Read Talaud WATTI'U MANGA RASUL 14 Bible Online

WATTI'U MANGA RASUL 14 - Talaud bible

WATTI'U MANGA RASUL 14

¹I Paulus wuṛṛu i Barnabas naapendamma olangnge uasul᷊ungnga ereudde su Ikonium. I mangitou inaite lai su wal᷊em pattataṛṛamawuannu Yahudi wuṛṛu nabbisara isudde aroddi lai olangnge na'oman sara manambo taumatan Yahudi wuṛṛu wal᷊ine Yahudi mangngimanna Mawu Yesus.

²Arawe manga taumatan Yahudi apan maddiri mangngimanna, mammono'a manga taumata wal᷊ine Yahudi, na'oman sara i mangitou mannaungnga lal᷊eo su manga taumata apan mangngimanna Mawu Yesus.

³Ana waugu udde i Paulus wuṛṛu i Barnabas natana'a mal᷊annu isudde. Wuṛṛu ringannu waṛṛani i mangitou mabatti'u wisara Mawu. Ne Mawu lai napaal᷊iatta'a manungku watti'i mangitou su ola'u darangngu-Ne udde atonna; i Tou nangonggolu taṛṛino si mangitou ma'ola'a al᷊aṛṛindu'a wuṛṛu inolaanna waine.

⁴Arawe tumana'u soa udde uatatiakka sangkatou ringannu sangkatou; piaddu mannamba'a taumatan Yahudi wuṛṛu piaddu lai mannamba'a manga rasul udde.

⁵See manga taumatan Yahudi wuṛṛu manga piaṛṛangnge su sampunna ringannu manga taumata wal᷊ine Yahudi na'ire manansara wuṛṛu manuntungngu watu su manga rasul udde.

⁶Arawe manga rasul udde naasingkattu olangnge udde, see nangingkatte watukku Listra wuṛṛu Derbe, eteudde manga soa su Likaonia, wuṛṛu watukku leta'a maranine.

⁷Poiaroddi i mangitou mabatti'u lai Watti'u Al᷊al᷊uassa udde.

⁸Su Listra pia sangkatou esakka leddane lome ro'en niariaddine, na'oman sara i tou tawe maamatta, ana waugu leddane tumaniten lome.

⁹Taumata udde ua'ianna poiaroddi uararingikka si Paulus mabbisara. I Paulus naasilo manungku taumata udde mangngimanna wuṛṛu ana waugu udde i tou wotongnge iapaapia. Ne i Paulus nanutuda si tou,

¹⁰wuṛṛu ringannu tingikka ma'ikkatta Paulus nabbisara, “Darisikka paatul᷊idda!” Taumata udde sinumolo'a dirumarisikka see inumamatta.

¹¹Napawe taumata nambo udde naasilo apa apan suete niola'i Paulus, i mangitou mangngintul᷊i sulal᷊ummu wisaran Likaonia, “Manga monganna sinumossokke su runia ringannu awa'u taumata.”

¹²See i Barnabas nisaggo mangitou i Zeus, wuṛṛu i Paulus nisaggo mangitou i Hermes, ana waugu ete i tou nabbisara.

¹³Imam Monganna Zeus apan tampa pattataṛṛamawuanne su saruannu soa, nirumanta uaapiddu manga sapi esakka wuṛṛu manga wungang kalu su ngara pasallangannu soa udde. I tou ma'apulu tumantalongnga taumata nambo udde manguntudu sasamba su manga rasul udde.

¹⁴Napawe i Barnabas wuṛṛu i Paulus naaringikka apa apan niola'u taumata nambo udde, i mangitou nanggesa'a manga laungnge lapiddu tuttal᷊angnga su pattangngannu awada'alla udde see u'al᷊iata,

¹⁵“Ei, anio i yamiu ma'ola'a arendi? I yami indi taumata ere lai yamiu! I yami rudanta mamasingkattu Watti'u Al᷊al᷊uassa si yamiu tadea'u i yamiu manantangngu inolaanna lal᷊eo indi wuṛṛu rumanta ringannu Ruata apan biakka, nandiadi langitta wuṛṛu runia wuṛṛu tahal᷊oangnga wuṛṛu anambon lal᷊oṛṛone.

¹⁶Su tempo nal᷊iu Mawu namala manga walahanna tuttuṛṛutta apulune sassane.

¹⁷Arawe i Tou tawe maabul᷊i mangonggolu tatiala-Ne, eteudde ringannu ma'ola'a apapia. i Tou mangngonggolu uranna wuassu langitta wuṛṛu hessin leta'a su tempone. I Tou mangngonggolu anna si yamiu wuṛṛu malluassa naungngu.”

¹⁸Arawe ringannu wisara udde lai ta'e masahadda manga rasul udde maningaddu manga taumata mangonggolu sasamba si mangitou.

¹⁹Manga pira taumatan Yahudi apan nirumanta su Listra wuassu Antiokhia su Pisidia wuṛṛu Ikonium mammono'a awada'alla, na'oman sara taumata nambo udde nanamba'a si mangitou. I mangitou nanuntungngu watu si Paulus, wuṛṛu namol᷊engnga si tou watukku liuddu soa. I mangitou massunna naudde i tou natete,

²⁰arawe napawe manga taumata apan mangngimanna isudde uarisikka uapal᷊iwutta si tou, i tou dirumarisikka wuṛṛu nabelengnga apia watukku soa. Tiṛṛabbine i tou inaite watukku Derbe su sampunna ringanni Barnabas.

²¹Su Derbe, i Paulus wuṛṛu i Barnabas mabatti'u Watti'u Al᷊al᷊uassa udde wuṛṛu manambo taumata apan nangngimanna Mawu Yesus. Wua'udde i mangitou nabelengke su Listra, wua'udde su Ikonium, see su Antiokhia su Pisidia.

²²Su manga soa udde i mangitou mannohassa naungngu mallal᷊aṛṛenggennu Mawu Yesus wuṛṛu mannantiro mallal᷊aṛṛenggenna udde tadea'u sidutu mangngimanna Mawu Yesus. “I ite ṛinone matataṛṛangnga rorone, wakkute udde i ite wotongnge mamendamma al᷊al᷊uassa su Runian Wakku Ruata,” aroddi manga rasul udde mangngaṛṛa'a manga mallal᷊aṛṛenggennu Mawu Yesus su soa udde.

²³Wuṛṛu su al᷊awo'u jamaatta, i Paulus wuṛṛu i Barnabas nanenegu manga piaṛṛangnge su jamaatta udde. See ringannu u'al᷊iomanna wuṛṛu mappuasa, i mangitou nanantillu manga piaṛṛangnge udde su Mawu apan pangngimananni mangitou.

²⁴Wua'udde i Paulus wuṛṛu Barnabas nanassukku amatanni mangitou sinumabbi leta'u Pisidia wuṛṛu na'omate su Pamfilia.

²⁵Wuṛṛu napawe i mangitou suete namasingkattu watti'u Ruata su Perga, i mangitou inaite watukku Atalia.

²⁶Wua'isudde i mangitou nassenggotte apia watukku Antiokhia. Eteudde soa tampa mangitou rorone tinantilla su darangngun Ruata, tadea'u i mangitou mammanara manara apan orassa indi suete niinsue mangitou.

²⁷Napawe na'omate su Antiokhia, i mangitou nangammullu manga taumata wuassu jamaatta udde, see nabatti'u sarangkanambone apan suete niola'u Ruata sulal᷊ummi mangitou. I mangitou nabbati'a lai su ola'u ereapa Ruata suete namantingidu lal᷊anna tadea'u manga taumata apan bal᷊ine Yahudi mangngimanna Mawu Yesus.

²⁸Su soa udde i Paulus wuṛṛu i Barnabas natana'a mal᷊annu ringannu manga taumata apan mangngimanna.