Read Talaud WATTI'U MANGA RASUL 17 Bible Online

WATTI'U MANGA RASUL 17 - Talaud bible

WATTI'U MANGA RASUL 17

¹I Paulus wuṛṛu Silas nanassukku amatanni tarua sinumabbi Amfipolis wuṛṛu Apolonia see na'omate su Tesalonika. Poiaroddi pia wal᷊em pattataṛṛamawuannu taumatan Yahudi.

²Ne i Paulus inaite watukku wal᷊em pattataṛṛamawuanna udde — ere su anaramme amungkangngu pia wal᷊em pattataṛṛamawuannu taumatan Yahudi — see maṛṛingidda su sambau ringannu manga taumata isudde su ola'u tatialan Wuke Susi. I tou na'ola'a udde pa'atallu allon Sabatta ualal᷊intuṛṛutta.

³Tumuṛṛuttu pinangianannu manga tatialan Wuke Susi i tou mannal᷊a'a wuṛṛu mammasingkatta manungku Ratum Punnu Sal᷊amatta apan pina'iren Ruata, ṛinone matataṛṛangnga wuṛṛu mabbiakka apia wuassu papate. “Mawu Yesus apan ta'u iapaasingkatta si yamiu udde, ete i Tou Ratum Punnu Sal᷊amatta apan pina'ire,” unni Paulus.

⁴Manga pira taumata mangngimanna see tinumantalongnga si Paulus wuṛṛu si Silas; aroddi lai anambon taumatan Yunani apan matta'uttu Ruata wuṛṛu manambo lai manga wawine piaṛṛangnge.

⁵Arawe manga taumatan Yahudi mannihikka arae madengki. I mangitou namago manga taumata ul᷊allele su manga lal᷊anna wuṛṛu na'ola'a ammul᷊anna mangal᷊iba'ukka. See i mangitou nangal᷊iba'ukke su ahewallu soa udde wuṛṛu nattudam bal᷊en sangkatou apan mangngimanna aranne i Yason maddea'a si Paulus wuṛṛu si Silas, ana waugu i mangitou ma'apulu mangapiddi Paulus wuṛṛu i Silas sumabangnga iapasaruanna awada'alla.

⁶Arawe su tempo i mangitou tawe naasomba si Paulus wuṛṛu si Silas, i mangitou namol᷊engnga si Yason wuṛṛu manga pira taumata mangngimanna waine, sinumaruanna manga tembonanne apan uaparenta su soa udde. I mangitou u'ui, “Manga taumata indi mangngal᷊iba'ukka su al᷊awo'u tampa! Orassa indi soang kite lai nirantanni mangitou,

⁷wuṛṛu Yason suete napaintal᷊a mangitou su wal᷊ene. I mangitou sarangkanambone nilumawangnga manga atorannu Kaisar Roma, ana waugu i mangitou mabbisara manungku pia lai ratu waine aranne Mawu Yesus.”

⁸Ringannu manga wisara udde i mangitou na'ola'a manga taumata nambo wuṛṛu manga tembonanne su soa udde hinumio.

⁹See manga tembonanne udde nandolokki Yason wuṛṛu manga taumata mangngimanna apan waine udde mamaekka roittu pasasal᷊a. Wakkute udde i mangitou ipallossa.

¹⁰Ṛabbi udde lai manga taumata mangngimanna su soa udde lai nandolokki Paulus wuṛṛu i Silas inai watukku Berea. Napawe na'omate isudde, i Paulus wuṛṛu i Silas inaite su wal᷊em pattataṛṛamawuannu Yahudi.

¹¹Manga taumata su Berea masaṛṛionto'a naungnge wuassu manga taumata su Tesalonika. Ringannu naungnga mal᷊uassa i mangitou madaringikka watti'u Mawu Yesus, wuṛṛu miallo-miallo i mangitou mannaṛṛassida lal᷊oṛṛon Wuke Susi tadea'u maasingkatta tanne al᷊aṛṛa'i Paulus udde atonna.

¹²Manambo su wallatti mangitou mangngimanna Mawu Yesus, wuṛṛu tawe matul᷊u lai papunna manga taumatan Yunani nangngimanna; mapia wawine ara'e lai esakka.

¹³Napawe manga taumatan Yahudi su Tesalonika naaringikka manungku i Paulus mabatti'u wisara Mawu su Berea, i mangitou nirumanta lai su Berea wuṛṛu mammono'a see na'ola'a taumata isudde tawe matammuda.

¹⁴Mal᷊iha-l᷊ihakka manga tuṛṛangnga su Berea nanguntuddi Paulus watukku apanne, arawe i Silas wuṛṛu i Timotius natantangnga su soa udde.

¹⁵Napawe suete nanguntuddi Paulus na'oman sara Atena, manga tuṛṛangnga udde nabelengnga su Berea ringannu uaapiddu tanata wuassi Paulus tadea'u i Silas wuṛṛu i Timotius manantuṛṛutta si tou ringannu mal᷊ihakka.

¹⁶Tantal᷊anna i Paulus uaraṛṛaddo si Silas wuṛṛu si Timotius su Atena, naungnge massusa naasilo soa udde napene manga paal᷊uanna.

¹⁷Ana waugu udde su wal᷊em pattataṛṛamawuanna, i Paulus uaa'al᷊iun ṛingidda ringannu manga taumatan Yahudi wuṛṛu manga taumata waine apan massubba Ruata isudde. Aroddi lai su manga pasakka, miallo-miallo i tou uaa'al᷊iun ṛingidda ringannu manga taumata isudde.

¹⁸Manga huru mallal᷊aṛṛenggenni Epikuros wuṛṛu Stoa uasasimbakki tou lai. Siri pira wuassi mangitou nabbisara, “Taumata indi masingkattu apa? Asingkanne tumba'u adio'a, arawe i tou tal᷊imoṛṛonganna!” Siri pirang katou waine nabbisara, “Lihidde i tou mabatti'u manga mongannu walahanna waine.” I mangitou nabbisara aroddi ana waugu i Paulus nabatti'u Mawu Yesus wuṛṛu su ola'u mabbiakka apia wuassu papate.

¹⁹See i mangitou nangapiddi Paulus watukku tampa pasasombanna su Wuiddu Areopagus. Poiaroddi i mangitou nabbisara si tou, “I yami maapulu maasingkata al᷊aṛṛa'a wakku apan iaaṛṛangngu udde.

²⁰Ana waugu i'o mammasingkatu manga inolaanna apan daringiṛṛanna paṛṛalane su aringikki yami. Ana waugu udde i yami ma'apulu maasingkattu atappasanne.” (

²¹Ana waugu taumatan Atena wuṛṛu manga taumata raho apan uatana'a isudde ma'apulu manginsue allo mangitou madaringikka wuṛṛu uahahatto manga hatto apan wakku.)

²²Su tempo i Paulus dirumarisikka su saruannu manga taumata apan uaammulla su Areopagus udde, i Paulus nabbisara, “Ei, manga taumatan Atena! I ya'u ma'ellega manungku su alawo'u inolaanna i yamiu lembon taṛṛa agama.

²³Ana waugu su tempo i ya'u u'amatta mammal᷊iwutta soa atatanaannu wuṛṛu mannutukka manga tampam pangal᷊iomanannu, i ya'u naasilo lai sambau tampa pangangadoannu sasamba; su tampa udde uawoṛṛetta, ‘Ionggola su Ruata apan awagananna.’ E, Ruata apan sassubbanni yamiu udde awagananna, ete i Tou apan iwabatti'u si yamiu.

²⁴Ruata apan nandiaddi runia indi wuṛṛu al᷊awo'u lal᷊oṛṛone, ete i Tou Ruatan su langitta wuṛṛu runia. I Tou tawe uatana'a su manga wal᷊em paal᷊uanna apan niola'u taumata.

²⁵I Tou lai tawe madorongnga tul᷊unganna su taumata, ana waugu ete i Tou apan mangngonggolu wiakka wuṛṛu sasangngo wuṛṛu manga al᷊awo'a su taumata.

²⁶Wuassu sangkatou taumata i Tou nandiaddi anambon walahanna wuṛṛu nandolokki mangitou matana'a su ahewallu runia. Ete i Tou lai apan nanantunna ro'en paarorone, tingngera wuṛṛu suapa i mangitou wotongnge mabbiakka.

²⁷Ruata na'ola'a udde tadea'u i mangitou maddea'a si Tou. Antimanna i mangitou maasomba si Tou su tempo i mangitou maddea'a si Tou. Arawe suṛṛinone Ruata tawe marau wuassi ite sangkatou-sangkatou.

²⁸Ere lai su wisaran taumata, ‘I ite wiakka wuṛṛu u'al᷊ore wuṛṛu uatana'a su runia indi ana waugu taṛṛinon Tou.’ Ere lai iwabal᷊o manga taṛṛa sasanato'i yamiu, i mangitou mabbisara, ‘Ete i ite sarangkanambone udde al᷊aṛṛanang-Nge.’

²⁹Ne, ana waugu ete i ite udde al᷊aṛṛana'u Ruata, i ite tawe wotongnge massunna manungku Ruata udde naal᷊ihida ere paal᷊uanna apan niola'a wuassu wul᷊awanna ara'e sal᷊a'a ara'e watu apan niola'a tumuṛṛuttu apanden taumata.

³⁰Tempon awawodong kite suete tinimbul᷊ianannu Ruata, arawe orassa indi i Tou nandolokku taumata su ahewallu runia tadea'u mawal᷊u wuassu manga rosa mangitou.

³¹Ana waugu i Tou suete nanantunnu sambau tempo ipamarikissa ahewallu runia indi ringannu atatul᷊idda. Manara udde sarun olaannu sangkatou apan suete nipilen Ruata su ipa'ola'a manara udde. Wuṛṛu tadea'u anambon taumata ma'asunna olangnge udde, Ruata suete napaawiakku taumata apia udde wuassu papate!”

³²Napawe manga taumata udde naaringikka hatto mabbiakka apia wuassu papate, su wallatti mangitou piaddu nilumagem Paulus. Piaddu nabbisara, “I yami maapulu madaringikka tuṛṛangnga mabbisara apia su ola'u hatto indi.”

³³See i Paulus nanantangngu ammul᷊anna udde.

³⁴Arawe piaddu lai su wallatti mangitou mannamba'a si Paulus wuṛṛu mangngimanna Mawu Yesus, eteudde: i Dionisius wuassu mammamanaran Areopagus, wuṛṛu sangkatou wawine aranne i Damaris, wuṛṛu pirang katou lai.