Read Talaud WATTI'U MANGA RASUL 26 Bible Online

WATTI'U MANGA RASUL 26 - Talaud bible

WATTI'U MANGA RASUL 26

¹I Agripa nabbisara si Paulus, “I'o iwala massinaukka manahekku watangannu.” Ne i Paulus namatten limane see nassinaukka ereindi,

²“Wabbantuhanna i Tuangnga Agripa! I ya'u mangke lulluassa ana waugu i ya'u wotongnge maasinaukka su saruanni Tuangnga su ola'u al᷊awo'u alae manga taumatan Yahudi maṛṛia'a su riri'u,

³nipangillembo lai ana waugu i Tuangnga masingkatta atonna addatta inanaramanna wuṛṛu manga hatton taumatan Yahudi. Ana waugu udde i ya'u sumal᷊ande tadea'u i Tuangnga madaringikka ringannu sabare i ya'u manal᷊a'a.

⁴Anambon taumatan Yahudi masingkatta ereapa i ya'u mabbiakka ro'en i ya'u ta'e umbasanna. I mangitou masingkatta manungku ro'en i ya'u umbasanna, i ya'u mabbiakka su wallattu manga pabbawala'u sassane su Yerusalem.

⁵Mal᷊annute i mangitou masingka'u. Wuṛṛu i mangitou maapulu, i mangitou wotongnge mabatti'a manungku ro'en paarorone i ya'u mabbiakka ere sangkatou taumatam Farisi ringannu tuttuṛṛutta al᷊awo'u atoranna apan tawe al᷊iuanna sulal᷊ummu agamang kami.

⁶Wuṛṛu orassa indi ya'u uarisikka isindi parikisanna ana waugu i ya'u mangngimanna paaire apan niola'u Ruata su ipungngu al᷊amonang kami.

⁷Ete pa'aire udde lai apan a'antimannu sire mapul᷊o dua walahannu Israel, na'oman sara i mangitou mangke mattaṛṛa Ruata allo wuṛṛu ṛabbi. Wuṛṛu ana waugu i ya'u mangngimanna paaire udde, Tuangnga apan mawantuga, i ya'u niapaasal᷊a manga taumatan Yahudi.

⁸Anio manga tuṛṛangnga manga taumatan Yahudi tawe mangngimanna manungku Ruata mapaawiakku taumata nate apia?

⁹Dorone i ya'u sassane lai pia addapatta manungku i ya'u ṛinone ma'ola'a manga al᷊awo'a ipanal᷊are Mawu Yesus wuassu Nazaret udde.

¹⁰Wuṛṛu atonna inolaanna udde suete ta'u niola'a su Yerusalem. Ringannu suratta taṛṛino wuassu manga imam tembonanne, i ya'u suete nantaṛṛo manambo taumata apan matuṛṛutta Ruata su tuttupanna. Ewe'e i ya'u lai inumire manungku i mangitou ṛinone pateanna.

¹¹Masokka i ya'u manansara si mangitou su wal᷊em pattataṛṛamawuanna, tadea'u mamata'i mangitou massinaaddu apa apan pangngimananni mangitou. Aroddi al᷊osone naungku si mangitou, na'oman sara watukku manga soa waine lai, ya'u sarun inai mangenggenna si mangitou poiaroddi.”

¹²“Ringannu pandumma udde lai ya'u nangapiddu surattu taṛṛino wuassu manga imam tembonanne wuṛṛu inaite watukku Damsyik.

¹³Wuṛṛu su tempo i ya'u su tangngan dal᷊anna, su tempo allattune, Tuangnga apan mawantuga, i ya'u naasilo sambau semakka wuassu langitta, apan semakke massemaṛṛanna wuassu matannallo. Semakka udde natuakka namal᷊iwutta si ya'u wuṛṛu manga taumata apan u'amatta suadio'a ringangku.

¹⁴I yami sarangkanambone naṛṛa'a su leta'a. See i ya'u naaringikka tingikka nabbisara si ya'u sulal᷊ummu wisaran Ibrani, ‘Saulus, Saulus! Anio i'o mangke mandal᷊eo si Ya'u! I'o sarun maapendamma sassane raddangngu, amungkangngu i'o sidutu lullawanga piaṛṛa'i Tou apan naola'a Mawunu.’

¹⁵Ne i ya'u nabbisara, ‘Isai I'o Mawu?’ Wuṛṛu Mawu sinumimbakka, ‘Ete i Ya'u Mawu Yesus apan raddal᷊eoannu udde.

¹⁶Pabbangunte wuṛṛu darisikke! I Ya'u nattingkapasilom batangang-Ku si'o pandumanne i'o Ta'u itenega maola'a mangangimbe-U. I'o ṛinone mamasingkatta su taumata waine apa apan niasiloannu allo indi su ola'u riri-U wuṛṛu apa apan sarun ipantingidda si'o su tempo apan sarun dumanta.

¹⁷I Ya'u sarun mapaal᷊iunu wuassu walahannu Israel wuṛṛu wuassu walahanna waine apan wal᷊ine Yahudi. I Ya'u sarun mandolokku inai ringanni mangitou iapawu'a mata mangitou,

¹⁸tadea'u i mangitou sumabangnga wuassu ararandumma wuṛṛu sumutta su asasemakka; tadea'u i mangitou mal᷊iu wuassu wawono'u Setanna, see mangngimante Ruata. Ne ringannu mangngimanna si ya'u, manga rosa mangitou sarun ampunganna wuṛṛu i mangitou sarun mareengnga su walahannu Ruata apan suete nipile.’ ”

¹⁹“Ana waugu udde, Tuangnga Agripa, i ya'u sidutu mattinsahadda tuttuṛṛutta sondappa apan suete ta'u nisengkamma wuassu Ruata udde.

²⁰Ringannu uahahatti ya'u namasingkatta su manga taumata manungku i mangitou ṛinone mawal᷊u wuassu manga rosa mangitou, wuṛṛu manantillu wadangngi mangitou su Ruata see lumiatta'a sulal᷊ummu wiakki mangitou manungku i mangitou nawal᷊ute wuassu manga rosa mangitou. I ya'u namasingkattu watti'a udde paarorone su Damsyik, wua'udde su Yerusalem wuṛṛu su ahewallu Yudea wuṛṛu su wallattu manga taumata apan wal᷊ine Yahudi.

²¹Ne ana waugu udde manga taumatan Yahudi nanametta si ya'u su Wal᷊e Mawu wuṛṛu maddea'a mamate si ya'u.

²²Arawe na'oman sara orassa indi ya'u mangke su lu'addu Ruata, na'oman sara lai ya'u wotongnge dirumarisikka isindi mangonggolu tiala'u su anambon taumata — timmade ara'e dario'a. Apa apan iwabatti'u indi tawe paddaṛṛalanne wuassu apa apan suete niapasingkattu manga nabi wuṛṛu i Musa;

²³eteudde manungku Ratum Punnu Sal᷊amatta apan pina'iren Ruata udde ṛinone matataṛṛangnga, wuṛṛu maola'a taumata paarorone apan mabbiakka apia wuassu papate, tadea'u ringannu udde i Tou wotongnge mamasingkattu asasemakka — eteudde asasal᷊amatta — mapia su manga taumatan Yahudi aroddi lai su manga taumata apan bal᷊ine Yahudi.”

²⁴Tantal᷊anna i Paulus massinaukka, i Festus niumui, “I'o nabewate Paulus! Apapandenu apan manambo udde naawewate si'o!”

²⁵Arawe i Paulus sinumimbakka, “I ya'u tawe wewa, Awantuhanne. Manga wisara apan iwabbisara'u udde atonna wuṛṛu sinumabangnga wuassu ṛingiṛṛanna apan masemakka.

²⁶Tuangnga Agripa sassane lai masingkattu manga hatto udde. Ana waugu udde i ya'u waṛṛani mabbisara su saruanni Tuangnga ringannu masema-semakka. I ya'u mangngimanna manungku tawe saran sangkapaddi wuassu hatto udde apan awagananni Tuangnga, ana waugu sarangkanambone udde tawe nariaddi su manga tampa apan uawuni.

²⁷Wabantuhanna Tuangnga Agripa, apa i Tuangnga mangngimanna wisara apan niapaasingkattu manga nabi? I ya'u mammendamma Tuangnga lai mangngimanna!”

²⁸See i Agripa nabbisara si Paulus, “Sunnanu mal᷊uassa mamol᷊engnga si ya'u maola'a taumatan Saṛṛani sulal᷊ummu tempo adio'a indi?”

²⁹“Sulal᷊ummu tempo adio'a ara'e sulal᷊ummu tempo mal᷊o'engnga,” sasimbakki Paulus, “i ya'u umal᷊iomanna su Ruata tadea'u i Tuangnga Agripa wuṛṛu manga mawu sarangkanambone apan uararingikka si ya'u allo indi wotongnge maola'a ere i ya'u — tabene'e tumba'u ṛaṛṛapussa indi!”

³⁰Panginsueanne tuangnga ratu, gubernure wuṛṛu Bernike, see anambon taumata waine dirumarisikka.

³¹Napawe su liuddete, i mangitou uahahatto sangkatou ringannu waine, “Taumata indi tawe inolaanne saran sambau apan botongnge maaṛṛuumanna si tou pateanna ara'e itaṛṛo su tuttupanna.”

³²See i Agripa nabbisara si Festus, “Taumata indi wotongngete ipallosa, amungkangngu i tou tate manassukku hattone parikisanna su mallaṛṛuungngu Kaisar.”