Read Talaud WATTI'U MANGA RASUL 24 Bible Online

WATTI'U MANGA RASUL 24 - Talaud bible

WATTI'U MANGA RASUL 24

¹Lima allo wua'udde, Imam Wahewa Ananias wuṛṛu manga piaṛṛa'u Yahudi inaite watukku Kaisarea uaapiddu sangkatou mangangatokku hatto aranne i Tertulus. I mangitou sinumaruanna si Gubernure Feliks wuṛṛu nangalaen Paulus.

²Napawe i Tertulus niwagoanna su saruanna, i tou mangngansilla si Paulus arendi, “Tuangnga Gubernure Apan Mawantuga! Sulal᷊ummu piaṛṛa'i Tuangnga wanuang kami tawe gione. Wuṛṛu ana waugu apapanden Tuangnga lai manambo apapia apan suete niola'i Tuangnga su walahanni yami.

³Sarangkanambone udde mangke sassal᷊ohoanni yami ringannu aadiangkamanna wuṛṛu aaddatta apan nangillembo su al᷊awo'u tampa.

⁴Arawe tadea'u tawe manggolo'a tempon Tuangnga manambo, i ya'u madorongnga amungkangngu wotongnge i Tuangnga madaringikka aalaen kami apan maautta indi.

⁵Niasombanganni yami taumata indi mangangal᷊iba'ukka apan maasilaka. Su al᷊awo'u tampa i tou ma'ola'a hio su wallattu manga taumatan Yahudi wuṛṛu i tou naola'a piaṛṛa'u pandumannu manga taumata Nazaret.

⁶Ewe'e i tou lai suete naannamma nandal᷊eo arannu Wal᷊e Mawu, arawe i yami nanametta si tou. [I yami mappandumma mamarikissa si tou tumuṛṛuttu titan agamang kami sassane.

⁷Arawe tembonannu tantara Lisias nangaṛṛo si tou wuassi yami,

⁸wuṛṛu namarenta tadea'u mangangalaene sumaruanna si Tuangnga.] Amungkangngu i Tuangnga mamarikissa taumata indi, i Tuangnga sassane sarun madaringikka wuassi tou manungku atonna sarangkanambone apan ipangngalaen kami si tou.”

⁹Manga taumatan Yahudi tinumantalongnga lai nangalaem Paulus wuṛṛu nangngimante al᷊awo'u wisara apan niwisaran Tertulus.

¹⁰See gubernure udde nangonggolu tempo si Paulus, manungku i tou wotongnge massinaukka. Ne i Paulus nabbisarate, “I ya'u masingkatta i Tuangnga naola'a mallaṛṛuungnga su wanua indi pirate tonna al᷊annune. Ana waugu udde i ya'u lulluassa mamasingkattu watti'a indi su saruanni Tuangnga.

¹¹I Tuangnga wotongnge manaṛṛassida sassane manungku tawe nilumebbe wuassu mapul᷊o dua su allone nal᷊iu i ya'u nirumanta su Yerusalem umal᷊iomanna.

¹²Wuṛṛu tawe saran paassa manga taumatan Yahudi udde naaratingnga si ya'u uatatiakka ringannu sangkatou, ara'e nangammullu taumata ana mangal᷊iba'ukka, mapia su Wal᷊e Mawu, ara'e su wal᷊em pattataṛṛamawuanna ara'e su al᷊awo'u tampa sulal᷊ummu soa.

¹³I mangitou lai tawe maasemakka manga alae mangitou si Tuangnga su ola'u watangangku.

¹⁴Atonna ṛinone i ya'u manga'u si Tuangnga manungku i ya'u massubba Ruatan iupungngu al᷊amonang kami tumuṛṛuttu al᷊aṛṛa'u Mawu Yesus apan sassunnanni mangitou nassal᷊a. Arawe i ya'u ta'e mangngimanna sarangkanambone apan uawoṛṛetta sulal᷊ummu Wuke Musa wuṛṛu Wuke Manga Nabi.

¹⁵Ere lai i mangitou, i ya'u lai pia antimma su Ruata manungku anambon taumata sarun mabbiakka apia wuassu papate — taumata mapia, ara'e lai taumata lal᷊eo!

¹⁶Ana waugu udde i ya'u sidutu ma'ola'a apapia, tadea'u naungku waresi su saruannu Ruata wuṛṛu waresi su saruannu taumata.

¹⁷Napawe pirate tonna tawe uatana'a su Yerusalem, i ya'u nabelengke apia su Yerusalem nangapiddu sasumbala roitta su pabbawala'u wuṛṛu nangapiddu aonggolla sasamba su Ruata.

¹⁸Su tempo i ya'u tantal᷊anna mammanara udde, i mangitou naaratingnga si ya'u su Wal᷊e Mawu, napawe i ya'u suete nallaghum pangangukasa wadangnga. Tawe taumata nambo isudde ringangku, wuṛṛu tawe pagahahio lai su tempo udde.

¹⁹Tumba'u pia sire pira taumatan Yahudi wuassu leta'u Asia. Ete i mangitou ṛinone mangapiddu alae mangitou si Tuangnga isindi, amungkangngu i mangitou piaddu ipangalae'u.

²⁰Ara'e wala'e manga taumata indi sassane mangalaen al᷊al᷊eo apa apan niasombanganni mangitou si ya'u su tempo i ya'u niapaasaruanna Mallaṛṛuungngu Agama.

²¹Niaringiṛṛanni mangitou tumba'u wisara sampaddi indi apan niwisara'u su saruanni mangitou eteudde: I ya'u niparikisanna allo indi ana waugu i ya'u mangngimanna manungku manga taumata nate sarun iapaawiakka apia.”

²²See i Feliks apan naasingkate manambo al᷊aṛṛa'u Mawu Yesus, nanguddussu ammul᷊anna udde. “I ya'u sarun manguddussu hatto indi,” unni tou, “amungkangngu komandanna Lisias nirumantate.”

²³See i tou nandolokku piaṛṛa'u tantara apan uariaga si Paulus udde, tadea'u sidutu uataṛṛangnga si Paulus, arawe ringannu nangonggolu loakke adio'a si tou wuṛṛu namala manga hawene mangonggolu hausanna apan ipaapulune.

²⁴Manga pira allo wua'udde, i Feliks nirumanta raringanannu awingnge aranne i Drusila; i tou sangkatou taumatan Yahudi. See i Feliks nandolokku taumata niapaal᷊appa si Paulus, wua'udde i Feliks nadaringikka si Paulus nassinaukka su ola'u pangangimanna si Kristus Yesus.

²⁵Arawe napawe i Paulus nanassukku wisarane su ola'u atatul᷊idda wuṛṛu asasabare wuṛṛu su ola'u pallaṛṛuumanna su allong kiamatta, i Feliks nata'utta see nabbisara, “I'o wotongngete mapul᷊e orassa indi. I ya'u sarun mamago si'o apia amungkangngu pia tempone.”

²⁶Tantal᷊anna udde i Feliks pia antimma sarun maasomba roitta wuassi Paulus. Ana waugu udde i tou masokka mandolokku taumata mangal᷊appa si Paulus magahahatton tou.

²⁷Napawe ruate tonna, i Perkius Festus nallol᷊ossa si Feliks naola'a gubernure. Wuṛṛu ana waugu i Feliks maapulu massal᷊o'u naungngu manga taumatan Yahudi, i tou namalam Paulus sulal᷊ummu tuttupanna.