Read Talaud WATTI'U MANGA RASUL 12 Bible Online

WATTI'U MANGA RASUL 12 - Talaud bible

WATTI'U MANGA RASUL 12

¹Su tempo udde lai i Ratu Herodes mannattake mapaasusa manga jamaatta.

²Wuassu parentane, i Yakobus tuṛṛangngi Yohanes nipaten hal᷊ele.

³Su tempo i Herodes naasilo manungku inolaanne udde ma'al᷊uassa naungngu manga taumatan Yahudi, i tou nattanno lai ereudde; i tou nandolokku taumata lai manametta si Petrus. Olangnge udde nariaddi su tempo Allo Wahewan Roti Tawe Ragine.

⁴Napawe niasamette, i Petrus nisutta sulal᷊ummu tuttupanna. Appatu wageangnga tantara niapaariaga si Petrus — sangkawageanganna udde anambone sire appata. Napawe rameam Paskah nasuete, wakkute udde i Herodes namarikissa si Petrus su saruannu awada'alla.

⁵Nariaddi i Petrus tataṛṛangante su tuttupanna; arawe manga jamaatta sidutu u'al᷊iomanni Petrus su Mawu ringannu atonna-tonna.

⁶Sambau ṛabbi tantal᷊anna i Herodes sarun mapasaruanni Petrus su awada'alla, i Petrus mattiilla aiitannu ṛate darua, su wallattu ruang katou tantara mandariaga. Su ngaran tuttupanna, manga mandariaga waine lai uariaga tuttupanna.

⁷Inaṛṛombanganne mala'ekattu Mawu uarisikka isudde wuṛṛu sambau semakka natuakka sulal᷊ummu wabo'an tuttupanna udde. Mala'ekatta udde nangio'i Petrus na'oman sara i tou napu'o. See mala'ekatta udde nabbisara, “Ei paasaṛṛawutte mapu'o!” Orassa udde lai ṛate atta'a nawu'a wuassu limam Petrus.

⁸Wua'udde mala'ekatta nabbisara, “Luṛṛea'e laungngu wuṛṛu wa'isa'e tal᷊in sapatunu.” Ne i Petrus nalluṛṛeten laungnge wuṛṛu nama'issu tal᷊in sapatune. Wua'udde mala'ekatta nabbisara apia, “Luṛṛea'e pal᷊iwungngu wuṛṛu tantalongke si ya'u.”

⁹Ne i Petrus tinumantalongke mala'ekatta udde sinumabangnga wuassu tuttupanna. Arawe i Petrus tawe naatutukka manungku inolaannu mala'ekatta udde atonna-tonna nariaddi. i Petrus massunna manungku udde tumba'u sambau sondappa.

¹⁰Su tempo i mangitou suete sinumabbi tampa pandariaganna paarorone wuṛṛu aruane, itarua na'omate su ngara atta'a, apan mabatukku soa. Ngara udde nawu'a sassane, see itarua sinumabangke wuṛṛu inumamatta su lal᷊anna maṛṛiputta. Inaṛṛombanganne mala'ekatta udde nanantangngi Petrus.

¹¹Wakkute udde i Petrus naatutukka apa apan suete nariaddi si tou, see i tou nabbisara, “Orassa indi ya'u masingkate manungku Mawu atonna-tonna suete nandolokku mala'ekan-Ne mapasabangku wuassu taṛṛinon Herodes wuṛṛu wuassu al᷊awo'u inolaannu walahannu Yahudi si ya'u.”

¹²Napawe naatutukke olangnge udde, i Petrus inaite watukku wal᷊e Maria, inangngi Yohanes apan isassago lai Markus. Isudde manambo taumata uaammulla wuṛṛu u'al᷊iomanna.

¹³I Petrus nanengkella ngaran liudde, see sangkatou mangangimbe wawine aranne i Rode, nirumanta mamu'a ngara.

¹⁴I tou lapiddu naaillal᷊a tingikki Petrus. Ana waugu lulluassa, i tou mal᷊iha-l᷊ihakka sinumutta apia ringannu tawe namu'a ngara, see nabal᷊o manga taumata isudde manungku i Petrus wowa su liudde.

¹⁵“I'o wewa!” unni mangitou. Arawe i Rode mangke mangngattikka manungku udde atonna-tonna i Petrus. Ne i mangitou nabbisara, “Udde mala'ekanne!”

¹⁶Tantal᷊anna udde i Petrus sidutu mannengkela ngara. Ne napawe i mangitou namu'a ngara, wuṛṛu naasilo si Petrus, i mangitou mangke naherangnga.

¹⁷I Petrus namasingkatta ringannu limane tadea'u i mangitou mallannaba, wua'udde i tou nabbati'e ereapa Mawu suete nangapiddi tou sinumabangnga wuassu tuttupanna. See i tou nabbisara, “Wal᷊oa'a hatto indi si Yakobus wuṛṛu su manga tuṛṛangnga waine lai.” Wua'udde i Petrus nanantangken tampa udde wuṛṛu inaite su tampa waine.

¹⁸Tiṛṛabbine ruaallo nariaddite hio su wallattu tantara mandariaga. I mangitou inal᷊iwune su ola'u apa apan suete nariaddi si Petrus.

¹⁹See i Herodes nandolokken taumata niaparea'a si Petrus, arawe i mangitou tawe naasomba si Petrus. Nariaddi i Herodes namarenta tadea'u manga mandariaga udde iwal᷊oanna see pateanna. Wua'udde i Herodes nanantangken Yudea wuṛṛu natana'e pira allo al᷊annune su Kaisarea.

²⁰I Herodes mangke mandona su manga taumatan Tirus wuṛṛu Sidon. Ana waugu udde i mangitou suadio'a nirumanta sumaruanna si tou. Paarorone i mangitou nassalo'i Blastus, apan uapiaṛṛa'u wal᷊en araratuanni Herodes, na'oman sara i tou nanamba'a si mangitou. Wua'udde i mangitou inaite sinumaruanna si Herodes, see nadorongnga maddame, ana waugu wanua mangitou tumba'u uaantimma anna wuassu wanuan Herodes.

²¹Su sambau allo, apan suete tinantunna, i Herodes nalluṛṛen laubbu araratuanna see inuma'ianna su adderan araratuanna wuṛṛu nanattakke massinaukka su saruannu lal᷊oṛṛon soa.

²²Lal᷊oṛṛon soa apan uararingikka udde mangke u'ui, “Indi tingikku monganna, wal᷊ine tingikku taumata!”

²³Su orassa udde lai mala'ekattu Mawu namero si Herodes, ana waugu i tou tawe mangngaddatta Ruata. I Herodes niinassu ul᷊idda see nate.

²⁴Ne wisaran Ruata mangke inaringiṛṛannu taumata nambo wuṛṛu lembo matohassa.

²⁵Napawe i Barnabas wuṛṛu i Saulus nanginsue manara mangitou, i mangitou nabelengke wuassu Yerusalem ringannu uaapiddi Yohanes Markus suadio'a ringanni mangitou.