Read Talaud WATTI'U MANGA RASUL 16 Bible Online

WATTI'U MANGA RASUL 16 - Talaud bible

WATTI'U MANGA RASUL 16

¹Paulus nanassute amatanne watukku Derbe, wua'udde watukku Listra. Isudde pia sangkatou mallal᷊aṛṛenggennu Mawu Yesus aranne i Timotius. Inangnge sangkatou Yahudi, apan mangngimante Mawu Yesus; arawe iamangnge taumatan Yunani.

²Su wallattu manga taumata mangngimanna apan uatana'a su Listra wuṛṛu Ikonium, i Timotius niasingkatanna sangkatou taumata apan mapia.

³I Paulus maapulu tadea'u i Timotius tumantalongnga si tou; ana waugu udde i tou nannunatte si Timotius. I tou na'ola'a aroddi ana waugu manga taumatan Yahudi su wanua udde manambo masingkatta manungku iamangngi Timotius sangkatou taumatan Yunani.

⁴Su al᷊awo'u soa apan tattemboanni mangitou, i mangitou mammasingkatta su manga taumata apan mangngimanna manga atoranna apan suete tinantunnu manga rasul wuṛṛu manga piaṛṛangnge su Yerusalem. I mangitou mannantiro manga tuṛṛangnga apan suete nangngimanna udde tadea'u tumuṛṛutta manga atoranna udde.

⁵Ne manga jamaatta udde niatambante atatohassu pangangimanne, wuṛṛu miallo-miallo a'atambanna anambone.

⁶Ghaṛṛahon Ruata tawe namalam Paulus wuṛṛu i Silas mabatti'u wisaran Ruata su leta'u Asia. Nariaddi amamatti tarua nisassukke watukku wageangngu Frigia wuṛṛu Galatia.

⁷Napawe na'omate su passarannu Misia, itarua na'annamma sinumutta su leta'u Bitinia, arawe Ghaṛṛaho Mawu Yesus naningaddi tarua inai isudde.

⁸Nariaddi itarua inumamatta nanassukke su Misia wuṛṛu lapiddu nasal᷊a watukku Troas.

⁹Ṛabbine su Troas, i Paulus nissondapanna. Sulal᷊ummu sondapa udde i tou naasilo taumata Makedonia uarisikka su saruanne lapiddu sussal᷊ande tadea'u i tou lai inai watukku Makedonia mantul᷊ungngi mangitou.

¹⁰Napawe i Paulus wua nissondapanna udde, i yami lapiddu nasasaddia inai watukku Makedonia. Ana waugu ringannu antimma i yami makkawessa manungku Ruata nandolokki yami mabatti'u Watti'u Al᷊al᷊uassa udde su manga taumata poiaroddi.

¹¹I yami nanantangken Troas wuṛṛu nassenggotte watukku Samotrake, wuṛṛu tiṛṛabbine watukku Neapolis.

¹²Wua'isudde i yami watukku Filipi, sambau soa paarorone su leta'u Makedonia. Filipi udde paparentannu araratuannu Roma. Poiaroddi yami natana'a manga pira allo.

¹³Su allon Sabatta i yami inai su winggin sal᷊ukka su liuddu ngara pasalangannu soa, ana waugu i yami mammendamma isudde pia tampa pangngal᷊iomanannu taumatan Yahudi. See yami inuma'iante wuṛṛu nagahatote manga wawine apan uaammulla su tampa udde.

¹⁴Sangkatou su wallatti mangitou eteudde mabbawal᷊u'u mal᷊aṛṛenessa ungu, aranne i Lidia taumata wuassu Tiatira. I tou marangngu Ruata, ne Mawu nangal᷊ore naungnge tadea'u i tou manengkamma apa apan ia'aṛṛa'i Paulus si tou.

¹⁵I Lidia wuṛṛu lal᷊oṛṛon bal᷊ene nisaṛṛanite. Napawe sueten saṛṛanine i tou nabal᷊o si yami. I tou nabbisara, “Amungkangngu manga tuṛṛangnga mammendamma i ya'u atonna-tonna suete nangngimanna Mawu Yesus, wette pangintal᷊ate su wal᷊e'u.” See i tou mammata'a tadea'u i yami tumuṛṛutta darorongngi tou.

¹⁶Su sambau allo tantal᷊anna i yami u'al᷊iomanna, i yami nassomban sangkatou wawine; i tou allangnga. Wawine udde aintaṛṛoannu ghaṛṛaho lal᷊eo apan wotongnge mani'attu arariadianna apan sarun dumanta. Ringannu manni'attu inolaannu taumata, wawine udde mangngonggolu auntunganna apan bahewa su mawune.

¹⁷Wawine udde sidutu uatantalongnga si Paulus wuṛṛu si yami lapiddu u'al᷊iata, “Manga taumata indi allangngu Ruata apan ahewal᷊anne! I mangitou nirumanta mapa'asingkatta su manga tuṛṛangnga ereapa lal᷊anne i yamiu masal᷊amatta!”

¹⁸Manga pira allo al᷊annune wawine udde sidutu u'al᷊iata aroddi. I Paulus niasueannu asasabarene, na'oman sara i tou nanaile see nabbisara ghaṛṛaho lal᷊eo udde, “Ringannu arannu Mawu Yesus Kristus, i ya'u mamarenta si'o sabbangnga wuassu wawine udde.” Orassa udde lai ghaṛṛaho udde nanantangngu wawine udde.

¹⁹Napawe manga mawune naatutukka manungku tempo mangitou maasomba roitta udde nawul᷊ite, i mangitou nanametta si Paulus wuṛṛu si Silas, see itarua niwol᷊engnga watukku tampam pangillol᷊oanna iapaasaruanna pamarenta.

²⁰I mangitou napaasaruanni Paulus wuṛṛu i Silas su manga tembonannu Roma, wua'udde nabbisara, “Manga taumata indi taumatan Yahudi. I mangitou mangngal᷊iba'ukku soang kite.

²¹I mangitou nandolokku taumata mallagun addatta inanaramanna apan uapapaṛṛala manga titang kite taumatan Roma. I ite tawe wotongnge manengkamma ara'e tumuṛṛutta addatta inanaramanna udde!”

²²Awada'alla udde lapiddu namuulla si Paulus wuṛṛu si Silas; wuṛṛu manga piaṛṛa'u pamarenta nanggesa'a laubbu rasul darua udde see nandolokku taumata niapapuulla sitarua.

²³Napawe itarua nipuulla ma'ikkatta, itarua nitaṛṛo sulal᷊ummu tuttupanna. Tembonannu tuttupanna nirolokka mandiaga sitarua ringannu matohassa.

²⁴Ana waugu parenta udde, tembonannu tuttupanna nantaṛṛon tarua su wabo'an tuttupanna apan al᷊al᷊umanne, wuṛṛu leddan tarua nimantungnga su sal᷊abba'u.

²⁵Iraṛṛangngo alloaranete, i Paulus wuṛṛu i Silas u'al᷊iomanna wuṛṛu mangngantarin daralo su Ruata. Manga taumata tataṛṛanganna waine lai tantal᷊anna uararingikka sitarua mangngantari.

²⁶Inaṛṛombanganne nallinukka wahewa na'oman sara rapappaku tuttupanna udde inumio'a. Anambo ngaran tuttupanna udde nawu'a wuṛṛu manga ṛate apan uamantungngu taumatan tuttupanna udde napallosa.

²⁷Tembonannu tuttupanna udde niṛṛumindu'a napu'o. Napawe i tou naasilo manga ngaran tuttupanna udde nawu'a, i tou nanawutta hal᷊ele ipamate ririne, ana waugu i tou massunna manungku manga taumata apan tataṛṛanganna tinumal᷊angke abbi.

²⁸Arawe i Paulus inumui ma'ikka-ikkatta, “Arie pamate ririnu! I yami sarangkanambone ta'e isindi!”

²⁹Tembonannu tuttupanna udde nadorongnga sol᷊o see tinumal᷊angnga watukku lal᷊umme, wuṛṛu ringannu mangngindo i tou inumal᷊intuda su saruanni Paulus wuṛṛu i Silas.

³⁰Wua'udde i tou nangapiddi tarua sinumabangnga wuṛṛu nabbisara, “Manga mawu, apa ṛinone ta'u olaanna tadea'u i ya'u masal᷊amatta?”

³¹I Paulus wuṛṛu i Silas sinumimbakka, “Pangngimante Mawu Yesus! I'o saru masal᷊amatta — i'o wuṛṛu anambon taumata sulal᷊ummu wal᷊enu!”

³²See i Paulus wuṛṛu i Silas nanal᷊aaten wisara Mawu su tembonannu tuttupanna udde wuṛṛu anambon taumata sulal᷊ummu wal᷊ene.

³³Su ṛabbi mattangnga udde lai, tembonannu tuttupanna udde nangapiddi tarua see namaresi manga lessan tarua. Ne i tou wuṛṛu anambon lal᷊oṛṛon wal᷊ene lapiddu naisaṛṛani.

³⁴Wua'udde i tou nangapiddi Paulus wuṛṛu i Silas su wal᷊ene wuṛṛu itarua niapaante. I tou wuṛṛu lal᷊oṛṛon wal᷊ene mangke lulluassa ana waugu i mangitou orassa udde nangngimante Ruata.

³⁵Tiṛṛabbine rua'allo, manga piaṛṛa'u pamarentan Roma nandolokku Polisi watukku tuttupanna iapawal᷊o, tadea'u i Paulus wuṛṛu i Silas iapapallossa.

³⁶Tembonannu tuttupanna udde nabal᷊om batti'a udde si Paulus. I tou nabbisara, “Manga mawu, manga piaṛṛa'u pamarenta suete nandolokka tadea'u manga mawu iapapallossa. Orassa indi manga mawu wotongngete mapul᷊e. Sal᷊amatte umamatta!”

³⁷Arawe i Paulus nabbisara su manga polisi udde, “I yami tumana'u Roma. Taambe niparikisanna i yami suete nipuulla su saruannu awada'alla wuṛṛu tinaṛṛo sulal᷊ummu tuttupanna. Wuṛṛu orassa indi i mangitou mandolokki yami mapul᷊e ringannu mal᷊anna-l᷊annaba? I yami maddiri! Dol᷊oṛṛa'a manga piaṛṛa'u pamarenta udde rumanta sassane isindi mamallosi yami.”

³⁸Manga polisi udde nabal᷊on hatto udde su manga piaṛṛa'u pamarentan Roma. Napawe manga piaṛṛangnge udde naaringikka manungku i Paulus wuṛṛu i Silas tumana'u araratuannu Roma, i mangitou nata'utta.

³⁹See i mangitou inaite nadorongnga ampungnga si Paulus wuṛṛu si Silas, wua'udde nanguntudi tarua sinumabangnga wuassu tuttupanna, lapiddu nadorongnga tadea'u i mangitou mangingkatta wuassu soa udde.

⁴⁰I Paulus wuṛṛu i Silas nanantangngu tuttupanna udde see inaite su wal᷊en Lidia. Napawe suete nassomba manga taumata mangngimanna poiaroddi, wuṛṛu nangonggolu sasasa si mangitou, i Paulus wuṛṛu i Silas inumamatte.