannu ua'e?”

⁴⁸Ne i Petrus nandolokki mangitou saṛṛanianna su arannu Mawu Yesus Kristus. Wua'udde i mangitou nadorongnga tadea'u Petrus matana'a ringanni mangitou manga pira allo al᷊annune.