Read Talaud WATTI'U MANGA RASUL 23 Bible Online

WATTI'U MANGA RASUL 23 - Talaud bible

WATTI'U MANGA RASUL 23

¹I Paulus nanutudda manga mallaṛṛuungnga udde see nabbisara, “Manga tuṛṛangku! Na'oman sara allo indi ya'u tawe naapendamma sal᷊a su saruannu Ruata sulal᷊ummu naungku su ola'u i ya'u mabbiakka.”

²Su tempo i Paulus nabbisara aroddi, Imam Bahewa Ananias nandolokku taumata apan uarisikka su sandiṛṛanni Paulus niapapero moṛṛongngi Paulus.

³Ne i Paulus nabbisara imam bahewa udde, “Ruata sarun mamero si'o, taumata lilangkamal᷊e'a apan ma'iellega na'ukkassa! I'o uaianna isudde mammarikissa si ya'u tumuṛṛuttu Tita Musa, wutte'e i'o sassane nilumawangnga Tita udde ringannu nandolokku taumata niapapero si ya'u!”

⁴Manga taumata su sandiṛṛanni Paulus nabbisara si Paulus, “I'o mangngadio'a imam bahewan Ruata!”

⁵I Paulus sinumimbakka, “Oh, i ya'u wagga, manga tuṛṛangnga, manungku i tou imam wahewa. Atonna sulal᷊ummu Wuke Susi pia uawoṛṛetta, ‘Imbaṛṛangnga i'o mangngadio'a piaṛṛa'u walahannu.’ ”

⁶Paulus naasilo manungku sambageanganna wuassu mallaṛṛuungnga udde taumatan Saduki, wuṛṛu sambageanganna lai taumatan Farisi. Ana waugu udde i tou nabbisara su manga mallaṛṛuungnga udde, “Manga tuṛṛangnga! I ya'u sangkatou taumata walahannu taumatan Farisi. I ya'u niparikisanna isindi ana waugu i ya'u mangngimanna manungku manga taumata nate sarun mabbiakka apia.”

⁷Napawe i tou nabbisara aroddi, manga taumatan Farisi wuṛṛu manga taumatan Saduki nanattakke uatatiakka, na'oman sara ṛa'ianna udde napesangnga natahia ruang kawageanganna. (

⁸Ana waugu manga taumatan Saduki pia addapanne manungku taumata nate tate mabbiakka apia, manungku tawe mala'ekatta, wuṛṛu tawe lai manga ghaṛṛaho, arawe manga taumatan Farisi mangngimanna sarangkanambone udde.)

⁹Ne nariaddite hio wahewa. Manga pira taumatan Farisi apan naola'a hurun agama dirumarisikka wuṛṛu nanompolla. I mangitou nabbisara, “Tumuṛṛutta si yami, taumata indi tawe sal᷊ane saran adio'a! Asinungka pia ghaṛṛaho ara'e mala'ekatta apan mabbisara si tou!”

¹⁰Patatatiakka udde naola'a aroddi ahewalle na'oman sara piaṛṛangnge udde nata'utta, aṛṛengenne i Paulus ṛimpulananni mangitou. Nariaddi i tou nandolokku tantarane inai mangal᷊appa si Paulus wuassu pattangngannu manga taumata udde see niapidda su tampa mangitou.

¹¹Ṛabbi nanansunna, Mawu Yesus nirumarisikka su sandiṛṛanni Paulus wuṛṛu nabbisara, “Paatohassa naungngu! I'o suete nattiala su ola'u riri-U su Yerusalem. I'o ṛinone lai mabatti'u udde su Roma.”

¹²Tiṛṛabbine ruaallo atonna, manga taumatan Yahudi, nanattakke ma'ammula. I mangitou nassalu tawe umanna ara'e ma'inumma amungkangngu i mangitou taambe naapate si Paulus.

¹³Appatu pul᷊o pia lebbene taumata apan uaammulla isudde.

¹⁴I mangitou inaite ringannu manga imam tembonanne wuṛṛu manga piaṛṛa'u Yahudi lapiddu nabbisara, “I yami suete nassalu suadio'a, tawe umanna wuṛṛu ma'inumma saran adio'a amungkangngu i yami taambe naapate si Paulus.

¹⁵Ne orassa indi manga tuṛṛangnga ringannu manga Mallaṛṛuungngu Agama ṛinone mapaapiddu suratta su tembonannu tantaran Roma udde ipadorongnga i tou mangapiddi Paulus mabelengnga sumaruanna si yamiu, paṛṛimau napa i yamiu mamarikissa apia hattone ringannu ma'uduppa. Wuṛṛu i yami uasasadiate mamate si tou tantal᷊anna i tou taambe na'oma isindi.”

¹⁶Arawe ana'u wawinem Paulus naaringikka pandumanni mangitou udde. Ne i tou inaite su tampan tantara wuṛṛu namasingkattu watti'a udde si Paulus.

¹⁷See i Paulus namaggo sangkatou perwira wuṛṛu nabbisara si tou. “Apira'a ana'a umbasanna indi su komandanna; i tou pia apa iwal᷊o si tou.”

¹⁸Perwira udde nangapiddu ana'a umbasanna udde su komandanna wuṛṛu nabbisara si tou, “I Paulus taumata tataṛṛanganna udde, namaggo si ya'u wuṛṛu nadorongnga tadea'u i ya'u mangapiddu ana'a umbasanna indi si Tuangnga; i tou piaddu iwal᷊o.”

¹⁹Komandanna udde nangagassa limang kana'a umbasanna udde, see nangapiddi tou sassane su sandiṛṛanne wuṛṛu naiwal᷊o, “I'o mabatti'u apa si ya'u?”

²⁰Ana'a umbasanna udde sinumimbakka, “Manga taumatan Yahudi suete na'ire madorongnga si Tuangnga mangapiddi Paulus sumaruanna Mallaṛṛuungngu Agama tiṛṛabbi, paṛṛimau napa i mangitou mamarikissa apia hattone ringannu ma'uduppa.

²¹Arawe arie Tuangnga madaringikka darorongngi mangitou udde, ana waugu appatu pul᷊o pia lebene taumata apan tantal᷊anna uaimbuni mangampangnga si tou su lal᷊anna. I mangitou sarangkanambone suete nassalu tawe umanna wuṛṛu ma'inumma amungkangngu i mangitou taambe naapate si Paulus. Orassa indi i mangitou nasaddiate; ete uaraṛṛaddo sasimbakki Tuangnga.”

²²Tembonannu tantara udde nabbisara, “Arie pabbal᷊oa'a sisai-sai manungku i'o suete nangalae si ya'u.” See i tou nandolokku ana'a umbasanna udde niapaapul᷊e.

²³Wua'udde komandanna udde namago ruang katou perwira, ana see i tou nabbisara sitarua, “Saddiaite rua ṛasutta tantara suadio'a ringannu pitum pul᷊o tantara uasa'e awal᷊o wuṛṛu rua ṛasutta tantara pia sambeangnge ana see inaite amatta puulla sio ṛabbi indi lai watukku Kaisarea.

²⁴Saddiaite lai awal᷊o sa'eanni Paulus wuṛṛu apira'e i tou ringannu sal᷊amatta ma'oma su wal᷊en Gubernure Feliks.”

²⁵See tembonannu tantara udde namoṛṛetu suratta tingikke ereindi,

²⁶“Apan awantuhanne Gubernure Feliks. Tabea wuassi Klaudius Lisias!

²⁷Taumata indi suete sinamettu manga taumatan Yahudi wuṛṛu ete adio'a pateanni mangitou, amungkangngu i ya'u tawe nirumanta ringannu tantara'u wuṛṛu nanal᷊amatta si tou; ana waugu i ya'u naaringikka manungku i tou tumana'u araratuannu Roma.

²⁸Ana waugu i ya'u ma'apulu maasingkata apa pasasal᷊ane apan iaansili mangitou si tou, ne i ya'u nangapiddi tou su Mallaṛṛuungngu Agama mangitou.

²⁹Ne nasemakke i tou tawe pasasal᷊a apan botongnge maaṛṛuumanna si tou ringannu ṛuumanna pateanna ara'e itaṛṛo su tuttupanna. Alae mangitou tumba'u ana waugu titan agama mangitou sassane.

³⁰Wua'udde i ya'u niwal᷊oanna manungku pia ire lal᷊eo wuassu manga taumatan Yahudi si tou. Ana waugu udde i ya'u napa'untudi tou ringanni Tuangnga Gubernure. Wuṛṛu i ya'u suete nandolokku mangangalaene mangapiddu alae mangitou si Tuangnga.”

³¹Ne manga tantara udde napaamatte manara mangitou. I mangitou nangal᷊appa si Paulus see nangapiddi tou ṛabbi udde lai na'oman sara su Antiparis.

³²Tiṛṛabbine i mangitou namalaten tantara apan uasa'e awal᷊o manassukku amatanne ringanni Paulus, wuṛṛu i mangitou nabelengke su tampa mangitou.

³³Napawe tantara uasa'e awal᷊o udde na'omate su Kaisarea, i mangitou nangonggolu suratta udde su gubernure, see i Paulus tinantilla si tou.

³⁴Napawe gubernure suete nabbasan suratta udde, i tou naiwal᷊o si Paulus wuassu apa darantane. Napawe i tou naasingkatta manungku i Paulus wuassu Kilikia,

³⁵i tou nabbisara, “Apianne! Ya'ute mamarikissa hattonu, amungkangngu manga taumata apan nangalaenu na'omate isindi.” See i tou namarenta tadea'u i Paulus taṛṛanganna sulal᷊ummu wal᷊en araratuanni Herodes.