Read Talaud WATTI'U MANGA RASUL 18 Bible Online

WATTI'U MANGA RASUL 18 - Talaud bible

WATTI'U MANGA RASUL 18

¹Wua'udde i Paulus nanantangken Atena wuṛṛu inaite watukku Korintus.

²Isudde i tou nassomban sangkatou Yahudi aranne i Akwila, darantane wuassu leta'u Pontus. I Akwila wakkute nirumanta wuassu Italia ringannu awingnge Priskila. I mangitou nirumanta su Korintus ana waugu i Kaisar Klaudius suete nandolokku anambon taumatan Yahudi iapaasal᷊iu wuassu Roma. Ne i Paulus inaite nattembo sitarua,

³see natana'a isudde ringanni tarua wuṛṛu mammanara suadio'a ringanni tarua, ana waugu manaran tarua uasul᷊ungngi Paulus, eteudde ma'ola'a rasanna.

⁴Arawe suapan allon Sabatta, i Paulus inaite uahahatto su wal᷊em pattataṛṛamawuanna tadea'u manga taumatan Yahudi aroddi lai manga taumatan Yunani mangngimanna Mawu Yesus.

⁵Napawe i Silas wuṛṛu i Timotius naranta wuassu Makedonia, i Paulus nappaattu anambon allone mammasingkattu Watti'a wuassu Ruata su manga taumatan Yahudi manungku Mawu Yesus udde Ratum Punnu Sal᷊amatta apan suete pina'iren Ruata.

⁶Arawe ana waugu manga taumata sidutu mannompolla wuṛṛu mangngal᷊uandaga si tou, ne i Paulus nangesogen awu wuassu laungnge, maola'a sambau pananaunganna si mangitou su pasasal᷊a mangitou. I tou nabbisara, “Amungkangngu i yamiu nasilaka, sal᷊anu sassane! I ya'u waggate! Manattakka orassa indi ya'u inaite ringannu manga taumata apan wal᷊ine Yahudi.”

⁷See i Paulus nanantangke mangitou wuṛṛu inaite natana'a su wal᷊e su samba'a wal᷊em pattataṛṛamawuanna udde. Wal᷊e udde wal᷊en sangkatou apan wal᷊ine Yahudi, arawe i tou massubba Ruata. Arannu taumata udde i Titius Yustus.

⁸Arawe i Krispus, tembonannu wal᷊em pattataṛṛamawuanna udde wuṛṛu manga lal᷊oṛṛon wal᷊ene nangngimante Mawu Yesus. Wuṛṛu manambo lai manga taumatan Korintus waine naaringikka watti'a apan niapaasingkatti Paulus, nangngimante Mawu Yesus see nissaṛṛani.

⁹Su sambau ṛabbi sulal᷊ummu sambau sondappa, Mawu nabbisara si Paulus, “Imbaṛṛangnga matta'utta! Sidutu pangngaṛṛa'a wuṛṛu arie pangillol᷊o.

¹⁰Ana waugu i Ya'u uaṛṛundinganna si'o. Tawe saran sangkatou apan mandal᷊eo si'o ana waugu manambo taumata su soa indi taumata-U.”

¹¹Ana waugu udde i Paulus natana'a su Korintus santonna annumu wul᷊anna al᷊annune wuṛṛu mangngaṛṛa'u wisaran Ruata si mangitou.

¹²Napawe i Galio naola'a gubernuren Akhaya, manga taumatan Yahudi na'ammulla mannal᷊are si Paulus wuṛṛu mangapiddi tou watukku mallaṛṛuungnga.

¹³I mangitou nangapiddu alae indi, “Taumata indi mammono'a awada'alla, tadea'u massubba Ruata ringannu saṛṛene uapapaṛṛalan Tita Musa!”

¹⁴Aroddi i Paulus sinumimbakka, i Galio nabbisarate rorone su manga taumatan Yahudi, “Ei, manga taumatan Yahudi! Amungkangngu ia'alaenu indi sambau pasasal᷊a ara'e sambau al᷊al᷊eo, i ya'u ṛinone manabaren alaenu indi.

¹⁵Arawe indi sambau patatatiakka su ola'u manga wisara wuṛṛu manga aranna see manga titanu sassane! Nariaddi yamiu ṛinone manginsue hatto indi. I ya'u maddiri mamarikissa hatto ereudde!”

¹⁶See i Galio nallimbuakka si mangitou watukku liudde.

¹⁷Ne i mangitou nanametta si Sostenes, tembonannu wal᷊em pattataṛṛamawuanna udde, wuṛṛu namuulla si tou su saruannu meddam pamamarikisanna. Arawe Galio ma'ielem wagga su ola'u hatto udde.

¹⁸Wua'udde i Paulus ta'e natana'a mal᷊annu su Korintus. Wua'udde i tou nabbisarate addattu patatal᷊ei su manga taumata apan mangngimanna isudde, see i tou nassenggotte ringanni Priskila wuṛṛu i Akwila watukku Siria. Su Kengkrea, i Paulus namol᷊o utangnge apan niwalan tou mal᷊o'engnga ana waugu riandine su Mawu.

¹⁹Napawe na'omate su Efesus, i Paulus nanantangngi Priskila wuṛṛu Akwila, see sinumutta su wal᷊em pattataṛṛamawuanna wuṛṛu uaraṛṛingida su sambau ringannu manga taumatan Yahudi isudde.

²⁰I mangitou nadorongnga tadea'u i tou matana'a mal᷊annu ringanni mangitou arawe i tou maddiri.

²¹Salaiwe aroddi, su tempo inaite, i tou nabbisara, “Amungkangngu Ruata mamala, i ya'u sarun mabelengnga apia isindi.” Nasue nabbisara aroddi, i tou inumamatte nanantangngu Efesus.

²²Napawe sinumossokke su Kaisarea, i tou inaite watukku Yerusalem mattabea manga jamaatta isudde, see nanassukku amatanne watukku Antiokhia.

²³Napawe natana'a isudde pira allo al᷊annune, i tou inaite inumamatta lai nattembo leta'u Galatia wuṛṛu Frigia inai manohassa pangangimannu taumata apan mangngimanna.

²⁴Tantal᷊anna udde, nirumantate su Efesus sangkatou Yahudi wuassu Aleksandria, aranne i Apolos. I tou pande massinaukka wuṛṛu masingkattu lal᷊oṛṛon Wuke Susi,

²⁵see suete lai niaṛṛaanna manaṛṛassida al᷊aṛṛa'u Mawu Yesus. Ne ringannu apulu apan wahewalla i tou mangngaṛṛa'a ringannu ma'uddupa su ola'u Mawu Yesus, salaiwe wakkute sasaṛṛanin Yohanes niasingkatanne.

²⁶Ringannu waṛṛani i Apolos nanattakke massinaukka su wal᷊em pattataṛṛamawuanna wuṛṛu su tempo i Priskila wuṛṛu i Akwila naaringikka al᷊aṛṛangnge, i mangitou nangapiddi tou su wal᷊e. Poiaroddi i mangitou mannal᷊a'a ringannu mapia si tou su ola'u pandumannu Ruata manal᷊amatta taumata sulal᷊ummu Mawu Yesus.

²⁷Wua'udde i Apolos pia pandumma inai su Akhaya. Ne manga taumata apan mangngimanna Mawu Yesus su Efesus namoṛṛetu suratta su manga tuṛṛangnga apan mangngimanna su Akhaya tadea'u i mangitou wotongnge manarimmatti Apolos. Wuṛṛu su tempo i Apolos na'omate su Akhaya, sasumbalane mangke mahuna su manga taumata apan ana waugu al᷊amattu Ruata nangngimante Mawu Yesus.

²⁸Ana waugu ringannu masaṛṛaungnga, i Apolos napaal᷊annabu manga taumatan Yahudi sulal᷊ummu patatatiakka su saruannu awada'alla. Wuṛṛu i tou nattiala ringannu tatiala Wuke Susi manungku tumba'u Mawu Yesus Ratum Punnu Sal᷊amatta apan suete pina'ire.