Read Talaud WATTI'U MANGA RASUL 20 Bible Online

WATTI'U MANGA RASUL 20 - Talaud bible

WATTI'U MANGA RASUL 20

¹Napawe patatatiakka su Efesus nallannabe, i Paulus nangammullu jamaatta wuṛṛu nangonggolu sasasa si mangitou. Wua'udde i tou nabal᷊ote wisaran patatal᷊ei, see nanassukku amatanne watukku Makedonia.

²I tou nattembo manga jamaatta su wageangngu leta'u Makedonia wuṛṛu i tou manambo mangagilu tatantiro su manga taumata apan mangngimanna Mawu Yesus poiaroddi wuṛṛu mangngonggolu sasasa si mangitou. Wua'udde i tou inaite watukku Yunani.

³Tallu wul᷊anna al᷊annune i tou uatana'a poiaroddi. See napawe i tou uasasaddiate massenggote watukku Siria, pia batti'a manungku manga taumatan Yahudi tantal᷊anna ma'ire mamate si tou. Ana waugu udde i tou naṛṛawessa mabelengnga malliu Makedonia.

⁴I Sopater ana'i Pirus wuassu Berea, inai suadio'a ringanni tou; aroddi lai i Aristarkus wuṛṛu i Sekundus taumatan Tesalonika, wuṛṛu i Gayus taumatan Derbe. Wuṛṛu lai Timotius, Tikhikus wuṛṛu i Trofimus manga taumata wuassu leta'u Asia.

⁵I mangitou nalliu ṛoro si yami see naṛṛado su Troas.

⁶Napawe Ramean Roti Tawe Ragine, nal᷊iudde, yami nassenggotte nanantangngu Filipi. Lima allo wua'udde yami na'ammulle apia ringanni mangitou su Troas. Poiaroddi yami natana'a sangkamisa.

⁷Ṛabbing kallo misa i yami na'ammulla umanna suadio'a naola'a ere sangkatuṛṛanganna. I Paulus uahahatto manga taumata, ana tiṛṛabbine i tou maṛṛingidda inaite umamatta. Na'oman sara alloarane i Paulus uahahatto.

⁸Sulal᷊ummu wabbo'a su ṛengkenne al᷊iu rosone, su tampa nipaammul᷊anni yami udde, pia manambo sol᷊o.

⁹Sangkatou umbasanna aranne i Eutikhus uaianna su sungketta. Ana waugu i Paulus tate mangillol᷊o maggahatto, umbasanna udde niamatiil᷊ante atonna, na'oman sara i tou niamatiilanna su sungketta udde, see nanawo wuassu ṛengkenne atallune. Su tempo i mangitou nanal᷊uru si tou, i tou natete.

¹⁰Arawe i Paulus sinumossokka, see nattingkaṛṛa'a su awa'u taumata udde wuṛṛu naṛṛa'uppa si tou. I Paulus nabbisara, “Arie paassinggawangnga, i tou ta'e wiakka!”

¹¹Wua'udde i Paulus nirumanganna apia su ṛengkenne al᷊iu rosone, see nattahia roti wuṛṛu inumante su adio'a. Napawe mal᷊annute uahahatto manga taumata na'oman sara rua'allo, i Paulus inaite inumamatta.

¹²Manga taumata nangapiddu umbasanna udde napul᷊e watukku wal᷊ene ringannu ta'e wiakka. I mangitou naapendamma al᷊al᷊uassa wuṛṛu naungnga mangke natuno.

¹³I yami nassenggotte nalliu ṛoro sinuma'e apalla wuṛṛu nabatukku Asos, ana mangotongnga si Paulus isudde. I tou suete nangatokka aroddi, ana waugu i tou inumamattu ammaranne watukku Asos.

¹⁴Napawe nassombate su Asos, i Paulus nasasaṛṛawutta sinuma'e su apalla see i yami nassenggotte watukku Metilene.

¹⁵Wua'poiaroddi yami nassenggotte apia, wuṛṛu tiṛṛabbine na'omate su tampa apan uasaruanna Khios. Tillorege i yami na'omate su Samos wuṛṛu massallo wua'udde su Miletus.

¹⁶I Paulus suete nangatokka manungku tate umotongnga su Efesus, tadea'u allo tawe maramme su leta'u Asia. Wuṛṛu amungkangngu wotongnge i tou ma'apulu mal᷊iha-l᷊ihakka ma'omate su Yerusalem su Allo Wahewam Pentakosta.

¹⁷Wuassu Miletus i Paulus napaapiddu watti'a watukku Efesus, madorongnga manga piaṛṛa'u jamaatta su Efesus rumanta maisasomban tou.

¹⁸Napawe i mangitou na'omate, i Paulus nabbisara si mangitou, “Manga tuṛṛangnga masingkatta ereapa i ya'u mabbiakka al᷊annune indi su wallatti yamiu ro'en allo paarorone ya'u na'oma su Asia.

¹⁹Ringannu awawawon dal᷊ummu naungnga wuṛṛu ringannu allo mata, i ya'u mammanara manara Mawu su pattangngannu asasusa apan niapendamangku ana waugu pandumma lal᷊eo wuassu taumatan Yahudi.

²⁰Tuṛṛangnga masingkatta manungku i ya'u tawe illol᷊one mammasingkatta si yamiu apa apan mahuna si yamiu. I ya'u mangngaṛṛa'a si yamiu su tampa pasasombannu awadaalla wuṛṛu su manga wal᷊e.

²¹Mapia udde su manga taumatan Yahudi aroddi lai su manga walahanna waine i ya'u sidutu mannanata tadea'u i mangitou mawal᷊u wuassu manga rosa mangitou wuṛṛu rumanta ringannu Ruata, see lai mangngimanna Mawu Yesus.

²²Orassa indi tadea'u maatuṛṛutta parenta Ghaṛṛahon Ruata, i ya'u inaite watukku Yerusalem. Wuṛṛu ya'u waggate apa apan sarun mariaddi si ya'u poiaroddi.

²³I ya'u tumba'u masingkatta manungku su al᷊awo'u soa, Ghaṛṛahon Ruata ringannu atonna mamasingkatta si ya'u manungku i ya'u sarun itaṛṛo su tuttupanna wuṛṛu sarun matataṛṛangnga.

²⁴Arawe i ya'u ma'ielem bagga ringannu wia'u indi, sambal᷊iate i ya'u napanginsue manara apan tinantillu Mawu Yesus si ya'u wuṛṛu sambal᷊iate i ya'u maatuṛṛutta na'oman sara pangudusannu wia'u ipammasingkattu Watti'u Al᷊al᷊uassa udde su ola'u darangngun Ruata.

²⁵I ya'u suete nattembo manga tuṛṛangnga sarangkanambone wuṛṛu suete namasingkatta lai su ola'u ereapa Ruata mamarenta ere sangkatou Ratu. Orassa indi ya'u mammendamma tate lai massomba manga tuṛṛangnga.

²⁶Ana waugu udde ringannu atonna i ya'u mabbisara si yamiu allo indi manungku amungkangngu su wallatti yamiu apan piaddu mate, udde wal᷊ine sal᷊a'u.

²⁷Tawe saran paassa i ya'u tinumal᷊angnga wuassu manara'u mannal᷊a'a si yamiu anambon pandumannu Ruata.

²⁸Ṛinone i yamiu uariaga watangannu wuṛṛu riagai lai anambon jamaatta apan suete tinantillu Ghaṛṛahon Ruata si yamiu iapariaga; ana waugu i yamiu suete nitenega maola'a mandariaga jamaatta udde. Ṛinone i yamiu uariaga jamaattu Ruata udde naal᷊ihidda ere mallal᷊u'adda uariaga dombane, ana waugu Ruata suete na'ola'a jamaatta udde pussaa-Ne sassane sulal᷊ummu papaten Anang-Nge sassane.

²⁹Su al᷊al᷊iu'u, sarun dumanta manga serigala apan waṛṛani su pattangngani yamiu. Wuṛṛu manga taumata apan rariaganni yamiu udde maola'a inassu manga serigala udde.

³⁰Ewe'e wuassu wallattu manga tuṛṛangnga sassane lai sarun lumapputa manga taumata apan sarun mabatti'u watti'a awusu. I mangitou ma'ola'a aroddi, tadea'u manga taumata apan nangngimante Mawu Yesus umal᷊iwu wuṛṛu tumantalongke si mangitou.

³¹Ana waugu udde paariagga! Paanaunge manungku tallu tonna al᷊annune ringannu anambon allommata, allo ṛabbi, ya'u tawe illol᷊one mangngaṛṛa'a awadaalla wuṛṛu si yamiu.

³²Orassa indi ya'u manantilli yamiu su Ruata, tadea'u i Tou mammadul᷊i si yamiu wuṛṛu tadea'u i yamiu sidutu ua'umbele watti'u darangngun Ruata. Ruata uatahuanna taṛṛino ipanohassa si yamiu wuṛṛu nangonggolu manga al᷊amatta apan sueten saddiane ionggolla su al᷊aṛṛanang-Nge.

³³Taambe saran paassa i ya'u ninumemman roitta ara'e laubbu taumata waine.

³⁴Tuṛṛangnga sassane masingkatta, manungku ringannu auatangku sassane i ya'u mammanara mannipussa hausangku wuṛṛu manga hawe'u apan uatantalongnga si ya'u.

³⁵Sulal᷊ummu al᷊awo'u hatto, i ya'u suete nanul᷊adda si yamiu manungku ringannu mammanara maṛṛimadda ereindi, i ite ṛinone mantul᷊ungngu manga taumata lome. Ana waugu i ite ṛinone mannaungnga apa apan suete niwal᷊o Mawu Yesus, ‘Lembon su lal᷊umanna'a i ite mangonggolla, wuassu i ite manengkamma.’ ”

³⁶Napawe i Paulus suete nabbisara, i tou inumal᷊intuda ringanni mangitou sarangkanambone see inumal᷊iomanna.

³⁷I mangitou sarangkanambone nilumuai lapiddu naṛṛa'uppa si Paulus wuṛṛu nabbisara, sal᷊amatte umamatta.

³⁸I mangitou massusa ana waugu i Paulus nabbisara manungku i mangitou tate maasilo si tou apia. See i mangitou nanguntudi Paulus sara su apalla.