Read Talaud WATTI'U MANGA RASUL 21 Bible Online

WATTI'U MANGA RASUL 21 - Talaud bible

WATTI'U MANGA RASUL 21

¹I yami nabal᷊o mapul᷊ete su manga piaṛṛa'u jamaatta wuassu Efesus udde see nanantangngi mangitou. Wua'udde i yami nassenggotte watukku taṛṛanusan Kos; wuṛṛu tiṛṛabbine i yami na'omate su taṛṛanusan Rodos. Wua'isudde i yami nassenggotte watukku tatul᷊iannu Patara.

²Su Patara i yami naasomba apalla apan mabatukku Fenesia. Ne i yami sinuma'ete apalla udde,

³wuṛṛu nassenggotte na'oman sara naasilo taṛṛanusan Siprus su samba'a aiṛṛing kami; arawe i yami lapiddu nassenggotta mattudan Siria. I yami nabbal᷊ango su Tirus, ana waugu isudde apalla sasa'eanni yami mangonna luranne.

⁴Su tampa udde i yami inai nattembo manga taumata apan mangngimanna Mawu Yesus, see natana'a ringanni mangitou sangkamisa al᷊annune. Wuassu tatantiron Ghaṛṛahon Ruata, i mangitou mangngaṛṛa'a si Paulus tadea'u arie inai su Yerusalem.

⁵Arawe napawe nasuete tempone i yami uatana'a isudde, i yami nanantangngi mangitou, wuṛṛu i yami nanassukku amatanni yami. I mangitou sarangkanambone ringannu anangnge wuṛṛu awingnge nanguntudi yami sara liuddu soa. Poiaroddi su winggin apanne, i yami sarangkanambone inumal᷊intuda see inumal᷊iomanna.

⁶Wua'udde i yami natatabeate, see i yami sinuma'ete apalla wuṛṛu i mangitou napul᷊ete watukku wal᷊e.

⁷I yami sidutu nassenggotte wuassu Tirus watukku Ptolemais. Poiaroddi yami inaite nattembo manga tuṛṛangnga apan mangngimanna, ana waugu mangonggolu tabea si mangitou, wua'udde natana'e allo massallo ringanni mangitou.

⁸Tiṛṛabbine i yami nassenggotte apia, see na'omate su Kaisarea. Isudde i yami inaite ringannu mabawatti'u ṛengetannu Mawu, aranne i Filipus, see natana'e su wal᷊ene. I tou sangkatou wuassu wallattu sire pitu apan napile su Yerusalem.

⁹Siri appata anangnge maṛṛuala suete inonggol᷊annu Ruata asingkata tadea'u wotongnge mamasingkattu Watti'u Al᷊al᷊uassa wuassu Ruata.

¹⁰Napawe manga pira allo al᷊annune poiaroddi, nirumantate sangkatou nabi wuassu Yudea aranne i Agabus.

¹¹I tou nirumanta ringanni yami ana see nanganu papeṛṛetti Paulus. Ringannu papeṛṛetta udde i tou nama'issa ledda wuṛṛu limane sassane ana see nabbisara, “Ete indi apan niapaasingkattu Ghaṛṛahon Ruata: Tatahuannu papeṛṛetta indi sarun ṛapusannu manga taumatan Yahudi ereindi su Yerusalem, wuṛṛu itantilla su manga taumata wal᷊ine Yahudi.”

¹²Napawe i yami naaringikka udde, i yami wuṛṛu manga tuṛṛangnga apan uatana'a su Kaisarea sinumal᷊ande si Paulus tadea'u i tou tawe inai watukku Yerusalem.

¹³Arawe i tou sinumimbakka, “Apa hunane tuṛṛangnga lulluai ereindi na'oman sara naungku nasusa? I ya'u nasaddiate wal᷊ine tumba'u sametanna poiaroddi, arawe nasaddiate lai mate ana waugu Mawu Yesus.”

¹⁴I Paulus maddiri madaringikka si yami, ne yami tate naningaddi tou. “Walatte apulu Mawu sassane mariaddi,” unni yami.

¹⁵Napawe uatana'e isudde manga pira allo al᷊annune, i yami nanahimpunte sarannapang kami see inaite watukku Yerusalem.

¹⁶Sire pira tuṛṛangnga wuassu Kaisarea inai lai tumantalongnga su adio'a ringanni yami, manguntuddi ami su wal᷊e Manason ana waugu ete su wal᷊en tou yami mangintal᷊a. (Manason sangkatou taumatan Siprus apan mal᷊annute naola'a mallal᷊aṛṛenggennu Mawu Yesus.)

¹⁷Su tempo i yami na'omate su Yerusalem, manga tuṛṛangnga isudde nanal᷊oho si yami ringannu naungnga apan mal᷊uassa.

¹⁸Tiṛṛabbine i Paulus inaite su adio'a ringanni yami mattembo si Yakobus; Manga piaṛṛa'u jamaatta uasemodda lai isudde.

¹⁹Napawe suete nattabea si mangitou, i Paulus nabbati'a si mangitou al᷊awo'u inolaanna apan suete niola'u Ruata sulal᷊ummi tou su wallattu manga taumata apan wal᷊ine Yahudi.

²⁰Napawe suete nadaringikka watti'i Paulus udde, i mangitou sarangkanambone nadalote Ruata. Wua'udde i mangitou nabbisara si Paulus, “Tuṛṛangnga Paulus! Tuṛṛangnga ṛinone maasingkatta manungku su ṛiwunete taumatan Yahudi mangngimanna Mawu Yesus. Ete i mangitou sarangkanambone udde taumata apan sidutu tuttuṛṛutta mappaamattu Titan Musa.

²¹Wuṛṛu orassa indi i mangitou naaringikke manungku tuṛṛangnga mangngaṛṛa'a anambon taumatan Yahudi apan uatana'a su wallattu walahanna waine, tadea'u mamallossu Titan Musa. Tuṛṛangnga mannantiro si mangitou tadea'u i mangitou tawe mapassunattu al᷊aṛṛana'i mangitou, ara'e tumuṛṛutta inanaramannu Yahudi.

²²Orassa indi manga taumatan Yahudi apan nangngimante udde sarun maaringikka manungku tuṛṛangnga isindi. Nariaddi ereapa orassa indi?

²³Mappianne tuṛṛutte tatantirong kami. Pia sire appatta isindi apan suete na'ire Mawu.

²⁴Ne ṛinone tuṛṛangnga inai mallaghu pangangukkassa wadangnga su adio'a ringanni mangitou wuṛṛu waeṛṛete sasannane tadea'u i mangitou wotongngete lungguṛṛanna. Ringannu aroddi sarun lumiatta'a su anambon taumata manungku apa apan niaringiṛṛanni mangitou su ola'u tuṛṛangnga udde awusu, ana waugu tuṛṛangnga sassane lai mappaamattu Titan Musa.

²⁵Arawe su ola'u taumata apan wal᷊ine taumatan Yahudi apan nangngimante Mawu Yesus, i yami suete napaapiddu suratta si mangitou su ola'u ṛaṛṛawessu hattong kami, manungku imbaṛṛangnga umanna anna apan suete pinassubba paal᷊uanna, tawe wotongnge ma'inumma ṛaṛṛa, ara'e uminassa winatangnga apan nate niattongnga; wuṛṛu tawe wotongnge ma'ola'a inolaanna apan lal᷊eo.”

²⁶Ne i Paulus inaite ringannu sire appata taumata udde see nallaghutem pangangukkassa wadangnga su adio'a ringanni mangitou su allo tiṛṛabbine. Wua'udde i mangitou sinumutta su Wal᷊e Mawu namasingkatta manungku ete pira allo lai lal᷊aghum pangangukkassa udde masue wuṛṛu sasamban sangkatou-sangkatou ionggole.

²⁷Napawe tempo pitu allo udde masuete, manga pira taumatan Yahudi wuassu Asia naasilo si Paulus sulal᷊ummu Wal᷊e Mawu. See i mangitou nangahe taumata nambo, wua'udde nanametta si Paulus,

²⁸lapiddu u'ui, “Ei, manga taumatan Israel, ontol᷊e! Ete indi taumatane apan mammal᷊intadu al᷊awo'u wanua mangngaṛṛa'a anambon taumata manga al᷊aṛṛa'a apan ipannompolla walahannu Israel, wuṛṛu mannompola Tita Musa wuṛṛu mannompolla Wal᷊e Mawu indi. Wuṛṛu orassa indi ewe'e i tou lai mangapiddu manga taumata apan wal᷊ine Yahudi su mutta sulal᷊ummu Wal᷊e Mawu wuṛṛu mandal᷊eo tampa na'ukkassa indi!” (

²⁹I mangitou nabbisara aroddi ana waugu i mangitou suete naasilo si Trofimus taumatan Efesus udde su soa su adio'a ringanni i Paulus; wuṛṛu i mangitou massunna manungku Paulus suete nangapiddi tou sinumutta sulal᷊ummu Wal᷊e Mawu.)

³⁰Lal᷊oṛṛon soa nassongkakka, wuṛṛu manambo taumata tinumal᷊angnga maddulu. I mangitou nanametta si Paulus wuṛṛu namol᷊engnga si tou sinumabangnga wuassu Wal᷊e Mawu. Orassa udde lai ngaran Wal᷊e Mawu niṛṛuuda.

³¹Tantal᷊anna mangangal᷊iba'ukka udde maddea'a mamate si Paulus, pia taumata namasingkatta su tembonannu tantaran Roma manungku lal᷊oṛṛon soan Yerusalem nassongkakke.

³²Tembonannu tantaran Roma udde lapiddu nangahe sire pira tantara tepelle wuṛṛu tantara waine see mal᷊iha-l᷊ihakka inai ringanni mangitou su tampam pabbawul᷊oanna udde. Napawe taumata nambo udde naasilo piaṛṛangnge wuṛṛu tantarane, i mangitou naddote mamuulla si Paulus.

³³Piaṛṛangnge udde inaite ringanni Paulus see nanametta si tou, wuṛṛu nandolokku taumata niapaṛṛapussa si tou. Wua'udde piaṛṛangnge naiwal᷊o su ola'u isai i Paulus wuṛṛu apa apan suete niolangnge.

³⁴Sangkawageanganna wuassu taumata nambo udde sinumimbakka arendi, wuṛṛu sangkawageanganna lai sinumimbakka aroddi. Saṛṛene naal᷊iba'ukke aroddi olangnge, na'oman sara piaṛṛa'u tantara udde tawe naasingkatta apa apan suete nariaddi. Ana waugu udde i tou nandolokka tadea'u Paulus iapidda su tampa mangitou.

³⁵Su tempo i mangitou nangapiddi tou sara tuadda, mangangal᷊iba'ukka udde naṛṛimpulunna aroddi aṛṛaginne na'oman sara i Paulus sarun ehetannu manga tantara.

³⁶I mangitou tatantalongannu mangangal᷊iba'ukka wuassu liudde apan u'ui, “Patete i tou!”

³⁷Aroddi sumuttate su tampan tantara, i Paulus nabbisara su tembonanne udde, “Wotongnge i ya'u massinaukka tal᷊ang kadio'a ringanni Tuangnga?” “I'o wotongnge massinaukku Yunani?” aiwal᷊on tembonanne udde.

³⁸“Amungkangngu aroddi i'o wal᷊ine taumatan Mesir apan allo nal᷊iu ma'ola'a hio see nantal᷊angngu appatu ṛiwu su atoune mangangal᷊iba'ukka pia ahidde sinumutta su wadda'a?”

³⁹I Paulus sinumimbakka, “I ya'u taumatan Yahudi; i ya'u tumana'u soan Tarsus soa ahewal᷊anne su Kilikia. Tul᷊unga'o i ya'u pahahattoa'u manga taumata udde.”

⁴⁰Ne napawe i Paulus niwala mabbisara, i Paulus dirumarisikke su tuadda, see namaten limane. Taumata nambo nallannaba. Wua'udde Paulus nabbisara si mangitou sulal᷊ummu wisaran Ibrani. I Paulus nabbisara,