Read Talaud WATTI'U MANGA RASUL 25 Bible Online

WATTI'U MANGA RASUL 25 - Talaud bible

WATTI'U MANGA RASUL 25

¹Tallu allo napawe i Festus na'omate su wanua udde, i tou inaite wuassu Kaisarea watukku Yerusalem.

²Poiaroddi manga imam tembonanne wuṛṛu manga piaṛṛa'u Yahudi nangalae si Festus alae mangitou su ola'i Paulus. I mangitou sidutu massal᷊oi Festus

³tadea'u wuassu apapia naungnge si mangitou, i tou mandolokku taumata mangapiddi Paulus watukku Yerusalem; ana waugu i mangitou suete na'ire mamate si tou su tangngan dal᷊anna.

⁴Arawe i Festus sinumimbakka, “I Paulus tantal᷊anna tataṛṛanganna su Kaisarea; wuṛṛu i ya'u sassane lai tate mal᷊annu mabelengnga poiaroddi.

⁵Nariaddi wala'e manga taumata papunnane su wallatti yamiu inai suadio'a ringangku watukku Kaisarea wuṛṛu magahatto poiaroddi, amungkangngu i tou suete na'ola'a sambau pasasal᷊a.”

⁶Napawe suete natana'a su Yerusalem iraṛṛangngo ual᷊ute ara'e mapul᷊o allo lai, i Festus nabelengke watukku Kaisarea. Tiṛṛabbine i tou na'ola'a ammulu mamamarikissa wuṛṛu nandolokka tadea'u i Paulus al᷊apanna iapasaruanna si tou.

⁷Napawe i Paulus na'omate, manga taumatan Yahudi apan nirumantate su Yerusalem dirumarisikka namal᷊iwutta si tou, wuṛṛu nanattakke mangngalae alae apan mawakkata su ola'i tou. Arawe i mangitou tawe maasemakka manga alae udde.

⁸Sulal᷊ummu sasinaukke, i Paulus nabbisara, “I ya'u tawe inolaanna apan nassal᷊a su saruannu Tita Musa ara'e su saruannu Wal᷊e Mawu ara'e su saruannu Kaisar Roma.”

⁹Arawe i Festus ma'apulu massal᷊o'u taumatan Yahudi. Ne i tou naiwal᷊o si Paulus, “I'o ma'apulu inai watukku Yerusalem parikisanna poiaroddi su saruangku su ola'u manga alae indi?”

¹⁰I Paulus sinumimbakka, “I ya'u tantal᷊anna uarisikka su saruannu mallaṛṛuungngu Kaisar Roma; wuṛṛu ete su tampa indi ya'u sarun parikisanna. I Tuangnga sassane masingkatta manungku i ya'u tawe sal᷊a su saruannu manga taumatan Yahudi.

¹¹Amungkangngu i ya'u suete nilumawangnga tita wuṛṛu ma'ola'a inolaanna apan maaṛṛuumanna ma'oman sara pateanna, i ya'u mal᷊uassa pateanna. Arawe amungkangngu alae mangitou udde awusu, tawe saran sangkatou wotongnge manantillu riri'u si mangitou. I ya'u madorongnga parikisanna su saruannu mallaṛṛuungngu Kaisar!”

¹²Napawe suete na'ire ringannu manga mananantirone, i Festus nabbisara, “I'o madorongnga parikisanna su saruannu mallaṛṛuungngu Kaisar, nariaddi i'o ṛinone inai sumaruanna Kaisar.”

¹³Tawe nal᷊annu wua'udde, i Ratu Agripa wuṛṛu i Bernike nirumanta su Kaisarea mabal᷊on tabea si Festus.

¹⁴Napawe i mangitou uatana'e isudde manga pira allo, i Festus nanal᷊a'an hattom Paulus si Agripa. I Festus nabbisara, “Isindi pia sangkatou taumata tataṛṛanganna apan tinantangngi Feliks.

¹⁵Su tempo i ya'u su Yerusalem, manga imam tembonanne wuṛṛu manga piaṛṛa'u Yahudi nangalaen taumata udde wuṛṛu madorongnga tadea'u i ya'u maṛṛuumanni tou.

¹⁶Arawe i ya'u sinumimbakka manungku taumatan Roma tawe wotongnge manantillu taumata iwala aroddi iapaṛṛuumanna, amungkangngu isai nialae taambe nasasaruannu mangangalaene wuṛṛu massinaukka manahekku ririne.

¹⁷Nariaddi su tempo i mangitou nirumanta isindi, i ya'u tawe naṛṛado mal᷊annu lai. Tiṛṛabbine i ya'u lapiddu na'ola'a ammul᷊annu mamamarikissa wuṛṛu nandolokka tadea'u taumata udde iapidda su maruanna si ya'u.

¹⁸Napawe mangangalae udde dirumarisikka mangngapiddu aalae mangitou, i mangitou tawe napaasingkattu saran sambau al᷊al᷊eone ere ta'u sassunnanna apan ia'alae mangitou.

¹⁹I mangitou tumba'u nassal᷊a sunna ringanni tou su ola'u agama mangitou sassane wuṛṛu su ola'u sangkatou apan aranne Mawu Yesus. Taumata udde natete, arawe i Paulus mangke mannohassu pangangimanne manungku taumata udde wiakka.

²⁰Ana waugu i ya'u nial᷊iwune su ola'u ereapa ya'u wotongnge maasomba sasimbakku manga hatto udde, i ya'u naiwal᷊o si Paulus, apa i tou inai lai watukku Yerusalem wuṛṛu hattone parikisanna poiaroddi.

²¹Arawe i Paulus nadorongnga tadea'u hattone parikisannu mamamarikissa atanggaṛṛanne, i tou madorongnga tadea'u i tou sidutu tataṛṛanganna, ma'oman sara hattone iṛṛawessu Kaisar. Ana waugu udde i ya'u namarenta tadea'u i tou sidutu tataṛṛanganna, ma'oman sara i ya'u pia tempone manguntudi tou ringannu Kaisar.”

²²See i Agripa nabbisara si Festus, “I ya'u sassane lai ma'apulu madaringikka taumata udde.” “Tiṛṛabbi i Tuangnga wotongnge madaringikka si tou,” sasimbakki Festus.

²³Tiṛṛabbine i Agripa wuṛṛu i Bernike nirumanta ringannu lal᷊aghun awawantuga. I mangitou sinumutta su tampam pamarikisanna suadio'a ringannu manga ahahewal᷊an tantara wuṛṛu manga papunna su soa udde. Wuassu parentam Festus, i Paulus niapasuttate.

²⁴See i Festus nabbisara, “Tuangnga Agripa wuṛṛu sarangkanambone apan uaammulla! Taumata indi suete nialae manga taumatan Yahudi si ya'u, mapia su Yerusalem ara'e lai isindi. I mangitou nadorongnga ringannu u'ui manungku i tou tawe wotongnge iwala wiakka.

²⁵Arawe i ya'u tawe naasomba saran sambau inolaanne apan botongnge maaṛṛuumanna si tou ma'oman sara pateanna. Wuṛṛu ana waugu i tou sassane nadorongnga hattone parikisanna ringannu Kaisar, i ya'u naṛṛawessa mangipiddi tou ringannu Kaisar.

²⁶Arawe i ya'u taambe naasomba sasimbakka apan masemakka su ririne see i ya'u maapamoṛṛettu suratta si Kaisar. Ana waugu udde i ya'u napaasaruanni tou si Tuangnga sarangkanambone, nangillembo apan awantuhanne i Tuangnga Agripa! Pandumangku eteudde tadea'u napawe nasuete pamamarikissa indi, i ya'u piaddu iwoṛṛeta.

²⁷Ana waugu tumuṛṛuttu apulu'u, tawe ṛinone mapaapiddu sangkatou taumatan ṛuumanna ringannu tawe asingkatanna pasasal᷊ane apan niola'i tou.”