Read Talaud WATTI'U MANGA RASUL 19 Bible Online

WATTI'U MANGA RASUL 19 - Talaud bible

WATTI'U MANGA RASUL 19

¹Tantal᷊anna Apolos su Korintus, Paulus tantal᷊anna u'amatta su ul᷊un wanua udde, see na'omate su Efesus. Poiaroddi i tou nassomba manga pira taumata apan suete nangngimanna Mawu Yesus.

²I tou naiwal᷊o si mangitou, “Manga tuṛṛangnga suete naasengkamma Ghaṛṛahon Ruata, su tempo i yamiu nangngimanna Mawu Yesus?” I mangitou sinumimbakka, “Taambe, Ewe'e i yami taambe naaringikka manungku pia Ghaṛṛahon Ruata.”

³“Amungkangngu aroddi, ringannu sasaṛṛanin sai yamiu nissaṛṛani?” aiwal᷊om Paulus. “Ringannu sasaṛṛanin Yohanes,” sasimbakki mangitou.

⁴See i Paulus nabbisara, “i Yohanes mannaṛṛani taumata tadea'u mapaal᷊iatta'a manungku manga taumata udde nawal᷊ute wuassu manga rosa mangitou. Arawe tantal᷊anna udde lai i Yohanes mammasingkatta su manga taumatan Israel manungku ṛinone i mangitou mangngimanna taumata apan rumanta manal᷊immuri wuassi tou, eteudde Mawu Yesus.”

⁵Napawe i mangitou naaringikka udde, i mangitou nissaṛṛanite ringannu arannu Mawu Yesus.

⁶Wuṛṛu su tempo i Paulus nangadon lima si mangitou, Ghaṛṛahon Ruata nangintaṛṛo si mangitou, see i mangitou mannattakke uahahatto sulal᷊ummu al᷊awo'u wisara apan maatiangnga lapiddu mammasingkattu watti'u Ruata.

⁷Reenganni mangitou sarangkanambone iraṛṛangngo sire mapul᷊o dua su atoune.

⁸Tallu wul᷊anna al᷊annune, i Paulus sidutu mabbisara ringannu waṛṛani su manga taumata su wal᷊em pattataṛṛamawuanna wuṛṛu uasasimbakki mangitou tadea'u i mangitou mangngimanna su ola'u ereapa Ruata mamarenta ere sangkatou Ratu.

⁹Arawe su wallattu manga taumata udde pia sire pira apan puane maattika wuṛṛu maddiri mangngimanna. Su saruannu awada'alla apan uasemodda isudde i mangitou mapaasal᷊an al᷊aṛṛa'a su ola'u Ruata manal᷊amatta taumata sulal᷊ummu Mawu Yesus. Ana waugu udde i Paulus nanantangngi mangitou, see inaite ringannu manga mallal᷊aṛṛenggennu Mawu Yesus su tampam pananantiroannu Tiranus. Isudde miallo-miallo i tou uaaiwal᷊o manga taumata.

¹⁰I tou sidutu ma'ola'a inolaanna udde rua tonna al᷊annune na'oman sara anambon taumata wuassu walahanna waine, sarangkanambone nadaringikka wisara Mawu.

¹¹Ruata na'ola'a manga al᷊aṛṛindu'a apan bahewalla si Paulus.

¹²Amungkangngu leso, ara'e wawa'issa lawassa apan suete nipaatti Paulus iapidda su manga taumata marada'a, rada'i mangitou mawul᷊i wuṛṛu ghaṛṛahon setanna lai sumabangnga wuassi mangitou.

¹³Pia sire pira tonaassu Yahudi apan u'aamatta su al᷊awo'u tampa, mallimbuakka ghaṛṛaho lal᷊eo wuassu manga taumata. Manga tonaassa udde ma'annama lai mappaattu arannu Mawu Yesus ipallimbuakka manga ghaṛṛahon setanna udde. I mangitou mabbisara su manga ghaṛṛahon setanna udde, “Ringannu arannu Mawu Yesus apan iwabatti'i Paulus udde, i ya'u mallimbuakka si yamiu!”

¹⁴Pia sire pitu al᷊aṛṛana'a esakka ana'u sangkatou imam tembonanne, aranne i Skewa, pia inolaanne ereudde.

¹⁵Arawe ghaṛṛahon setanna udde nabbisara si mangitou, “I ya'u masingkattu Mawu Yesus wuṛṛu i Paulus asingkatangku lai, arawe i yamiu indi isai?”

¹⁶See taumata apan niasuttannu setanna udde sinumolo'a wuṛṛu tinumambo si mangitou ringannu maṛṛagissa, na'oman sara i mangitou tinumal᷊angnga wuassu wal᷊e udde nal᷊al᷊essa wuṛṛu natantol᷊e, ana waugu laubbi mangitou nihesa'a wuassu wadangngi mangitou.

¹⁷Anambon taumatan Yahudi wuṛṛu walahanna waine apan uatana'a su Efesus naaringikka arariadianna udde, see i mangitou nata'utte. Ne arannu Mawu Yesus mangke raddaloanna.

¹⁸Manga taumata apan nangngimante Mawu Yesus, nirumanta mangnga'u su tangngan awadaalla manga inolaanni mangitou su tempo nangkal᷊iu.

¹⁹Wuṛṛu i mangitou apan ninumarampe mappaattu laṛṛopa, nangammullu manga wuke mangitou wuṛṛu tinutungnga su saruannu awadaalla. Aregga manga wuke udde amungkangngu ireengnga sarangkanambone, iraṛṛangngo limam pul᷊o su ṛiwune roitta sal᷊a'a.

²⁰Ete aroddi, ringannu saṛṛene apan wahewalla udde wisara Mawu mangke inasingkatanna wuṛṛu a'atambanna taumata apan mangngimanna.

²¹Wuassu arariadianna udde, i Paulus naṛṛawessa inaite watukku Makedonia wuṛṛu Akhaya, see masal᷊ate watukku Yerusalem. “Wua'isudde,” unni Paulus, “i ya'u inaite watukku Roma apia.”

²²Ne i tou nandolokku ruang katou wuassu mallal᷊al᷊imane eteudde i Timotius wuṛṛu i Erastus inai watukku Makedonia, wuṛṛu i tou matana'a manga pira tempo al᷊annune su leta'u Asia.

²³Iraṛṛangngo ete su tempo udde lai nariaddi patatatiakka apan wahewa su Efesus ana waugu su ola'u al᷊aṛṛa'u Mawu Yesus.

²⁴Ana waugu su soa udde pia sangkatou taṛṛa ola'a sarannapa wuassu sal᷊a'a aranne i Demetrius, apan ma'ola'a manga wal᷊e monganna Monganni Artemis. Manaran taumata udde mandantan auntunganna apan bahewa su manga mammamanarane.

²⁵Ana waugu udde i tou nangammullu manga mammamanarane su sampunna ringannu mamanara taṛṛa ola'a sal᷊a'a waine, see nabbisara, “Manga tuṛṛangnga! Tuṛṛangnga masingkatta manungku i ite naasomba auntunganna wuassu manara indi.

²⁶Orassa indi manga tuṛṛangnga naasilote wuṛṛu naaringikke sassane apa apan niola'i Paulus udde. I tou nabbisara manungku manga monganna apan niola'u taumata, wal᷊inewe monganna atonna. Wuṛṛu i tou namohete manambo taumata mangngimanna al᷊aṛṛangnge, wal᷊ine tumba'u isindi su Efesus, ewe'e maranin su ahewallu leta'u Asia.

²⁷Ma'ata'utta manungku manarang kite indi sarun maasomba aranna lal᷊eo. Wuṛṛu wal᷊ine tumba'u udde, ewe'e wal᷊en Monganni Artemis lai sarun tawe saileanna see al᷊aṛṛangnge mangke laṛṛindanna; sumbal᷊i i tou monganna apan sassubbannu anambon taumata su leta'u Asia wuṛṛu su ahewallu runia!”

²⁸Aroddi manga taumata udde naaringikka udde, naungngi mangitou nal᷊al᷊eo, see i mangitou u'ui, “Wiakke Artemis, mongannu taumatan Efesus!”

²⁹Ne patatatiakka udde nilumewesse su ahewallu soa. Wua'udde ammul᷊annu al᷊iba'ukka udde nanamette si Gayus wuṛṛu si Aristarkus, eteudde manga taumata Makedonia apan uaammungnga si Paulus sulal᷊ummu amatanne, see namol᷊engnga si mangitou su wal᷊em pananalanganna su soa udde.

³⁰I Paulus ma'apulu sumutta tumantalongnga si mangitou, arawe manga taumata apan mangngimanna Mawu Yesus naningaddi tou.

³¹Manga pira tembonannu leta'u Asia udde, apan uahahawem Paulus, nandolokku taumata namasingkatta si Paulus tadea'u i tou tawe mattingkapasilo su tampa udde.

³²Tantal᷊anna udde manga taumata apan uaammulla su wal᷊em pananalanganna udde nassongkaka. Piaddu u'ui arendi, piaddu lai u'ui aroddi, ana waugu manambo wuassi mangitou wagga pandumanne ma'ammula isudde.

³³Sambageanganna wuassu manga taumata udde massunna manungku i Aleksander maṛṛaṛṛingidde, ana waugu ete i tou sinuṛṛudu manga taumatan Yahudi su saruanne. Ne i Aleksander namatten limane madorongnga onggol᷊annu tempo i tou sumimbakka su saruannu manga taumata udde.

³⁴Arawe aroddi i mangitou naasilo manungku i tou taumatan Yahudi, sangkarindo'a i mangitou inumui ma'ikka-ikkatta, “Wiakka Monganni Artemis, mongannu taumatan Efesus!”

³⁵Panginsueanne mamamoṛṛetu soa udde napaal᷊annabu awada'alla udde. I tou nabbisara, “Tumana'u Efesus! Al᷊awo'u taumata masingkatta manungku ete su Efesus soa apan mammadul᷊i wal᷊en Monganna Artemis wuṛṛu watu susi apan nanawo wuassu langitta.

³⁶Tawe saran sangkatou wotongnge maal᷊awangnga olangnge udde. Ana waugu udde paal᷊annabe, wuṛṛu arie ma'ola'a sambau manara ringannu tawe maṛṛingidda asuene.

³⁷Manga taumata indi suete niapiddi yamiu isindi, wal᷊ine ana waugu i mangitou suete nangaṛṛo wal᷊en monganna ara'e ana waugu i mangitou suete nangadio'a monganni ite.

³⁸Amungkangngu i Demetrius wuṛṛu manga mammamanarane udde pia alaene su ola'u su sangkatou taumata, wala'e i mangitou mangapiddu hattone udde su mallaṛṛuungnga. Mallaṛṛuungnga manengkamma al᷊awo'u hatto udde wuṛṛu manga piaṛṛa'u pamarenta lai sidutu isudde.

³⁹Arawe amungkangngu ta'e pia lai waine apan ipa'apulung kamiu, udde ṛinone insueanna sulal᷊ummu ammulu awada'alla apan matohassa.

⁴⁰Ana waugu arariadianna allo indi wotongnge maal᷊al᷊eo si ite. I ite wotongnge ansil᷊anna na'ola'a pagahahio, ana waugu i ite tawe sambau pinangiananne mapaaṛṛinon patatatiakka indi.”

⁴¹Napawe suete nabbisaran sarangkanambone udde, mamamoṛṛettu soa udde nandolokken taumata nambo udde niapaapul᷊e.