Read Talaud WATTI'U MANGA RASUL 13 Bible Online

WATTI'U MANGA RASUL 13 - Talaud bible

WATTI'U MANGA RASUL 13

¹Sulal᷊ummu jamaatta su Antiokhia pia manga nabi wuṛṛu manga huru eteudde i Barnabas, i Simeon apan isassago lai i Ma'itumma, i Lukius wuassu Kirene, Menahem apan niwuwunna suadio'a ringanni Herodes wuṛṛu Saulus.

²Su tempo i mangitou tantal᷊anna mattaṛṛamawu su Mawu wuṛṛu mappuasa, Ghaṛṛahon Ruata nabbisara si mangitou, “Pamilete si Barnabas wuṛṛu si Saulus tumba'u hunane su manara-U, tadea'u i mangitou mammanara manara apan suete niapamanara-U si mangitou.”

³Napawe suete nappuasa wuṛṛu inumal᷊iomanna, i mangitou nangandangngu lima si Barnabas wuṛṛu si Saulus see nandoloken tarua.

⁴Ana waugu nirolokku Ghaṛṛahon Ruata, i Barnabas wuṛṛu i Saulus inaite watukku Seleukia. Wua'isudde i mangitou nassenggotte watukku taṛṛanusan Siprus.

⁵Napawe na'omate su Salamis i mangitou nabbati'u wisara Mawu su manga wal᷊em pattataṛṛamawuannu Yahudi. I Yohanes Markus nallal᷊ima su amatanni mangitou.

⁶Ahewallu taṛṛanusa udde niamatanni mangitou na'oman sara watukku Pafos. Poiaroddi i mangitou nassomban sangkatou taumatan Yahudi aranne i Bar Yesus. I tou taṛṛa wal᷊iimmata apan mangnga'u i tou nabi.

⁷I Sergius Paulus gubernure su taṛṛanusa udde hawene taṛṛa wal᷊iimmata udde. Gubernure udde sangkatou pande wuṛṛu masaṛṛaungnga. I tou namago si Barnabas wuṛṛu si Saulus ana waugu i tou ma'apulu madaringikka wisaran Ruata.

⁸Arawe i Barnabas wuṛṛu i Saulus siningaddi Elimas taṛṛa wal᷊iimmata udde, ana waugu i Elimas (eteudde aranne sulal᷊ummu wisaran Yunani) maddea'a tadea'u gubernure udde tawe mangngimanna Mawu Yesus.

⁹Arawe i Saulus — apan isassago lai i Paulus — pia taṛṛinon Ghaṛṛahon Ruata, na'oman sara i tou nanutudda taṛṛa wal᷊iimmata udde,

¹⁰wuṛṛu nabbisara, “Ei taṛṛa awusu, ana'u al᷊al᷊eo! I'o seettu al᷊awo'u apapia. Anio i'o tawe mangillol᷊o mandal᷊eo pandumannu Ruata, ipanal᷊amatta taumata?

¹¹Orassa indi pa'ellega, Mawu sarun makkuumannu! I'o sarun mawuta, ma'oman sara i'o tawe maasilo semakku matannallo lai tal᷊ang kadio'a.” Orassa udde lai i Elimas naapendamma pia awu ma'itumma nallindumma matane, na'oman sara i tou u'amatta uasasaṛṛipo maddea'a taumata mangehetta si tou.

¹²Napawe gubernure udde naasilo apa apan suete nariaddi, i tou nangngimante Mawu Yesus; ana waugu i tou mangke niaguku al᷊aṛṛa'u Mawu.

¹³Wuassu Pafos, i Paulus wuṛṛu manga hawene nassenggotte watukku Perga su Pamfilia. Isudde i Yohanes Markus nanantangngi mangitou, see nabelengnga watukku Yerusalem.

¹⁴Wuassu Perga i mangitou nanassukku amatanne watukku Antiokhia su Pisidia, wua'udde su allon Sabatta i mangitou inaite inuma'ianna sulal᷊ummu wal᷊em pattataṛṛamawuanna.

¹⁵Napawe Wuke Musa wuṛṛu Wuke Manga Nabi niwasate, manga piaṛṛa'u wal᷊em pattataṛṛamawuanna udde nandolokku taumata iapaiwal᷊o si Paulus wuṛṛu manga hawene, “Manga tuṛṛangnga, amungkangngu tuṛṛangnga pia sambau al᷊aṛṛa'a su manga taumata indi, wal᷊oa'e al᷊aṛṛa'a udde.”

¹⁶I Paulus dirumarisikka, see namatten lima wua'udde nabbisara, “Manga tuṛṛangku walahannu Israel wuṛṛu manga tuṛṛangku apan baine isindi, apan tuttuṛṛutta Ruata! Padaringikka si ya'u:

¹⁷Ruatam walahannu Israel suete namile iupungngu al᷊amonang kite, wuṛṛu na'ola'a walahanna indi walahanna apan wahewa su tempo i mangitou uatana'a su Mesir naal᷊ihida ere taumata raho. Wua'udde ringannu taṛṛino apan wahewa Ruata nangapiddi mangitou sinumabangnga wuassu Mesir.

¹⁸I Tou masabare su pallal᷊agu mangitou su wadda'a appattu pul᷊o su tonnane al᷊annune.

¹⁹Pitu walahanna nipaten tou su wanua Kanaan tadea'u maatahia wanua udde su walahannu Israel tadea'u wanua udde maola'a pussa'an mangitou.

²⁰Sarangkanambone udde nariaddi appatu ṛasutta limam pul᷊o su tonnane al᷊annune. Napawe suete nattahia leta'u Kanaan udde, Ruata nangonggolu manga mallaṛṛuungnga si mangitou. Mallaṛṛuungnga panginsueanne eteudde i Nabi Samuel.

²¹Wua'udde i mangitou nadorongnga sangkatou ratu. Ruata nangonggolli Saul si mangitou ana'i Kis wuassu walahanni Benyamin maola'a ratu mangitou appatu pul᷊o su tonnane al᷊annune.

²²Napawe Ruata nanossokki tou wuassu aiananne, Ruata nanenegi Daud maola'a ratu mangitou. Wuṛṛu ete indi apan iwabal᷊on Ruata su ola'i Daud, ‘I ya'u suete naasomba si Daud ana'i Isai udde sangkatou apan ma'al᷊uassa naung-Ku. Tumba'u i tou taumata apan mangngamattu apulu-U.’

²³Ete wuassi papapulunni Daud udde Ruata nangonggolla su walahannu Israel sangkatou Ratum Punnu Sal᷊amatta su ereapa suete pina'ire. Wuṛṛu ete Mawu Yesus udde Ratum Punnu Sal᷊amatta.

²⁴Ro'en Mawu Yesus taambe napaamattu manara-Ne, i Yohanes suete inumal᷊iata su manga taumatan Israel tadea'u i mangitou mawal᷊u wuassu rosa mangitou wuṛṛu saṛṛanianna.

²⁵Napawe maranitem panginsueannu manarane, i Yohanes nabbisara su manga taumata, ‘Isai ya'u indi tumuṛṛuttu addapatti yamiu? I ya'u wal᷊ine taumata apan ṛaṛṛadoanni yamiu. Paanaunge, taumata udde sarun dumanta manantuṛṛutta si ya'u; sara mamu'a sapatu-Ne lai ya'u tawe wotongnge.’

²⁶Manga tuṛṛangnga papapulunni Abraham, wuṛṛu manga tuṛṛangnga waine apan isindi apan tuttuṛṛutta Ruata! Ruata suete nangonggolu Watti'u Asasal᷊amatta udde si ite;

²⁷ana waugu manga taumata apan uatanaa'a su Yerusalem wuṛṛu manga piaṛṛa'i mangitou tawe maatutukka manungku ete i Tou punnu sal᷊amatta udde. I mangitou tawe maasunna al᷊aṛṛa'u manga nabi apan iwabasa su manga allon Sabatta, na'oman sara i mangitou nakkuumannu Mawu Yesus. Arawe ringannu na'ola'a aroddi, i mangitou napaatipussa manungku apa apan iapaasingkattu manga nabi udde nariaddite.

²⁸Salaiwe i mangitou tawe maasomba sambau pasasal᷊a wuassi Tou, apan botongnge maaṛṛuumanna ringannu ṛuumanna pateanna, arawe i mangitou nadorongnga si Pilatus tadea'u i Tou pateanna.

²⁹Wuṛṛu napawe i mangitou suete na'ola'a sarangkanambone apan uawoṛṛetta su Wuke Susi su ola'i Tou, i mangitou nallintukku winal᷊unan-Ne wuassu alu arussa, see niaddo su lal᷊abinganna.

³⁰Arawe Ruata napaawiakki Tou apia wuassu papate.

³¹Wua'udde manga pira allo al᷊annune i Tou nirumanta namasilon batangan-Ne su manga taumata apan suete nirumanta ringanni Tou wuassu Galilea watukku Yerusalem. Ete i mangitou udde orassa indi naola'a manga tatialan Tou su walahannu Israel.

³²Nariaddi, orassa indi yami mamasingkattu Watti'u Al᷊al᷊uassa udde si yamiu: Apa apan suete pina'iren Ruata su iupungngu al᷊amonang kite,

³³udde suete nimanaran Tou si ite ringannu napaawiakku Mawu Yesus apia wuassu papate. Ana waugu sulal᷊ummu Mazmur aruane uawoṛṛetta, ‘Ete I'o Ana-U su allo indi I Ya'u naola'e Iamang-Ngu.’

³⁴Ruata suete napaawiakki Tou apia wuassu papate. Orassa indi i Tou tate lai mamendamma papate sulal᷊ummu lal᷊abinganna. Su olangnge udde Ruata nabbisara, ‘I Ya'u sarun mangonggolu paaire susi Si'o apan sarun tipusanna, apan suete pina'ire-U si Daud.’

³⁵Aroddi lai sulal᷊ummu tatialane waine niapaasingkatta, ‘I'o tawe mapaawalan Allang-Ngu apan matuṛṛutta udde mawukku'a sulal᷊ummu lal᷊abinganna.’

³⁶I Daud natete wuṛṛu nilabingnga lai suadio'a ringannu iupungngu al᷊amonane, napawe i tou suete nammanara apa apan nirolokku Ruata si tou. Winal᷊unanni Daud naṛṛenessa wuṛṛu sarangkanambone nasuete.

³⁷Arawe Mawu Yesus apan suete niapaawiakku Ruata wuassu papate-Ne udde tawe maṛṛenessa aroddi.

³⁸Ana waugu udde manga tuṛṛangnga, i yamiu ṛinone maasingkata manungku sulal᷊ummu Mawu Yesus indi, watti'a su ola'u pangangampungnga rosa niapaasingkatta si yamiu; i yamiu ṛinone masingkatta manungku suapan taumata apan mangngimanna si Tou, iapaal᷊iu wuassu al᷊awo'u rosa apan tawe iapappassa sulal᷊ummu manga parenta Ruata apan niapaasingkatti Musa.

³⁹

⁴⁰Ana waugu udde ṛinone i yamiu manutukka mapia-pia, arie ma'oman sara mariaddi si yamiu apa apan iwabbisara manga nabi indi,

⁴¹‘Panutukka paapia-pia, ei yamiu manga taumata apan ma'apulu mangal᷊uandaga! I yamiu sarun maherangnga see mate! Ana waugu su tempo indi ya'u tantal᷊anna ma'ola'a manga apa apan tawe pangimananni yamiu sassane salaiwe pia taumata mannal᷊a'a si yamiu.’ ”

⁴²Napawe i Paulus wuṛṛu i Barnabas nanantangngu wal᷊em pattataṛṛamawuanna udde, manga taumata su wal᷊em pattataṛṛamawuanna udde madorongnga sitarua mabelengnga apia su allon Sabatta manansunna, tadea'u manal᷊a'a sansune su ola'u manga hatto udde.

⁴³Napawe manga taumata sinumabangke wuassu wal᷊em pattataṛṛamawuanna udde, i Paulus wuṛṛu i Barnabas nitantalongannu manambo taumatan Yahudi wuṛṛu taumatam walahanna waine apan suete sinumutta agaman Yahudi. Ne manga rasul udde nangaṛṛa'a si mangitou tadea'u i mangitou sidutu uaantimma al᷊amattu Ruata.

⁴⁴Su allon Sabatta manansunna, maranin anambon taumata su soa udde nirumanta madaringikka wisara Mawu.

⁴⁵Napawe manga taumatan Yahudi naasilo taumata manambo udde, i mangitou mannihikka ara'e maddengki atonna. I mangitou mangngal᷊uandaga si Paulus wuṛṛu mannompola anambon bisarane.

⁴⁶Arawe ringannu lembon waṛṛani lai i Paulus wuṛṛu i Barnabas nabbisara uahahati. I mangitou nabbisara, “Wisaran Ruata atonna ṛinone iwal᷊o si yamiu rorone. Arawe ana waugu i yamiu maddiri madaringikka, i yamiu suete namile sassane manungku i yamiu tawe ṛinone manengkamma wiakka tutune wuṛṛu saran mal᷊annu-l᷊annu. Wuṛṛu orassa indi yami manantangngi yamiu wuṛṛu inaite ringannu walahanna waine.

⁴⁷Ana waugu indi parenta Mawu si yami: Mawu nabbisara, ‘I Ya'u suete namile si yamiu maola'a semakka su manga taumata waine apan wal᷊ine Yahudi, tadea'u i yamiu mangapiddu asasal᷊amatta su ahewallu runia.’ ”

⁴⁸Su tempo manga walahanna waine apan wal᷊ine Yahudi naaringikka udde, i mangitou lembon lulluassa, see mangke maddalo wisara Mawu. Wuṛṛu manga taumata apan suete nitantunnu Ruata maasomba wiakka tutune wuṛṛu saran mal᷊annu-l᷊annu, manga taumata udde mangngimanna.

⁴⁹Ne wisara Mawu nassal᷊iawukke su ahewallu leta'a udde.

⁵⁰Arawe manga tembonannu soa udde wuṛṛu manga wawine wuassu wageangngu taumata papunna apan matta'uttu Ruata, niwal᷊oannu manga taumatan Yahudi. I mangitou na'ola'a pabbawawul᷊o su saruanni Paulus wuṛṛu Barnabas, wuṛṛu nallimbuakka sitarua wuassu leta'a udde.

⁵¹Ne manga rasul udde nangesogen awu ledda mangitou su saruannu manga taumata udde, maola'a sambau pananaunganna, see itarua inaite watukku Ikonium.

⁵²Manga mallal᷊aṛṛenggenna su Antiokhia lembon lulluassa wuṛṛu niintaṛṛoannu Ghaṛṛahon Ruata.