Read Talaud WATTI'U MANGA RASUL 2 Bible Online

WATTI'U MANGA RASUL 2 - Talaud bible

WATTI'U MANGA RASUL 2

¹Napawe nia'omante allom Pentakosta, anambon taumata apan mangngimanna na'ammulla su sambau tampa.

²Inaṛṛombanganne niaringiṛṛanna tingikka wuassu langitta naal᷊ihida anginna ma'ikkatta. Wal᷊e aianannu manga taumata udde mangke napenen tingikka.

³See i mangitou naasilo manga lila ere ṛenggammu putungnga mangngeekka su al᷊awo'u tampa wuṛṛu inumarunna si mangitou sangkatou-sangkatou.

⁴I mangitou sarangkanambone naasomba taṛṛinon Ghaṛṛahon Ruata, wuṛṛu nanattakke mabbisara sulal᷊ummu al᷊awo'u manga wisara waine. I mangitou mabbisara tumuṛṛuttu apa apan ia'onggolu Ghaṛṛaho udde si mangitou iapawisara.

⁵Su tempo udde manambo taumatan Yahudi, wuṛṛu wuassu al᷊awo'u wanua su ahewallu runia, natana'a su Yerusalem. I mangitou udde taumata matuṛṛutta Ruata.

⁶Napawe naaringikka tingikka udde, manambo taumata naṛṛimpulunna. I mangitou sarangkanambone niṛṛumindu'a naaringikka manga taumata mangngimanna udde maggahatto sulal᷊ummu wisara mangitou sambau-sambau.

⁷Ringannu naherangnga wuṛṛu inagukke i mangitou nabbisara, “Manga taumata apan mabbisara indi sarangkanambone wal᷊inewe taumatan Galilea?

⁸Ereapa arariaddine na'oman sara i ite naaringikka i mangitou mabbisara sulal᷊ummu wisara wanuang kite sambau-sambau?

⁹I ite manga taumata wuassu Partia, Media, Elam; wuassu Mesopotamia, Yudea wuṛṛu Kapadokia; wuassu Pontus wuṛṛu Asia,

¹⁰wuassu Frigia wuṛṛu Pamfilia, wuassu Mesir wuṛṛu manga leta'u Libia maranin Kirene; piaddu wuassi ite lai apan nirumanta wuassu Roma,

¹¹pia manga taumatan Yahudi wuṛṛu pia lai manga taumatam walahanna waine apan suete sinumutta agaman Yahudi; pia lai nirumanta wuassu Kreta wuṛṛu Arab. I ite sarangkanambone maaringikka i mangitou mabbisara sulal᷊ummu wisarang kite sambau-sambau su ola'u hatto apan ma'aherangnga apan niola'u Ruata!”

¹²Ringannu naherangnga wuṛṛu niagukke i mangitou sarangkanambone uaaiwal᷊o sangkatou ringannu waine, “Apa atapasanne indi?”

¹³Arawe piaddu lai manga taumata mangngal᷊uandaga. I mangitou nabbisara, “Ei, manga taumata udde wu'anna!”

¹⁴See i Petrus dirumarisikka suadio'a ringannu sire mapul᷊o assa rasul waine, wua'udde nabbisara su taumata nambo udde. Ringannu tingikka ma'ikkatta i tou nabbisara, “Manga tuṛṛangnga, manga taumatan Yahudi wuṛṛu sarangkanambone apan uatana'a su Yerusalem! Padaringikka paapia-pia, ana waugu olangnge indi ta'u ital᷊a'a si yamiu ringannu masema-semakka.

¹⁵Manga taumata indi wal᷊ine wu'anna, ere su sunnang kamiu; ana waugu orassa indi wakku puulla sio rua'allo.

¹⁶Arawe indi suete niapa'asingkattu Ruata si Nabi Yoël:

¹⁷Ruata nabbisara, ‘Su panginsueannu runia I Ya'u sarun mangonggolu Ghaṛṛaho-U su anambon taumata. Al᷊aṛṛanangngu esakka wuṛṛu al᷊aṛṛanangngu wawine sarun mamasingkatta si yamiu manga inolaanna apan Ta'u ipaasingkatta si mangitou. Manga dario'a sarun maasilo inolaanna apan Ta'u iapasilo si mangitou. Manga taumata timmaddenu sarun mabal᷊iawa su ola'u wal᷊iawa apan Ta'u ionggolla si mangitou.

¹⁸Su manga allang-Ku lai — mawae esakka ara'e wawine — , sarun onggol᷊annu Ghaṛṛaho-U su allo udde. I mangitou sarun mamasingkattu inolaanna apan Ta'u iapaasingkatta si mangitou.

¹⁹I Ya'u sarun ma'ola'a manga al᷊aṛṛindu'a roso su langitta, wuṛṛu inolaanna apan wahewalla su runia; sarun pia ṛaṛṛa wuṛṛu putungnga, sawudda wuṛṛu timbulla.

²⁰Matannallo sarun maddandumma, wul᷊anna mabbal᷊i maṛṛamu ere ṛaṛṛa tantal᷊anna Allo Mawu, Allo apan bahewa wuṛṛu Allo apan mawantuga udde rumanta.

²¹Su tempo udde taumata apan mailal᷊are su Mawu sarun masal᷊amatta.’

²²Manga tuṛṛangnga taumatan Israel! Padaringikka wisara'u indi: Mawu Yesus taumata Nazaret udde suete nionggol᷊annu Ruata manara hunang kamiu. Udde natualaga su manga al᷊aṛṛindu'a wuṛṛu inolaanna apan wahewalla apan niola'u Ruata su pattangngani yamiu sulal᷊ummu Mawu Yesus udde. Sarangkanambone udde tuṛṛangnga sassane masingkatta.

²³Ere su ṛingiṛṛan-Ne sassane, Ruata naṛṛawessa, i Tou manantillu Mawu Yesus si yamiu. Wuṛṛu su tempo i Tou tinantilla, i yamiu namate si Tou ringannu namala manga taumata lal᷊eo nangarussan Tou.

²⁴Arawe Ruata napaawiakki Tou apia wuassu wallattu manga taumata nate. I Tou niallupu papate, arawe Ruata napaal᷊iun Tou, ana waugu tawe ṛinone i Tou sidutu aagasannu papate.

²⁵Su ola'u Mawu Yesus indi i Daud suete nabbisara, ‘I Ya'u sidutu ua'ellega Mawu su saruangku; I Tou uaammungnga si ya'u, tadea'u ya'u tawe awono'anna.

²⁶Ana waugu udde naungku mangke lulluassa, moṛṛongku mangke maddalo: wuṛṛu wadangku indi sarun mallaṛṛado ringannu matammuda sulal᷊ummu lal᷊abinganna.

²⁷Ana waugu I'o tawe namala ṛimuu'u matantangnga su runian taumata nate. I'o tawe mamalan allang-Ngu apan matuṛṛutta indi maṛṛimunsa'a wuṛṛu masue.

²⁸I'o suete namantingidu lal᷊anna si ya'u ipatuddan wiakka apan tutune. Al᷊al᷊uassa sia'u ete niapangillembo ana waugu I'o sidutu uatantalongnga si ya'u.’

²⁹Manga tuṛṛangnga, i ya'u madorongnga mabbisara ringannu masemakka su ola'i Daud, iamangngu al᷊amonang kite udde. I tou nate wuṛṛu suete nilabingnga lai; lal᷊abinganne ta'e udde saran orassa indi.

³⁰Ruata suete na'ire si Daud, ringannu sasalu, manungku sangkatou wuassu wallattu papapulunne sarun itenegu Ruata maola'a ratu. Ana waugu Daud masingkattu paaire udde wuṛṛu ana waugu i tou lai sangkatou nabi,

³¹i tou masingkatta lai apa apan sarun olaannu Ruata. Nariaddi i tou suete namasingkatta manungku Ratum Punnu Sal᷊amatta apan pina'ire Ruata, sarun mabbiakka apia wuassu papate. Daud nabbisara, ‘I tou tawe iwala matantangnga sulal᷊ummu runian taumata nate; wadang-Nge tawe maṛṛimunsa'a wuṛṛu masue.’

³²Ete Mawu Yesus udde apan niapaawiakku Ruata apia wuassu papate. Iami sarangkanambone suete naasilo sassane olangnge udde.

³³I Tou nitenega su aiananna apan matanggakka wuṛṛu nionggol᷊annu Ruata taṛṛino, see nanengkamma Ghaṛṛaho Ruata apan suete pina'iren Iamangnga. Wuṛṛu apan niaringiṛṛanna wuṛṛu aellehanni yamiu orassa indi eteudde Ghaṛṛaho apan suete nionggolla si yami.

³⁴I Daud sassane tawe nasengkengnga watukku surga, arawe i Daud nabbisara, ‘Mawu nabbisara su Mawu-U:

³⁵A'iante su samba'an uanang-Ku, ma'oman sara i Ya'u ma'ola'a manga seennu massuṛṛubawa Si'o!’

³⁶Ana waugu udde anambon taumatan Israel ṛinone maasingkatta atonna-tonna manungku Mawu Yesus apan niarussang kamiu udde, eteudde Mawu Yesus apan nitenegu Ruata maola'a Mawu wuṛṛu Ratum Punnu Sal᷊amatta!”

³⁷Napawe manga taumata udde naaringikka olangnge udde, naungngi mangitou u'ambul᷊isada. See i mangitou naiwal᷊o si Petrus wuṛṛu manga rasul apan baine, “Manga tuṛṛangnga apa ṛinone olaanni yami?”

³⁸I Petrus sinumimbakka, “Awal᷊ute wuassu manga rosanu. Wuṛṛu i yamiu sambau-sambau ṛinone saṛṛanianna su arannu Mawu Yesus Kristus, tadea'u manga rosanu ampunganna. Ne manga tuṛṛangnga sarun manengkamma Ghaṛṛahon Ruata wuassu Ruata.

³⁹Ana waugu pa'airen Ruata udde maola'a wageangngu wuṛṛu papapulunnu see manga taumata apan uatana'a su tampa apan marau — eteudde anambon taumata apan niwagoannu Ruata rumanta ringanni Tou.”

⁴⁰Ete aroddi i Petrus mannal᷊a'a si mangitou. Wuṛṛu ringannu wisara apan manambo waine lai i tou nandolokki mangitou tadea'u i mangitou mapaal᷊iun watanganne wuassu walahanna apan dal᷊eo indi apan sarun iṛṛuumannu Ruata.

⁴¹Manambo taumata mangngimanna watti'i Petrus, see i mangitou naisaṛṛanite. Ne reengannu taumata mangngimanna su allo udde niatambanna lai tallu ṛiwu su atoune.

⁴²Ringannu maṛṛimada i mangitou sidutu mangngurumma al᷊aṛṛa'a wuassu manga rasul wuṛṛu sidutu uaammulla suadio'a. I mangitou u'anna su sambau wuṛṛu u'al᷊iomanna su sampunna.

⁴³Manambo atonna al᷊aṛṛindu'a apan maarindu'a apan niola'u manga rasul udde na'oman sara manambo taumata naherangnga wuṛṛu nata'utta.

⁴⁴Manga taumata apan mangngimanna udde sarangkanambone sidutu uaaukka wuṛṛu apa apan tatahuannani mangitou ipappaatti mangitou suadio'a.

⁴⁵I mangitou nabal᷊u'u manga sarannapa wuṛṛu pussa'a mangitou, see tinahia roinne si mangitou sarangkanambone tumuṛṛuttu hausannu sangkatou-sangkatou.

⁴⁶Miallo-miallo i mangitou sidutu uaammulla su Wal᷊e Mawu; lapiddu u'anna suadio'a, ringannu lulluassa wuṛṛu masaṛṛionto'a su manga wal᷊e mangitou.

⁴⁷I mangitou sidutu madalo Ruata wuṛṛu ipaapulun taumata nambo. Miallo-miallo reenganni mangitou aatambanna ana waugu Mawu nangonggolu manga taumata apan tantal᷊anna sassal᷊amattanna.