Read Talaud WATTI'U MANGA RASUL 22 Bible Online

WATTI'U MANGA RASUL 22 - Talaud bible

WATTI'U MANGA RASUL 22

¹“Manga iamangnga wuṛṛu manga tuṛṛangnga sarangkanambone! I ya'u sarun manapputu atatul᷊i'u si yamiu. Daringiṛṛe'o!”

²Napawe i mangitou naaringikka i Paulus nabbisara sulal᷊ummu wisaran Ibrani, i mangitou lembo nallannaba lai. Ne Paulus nanassukku tal᷊aane.

³“I ya'u taumatan Yahudi,” unni Paulus, “i ya'u niasungkangnga su Tarsus su leta'u Kilikia arawe i ya'u niwuwunna isindi su Yerusalem, wuṛṛu niaṛṛaanna ringannu ma'uduppa wuassu huru wahewa Gamaliel sulal᷊ummu Tita apan nionggolli Musa su iupungngu al᷊amonang kite. Ere lai manga tuṛṛangnga sarangkanambone isindi, allo indi, ya'u lai maṛṛimadda su manaran Ruata.

⁴I ya'u mammate ma'oman sara mallal᷊aṛṛenggennu al᷊aṛṛa'a wakku udde nate. I mangitou sarangkanambone mapia esakka ara'e lai wawine, ta'u sinametta wuṛṛu tinaṛṛo sulal᷊ummu tuttupanna.

⁵Imam bahewa sassane wuṛṛu anambo Mallaṛṛuungngu Agama wotongnge mattiala manungku i ya'u tawe mangawusu. Ana waugu ete i mangitou udde suete nangonggolu suratta wawal᷊o su manga taumatan Yahudi su Damsyik. Ringannu suratta udde i ya'u wotongnge manametta poiaroddi manga taumata apan mangngimanna al᷊aṛṛa'a udde wuṛṛu mangapiddi mangitou su Yerusalem iṛṛuumanna.”

⁶“Su tempo i ya'u tantal᷊anna su amatanna wuṛṛu maraniten Damsyik, su tempo allattune, sambau semakka apan tumanite masemakka atonna inaṛṛombanganne natuakka wuassu langitta namal᷊iwutta si ya'u.

⁷I ya'u naṛṛa'a su leta'a see i ya'u naaringikka sambau tingikka nabbisara si ya'u, ‘Saulus, Saulus! Anio i'o mandal᷊eo si Ya'u?’

⁸See i ya'u naiwal᷊o, ‘Isai I'o Mawu?’ ‘I Ya'u eteudde Mawu Yesus taumata Nazaret udde apan raddal᷊eoannu,’ sasimbakke.

⁹Manga taumata isudde suadio'a ringangku naasilo semakka udde arawe i mangitou tawe naaringikka tingikka apan nabbisara si ya'u.

¹⁰See i ya'u naiwal᷊o apia, ‘Apa ṛinone ta'u olaanna Mawu?’ Mawu sinumimbakka, ‘Darisikke wuṛṛu roote su Damsyik. Poiaroddi i'o sarun pasingkatanna su ola'u apa apan ipaapulun Ruata sarun olaannu.’

¹¹I ya'u nawuta ana waugu semakka apan mal᷊angitta udde. Nariaddi manga hawe'u nangehetta si ya'u sinumutta su Damsyik.

¹²Isudde pia sangkatou aranne i Ananias. I tou sangkatou apan susi wuṛṛu matuṛṛutta mappaamattu Titan Musa. Anambon taumatan Yahudi apan uatana'a su Damsyik mangngaddatta si tou.

¹³I tou nirumanta nattembo si ya'u, see nirumarisikka su sandiṛṛangku wuṛṛu nabbisara, ‘Tuṛṛangku Saulus, ṛinone i'o maasilo apia!’ Orassa udde lai ya'u tinumagekka see naasilo si tou.

¹⁴Wua'udde i tou nabbisara si ya'u, ‘Ruata iupungngu al᷊amonang kite suete namile si'o, tadea'u i'o maasingkatta pandumme wuṛṛu maasilo Mawu Yesus, Allangngu Ruata apan nanipussa apulun Ruata see madaringikka tingikku Mawu Yesus sassane.

¹⁵I'o sarun maola'a daroloṛṛanna mammasingkatta su anambon taumata apa apan suete niasiloannu wuṛṛu niaringiṛṛannu.

¹⁶Orassa indi ariete i'o maṛṛado mal᷊annu. Darisikke wuṛṛu paisaṛṛanite. Sal᷊andete su Mawu tadea'u i'o iapaal᷊iu wuassu manga rosanu.’ ”

¹⁷“I ya'u nabelengnga watukku Yerusalem, wuṛṛu napawe i ya'u u'al᷊iomanna su Wal᷊e Mawu, ya'u niintaṛṛoannu Ghaṛṛahon Ruata.

¹⁸I ya'u naasilo Mawu; i Tou nabbisara si ya'u, ‘Paal᷊ihakke manantangngu Yerusalem, ana waugu manga taumata isindi tawe madaringikka tatialanu su ola'u riri-U.’

¹⁹I ya'u nabbisara, ‘Mawu, i mangitou masingkatta atonna manungku i ya'u suete sinumutta su manga wal᷊em pattataṛṛamawuanna maddea'a manametta si mangitou wuṛṛu mamuulla manga taumata apan mangngimanna Si'o.

²⁰Aroddi lai napawe matatialanu i Stefanus nipate, i ya'u sassane isudde, wuṛṛu i ya'u lai inumire su ola'u pamamate udde. Ewe'e ete i ya'u lai uariaga laubbu manga taumata apan namate si tou.’

²¹Arawe Mawu nabbisara apia lai si ya'u, ‘Roote, ana waugu i Ya'u sarun mandolokku inai su tampa apan marau ringannu manga taumata apan wal᷊ine Yahudi.’ ”

²²Manga taumata ta'e sidutu uararingikka si Paulus mabbisara, arawe su wisara apan pangudusanne i mangitou inumui ma'ikkatta, “Pate taumata ereudde. Tawe ṛinone i tou mabbiakka!”

²³Lapiddu u'ui i mangitou mangngalabbu pal᷊iwungngi mangitou wuṛṛu mannongkakku awu watukku winalanganna.

²⁴Ne tembonannu tantaran Roma namarenta, tadea'u i Paulus iapidda su tampa mangitou, tadea'u i tou parikisanna isudde ringannu araṛṛagissa see asingkatanna anio manga taumatan Yahudi u'ui aroddi si tou.

²⁵Arawe su tempo i Paulus ṛaṛṛapusante wuṛṛu suete nipuulla, i Paulus nabbisara su tembonannu tantara apan uarisikka isudde, “Apa wotongnge mamuulla sangkatou tumana'u araratuannu Roma, tantal᷊anna i tou taambe niparikisanna?”

²⁶Naaringikka udde, perwinan tantara udde inaite ringannu tembonannu wuntuanna wuṛṛu nabbisara, “Apa sarun olaanni ite Iamangnga? Taumata indi tumana'u araratuannu Roma!”

²⁷Ne komandan tantara udde inaite ringanni Paulus wuṛṛu naiwal᷊o, “Wal᷊oa'e si yami, atonna i'o tumana'u araratuannu Roma!” “Ore,” sasimbakki Paulus, i ya'u tumana'u araratuannu Roma.

²⁸Tembonanne udde nabbisara apia, “I Ya'u naola'a tumana'u Roma ringannu namaekka tumanite manambo!” I Paulus sinumimbakka, “Arawe i ya'u niasungkangnga naola'a sangkatou tumana'u araratuannu Roma.”

²⁹Orassa udde lai manga tantara apan mamarikissa si Paulus udde, sinumoṛṛota, wuṛṛu tembonanne udde nata'utta ana waugu i tou suete naṛṛapussa si Paulus, sumbal᷊i i Paulus tumana'u araratuannu Roma.

³⁰Tembonannu tantaran Roma udde mangke ma'apulu maasingkatta anio taumatan Yahudi mapaasal᷊am Paulus. Ana waugu udde tiṛṛabbine i tou namaggo manga imam tembonanne, wuṛṛu Mallaṛṛuungngu Agama ma'ammula. See i Paulus nipallose wuassu mantungnge, wua'udde niapidda sinumaruanna si mangitou sarangkanambone.