Read Talaud WATTI'U MANGA RASUL 11 Bible Online

WATTI'U MANGA RASUL 11 - Talaud bible

WATTI'U MANGA RASUL 11

¹Manga rasul wuṛṛu manga taumata apan mangngimanna su ahewallu leta'u Yudea naaringikka manungku manga taumata apan agamane wal᷊ine Yahudi lai naasengkampe wisara Ruata.

²Wua'udde napawe i Petrus inaite watukku Yerusalem, manga taumatan Yahudi apan suete nangngimanna udde, mapaasal᷊am Petrus.

³“Anio i'o rudanta su wal᷊e manga taumata apan taambe nissunatta? Ewe'e i'o lai inumanna suadio'a ringanni mangitou!”

⁴Ana waugu udde i Petrus nanal᷊a'a si mangitou sarangkanambone apan suete nariaddi, nanattakka wuassu panattaṛṛanne. I Petrus nabbisara,

⁵“I ya'u tantal᷊anna u'al᷊iomanna su soan Yope, see i ya'u nissondapanna. I ya'u naasilo pia sambau sarannapa naal᷊ihida ere sangkul᷊appa mal᷊aṛṛenessa apan mal᷊al᷊akka nonto'a wuassu langitta, ua'ele su wuune appata, wua'udde nattaalla su sandiṛṛangku.

⁶Su tempo i ya'u na'ellega sulal᷊umme, i ya'u naasilo manga winatangnga leddane appata, manga winatangnga matengnga, manga winatangnga tuttundon tianne wuṛṛu manga manu'a matengnga.

⁷See ya'u naaringikka, pia tingikka nabbisara si ya'u, ‘Ote apu'ote, Petrus! Pototte udde wuṛṛu ante!’

⁸Arawe i ya'u sinumimbakka, ‘tawe, Mawu! Taambe saran paassa i ya'u inumanna anna apan ipappalli wuṛṛu ia'arantinna.’

⁹Arawe tingikka udde nabbisara apia wuassu langitta, ‘Apa apan suete niwala Ruata wotongnge ipaattu taumata imbaṛṛangnga iwal᷊onu palli.’

¹⁰I ya'u naasilo sondappa udde na'oman sara paatallu sinul᷊e, wua'udde sarangkanambone nasengkengnga watukku surga.

¹¹Arawe sutempo udde lai sire tallu wuassu Kaisarea, apan nirolokka ringangku na'oma su wal᷊e pangngintal᷊angku.

¹²See Ghaṛṛahon Ruata nandolo'u inai suadio'a ringanni mangitou wuṛṛu tawe mapapadua. Siri annumma tuṛṛangnga indi lai tinumantalongnga si ya'u watukku Kaisarea, wuṛṛu i yami sarangkanambone sinumuttate su wal᷊en Kornelius.

¹³Wua'udde i Kornelius nabbati'a si yami ereapa i tou naasilo sangkatou mala'ekatta uarisikka sulal᷊ummu wal᷊ene wuṛṛu nabbisara, ‘Pandolokku taumata watukku Yope pawagoa'a sangkatou esakka aranne i Simon Petrus.

¹⁴I tou sarun mamasingkatta si'o watti'a apan ma'asal᷊amatta si'o wuṛṛu lal᷊oṛṛon bal᷊enu.’

¹⁵Wuṛṛu su tempo i ya'u mannatakke mabbisara aroddi,” aroddi i Petrus nanassukku wattingnge, “Ghaṛṛaho Ruata nonto'a si mangitou, ere lai nariaddi si ite rorone su panattaṛṛanne.

¹⁶See i ya'u naanaungnga Mawu suete nabbisara, ‘Yohanes mannaṛṛaning kua'e arawe i yamiu sarun saṛṛaniannu Ghaṛṛaho Ruata.’

¹⁷Nariaddi nasemakke Ruata lai mangngonggolla su taumata apan agamane wal᷊ine Yahudi udde, aonggolla apan uasul᷊ungnga nionggolli Tou si ite su tempo i ite mangngimanna Mawu Yesus Kristus. Ana waugu udde, tawe mariaddi ya'u maningaddu Ruata!”

¹⁸Napawe naaringikke udde, i mangitou tate nanompola apia. See i mangitou nadalote Ruata. I mangitou mabbisara, “Amungkangngu aroddi, manga taumata apan bal᷊ine Yahudi lai inonggol᷊annu Ruata tempone mawal᷊u wuassu manga rosane wuṛṛu maapussa'a wiakka apan tutune!”

¹⁹Napawe i Stefanus nipate, manga taumata apan mangngimanna Mawu Yesus, nanattakke a'enggenanna, na'oman sara i mangitou nassal᷊iawukka su al᷊awo'u tampa. Piaddu tinumal᷊angnga su Fenisia, wuṛṛu piaddu lai na'oma su Siprus wuṛṛu Antiokhia. I mangitou mammasingkattu Watti'u Ruata tumba'u su manga taumatan Yahudi sassane.

²⁰Arawe wuassu wallattu manga taumata mangngimanna udde, apan darantane wuassu Siprus wuṛṛu Kirene, pia lai manga taumata inai watukku Antiokhia mamasingkattu Watti'u Al᷊al᷊uassa su ola'u Mawu Yesus udde su manga taumata apan agamane wal᷊ine Yahudi lai.

²¹Taṛṛino Mawu mangke si mangitou na'oman sara taumata nambo mangngimanna wuṛṛu nanantillu watanganne su Mawu.

²²Manga watti'a su ola'u manga al᷊aṛṛindu'a udde na'omate lai su jamaattu Yerusalem. Ne i mangitou nandolokki Barnabas watukku Antiokhia.

²³Wuṛṛu napawe i Barnabas na'omate su Antiokhia, wuṛṛu naasilo ereapa Ruata nangal᷊amatta manga taumata udde, i tou lembon lulluassa. See i tou nadorongnga tadea'u i mangitou atonna-tonna tumuṛṛutta Ruata ringannu ahewallu naungnge.

²⁴I Barnabas indi sangkatou taumata apan mapia naungnge wuṛṛu pia taṛṛinon Ghaṛṛahon Ruata see lai lembo mangngimanna Mawu na'oman sara taumata nambo tinumantalongnga Mawu.

²⁵Wua'udde i Barnabas nanute su Tarsus nadea'a si Saulus.

²⁶Napawe nassombaten Saulus, i tou nangapidi Saulus watukku Antiokhia wuṛṛu santonna al᷊annune i mangitou uaammulla ringannu jamaatta poiaroddi lapiddu mangngaṛṛa'a taumata nambo. Ete su Antiokhia udde, manga taumata apan mangngimanna Mawu Yesus paarorone nisago taumatan Saṛṛani.

²⁷Su tempo udde pia sire pira nabi nirumanta wuassu Yerusalem mabatukku Antiokhia.

²⁸Su wallatti mangitou pia sangkatou aranne i Agabus. Wuassu piaṛṛa'u Ghaṛṛahon Ruata i tou nabbati'a manungku su ahewallu runia sarun mariaddi tempon al᷊aṛṛutumma apan bahewalla. (Wuṛṛu olangnge udde natipusse su tempo i Klaudius uaparenta.)

²⁹Ne anambo mallal᷊aṛṛenggennu Mawu Yesus na'ire mapaapiddu sumbala su manga tuṛṛangnge apan uatana'a su Yudea, sangkatou-sangkatou nangonggolla tumuṛṛuttu asombangnge.

³⁰Pa'aire udde niola'a lai, see i Barnabas wuṛṛu i Saulus nirolokka manguntudu aonggola udde su manga piaṛṛa'u jamaatta.