Read Talaud WATTI'U MANGA RASUL 15 Bible Online

WATTI'U MANGA RASUL 15 - Talaud bible

WATTI'U MANGA RASUL 15

¹Manga pira taumata wuassu Yudea nirumanta su Antiokhia wuṛṛu mangngaṛṛa'a manga taumata mangngimanna su Antiokhia udde manungku amungkangngu i mangitou tawe sunatanna tumuṛṛuttu Tita Musa, i mangitou tawe masal᷊amatta.

²I Paulus wuṛṛu i Barnabas mangke mannompola addapattu manga taumata udde. Panginsueanne tinantunna tadea'u i Paulus wuṛṛu i Barnabas wuṛṛu manga pira taumata waine wuassu Antiokhia inai watukku Yerusalem suadio'a ringannu manga rasul wuṛṛu manga piaṛṛangnge poiaroddi.

³Jamaatta su Antiokhia nanguntudi mangitou na'oman sara su liuddu soa, wua'udde i mangitou inaite nabatukku Fenesia wuṛṛu Samaria. Poiaroddi i mangitou nabbati'u ereapa manga taumata apan wal᷊ine Yahudi suete nanantillu watanganne su Ruata. Watti'a udde naal᷊uassa manga taumata mangngimanna isudde.

⁴Napawe i mangitou na'omate su Yerusalem, i mangitou sinal᷊ohoannu jamaatta ringannu mapia, wuṛṛu manga rasul see manga piaṛṛangnge. See i mangitou nabatti'a su manga taumata isudde su ola'u anambon inolaannu Ruata sulal᷊ummi mangitou.

⁵Arawe sire pira wuassu wageangngu Farisi apan suete nangngimanna, dirumarisikka wuṛṛu nabbisara, “Manga taumata walahanna waine apan nangngimante udde ṛinone sunatanna wuṛṛu ṛinone tumuṛṛutta Tita Musa.”

⁶See manga rasul wuṛṛu manga piaṛṛangnge na'ammulla magahatton olangnge udde.

⁷Mal᷊annu atonna i mangitou uaraṛṛingidda su sambau. Panginsueanne i Petrus dirumarisikka wuṛṛu nabbisara, “Manga tuṛṛangnga! I yamiu sassane masingkatta manungku tempo nal᷊iu Ruata namile si ya'u wuassu wallatti yamiu mamasingkattu Watti'u Al᷊al᷊uassa udde su manga taumata apan wal᷊ine Yahudi, tadea'u i mangitou madaringikka wuṛṛu mangngimanna.

⁸Wuṛṛu Ruata apan masingkattu naungngu taumata suete napaal᷊iatta'a manungku i Tou manengkamma si mangitou; i Tou napaal᷊iatta'u olangnge udde ringannu nangonggolu Ghaṛṛahon Ruata si mangitou ere lai suete nionggolla si ite.

⁹Ruata tawe mapapaṛṛalang kite wuṛṛu i mangitou. I Tou nangukkassa naungngi mangitou ana waugu i mangitou mangngimanna.

¹⁰E, anio i yamiu lullawangnga Ruata orassa indi ringannu nangonggolu winabbawa apan mawakkata su mallal᷊aṛṛenggenna indi, sumbal᷊i iupungngu al᷊amonang kite wuṛṛu i ite sassane lai tawe maatuṛṛutta manara udde?

¹¹Arawe, i ite mangngimanna wuṛṛu i ite naasomba asasal᷊amatta ana waugu darangngu Mawu Yesus; aroddi lai i mangitou.”

¹²Ne nallannabe manga taumata apan uaammulla isudde. Wua'udde i mangitou nadaringikka si Barnabas wuṛṛu si Paulus nabbatti'a apia su ola'u anambon al᷊aṛṛindu'a wuṛṛu manga inolaanna apan bahewalla apan suete niola'u Ruata sulal᷊ummi mangitou su wallattu manga taumatan walahanna waine apan wal᷊ine Yahudi.

¹³Napawe i mangitou suete nabbisara, i Yakobus nabbisara, “Manga tuṛṛangnga! Padaringikka si ya'u.

¹⁴I Simon wakkute lai nanal᷊a'a ereapa Ruata paarorone napaal᷊iatta'u naung-Nge su manga taumata wal᷊ine Yahudi ringannu pandumma mamile wuassi mangitou manga taumata waine apan sarun olaanna pabbawala-Ge.

¹⁵Udde nassul᷊ungngu apa apan suete niapaasingkattu manga nabi. Ana waugu pia uawoṛṛetta arendi,

¹⁶‘Napawe wua'udde i Ya'u sarun dumanta apia,’ unnu Mawu, ‘I Ya'u sarun mapararisikka apia wal᷊en Daud apan naṛṛaate wuṛṛu manul᷊en aolangnge nahohakka, see iapararisikka apia;

¹⁷tadea'u taumata apan lambene udde maddea'a Mawu, su sampunna ringannu walahanna waine apan wal᷊ine Yahudi apan suete niwagoang-Ku maola'a pussaa-U.’ Ete aroddi wisara Mawu,

¹⁸apan suete namasingkattu olangnge udde ro'em paarorone.”

¹⁹“Nariaddi tumuṛṛuttu addapa'u,” unni Yakobus, “I ite tawe wotongnge mapaasusan taumata wal᷊ine Yahudi udde apan suete nanantillu wadangnge su Ruata.

²⁰Arawe i ite ṛinone mamoṛṛettu suratta si mangitou tadea'u i mangitou tawe umanna anna lal᷊eo apan suete pinassubba paal᷊uanna, ara'e inassa wuassu ṛemessu winatangnga apan nate niattongnga, ara'e ma'inumma ṛaṛṛa. Wuṛṛu lai tadea'u i mangitou mapaaraun batanganne wuassu manga inolaanna apan lal᷊eo.

²¹Ana waugu Tita Musa ro'en paarorone iwabbasa suapan allon Sabatta su manga wal᷊em pattataṛṛamawuanna wuṛṛu iapaasingkatta su anambon soa.”

²²Manga rasul wuṛṛu manga piaṛṛangnge, su sampunna ringannu jamaatta udde naṛṛawessa mamile manga pirang katou taumata wuassu wallatti mangitou apan sarun irolokka watukku Antiokhia suadio'a ringanni Paulus wuṛṛu i Barnabas. I mangitou namile si Silas wuṛṛu si Yudas apan isassago lai i Barsabas. Taumata darua indi paarorone su wallattu manga taumata mangngimanna su Yerusalem.

²³Suadio'a ringannu manga daroloṛṛanna udde, i mangitou napaapiddu suratta lai apan tingikke arendi, “Iwuna'a su anambon tuṛṛangnga wuassu manga walahanna waine apan wal᷊ine Yahudi, wuṛṛu uatana'a su Antiokhia, Siria, wuṛṛu Kilikia. Tabea wuassi yami, manga rasul wuṛṛu manga piaṛṛangnge, eteudde manga tuṛṛangngu.

²⁴I yami naaringikka pia sire pira taumata wuassu wallatti ami apan suete nirumanta ringanni yamiu nanongkakka wuṛṛu naapatiangngang kamiu ringannu al᷊aṛṛa'i mangitou. Sumbal᷊i yami tawe nandolokki mangitou ma'ola'a manara udde.

²⁵Ana waugu udde i yami suete na'ire wuṛṛu sarangkanambone inumire mamile sire pira taumata wuṛṛu mandolokki mangitou ringanni yamiu. I mangitou sarun inai suadio'a ringannu tuṛṛangnga Barnabas wuṛṛu i Paulus apan arangnguanni yami.

²⁶Itarua indi eteudde manga taumata apan suete nanantillu niawane ana waugu Mawung kite Yesus Kristus.

²⁷Nariaddi yami nandolokki Yudas wuṛṛu i Silas ringannu manga tuṛṛangnga. Ete i mangitou sassane mamasingkatta uahahati si yamiu watti'a apan uawoṛṛetta sulal᷊ummu suratta indi lai.

²⁸Ghaṛṛahon Ruata suete namala — wuṛṛu i yami maapulu tadea'u i yamiu tawe onggol᷊annu manara apan awakkatanne wuassu manga manara apan apianne indi:

²⁹imbaṛṛangnga umanna anna apan suete pinassubba paal᷊uanna; imbaṛṛangnga ma'inumma ṛaṛṛa, imbaṛṛangnga uminassa ṛemessu winatangnga nate niattongnga, wuṛṛu paaraun inolaanna apan lal᷊eo. Amungkangngu i yamiu mangindaun watanganni yamiu wuassu manga inolaanna udde, i yamiu suete na'ola'a apapia. Na'omate isindi, tabea!”

³⁰Napawe suete nabal᷊o inaite, i mangitou apan nirolokka udde, nabatukken Antiokhia. Poiaroddi i mangitou namaggo anambon jamaatta maammula see namasingkattu lal᷊oṛṛon suratta udde.

³¹Napawe manga jamaatta naawasan suratta udde, i mangitou mangke lulluassa ana waugu lal᷊oṛṛon suratta udde maal᷊uassa naungngi mangitou.

³²I Yudas wuṛṛu i Silas, apan nabi lai, mal᷊annu uahahatto manga tuṛṛangnga apan mangngimanna su Antiokhia udde wuṛṛu nangonggolu sasasa wuṛṛu awawaṛṛani si mangitou.

³³Napawe i Yudas wuṛṛu i Silas natana'a manga pira allo al᷊annune, manga taumata mangngimanna su Antiokhia udde nandolokki mangitou mabelengnga wuṛṛu nananatan tabea mangitou su manga taumata apan nandolokki mangitou. [

³⁴Arawe i Silas naṛṛawessa see sidutu matana'a su Antiokhia.]

³⁵I Paulus wuṛṛu i Barnabas natana'a lai manga pira allo al᷊annune su Antiokhia. Poiaroddi i mangitou mangngaṛṛa'a wuṛṛu mabatti'u wisara Mawu suadio'a ringannu taumata nambo waine.

³⁶Tawe nal᷊annu wua'udde i Paulus nabbisara si Barnabas, “Wette i ite mabelengke apia mattembo manga tuṛṛangnga apan mangngimanna Mawu Yesus su anambon soa apan suete niwatti'i anni ite wisara Mawu; tadea'u i ite maasilo ereapa ola'i mangitou.”

³⁷I Barnabas maapulu mangapiddi Yohanes Markus,

³⁸arawe i Paulus mammendamma lal᷊eo mangapiddi Markus apan maddiri mammanara su sampunna ringanni mangitou wuṛṛu nanantangngi mangitou su Pamfilia.

³⁹Ne i Paulus wuṛṛu i Barnabas natatiakka na'oman sara panginsueanne itarua nattal᷊ei: i Barnabas nangahete si Markus wuṛṛu nassenggotte itarua watukku Siprus.

⁴⁰I Paulus namile si Silas see inaite itarua napawe manga tuṛṛangnge su Antiokhia nanantilli tarua su al᷊amattu Mawu.

⁴¹Itarua namal᷊iwutta Siria wuṛṛu Kilikia; poiaroddi itarua mannohassa manga jamaatta.